Nitgħallmu mill-​Iżbalji tal-​Passat

IL-​LIĠIJIET morali tal-​ħallieq tagħna huma eterni u ma jistgħux jinbidlu. Għal din ir-​raġuni l-​prinċipju li jinstab f’Galatin 6:7 għadu japplika llum: “Dak li bniedem jiżra[’], dak huwa jaħsad.” Veru, individwu jistaʼ jiċħad li hu għandu jagħti kont lil Alla, imma r-​regola divina tibqaʼ kostanti. Fl-​aħħar mill-​aħħar, l-​ebda bniedem ma huwa ħieles mill-​konsegwenzi taʼ l-​azzjonijiet tiegħu.

Xi ngħidu għal xi ħadd li jgħix ħajja xxellerata, imbagħad jinbidel u jsir qaddej t’Alla? Hu xorta jistaʼ jkollu jiffaċċja l-​konsegwenzi taʼ l-​istil taʼ ħajja taʼ qabel. Dan ma jfissirx, madankollu, li Alla ma ħafirlux. Ir-​relazzjoni adulteruża tas-​sultan David maʼ Batseba ġabet inkwiet kbir fil-​ħajja tiegħu. Dan ma setax jaħarbu. Imma hu kien nidem, u kien irċieva l-​maħfra t’Alla.—2 Samwel 12:13-19; 13:1-31.

Qatt ħassejtek qalbek maqtugħa meta tesperjenza l-​konsegwenzi taʼ xi żbalji li tkun għamilt? Jekk inħarsu minn punto di vista pożittiv, li nħossuna ddispjaċuti jistaʼ jservina bħala tfakkira biex ‘inqisu li ma ndurux lejn il-​ħażen.’ (Ġob 36:21) Iva, li nħossuna ddispjaċuti jistaʼ jgħinna nevitaw li nirrepetu xi dnub. Iżjed aħjar minn hekk, David uża l-​esperjenza li kiseb mid-​dnub li kien ikkommetta biex mhux biss jibbenefika hu imma biex jibbenefika ħaddieħor ukoll. Hu qal: “Lill-​midinbin ngħallem triqatek, u l-​ħatjin lejk jerġgħu lura.”—Salm 51:15 [Salm 51:13, New World Translation].

[Stampi f’paġna 7]

David ħa tagħlima mid-​dnub maʼ Batseba