Iż-​Żgħażagħ Jistaqsu

◼ Karen m’ilhiex iktar minn għaxar minuti l-​party meta tara żewġ subien ġejjin qed iġorru boroż kbar tal-​karti. X’hemm f’dawn il-​boroż m’huwiex misteru. Iktar kmieni kienet semgħet lil dawn is-​subien jgħidu li se jkun hemm ħafna xorb alkoħoliku f’dan il-​party. M’għandniex xi ngħidu, Karen ma semmiet xejn dwar dan lill-​ġenituri tagħha. Hi ħasbet bejnha u bejn ruħha li s-​subien kienu biss qed jiċċajtaw. Wara kollox, suppost kellu jkun hemm xi adulti f’din id-​dar—xi mkien.

F’daqqa waħda, minn warajha, Karen tismaʼ leħen familjari. “X’int tagħmel bil-​wieqfa hemm? Tħassarx festi ta!” Karen iddur u tara lil ħabibitha Jessica, b’żewġ fliexken birra f’idejha li kienu għadhom kif infetħu. Jessica żżomm flixkun quddiem wiċċ Karen u tgħidilha, “Issa tgħidlix li għadek żgħira wisq biex tieħu ftit pjaċir!”

Karen trid tirrifjuta. Imma l-​pressjoni biex taċċetta hija iktar qawwija milli stenniet. Karen ma jimpurtahiex mill-​alkoħol. Huwa sempliċement minħabba li Jessica hija l-​ħabiba tagħha, u Karen ma tridx tidher bħala waħda li tħassar il-​festi, kif qaltilha Jessica. Barra minn hekk, Jessica hi tifla sew. U jekk hi qiegħda tixrob, allura x’hemm ħażin jekk Karen tixrob ukoll? ‘Mhux daqsxejn taʼ birra!’ tgħid Karen lilha nfisha. ‘Mhux bħal meta tieħu d-​drogi jew tagħmel is-​sess.’

META tkun għadek żgħir, it-​tentazzjoni tiġi b’diversi modi. Spiss, dan jinvolvi s-​sess oppost. “It-​tfajliet fl-​iskola huma persistenti,” jgħid Ramona taʼ 17-il sena. “Jieħdu pjaċir imissuk u jaraw sa fejn se tħallihom jaslu. Huma ma jkunux iridu jieqfu!” Deanna, li wkoll għandha 17-il sena, kellha esperjenza simili. “Ġuvni wieħed ġie fuqi u poġġa idejh madwari,” tgħid hi. “Tajtu daqqa sew f’idu u għedtlu, ‘X’int tagħmel? Lanqas biss nafek!’”

Int ukoll tistaʼ tiffaċċja tentazzjonijiet, u jistaʼ jidher li l-​pressjonijiet qatt m’huma se jieqfu. Bħalma qal wieħed Kristjan, “it-​tentazzjoni hija bħal meta xi ħadd kontinwament iħabbat fuq il-​bieb tiegħek avolja tipprova tinjorah.” Tismaʼ int dik it-​taħbita iktar spiss milli tixtieq? Per eżempju, tħajrek xi waħda minn dawn li ġejjin?

□ Tpejjep

□ Tieħu xorb alkoħoliku

□ Tieħu d-​drogi

□ Tara l-​pornografija

□ Tieħu sehem f’sess immorali

□ Affarijiet Oħrajn ․․․․․

Jekk immarkajt xi waħda minn dawn t’hawn fuq, tikkonkludix li ma tistax tkun Kristjan. Int tistaʼ tikkontrolla x-​xewqat ħżiena u tirreżisti t-​tentazzjoni. Kif? Ikun t’għajnuna li tirrikonoxxi xi jwassal għat-​tentazzjoni. Ikkunsidra tliet fatturi.

1. L-​imperfezzjoni. L-​inklinazzjoni biex nagħmlu dak li hu ħażin hija komuni fost il-​bnedmin imperfetti kollha. Saħansitra l-​appostlu Pawlu—Kristjan matur—ammetta b’onestà: “Meta nixtieq nagħmel dak li hu sewwa, dak li hu ħażin ikolli fija.” (Rumani 7:21) B’mod ċar, saħansitra l-​iktar persuna retta, xi drabi, tagħti attenzjoni lix-​“xewqa tal-​laħam u x-​xewqa taʼ l-​għajnejn.” (1 Ġwanni 2:16) Imma l-​ħsibijiet kontinwi dwar it-​tentazzjonijiet sempliċement jiggravaw is-​sitwazzjoni, għax il-​Bibbja tgħid: “Meta x-​xewqa ssir fertili, tiled id-​dnub.”—Ġakbu 1:15.

