नवनवीन गोष्टी शिकून घ्यायच्या इच्छेने अभ्यास करा

अभ्यासाची तयारी करत असताना कदाचित आपल्या मनात असा प्रश्‍न येईल, की ‘मला यातून काय शिकायला मिळेल?’ पण आपण हे लक्षात ठेवलं पाहिजे, की आपल्याला अमुक एक गोष्ट शिकायला मिळेल असं आपल्याला वाटत असलं, तरी आपण तेवढ्यावरच समाधानी नाही राहिलं पाहिजे. तर यहोवा आपल्याला आणखी कोणकोणत्या नवीन गोष्टी शिकवतोय त्यावरही आपलं लक्ष असलं पाहिजे. मग अभ्यास करताना आपण नवनवीन गोष्टी शिकून घ्यायचा प्रयत्न कसा करू शकतो?

बुद्धीसाठी प्रार्थना करा. आपण आत्ता काय शिकून घ्यावं अशी यहोवाची इच्छा आहे हे समजून घ्यायला त्याला प्रार्थना करा. (याको. १:५) तुम्हाला माहीत असलेल्या गोष्टींवरच अवलंबून राहू नका.—नीति. ३:५, ६.

देवाच्या वचनाला तुमच्यावर कार्य करू द्या. कारण “देवाचं वचन जिवंत” आहे. (इब्री ४:१२) आपण जेव्हा-जेव्हा देवाचं जिवंत “वचन” वाचतो, तेव्हा-तेव्हा आपल्याला नवीन गोष्टी शिकायला मिळू शकतात आणि वेगवेगळ्या पद्धतीने आपल्याला मदत होऊ शकते. पण देव जे शिकवतोय ते आपण शिकून घेतलं पाहिजे. ही मनोवृत्ती जर आपण ठेवली तरच देवाच्या वचनाचा आपल्यावर प्रभाव पडू शकतो.

यहोवाच्या मेजावर असलेल्या सर्व गोष्टींची कदर करा. तो देत असलेलं आध्यात्मिक अन्‍न ‘उत्तम अन्‍नपदार्थांच्या मेजवानीसारखं’ आहे. (यश. २५:६) आपल्याला हा ‘अन्‍नपदार्थ’ इतका काही आवडणार नाही म्हणून तो खायचं टाळू नका. कारण त्याचा तुम्हाला फक्‍त फायदाच होणार नाही, तर देव जे पुरवतोय त्याच्यामुळे तुम्हाला खूप आनंदही होईल.