Il-Gwida Umana Falliet?

MIN ħalaq kollox? Jekk it-​tweġiba tiegħek hija “Alla,” allura inti fi qbil maʼ miljuni li jemmnu f’dak Alla tal-​Bibbja, il-​Ħallieq.

Madankollu, ħafna li jemmnu f’Alla jsibu diffikultà biex jaċċettaw li hu involut attivament f’li jsolvi l-​problemi tal-​bniedem. Huwa realistiku li taħseb li Alla għandu programm għaddej li se jġib serħan għall-​umanità? Ħafna m’għandhomx evidenza raġonevoli li dan huwa minnu.

Għal eluf taʼ snin, il-​bnedmin esperimentaw b’numru bla għadd taʼ metodi biex jgħinu lilhom infushom fit-​tfittxija għal soluzzjonijiet, billi jħallu ’l Alla fil-​ġenb. Imma l-​bnedmin sabuhom is-​soluzzjonijiet? Jew il-​problemi qegħdin isiru iktar serji u diffiċli biex jirrisolvu ruħhom? Il-​bniedem kif qiegħed jimmaniġġja l-​problemi urġenti fid-​dinja taʼ llum?

Wieħed espert ipoġġiha b’dan il-​mod: “Sa mir-​Rivoluzzjoni Industrijali, il-​pajjiżi żviluppati esplojtaw fuq li esplojtaw ir-​riżorsi naturali tad-​dinja permezz taʼ mudelli bla sugu taʼ produzzjoni u konsum, bi ħsara għall-​ambjent globali, għad-​detriment taʼ pajjiżi li qegħdin jiżżviluppaw.”

Il-bniedem ikompli jirrovina l-​art. Il-​gazzetta Arġentinjana Clarin ikkummentat: “Fit-​tieni nofs taʼ dan is-​seklu, xenqa ekonomika, nuqqas taʼ attenzjoni, u negliġenza kienu responsabbli għal diżastri kbar li mhux biss ħasdu vittmi umani imma wkoll iddegradaw lill-​ambjent, spiss sa limiti bla qies.”

Faqar estrem issa jidher li huwa fattur permanenti fis-​soċjetà moderna. Saħansitra l-​hekk imsejħin pajjiżi għonja tad-​dinja qegħdin iċedu taħt il-​piż enormi tal-​faqar. Skond The Globe and Mail taʼ Toronto, il-Kanada, huwa stmat illi “terz mill-​Kanadiżi kollha se jesperjenzaw il-faqar matul il-​korsa taʼ ħajjithom dment li jifilħu jaħdmu.” Il-​gazzetta żżid li “l-​kollass tal-​familji huwa waħda mir-​raġunijiet prinċipali għall-​faqar, u din l-​inklinazzjoni aċċellerat fi snin riċenti.”

L-abbuż mid-​droga huwa sinjal ieħor taʼ soċjetà li qiegħda titmermer. Il-​bniedem x’jistaʼ jagħmel dwaru? Evidentement ftit li xejn kollox maʼ kollox. Miljuni jkomplu jesperjenzaw degradazzjoni fiżika, mentali, u morali bħala riżultat dirett taʼ l-​abbuż tagħhom min-​narkotiċi. U l-​problema qiegħda tinfirex b’ħeffa inkontrollabbli.

Ix-xjenzati jidhru li qed jitilfu l-​gwerra kontra l-​mard. Veru, it-​teknoloġija moderna rebħet ħafna battalji. Madankollu, xi proċeduri xjentifiċi fihom infushom ikkontribwew għall-​feġġ taʼ tipi taʼ mikrobi perikolużi ġodda li jirreżistu d-​drogi.

Il-gvernijiet umani ma jistgħux iwaqqfu l-​vjolazzjonijiet tant mifruxin tad-​drittijiet umani. Per eżempju, minkejja l-​ħafna garanziji u liġijiet ifformulati biex ma jkunx hawn skjavitù, huwa stmat li madwar id-​dinja iktar minn mitt miljun ruħ huma sfurzati biex jaħdmu taħt kundizzjonijiet li jammontaw għal xejn inqas minn skjavitù umiljanti.

Imma għala falliet il-​gwida umana? Ikkunsidra dawn il-​fatturi. Gwida umana tiġi minn nies​—nies li għandhom limitazzjonijiet serji. L-​esperjenza tagħhom fil-​ħajja hi relattivament qasira u ġeneralment limitata minn ċerti kulturi jew ambjenti. L-​għarfien tagħhom ukoll huwa limitat. Hi x’inhi l-​gwida li jagħtu tirrifletti dawk il-​limitazzjonijiet. Bħalma qal l-​appostlu Pawlu, “kollha dinbu u ma jilħqux il-​glorja t’Alla.”—Rumani 3:23.

Fir-realtà l-​biċċa l-​kbira mill-​problemi u d-​diffikultajiet li l-​parti l-​kbira taʼ l-​umanità qiegħda tesperjenza huma r-​riżultat dirett jew indirett taʼ li qiegħda tinjora l-​gwida t’Alla. Fejn, iżda, tistaʼ gwida bħal din tinstab? Alla kif jipprovdilna direzzjoni llum? L-​artiklu li jmiss sejjer jikkunsidra t-​tweġibiet. (w94 4/15)