Ir-Rabta taż-Żwieġ li Qiegħda Tiddgħajjef

OMM żagħżugħa ħaddnet lit-​tarbija tagħha taʼ xahrejn. Imbagħad, b’ferneżija tal-​mument, waqqgħetu fl-​art. It-​tifel miet ftit sigħat wara. “Jien waqqajtu apposta,” qalet l-​omm, “għaliex żewġi ma jimpurtahx mill-​familja tiegħu.” Minflok ma ddiskutiet il-​kwistjoni maʼ żewġha, hi żvogat ir-​rabja tagħha fuq it-​tarbija innoċenti.

Ftit huma l-​ommijiet li jaslu għal miżura estrema bħal din, imma ħafna jaqblu mas-​sentimenti tagħha. Qiegħed isir iktar u iktar diffiċli għal koppji miżżewġin biex ikollhom suċċess fiż-​żwieġ tagħhom. “Meta l-​probabbiltà taʼ suċċess fiż-​żwieġ hija baxxa bħalma hi fl-​Istati Uniti llum,” igħid il-​Journal of Marriage and the Family, “li tikkommetti ruħek bis-​sħiħ u bla riżerva għal żwieġ . . . huwa tant perikoluż li l-​ebda bniedem totalment f’sensih ma se jagħmel dan.”

F’dawn iż-​żminijiet taʼ taqlib, l-​immoralità, l-​inkompatibilità, id-​djun, l-​inkwiet mal-​kunjati, u l-​egoiżmu kollha kemm huma jistimulaw il-​ġlied fid-​dar, li minn żmien għal żmien iwassal għal divorzju. Tant hi serja s-​sitwazzjoni fil-​Ġappun li saħansitra l-​Knisja Kattolika, li hija magħrufa għall-​waqfa soda tagħha kontra d-​divorzju, kellha twaqqaf kumitat speċjali biex tiffaċilita d-​diskriminazzjoni fost il-​Kattoliċi kontra dawk li ddivorzjaw u żżewġu mill-​ġdid. Numru li qiegħed dejjem jikber taʼ nies li jmorru l-​knisja qegħdin jiġu effettwati minn problemi li għandhom x’jaqsmu mad-​divorzju.

Madankollu, in-​numru taʼ divorzji jirrivelaw biss parti żgħira minn problema ferm akbar. Riċerka fl-​Istati Uniti turi li hija l-​kwalità li qiegħda tiddeterjora tal-​ħajja miżżewġa stess li hi l-​kaġun taż-​żjieda fid-​divorzju, iktar milli s-​sempliċi xejriet soċjali li jagħmlu d-​divorzju iktar faċli. B’inqas sforz u b’inqas impenn, il-​ħajja miżżewġa titlef il-​ġmiel tagħha. Ħafna għal għajn in-​nies jidhru li huma koppja miżżewġa, imma ma jorqdux flimkien, u bil-​kemm ikellmu lil xulxin. Xi wħud iħossuhom kif ħassitha l-​mara mill-​Orjent li xtrat il-​qabar separat tagħha stess, billi qalet, ‘Ma rridx li nkun fil-​qabar maʼ żewġi.’ Billi ma tistax tiddivorzja lil żewġha issa, hija l-​mira tagħha li jkollha divorzju wara l-​mewt. Hija ħasra li għalkemm nies bħal dawn m’humiex iddivorzjati, il-​ħajja miżżewġa mhix sors taʼ hena għalihom.

Dak kien il-​każ taʼ Isao. Hu kien iżżewweġ lill-​mara tiegħu b’kapriċċ, u għalhekk ma ħass ebda tqanqil biex jibdel il-​mod taʼ ħajja egoistika tiegħu. Għalkemm kien jaqlagħha tajjeb bħala xufier tat-​trakkijiet, kien jaħli l-​paga tiegħu kollha fl-​ikel u x-​xorb, u ma kienx jieħu ħsieb il-​familja tiegħu. Bħala riżultat, it-tilwim mal-​mara tiegħu qatt ma kien jaqtaʼ. “Kull meta l-​affarijiet jispiċċaw ħażin għalija,” jiftakar Isao, “kont immur id-​dar u niżżvoga r-​rabja tiegħi fuq il-​familja tiegħi.” Bħal xi vulkan li ma riedx joqgħod kwiet, is-​suġġett tad-​divorzju kien jiżżbroffa kuljum.

Ħafna rġiel u nisa qegħdin jissaportu żwieġ ħażin. Kemm jekk jiddivorzjaw u kemm jekk ma jiddivorzjawx, m’humiex qegħdin isibu l-​hena. Hemm xi triq għalihom biex ikollhom suċċess fiż-​żwieġ tagħhom? X’jistaʼ jsir biex isaħħu r-​rabta taż-​żwieġ tagħhom?