आरशाचा चांगला वापर करा!

याकोबने बायबलची तुलना आरशासोबत केली. या आरशामुळे आपल्याला आपण आतून कशा प्रकारची व्यक्‍ती आहोत हे समजतं. (याको. १:२२-२५) मग आपण बायबलचा आरशासारखा वापर कसा करू शकतो?

लक्ष देऊन वाचा. आपण जर आरशात फक्‍त वरवर पाहिलं, तर एखादा डाग आपल्याला दिसणार नाही. त्याच प्रकारे आपण जर बायबल घाईघाईत वाचलं, तर आपण आतून कशा प्रकारची व्यक्‍ती आहोत हे आपल्याला समजणार नाही. त्यामुळे आपल्यातल्या ज्या गोष्टी आपण बदलल्या पाहिजेत त्या आपल्याला बदलता येणार नाहीत. म्हणून आपण देवाचं वचन लक्ष देऊन वाचलं पाहिजे.

इतरांपेक्षा स्वतःकडे जास्त लक्ष द्या. आपण जर आरसा तिरका पकडला, तर आपल्याला आपले नाही तर दुसऱ्‍यांचे दोष दिसतील. त्याच प्रकारे, आपण जेव्हा बायबल वाचू तेव्हा कदाचित आपल्याला इतरांचे दोष दिसतील. पण जर आपण असं केलं तर आपल्याला आपले दोष सुधारता येणार नाहीत.

समजूतदारपणा दाखवा. आपण जर आपल्या दोषांकडे जास्त लक्ष दिलं तर आपण निराश होऊ शकतो. त्यामुळे बायबल वाचताना आपण समजूतदारपणा दाखवू शकतो. यहोवा आपल्याकडून जी अपेक्षा करतो, त्यापेक्षा जास्त अपेक्षा आपण स्वतःकडून करणार नाही.—याको. ३:१७.