Kondotta mill-​Aħjar Iġġib Tifħir

IL-​gazzetta Taljana La Gazzetta del Mezzogiorno faħħret lix-​Xhieda taʼ Jehovah talli ppubblikaw l-​artiklu “Matera​—Belt Taʼ Għamajjar Uniċi Fl-​Għerien.” Dan l-​artiklu deher fil-​ħarġa taʼ Lulju-Settembru, 1997, tar-​rivista Stenbaħ!, li kellha ċirkolazzjoni estensiva f’ħafna lingwi. Din ir-​rivista bħalissa qed tiġi tradotta f’81 lingwa u għandha ċirkolazzjoni taʼ iktar minn 19-il miljun kopja madwar id-​dinja. Il-​gazzetta kkummentat li r-​rivista Stenbaħ! stabbiliet ir-​rekord tas-​sajf “f’dawk li huma kampanji taʼ riklamar biex jippromwovu l-​wirt storiku u artistiku tal-​belt [taʼ Matera].”

Il-gazzetta faħħret lix-​Xhieda f’konnessjoni mal-​Konvenzjoni Distrettwali “Fidi fil-​Kelma t’Alla” li saret f’Matera fl-​1997. L-​artiklu nnota li x-​Xhieda rnexxielhom “iġibu 4,000 persuna fl-​Istadju XXI Settembre [tal-belt] f’nofs is-​sajf u taħt xemx tisreġ; ħadu ħsieb it-​tindif, it-​tibjid, u l-​irranġar bażiku taʼ dan iċ-​ċentru sportiv (partikolarment il-​faċilitajiet tat-​tojlit) kompletament bla ħlas, billi ħallsu minn buthom l-​ispejjeż għax-​xiri tal-​materjal neċessarju.”

Ix-Xhieda taʼ Jehovah jistinkaw biex ikunu ġirien tajbin. (Mattew 22:37-39) Huma jsegwu wkoll it-​twissija Skritturali: “Ġibu rwieħkom sewwa qalb il-​pagani biex, . . . jaraw sewwa l-​għemil tajjeb tagħkom u jsebbħu ’l Alla meta jasal jum iż-​żjara tiegħu.”—1 Pietru 2:12.