Għandna Bżonn lil xi Ħadd li Jismagħna

BĦALA bnedmin, aħna nipprovaw insibu l-​ferħ u s-​sodisfazzjon fil-​ħajja. Imma meta jqumu xi problemi persunali, kemm ikun taˈ għajnuna u taʼ faraġ li jkollna lil xi ħadd li nistgħu nitkellmu miegħu dwar l-​inkwiet tagħna!

Igħid Dr. George S. Stevenson: “Li titkellem dwar il-​problema jgħinek biex ittaffi t-​tensjoni, igħinek biex tara l-​inkwiet tiegħek f’dawl iktar ċar, u spiss ighinek tara x’tistaʼ tagħmel dwaru.“ Dr. Rose Hilferding osservat: “Ilkoll irridu naqsmu l-​inkwiet tagħna maʼ xi ħadd. Irridu naqsmu t-​tħassib. Irridu nħossu li hemm xi hadd fid-​dinja li hu lest li jismaʼ u li kapaci jifhimna.

“M’għandniex xi ngħidu, ebda bniedem ma jistaʼ jissodisfa għalkollox din il-​ħtieġa. Minħabba limiti fuq il-​ħin u fatturi ohra, dawk il-​bnedmin li nistgħu niftħu qalbna magħhom forsi ma jkunux disponibbli meta l-​iktar li jkollna bżonnhom, jew forsi nżommu lura milli niddiskutu xi kwistjoni saħansitra mal-​akbar ħbieb taghna.

Il-veri Kristjani, madankollu, qatt ma huma ghalkollox mingħajr xi ħadd li jismagħhom, għax dejjem għandhom il-​mezz tat-​talb. Il-​Bibbja tinkuraġġina ripetutament biex nitolbu lil Alla, il-​Ħallieq tagħna, li jismu Jehovah. Jintqalilna biex nitolbu bis-​sinċerità, f’isem Ġesù, u fi qbil mar-​rieda t’Alla. Anki kwistjonijiet persunali u privati huma suġġetti xierqa ghat-talb. “F’kollox . . . ħalli jkunu l-​petizzjonijiet tagħkom imgħarrfin lil Alla,” jmtqalilna f’​Filippin 4:6. X’ghotja tal-​għaġeb! Il-​Ħakkiem Sovran tal-​univers taghna huwa dejjem lest li jilqaʼ u jirċievi t-​talbiet tal-​qaddejja umlin tiegħu kulmeta jixtiequ li jersqu lejh.−Salm 83:18; Mattew 6:9-15; Ġwann 14:13, 14; 1 Ġwann 5:14.

Madankollu, tassew li Alla jismaʼ? Xi wħud forsi jaħsbu jekk l-​effett tat-​talb hux limitat skond l-​abbiltà tal-​bniedem: Wieħed jitlob, billi jirranġa l-​ħsibijiet tiegħu u jghidhom fi kliemu. Billi b’hekk ikun iddefinixxa l-​problema tiegħu, hu jfittex soluzzjoni xierqa u jkun għajnejh miftuħin beraħ ghal kull ħaġa li tistaʼ tgħinu biex isibha. Meta l-​problema tiegħu tiġi solvuta, hu jistaʼ jagħti l-​kredtu lil Alla, imma kienu attwalment il-​moħħ u l-​isforzi tiegħu stess li pproduċew ir-​riżultati mixtiqin.

Ħafna llum jaħsbu li dak hu kulma hemm dwar it-​talb. Hekk taħseb int? Hija l-​qawwa tat-​talb limitata hekk? Veru, l-​isforzi mentali u fiziċi taˈ dak li jkun fi qbil mat-​talb tiegħu għandhom irwol sinjifikanti f’li wieħed jikseb it-​tweġiba. Xi ngħidu, madankollu, dwar l-​irwol t’Alla stess fil-​kwistjoni? Jismaʼ Alla meta int titolbu? Iqishom hu t-​talbiet tiegħek bħala li huma importanti, billi jqis x’fihom u jwieġeb għalihom?

It-tweġibiet għal dawn il-​mistoqsijiet huma sinjifikanti. Jekk Alla ma jagħtix l-​attenzjoni tiegħu lit-​talbiet tagħna, allura t-​talb ma fihx ħlief valur psikologiku. Mill-​banda l-​oħra, jekk Alla tabilħaqq jirċievi u jismaʼ b’interess lil kull waħda mit-​talbiet tagħna, kemm għandna nkunu grati għal provvediment bħal dan! Dan għandu jqanqalna biex nużaw dak il-​provvediment kuljum.

Nistednuk, allura, li tkompli taqra, hekk kif dawn il-​kwistjonijiet se jiġu diskussi fl-​artiklu li jmiss.