“Ibqgħu Żommu dak li Għandkom”

Grupp taʼ Xhieda kienu qegħdin jippridkaw fuq waħda minn madwar 30 gżira li jifformaw il-​Gżejjer Ċikladi tal-​Greċja. Waqt li tnejn minnhom kienu qegħdin jippridkaw fi triq minn dar għal dar, iltaqgħu maʼ pulizija li qalilhom imorru miegħu l-​għassa. Ftit wara li waslu l-​għassa, ċempel it-​telefon. Kien il-​qassis tar-​raħal. “Smajt li hemm ix-​Xhieda taʼ Jehovah fir-​raħal,” qal hu. “Iva, għandi tnejn hawnhekk,” wieġeb il-​pulizija. “Se niġi dritt hemmhekk.” Mit-​ton tal-​konversazzjoni, l-​aħwa saru kemxejn beżgħanin.

Madankollu, malli wasal, il-​qassis tbissem, ħadilhom b’idejhom, u qagħad bil-​qiegħda fuq siġġu ħdejn il-​pulizija. Hekk kif issoktat id-​diskussjoni, il-​pulizija ħa xejra ġellidija waqt li l-​qassis baqaʼ raġunevoli u dħuli. Hu qal lill-​pulizija biex ma jċekkinx lix-​Xhieda, u żied: “Dawn jistgħu jwieġbu kwalunkwe mistoqsija għaliex jirċievu t-​taħriġ fl-​Iskola tal-​Ministeru Teokratiku. Ikun iktar faċli li theżheż lid-​dinja mill-​pedament tagħha milli tbiddel it-​twemmin taʼ wieħed mix-​Xhieda taʼ Jehovah.”

L-għada, waqt li kienu qegħdin jippridkaw, l-​aħwa reġgħu ltaqgħu mal-​qassis u staqsewh: “Għala kont daqshekk dħuli magħna waqt id-​diskussjoni fl-​għassa tal-​pulizija?” Il-​qassis qalilhom li kien midħla taʼ ħafna Xhieda f’Siros u li kien ilu jaqra r-​rivisti Torri taʼ l-​Għassa u Stenbaħ! għal ħafna snin. Fil-​fatt, f’għadd taʼ drabi hu ħa r-​rivista Torri taʼ l-​Għassa, ħbieha ġo kartonċina mitwija, u wżaha biex jagħti l-​priedka tiegħu fil-​knisja. Irrimarka hu: “Naħseb li ma kienx ikolli skop fil-​ħajja kieku ma kellix il-​letteratura tagħkom. Dan hu li jagħtini tama.”

Iktar tard, il-​qassis qal lix-​Xhieda: “Ħaġa waħda rrid ngħidilkom. Ibqgħu żommu dak li għandkom. Tagħmlux l-​iżball li titilquh. Dak li qiegħed ngħidilkom issa huwa l-​aqwa priedka li qatt tajt, u dan mhux qed ngħidu b’fommi biss; qed ngħidu b’qalbi kollha.”