2. Influwenzi barra l-​familja. It-​tentazzjoni ssibha kullimkien. “In-​nies il-​ħin kollu jitkellmu dwar is-​sess, kemm fl-​iskola u kemm fuq ix-​xogħol,” tgħid Trudy. “Fuq it-​televixin u fil-​films, dejjem jagħmluh jidher sabiħ u eċċitanti. Rari tara l-​konsegwenzi koroh tiegħu!” Mill-​esperjenza, Trudy taf kemm jistgħu jkunu b’saħħithom influwenzi bħal dawn. “Taʼ 16-il sena ħsibt li sirt inħobb lil xi ħadd,” tirrakkonta hi. “Ommi poġġiet bil-​qiegħda miegħi u qaltli li jekk kont se nibqaʼ sejra hekk se nispiċċa noħroġ tqila. Tkexkixt meta ommi qaltli hekk! Xahrejn wara ħriġt tqila.”

3. “Xewqat li jistaʼ jkollok fiż-​żgħożija.” (2 Timotju 2:22) Din il-​frażi tistaʼ tinkludi kwalunkwe xewqa li ż-​żgħażagħ spiss ikollhom, bħax-​xenqa qawwija li jiġu aċċettati jew ix-​xewqa li oħrajn iqisuhom bħala adulti. Dawn ix-​xewqat m’humiex ħżiena fihom infushom, imma jekk ma jiġux kontrollati, jistgħu jagħmlu t-​tentazzjoni iktar diffiċli biex tirreżistiha. Per eżempju, ix-​xewqa kbira biex tiġi meqjus bħala adult tistaʼ maż-​żmien iġġiegħlek tiċħad il-​valuri tajbin li ġejt mgħallem id-​dar. Hekk ġralu Steve meta kellu 17-il sena. Hu jgħid, “Jien irribellajt kontra l-​ġenituri tiegħi u għamilt dak kollu li huma stess għallmuni biex ma nagħmilx—għamilt dan kollu ftit wara li tgħammidt.”

M’għandniex xi ngħidu, l-​influwenzi li ssemmew qabel huma qawwijin. Minkejja dan, int tistaʼ tirreżisti t-​tentazzjoni. Kif?

◼ L-​ewwel, identifika l-​iktar tentazzjoni li hija diffiċli għalik biex tirreżistiha. (Jistaʼ jkun li diġà għamilt dan hawn fuq.)

◼ Imbagħad, staqsi lilek innifsek, ‘Meta hu l-​iktar probabbli li jkolli din it-​tentazzjoni?’ Immarka waħda minn dawn li ġejjin:

□ Waqt l-​iskola

□ Waqt ix-​xogħol

□ Meta nkun waħdi

□ Drabi oħrajn ․․․․․

Il-​fatt li tkun taf meta huwa l-​iktar probabbli li tiġi tentazzjoni jistaʼ saħansitra jgħinek tevitaha għalkollox. Per eżempju, ikkunsidra s-​sitwazzjoni immaġinarja li ġiet msemmija fil-​bidu taʼ dan l-​artiklu. Xi twissija kellha Karen li kien se jkun hemm il-​periklu fil-​party li attendiet? Kif setgħet hi tevita għalkollox it-​tentazzjoni?

◼ Issa li (1) identifikajt it-​tentazzjoni u (2) iddeterminajt meta x’aktarx se tiġri, tinsab lest biex tieħu azzjoni. L-​ewwel prijorità hi li tara kif se tnaqqas jew telimina kwalunkwe ħaġa li ġġibek fit-​tentazzjoni. Ikteb hawn taħt x’tistaʼ tagħmel.

․․․․․

․․․․․

(Eżempji: Jekk wara l-​iskola tiltaqaʼ regolarment maʼ sħabek taʼ l-​iskola li jħeġġuk biex tpejjep magħhom, forsi tistaʼ tbiddel it-​triq biex tevitahom. Jekk spiss tirċievi pornografija fuq l-​Internet avolja ma tridhiex, forsi tistaʼ tikkunsidra li tinstalla programmi li jimblokkaw is-​sors tagħha u s-​siti kollha li huma simili. Ukoll, tistaʼ tkun iktar speċifiku meta tittajpja l-​kliem li trid tuża biex tfittex fil-​“Web site.”)

