Il-Ħbieb t’Alla Se Jgħixu f’Ġenna ta’ l-Art

Il-​Ġenna ta’ l-​art mhux se tkun bħad-​dinja li qed ngħixu fiha issa. Alla qatt ma ried li l-​art tkun mimlija bl-​inkwiet u n-​niket, bl-​uġigħ u s-​sofferenza. Fil-​futur, Alla se jagħmel l-​art ġenna. Kif se tkun din il-​Ġenna ta’ l-​art? Ejja naraw x’tgħid il-​Bibbja:

Nies tajbin. Il-​Ġenna ta’ l-​art se tkun id-​dar tal-​ħbieb t’Alla. Huma se jagħmlu l-​ġid lil xulxin. Se jgħixu skond il-​mogħdijiet twajbin t’Alla.—Proverbji 2:21.

Abbundanza ta’ ikel. Fil-​Ġenna ta’ l-​art, mhux se jkun hemm ġuħ. Il-​Bibbja tgħid: “Ikun kotran il-​qamħ [jew, l-​ikel] fuq l-​art.”—Salm 72:16.

Djar mill-​aħjar u xogħol pjaċevoli. Fuq l-​art magħmula Ġenna, kull familja se jkollha d-​dar tagħha stess. Kulħadd se jagħmel xogħol li jġib ferħ veru.—Isaija 65:21-23.

Paċi mad-​dinja kollha. In-​nies mhux se jibqgħu iktar jiġġieldu u jmutu fil-​gwerer. Il-​Kelma t’Alla tgħid: “[Alla] iwaqqaf il-​gwerer sa truf l-​art.”—Salm 46:9, 10 [46:8, 9, NW].

Saħħa tajba. Il-​Bibbja twiegħed: “Ħadd minn min jgħammar hemm [fil-​Ġenna ta’ l-​art] ma jgħid: ‘Jien marid.’” (Isaija 33:24) Ukoll, ħadd ma se jkun zopp, agħma, trux, jew mutu.—Isaija 35:5, 6.

Tmiem għall-​uġigħ, niket, u mewt. Il-​Kelma t’Alla tgħid: “Ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ ta’ qabel.”—Apokalissi 21:4.

In-​nies il-​ħżiena se jinqerdu. Jehovah jwiegħed: “[I]l-​ħżiena mill-​art jitqaċċtu, u l-​qarrieqa jinqalgħu minnha.”—Proverbji 2:22.

In-​nies se jkunu jħobbu u jirrispettaw lil xulxin. Mhux se jkun hemm iktar inġustizzja, moħqrija, regħba, u mibegħda. In-​nies se jkunu magħqudin u se jgħixu fi qbil mal-​mogħdijiet twajbin t’Alla.—Isaija 26:9.