Qassis Jammetti li x-​Xhieda Għandhom il-​Virtujiet

Minn kittieb għal Stenbaħ! fl-​Awstralja

FL-​1991, is-​Sala tas-​Saltna tax-​Xhieda taʼ Jehovah f’Condobolin, New South Wales, l-​Awstralja, iġġarrfet bin-​nar. Ftit ġimgħat wara, fl-​ittra parrokkjali tiegħu, qassis Anglikan lokali esprima sentimenti taʼ mogħdrija “għat-​telfa tal-​post taʼ qima.” L-​ittra tiegħu kompliet hekk:

“Filwaqt li hemm differenzi ovvji bejn il-​prattiċi tagħna u tagħhom, għal snin sħaħ jien faħħart ħafna l-​aspetti tal-​prattiċi tal-​fidi tagħhom li fihom infushom nemmen li huma tajbin.” X’inhuma xi ftit minn dawn l-​aspetti pożittivi?

L-ewwel: “Huma konċernati ħafna dwar it-​tagħlim tal-​fidi. Minħabba f’hekk, jiltaqgħu flimkien għal żewġ jew tliet okkażjonijiet kull ġimgħa.” Dan hu minnu—ir-​reliġjon tax-​Xhieda taʼ Jehovah tinkludi qari, tagħlim, u ppridkar. Għandhom tliet laqgħat fil-​ġimgħa.

It-tieni punt tal-​qassis kien: “Huma . . . jagħmlu żjajjar taʼ evanġelizzar regolarment fid-​djar tan-​nies. . . . Huma jriduna nkunu nafu li t-​tielet l-​akbar denominazzjoni fl-​Awstralja hija magħmula minn nies li jgħidu li huma Bla Reliġjon (3,841,000 ruħ). Ix-​Xhieda taʼ Jehovah m’humiex kuntenti li jżommu l-​fidi għalihom biss imma jridu jaqsmuha maʼ nies oħrajn.” Huma jafu li jridu jwieġbu għal Mattew 24:14 u Mark 13:10 billi jippridkaw l-​aħbar tajba.

It-tielet punt hu: “Ma tarahomx jiġbru l-​fondi permezz tal-​komunità billi jagħmlu xi ġbir mit-​toroq jew b’xi modi oħrajn. Il-​finanzi tagħhom jiġu minn ġol-​komunità [tagħhom] stess.” Il-​Bibbja tgħid, “b’xejn ħadtu, b’xejn agħtu” u, “min jagħti hu aktar hieni minn min jieħu.” B’hekk, huma ma jagħmlux ġbir. B’għaqal, fis-​swali tagħhom issib kaxxi għall-​kontribuzzjonijiet.—Mattew 10:8; Atti 20:35.

X’kien l-​aħħar aspett taʼ tifħir li semma? “Huma jibnu l-​postijiet taʼ qima tagħhom billi jużaw ammont taʼ ħin u finanzi mill-​inqas. . . . Tistgħu tmorru tagħtu titwila fi Triq Gum Bend Lake . . . u taraw lix-​Xhieda taʼ Jehovah lokali . . . jaħdmu biex jibnu Sala tas-​Saltna ġdida. Huma jgħidu li bejn wieħed u ieħor ix-​xogħol se jdum tlett ijiem.” Imbagħad x’parir ta lill-​parruċċani tiegħu?

“Jien nagħtikom parir terġgħu taqraw l-​erbaʼ punti li ssuġġerejt hawn fuq u taraw kif dawn jistgħu jgħinukom taħsbu dwar kif qed tipprattikaw b’mod viżibbli l-​fidi tagħkom. . . . Jien naħseb li meta nqisu dawn l-​erbaʼ punti li semmejna, in-​nies tax-​Xhieda taʼ Jehovah iġibu fix-​xejn lill-​Anglikan in ġenerali u lil parroċċi Kristjani oħrajn.”

Jekk tixtieq iżżur Sala tas-​Saltna u tara b’għajnejk kif ix-​Xhieda taʼ Jehovah jagħtu qima u x’jemmnu, tiddejjaqx tmur fl-​eqreb Sala tas-​Saltna, jew inkella tiktbilna għall-​indirizz taʼ l-​eqreb sala għalik.