‘Qawwi u Konvinċenti’

“MINN għada se nibda nużah fix-​xogħol taʼ l-​ippridkar, għax l-​argumenti li fih huma verament qawwijin u konvinċenti,” kiteb wieħed mix-​Xhieda taʼ Jehovah minn Franza. Xhud mill-​Istati Uniti kiteb: “Qrajtu immedjatament u għandi sebaʼ mitt sena biex nużah fil-​ministeru taʼ l-​għalqa, peress li niltaqgħu maʼ ħafna nies li huma apatetiċi u li m’għandhom ebda fiduċja fil-​Bibbja.” Dawn x’kienu qed jiddeskrivu? Il-​browxer taʼ 32 paġna intitolat Ktieb Għan-​Nies Kollha, li nħareġ mill-​Watch Tower Society fil-​Konvenzjonijiet Distrettwali “Fidi fil-​Kelma t’Alla” matul l-​1997/98.

Din il-​pubblikazzjoni ġiet ippreparata apposta għal udjenza partikulari​—dawk li forsi jkunu taʼ edukazzjoni għolja imma li ftit li xejn jafu dwar il-​Bibbja. Ħafna minn dawn l-​individwi għandhom opinjonijiet fissi dwar il-​Bibbja, għalkemm qatt ma qrawha personalment. L-​iskop tal-​browxer hu li jikkonvinċi lill-​qarrej li, minn taʼ l-​inqas, il-​Bibbja jistħoqqilha li tiġi eżaminata. Il-​browxer ma jimponix fuq il-​qarrej biex jaċċetta l-​opinjoni li l-​Bibbja hija mnebbħa minn Alla. Minflok, dan iħalli l-​fatti jitkellmu għalihom infushom. Il-​kliem m’huwiex imponenti imma huwa ċar u dirett.

Bħalma jindikaw dawn il-​kummenti kkwotati hawn fuq, dawk preżenti fil-​konvenzjonijiet kienu ħerqanin biex jużaw dan il-​browxer fil-​ministeru tagħhom taʼ l-​għalqa. Per eżempju, fi Franza ġiet organizzata kampanja speċjali taʼ għoti taʼ xiehda għat-​23 u l-​24 t’Awissu, meta mijiet t’eluf taʼ viżitaturi żgħażagħ minn madwar id-​dinja nġabru f’Pariġi għall-​Jum Dinji taż-​Żgħażagħ. Madwar 2,500 Xhud (il-biċċa l-​kbira minnhom bejn is-​16 u t-​30 sena) ħallew 18,000 kopja tal-​browxer bil-​Franċiż, bil-​Ġermaniż, bl-​Ingliż, bl-​Ispanjol, bil-​Pollakk, u bit-​Taljan.

Ejjew nużaw kull mezz biex inqassmu dan il-​browxer, Ktieb Għan-​Nies Kollha fil-​ministeru tagħna. Jalla din il-​pubblikazzjoni turi kemm hija imprezzabbli f’li tikkonvinċi lin-​nies raġonevoli li għandhom jeżaminaw il-​Bibbja huma stess.