Proklamaturi tas-​Saltna Jirrapportaw

META xi esploraturi Ewropej żaru l-​Golf tal-​Venezwela u l-​Lake Maracaibo, ix-​xatt kollu kien miżgħud b’għerejjex b’soqfa tat-​tiben mibnijin fuq pilastri ġol-​baħar baxx. Id-​dehra kienet tfakk­rek f’Venezja, ġewwa l-​Italja, fejn in-​nies bnew djarhom maʼ tarf l-​ilma. B’hekk, l-​esploraturi li kienu jitkellmu bl-​Ispanjol semmew dan il-​post Venezwela, li jfisser “Venezja Żgħira.”

Illum, f’dan il-​pajjiż sabiħ qed isir proġett taʼ bini ieħor, wieħed spiritwali. Hawnhekk, ix-​Xhieda taʼ Jehovah huma medhijin f’li jiżirgħu ż-​żerriegħa tas-​Saltna f’kull okkażjoni xierqa. Il-​ħsad spiritwali li qed jirriżulta minn dan qed iġib ħafna tifħir lil “Sid il-​ħsad,” Alla Jehovah.—Mattew 9:37, 38.

Meta indokratur li jivvjaġġa żar kongregazzjoni fl-​istat taʼ Zulia fil-​Majjistral tal-​Venezwela, ix-​Xhieda t’hemmhekk għamlu arranġamenti biex hu u martu jżuru gżira żgħira fil-​viċin li jisimha Toas. Kmieni fil-​għodu, waqt li kienu qed jistennew fil-​kju biex jirkbu l-​lanċa għal din il-​gżira, Mery, il-​mara taʼ l-​indokratur li jivvjaġġa ssuġġeriet lill-​pijuniera full-time li kienet magħha biex jitkellmu maʼ xi ħaddiema fuq il-​lanċa. Din qablet magħha.

Mery marret fuq wieħed mekkanik u ppreżentatlu l-​ktieb Għarfien Li Jwassal Għall-​Ħajja Taʼ Dejjem. Hi wrietu l-​kapitlu “Nibnu Familja Li Tonora Lil Alla,” u mid-​dehra kien qed jieħu gost jismaʼ. Imbagħad, Mery spjegatlu li permezz taʼ din il-​pubblikazzjoni setaʼ jkollu studju tal-​Bibbja ġewwa daru stess. Hu aċċetta l-​ktieb, u saru arranġamenti biex xi ħadd ikun jistaʼ jmur għandu.

Ftit taż-​żmien wara, f’dawk l-​inħawi kien hemm jum t’assemblea speċjali. X’sorpriża ħadet Mery meta rat lil dak il-​mekkanik, Senor Nava, hemmhekk, flimkien maʼ martu u ż-​żewġ uliedu bniet! Mery staqsiet lil martu x’kienet taħseb fuq l-​istudju tagħhom tal-​Bibbja bħala familja. It-​tweġiba tagħha kienet verament sorprendenti.

“Jien nirringrazzja lil Jehovah li sirna nafu bil-​verità,” qalet hi. Imbagħad spjegat. “Meta int kellimt lir-​raġel tiegħi, kien għadu kemm telaqni minħabba mara oħra. Tgħidx kemm kien jixrob. Xi drabi meta kien jisker, kien jinsulenta lil kulħadd, ħaġa li l-​komunità żgħira taʼ fuq il-​gżira xejn ma kienet togħġobhom. Kien jipprattika wkoll l-​ispiritiżmu. Madankollu, l-​għarfien tal-​Bibbja li kiseb permezz taʼ l-​istudju għenu jagħmel bidliet enormi f’ħajtu. Qataʼ l-​prattiċi maħmuġin kollha li kellu. Il-​ġenituri tiegħu, li huma Kattoliċi, baqgħu impress­jonati ferm b’dawn il-​bidliet. Huma ferħanin li issa huwa raġel u missier responsabbli.”

Senor Nava tgħammed fl-​1996 u issa qed jaqdi bħala ministru full-time. Martu, Jenny, tgħammdet fl-​1997. Is-​sindku tal-​belt tant kien impressjonat bil-​bidliet li għamel dan il-​mekkanik tal-​lanċa li hu wkoll talab biex ikollu studju tal-​Bibbja. Kemm huma ferħanin dawk l-​aħwa li dakinhar ma żammewx lura milli jiddikjaraw l-​aħbar tajba waqt li kienu qed jistennew fil-​kju!

[Stampi f’paġna 7]

Il-​fatt li qasmu l-​aħbar tajba mal-​mekkanik tal-​lanċa ġab riżultati sbieħ