Għala Tittestja Kemm Hi Eżatta l-Bibbja?
Int kif tħares lejn il-Bibbja? Xi wħud jemmnu b’mod sod li hija r-rivelazzjoni t’Alla lill-bniedem. Oħrajn jemmnu li hija sempliċement ktieb ordinarju. Jerġaʼ oħrajn huma indeċiżi. Jekk għandek xi dubju dwar l-oriġini tal-Bibbja, hemm raġunijiet interessanti għala għandek teżaminaha u taqtaʼ l-kwistjoni.
SAS-SEKLU 18, il-Bibbja kienet irrispettata minn ħafna bħala l-Kelma t’Alla f’artijiet tal-Kristjaneżmu. Imma mis-seklu 19 ’il quddiem, numru taʼ għalliema, xjenzati, u saħansitra teoloġi u mexxejja tal-knejjes bdew jesprimu pubblikament dubju dwar l-eżattezza tal-Bibbja.
Bħala riżultat, il-kritika tal-Bibbja saret tant mifruxa li ħafna jgħaddu l-ġudizzju mingħajr lanqas biss ma jafu x’fiha l-Bibbja. Minflok il-Bibbja, ħafna nies fil-Kristjaneżmu jħarsu lejn il-filosofiji tal-bnedmin. Xorta waħda, il-filosofija moderna ma produċietx dinja ferħana jew bla perikli. Din hi raġuni tajba waħda biex teżamina l-Bibbja u tara jekk il-gwida tagħha twassalx għall-hena u s-suċċess.
Raġuni oħra biex tittestja jekk il-Bibbja hix eżatta hija l-prospett tal-għaġeb li toffri hi għall-umanità. Per eżempju, Salm 37:29 jistqarr: “It-twajbin infushom se jkollhom pussess tal-art, u se jgħammru għal dejjem fuqha.” (Rivelazzjoni 21:3-5) X’effett għandhom wegħdi bħal dawn fuqek? Żgur li hemm raġuni biżżejjed biex teżamina l-Bibbja u tara jekk tistax tiġi fdata.
Din ir-rivista dejjem sostniet il-verità tal-Bibbja u taʼ spiss tat prova tal-eżattezza tagħha. Hemm numru taʼ każi fejn l-eżattezza tal-Bibbja tistaʼ tiġi ttestjata. Ħarġiet differenti tat-Torri tal-Għassa se jgħinuk twieġeb dawn il-mistoqsijiet: Il-fatti magħrufin tal-istorja antika jaqblu mal-Bibbja? It-tbassiriet tagħha huma eżatti? Il-parir tagħha huwa prattiku, jew għalliema u filosfi moderni taw prova li l-Bibbja hija antikwata?
Il-ġeografija hija qasam ieħor li fih inti tistaʼ tittestja l-eżattezza tal-Bibbja. Ħrejjef pagani taʼ spiss huma f’konflitt mal-fatti ġeografiċi. Per eżempju, ħafna popli tal-qedem irrakkontaw stejjer taʼ vjaġġi lejn dik li hi msejħa d-dinja tal-mejtin. Dwar il-Griegi tal-qedem, il-ktieb A Guide to the Gods jispjega: “L-art kienu jarawha bħala wiċċ ċatt iċċirkondat bi kwantità enormi taʼ ilma msejjaħ Oċean. Wara dan kien hemm id-Dinja l-oħra, biċċa art mħarbta mifruxa bi pjanti mudlama u bla frott.” Meta dan ġie pprovat li kien ħrafa, il-filosfi pagani kellhom iċaqalqu l-hekk imsejħa dinja l-oħra tagħhom. “Post addattat instab, taħt l-art, ikkonnettjat maʼ din id-dinja b’diversi għerien fondi,” jispjega l-awtur Richard Carlyon. Illum, aħna nafu li dan ukoll huwa ħrafa. Ma teżisti l-ebda dinja taħt l-art jew passaġġ bħal din.
Differenti mill-ħrejjef tal-popli antiki, il-Bibbja ma fihiex il-ħarsa żballjata li l-art hija ċatta. Minflok, hi tistqarr il-verità xjentifika li l-art hija oġġett tond li m’hu qiegħed jistrieħ fuq xejn. (Ġob 26:7; Isaija 40:22) Xi ngħidu dwar deskrizzjonijiet ġeografiċi oħrajn imsemmijin fil-Bibbja? Huma dawn xi mitoloġija, jew hu possibbli li ġġib quddiem għajnejk b’eżattezza ġrajjiet Bibliċi meta tkun qiegħed iżżur l-Eġittu tal-lum, inkluża l-Penisula tas-Sinaj, u Iżrael tal-lum?
[Stampa f’paġna 3]
“Hemm Wieħed li qiegħed igħammar ’il fuq miċ-ċirku tal-art.”—Isaija 40:22
“Hu qiegħed . . . idendel l-art fuq xejn.”—Ġob 26:7