Ġuħ Spiritwali Fir-​Rumanija

RAPPORT taʼ l-​Associated Press minn Brasov, ir-​Rumanija, qal li madwar 90 fil-​mija tat-​23 miljun ruħ fir-​Rumanija huma membri tal-​Knisja Ortodossa, li kellha permess biex topera taħt il-​ħakma Komunista. Madankollu, id-​Daily Record taʼ Canon City, fil-​Kolorado, l-​Istati Uniti, innotat li ħafna issa qegħdin isibu li l-​knisja m’hijiex tagħmel xogħolha. Din kellha t-​titlu: “Ir-​Rumeni Jsibu L-​Knisja Ortodossa Nieqsa Mir-​Relevanza.”

“Alexandru Paleologu, kittieb u filosfu,” irrapportat il-​gazzetta f’Ottubru li għadda, “iċċita nuqqas taʼ fiduċja fl-​awtoritajiet tal-​knisja, u qal li l-​istil u s-​sustanza tar-​reliġjon tħalltu. In-​nies iroddu s-​salib u jsumu fil-​ġranet magħżulin, per eżempju. Imma l-​abort, li l-​knisja tqisu bħala dnub, huwa mifrux maʼ kullimkien.”

Id-Daily Record osservat li ħafna saru Xhieda taʼ Jehovah, u ċċitat l-​effett li l-​programm taʼ tagħlim tal-​Bibbja kellu fuq familja waħda: “Ir-​raġel taʼ Florentina Petrisor kien jisker u jsawwatha, tgħid hi. Imma minn mindu l-​koppja saru Xhieda taʼ Jehovah, il-​ħajja tal-​familja tagħha hija stampa t’armonija.”

Huwa rrapportat li Florentina, ħajjata taʼ 38 sena, “telqet mill-​knisja Ortodossa minħabba li din naqset fit-​tagħlim pastorali tagħha u minħabba l-​materjaliżmu tal-​qassis tal-​lokal tagħha.” Il-​gazzetta spjegat: “Meta miet il-​kunjatu tagħha, Petrisor qalet li l-​familja kellha tħallas u titmaʼ lill-​qassis biex tiżgura li jagħmillu funeral sabiħ, qabel ma setgħet titmaʼ lil uliedha. ‘Deherli li dan ma kienx sewwa,’ qalet hi.”

Rigward il-​kampanja tal-​knisja biex ixxerred informazzjoni żbaljata dwar ix-​Xhieda, id-​Daily Record osservat: “Fir-​Rumanija, il-​knisja Ortodossa, li reġgħet akkwistat influwenza, għenet biex timmanuvra lill-​gvern biex jibdel il-​lok t’assemblea kbira tax-​Xhieda taʼ Jehovah dan is-​sajf mill-​kapitali Bukarest għall-​ibliet Transilvanjani taʼ Brasov u Cluj.”

Fil-ħarġa tat-​22 taʼ Frar, 1997, l-​Awake! tkellem dwar il-​kampanja tal-​knisja biex tinfluwenza lill-​gvern biex jikkanċella l-​konvenzjoni internazzjonali li kienet mistennija ssir ġewwa Bukarest f’Lulju 1996. Tistaʼ taqra f’dik ir-​rivista kif konvenzjonijiet alternattivi ġew irranġati malajr ġewwa Cluj-Napoca u Brasov u kif total taʼ 34,866 attendew għalihom. Il-​pubbliċità li rriżultat madwar id-​dinja kienet rimarkevoli. “Dak li l-​Knisja Ortodossa Rumana ħasbet li kien se jfixkilna,” innota rappreżentant tax-​Xhieda, “attwalment irriżulta għall-​avvanz taʼ l-​aħbar it-​tajba.”

[Stampa fʼpaġna 30]

Delegati jkantaw fil-​konvenzjoni taʼ Brasov