“Huwa l-​Aħjar Testment il-​Ġdid Interlineari Disponibbli”

DAN hu kif Dr. Jason BeDuhn jiddeskrivi The Kingdom Interlinear Translation of the Greek Scriptures. Hu jispjega:

“Jien għadni kif spiċċajt ngħallem f’kors għad-​Dipartiment taʼ l-​Istudji Reliġjużi taʼ l-​Università taʼ Indjana, ġewwa Bloomington, [l-Istati Uniti] . . . Dan hu primarjament kors fl-​Evanġelji. L-​għajnuna tagħkom ġiet fil-​forma taʼ kopji taʼ The Kingdom Interlinear Translation of the Greek Scriptures li l-​istudenti tiegħi wżaw bħala wieħed mill-​kotba taʼ istruzzjoni għall-​klassi. Dawn il-​volumi żgħar kienu imprezzabbli għall-​kors u popolari ħafna maʼ l-​istudenti tiegħi.”

Dr. BeDuhn għala juża t-​traduzzjoni tal-​Kingdom Interlinear fil-​korsijiet tiegħu tal-​kulleġġ? Hu jwieġeb: “Sempliċement għaliex huwa l-​aħjar Testment il-​Ġdid interlineari disponibbli. Jien skular imħarreġ tal-​Bibbja, familjari mat-​test u maʼ l-​għodod użati fi studji bibliċi moderni, u, barra minn hekk, m’iniex membru tax-​Xhieda taʼ Jehovah. Iżda jien nagħraf pubblikazzjoni taʼ kwalità meta nara waħda, u n-​‘New World Bible Translation Committee’ tagħkom għamel xogħlu sewwa. It-​traduzzjoni interlineari tagħkom bl-​Ingliż hija eżatta u konsistenti sal-​punt li tobbliga lill-​qarrej biex jagħti konsiderazzjoni serja lill-​firdiet lingwistiċi, kulturali, u konċettwali taʼ bejn id-​dinja taʼ dawk li jitkellmu bil-​Grieg u dik tagħna. In-​‘New World Translation’ tagħkom hija taʼ kwalità għolja, traduzzjoni litterali li tevita qerq tradizzjonali fil-​fedeltà tagħha lejn il-​Grieg. Din hija, f’ħafna modi, superjuri għall-​iktar traduzzjonijiet li rnexxew użati llum.”

The Kingdom Interlinear Translation of the Greek Scriptures hija ppubblikata mix-​Xhieda taʼ Jehovah biex tgħin lil dawk li jħobbu l-​Kelma t’Alla biex isiru midħla tat-​test Grieg tal-​Bibbja. Din fiha The New Testament in the Original Greek fuq in-​naħa tax-​xellug (ikkompilat minn B. F. Westcott u F. J. A. Hort). Traduzzjoni litterali kelma b’kelma bl-​Ingliż tinstab taħt il-​linji tat-​test Grieg. Fil-​kolonna dejqa tan-​naħa tal-​lemin hemm in-​New World Translation of the Holy Scriptures, li tippermettilek tqabbel it-​traduzzjoni interlineari maʼ traduzzjoni moderna tal-​Bibbja bl-​Ingliż.