M’għandniex xi ngħidu, ma tistax tevita t-​tentazzjonijiet kollha. Illum jew għada, int x’aktarx li se tiffaċċja ġibda partikolarment qawwija—forsi meta l-​inqas tkun qed tistennieha. X’tistaʼ tagħmel dwar dan?

Kun preparat. Meta Ġesù “ġie ttantat minn Satana,” hu mill-​ewwel irrifjuta. (Marku 1:13) Għala? Għaliex hu diġà kien jaf x’kellu jagħmel dwar il-​kwistjonijiet li nqalgħu. Aħseb dwar dan. Ġesù ma kienx robot. Hu setaʼ ċeda għat-​tentazzjoni. Imma diġà kien determinat li jobdi dejjem lil Missieru. (Ġwanni 8:28, 29) Ġesù kien tassew sinċier meta qal: “Jien ma nżiltx mis-​sema biex nagħmel ir-​rieda tiegħi imma r-​rieda taʼ dak li bagħatni.”—Ġwanni 6:38.

Ikteb fl-​ispazju t’hawn taħt żewġ raġunijiet għala għandek tirreżisti t-​tentazzjoni li spiss tiffaċċja u żewġ modi kif se tirreżistiha.

1. ․․․․․

2. ․․․․․

Ftakar li meta ċċedi għat-​tentazzjoni, int issir ilsir tax-​xewqat tiegħek. (Titu 3:3) Għala għandek tħalli lilek innifsek tiġi kontrollat mix-​xewqat qawwijin tiegħek? Kun matur biżżejjed billi tikkontrolla x-​xewqat tiegħek minflok ma tħalli lilhom jikkontrollawk.—Kolossin 3:5.

Iktar artikli mis-​serje “Iż-​Żgħażagħ Jistaqsu” jistgħu jinstabu fuq il-​Web site www.watchtower.org/ype

[Nota taʼ taħt]

AĦSEB DWAR DAN

◼ Jistgħu ħlejjaq perfetti jiġu ttantati?—Ġenesi 6:1-3; Ġwanni 8:44.

◼ Meta tirreżisti t-​tentazzjoni, x’effett ikollha l-​lealtà tiegħek fuq oħrajn?—Proverbji 27:11; 1 Timotju 4:12.

[Kaxxa f’paġna 27]

IPPROVA DAN L-​ESPERIMENT

Aqbad boxxla u poġġieha b’tali mod li l-​labra tipponta lejn it-​tramuntana. Issa poġġi kalamita mal-​ġenb tal-​boxxla. X’jiġri? Il-​labra m’għadhiex tagħti d-​direzzjoni eżatta. Minflok daret lejn il-​kalamita.

Il-​kuxjenza tiegħek hi bħal din il-​boxxla. Jekk tħarriġha kif suppost, din se tipponta lejn it-​“tramuntana,” jiġifieri, fid-​direzzjoni t-​tajba, u tgħinek tagħmel deċiżjonijiet għaqlin. Imma s-​sħubija taʼ ħsara, bħal kalamita, tiġbdek b’tali mod li tgħawweġ il-​ġudizzju morali tiegħek. It-​tagħlima? Ipprova evita nies u sitwazzjonijiet li jistgħu jgħawġulek is-​sens morali tiegħek!—Proverbji 13:20.

[Kaxxa f’paġna 27]

SUĠĠERIMENT

Ippjana minn qabel xi tweġibiet li tistaʼ tuża meta tiltaqaʼ maʼ xi ħadd li jipprova jħajrek tagħmel il-​ħażin. Tinkwetax. M’għandekx għalfejn tagħmel xi ħaġa li se tagħmlek tidher superjuri. Spiss, kulma għandek tagħmel hu li tiċħad b’konvinzjoni. Per eżempju, jekk sieħbek taʼ l-​iskola joffrilek sigarett, tistaʼ tgħidlu: “Taħlihx fuqi. Jien ma npejjipx!”

[Stampa f’paġna 28]

Meta ċċedi għat-​tentazzjoni, int issir ilsir tax-​xewqat tiegħek