Mingħand il-​Qarrejja

Skart Grazzi mill-​qalb għas-​serje t’artikli f’waqthom “L-​Iskart​—Se Jidfinna?” (8 taʼ Settembru, 2002) Meta tkun tgħix ġo pajjiż industrijalizzat huwa faċli ħafna li tinqabad f’mentalità taʼ “uża u armi.” L-​artiklu tagħkom ġagħalni nieqaf u naħseb dwar il-​perikli li dan iġib miegħu. Minn issa ’l quddiem se nibda naħsibha darbtejn l-​għala nkun irrid neħles mill-​affarijiet!

J. B., Stati Uniti

Tassew ħadt pjaċir bl-​artikli li jiddiskutu l-​problema taʼ l-​iskart. Għal żmien twil kont ngħix f’kumpless t’appartamenti li fil-​propjetà kellhom diversi tankijiet kbar għall-​iskart. Darba kont miexi barra u nnotajt li fuq wieħed mit-​tankijiet mimlijin kien hemm magna tal-​kafè ġdida tleqq. Xi ftit żmien qabel, żewġ ġuvintur żgħar qalu li sabu arloġġ tad-​deheb hemmhekk. Bqajt ixxokkjat bl-​affarijiet li stajna nsibu f’dawk it-​tankijiet. Issa għamlu tabella li tgħid, “Tqallbux fl-​iskart.”

B. Q., Stati Uniti

Kirurġija Kosmetika Grazzi minn qiegħ qalbi għall-​artiklu “Iż-​Żgħażagħ Jistaqsu . . . Għandi Nuża l-​Kirurġija Kosmetika?” (8 taʼ Settembru, 2002) Jien għandi 14-il sena, u l-​iskola xi studenti joqogħdu jwaqqgħuni għaċ-​ċajt minħabba waħda mill-​fattizzi taʼ wiċċi. Kont konvinta li ridt inbiddilha. Dan l-​artiklu għenni nanalizza dak li verament ridt u nifhem kemm kont sejra żbaljata. Dak li jgħodd għal Jehovah huwa s-​sbuħija minn ġewwa.

C. T., Franza

Xi ftit xhur ilu, meta kont qed nitkellem maʼ waħda minn sħabi tax-​xogħol, is-​suġġett waqaʼ fuq il-​kirurġija kosmetika. Hi ħasset li din m’hijiex xierqa għax turi diżrispett lejn il-​Ħallieq. Dak iż-​żmien ma stajt insib xejn speċifiku fil-​pubblikazzjonijiet tagħna. Madankollu, għedtilha liema prinċipji Bibliċi japplikaw, li wara sibthom f’dan l-​artiklu. Meta urejtha l-​artiklu, tgħidx kemm ħadet pjaċir bih.

M. R., Stati Uniti

Attrazzjoni Jien għandi 21 sena u niġġieled mal-​fatt li ma nħossnix attraenti. L-​esperjenza tiegħi hija deskritta l-​aħjar minn Tyler fl-​artiklu “Iż-​Żgħażagħ Jistaqsu . . . X’Nistaʼ Nagħmel biex Inkun Iktar Attraenti?” (8 t’Awissu, 2002) Il-​parir prattiku u bbażat minn fuq il-​Bibbja kien dak kollu li kelli bżonn. Grazzi għal dan l-​artiklu u għall-​pubblikazzjonijiet oħrajn li jkomplu joffru l-​għajnuna liż-​żgħażagħ li qed jiffaċċjaw daqs dawk sfidi f’din id-​dinja mill-​agħar. Dak li jonqosni nagħmel huwa li npoġġi l-​parir fil-​prattika.

P. L., Żambja

Talb Grazzi mill-​qalb għall-​artiklu “Il-​Ħarsa tal-​Bibbja: Talb li Hu Mismugħ minn Alla.” (8 taʼ Settembru, 2002) Dik il-​ġurnata li qrajtu kont dipressa ħafna. Il-​kliem li hemm f’Isaija 41:10 veru saħħaħni. Kemm jien ferħana li Jehovah isaħħaħ mhux biss lili imma lil oħrajn ukoll u li hu jismaʼ t-​talb kollu tagħna, anki l-​ħsibijiet! Ilni ngħix f’dar maqsuma reliġjożament għal 20 sena. M’huwiex faċli għax ilni nbati wkoll minn marda kronika għal iktar minn 30 sena. Grazzi ħafna għal dawn ir-​rivisti meraviljużi. Jibqgħu jagħtuni s-​saħħa li jkolli bżonn biex nibqaʼ miexja ’l quddiem.

D. G., Ġermanja