फिलेमोन याला पत्र

१ ख्रिस्त येशूसाठी तुरुंगात कैदी असलेला पौल+ आणि आपला भाऊ तीमथ्य यांच्याकडून,+ आमचा प्रिय सहकारी फिलेमोन २ आणि आमची बहीण अफ्फिया, आमच्या सोबतचा सैनिक अर्खिप्प,+ तसंच तुझ्या घरात भेटणारी मंडळी+ या सगळ्यांना:

३ देव जो आपला पिता आणि येशू ख्रिस्त जो आपला प्रभू यांच्याकडून तुम्हा सर्वांना अपार कृपा आणि शांती मिळो.

४ माझ्या प्रार्थनांमध्ये मी जेव्हा जेव्हा तुझा उल्लेख करतो, तेव्हा तेव्हा मी माझ्या देवाचे उपकार मानतो.+ ५ कारण तुझ्या विश्‍वासाबद्दल, तसंच प्रभू येशू ख्रिस्त आणि सर्व पवित्र जन यांच्यासाठी* असलेल्या तुझ्या प्रेमाबद्दल, मला नेहमीच ऐकायला मिळतं. ६ तुझा आणि तुझ्या बांधवांचा जो विश्‍वास आहे, त्यामुळे ख्रिस्ताद्वारे आपल्याला मिळालेल्या सर्व आशीर्वादांची तुला जाणीव व्हावी, अशी मी प्रार्थना करतो. ७ कारण तू दाखवत असलेल्या प्रेमाबद्दल जेव्हा मी ऐकलं, तेव्हा मला खूप आनंद झाला आणि सांत्वन मिळालं. माझ्या भावा, तुझ्याद्वारे पवित्र जनांच्या मनाला* बळ मिळालं आहे.

८ याच कारणामुळे, मला ख्रिस्ताचा प्रेषित या नात्याने, तू योग्य ते करावं असा आदेश देण्याचा अधिकार आहे. ९ तरी मी तुला प्रेमाच्या आधारावर विनंती करायचं जास्त पसंत करीन. कारण मी, पौल, एक वडीलधारा माणूस आहे आणि आता तर ख्रिस्त येशूसाठी तुरुंगात कैदीही आहे. १० मी ज्याचा तुरुंगात* असताना विश्‍वासात वडील बनलो,+ त्या माझ्या लेकरासाठी, अनेसिमसाठी+ मी तुला विनंती करत आहे. ११ तो पूर्वी तुझ्यासाठी निरुपयोगी होता, पण आता तो तुझ्यासाठी आणि माझ्यासाठीही उपयोगी आहे. १२ मी त्याला, हो, माझ्या काळजाच्या तुकड्याला तुझ्याकडे परत पाठवत आहे.

१३ आनंदाच्या संदेशासाठी मला झालेल्या या कैदेदरम्यान, माझी सेवा करण्यासाठी तुझ्या जागी त्याला ठेवून घ्यायला खरंतर मला आवडलं असतं.+ १४ पण, मला तुझ्या परवानगीशिवाय काहीही करायची इच्छा नाही. कारण, हे चांगलं काम तू बळजबरीने नाही, तर तुझ्या स्वतःच्या इच्छेने करावं, असं मला वाटलं.+ १५ कदाचित यासाठीच तो काही काळ* तुझ्यापासून दुरावला असेल, की तो कायमचा तुला परत मिळावा; १६ यापुढे एक दास म्हणून नाही,+ तर दासापेक्षाही जास्त, एक प्रिय भाऊ म्हणून. माझ्यासाठी तर तो एक प्रिय भाऊ आहेच,+ पण माझ्यापेक्षाही तो तुझ्यासाठी आणखी जास्त प्रिय असा भाऊ आहे. कारण तो तुझा दासच नाही तर प्रभूच्या सेवेत तुझा सहकारीसुद्धा आहे. १७ तेव्हा, जर तू मला आपला मित्र* समजत असशील, तर जितक्या प्रेमाने तू माझं स्वागत केलं असतं, तितक्याच प्रेमाने त्याचंही स्वागत कर. १८ शिवाय, जर त्याने तुझं काही नुकसान केलं असेल, किंवा जर त्याच्यावर तुझं काही कर्ज असेल, तर ते माझ्या हिशोबात जोड. १९ मी, पौल, स्वतःच्या हाताने हे लिहीत आहे: मी त्याची परतफेड करीन. अर्थात, तू तर आपल्या जीवनासाठीही माझा ऋणी आहेस, हे वेगळं सांगायला नको. २० तेव्हा, माझ्या भावा, प्रभूच्या सेवेत माझी एवढी मदत कर. ख्रिस्ताचा शिष्य या नात्याने माझ्या मनाला* बळ दे.

२१ तू माझ्या सांगण्याप्रमाणे वागशील याची मला खातरी आहे, म्हणूनच मी तुला लिहीत आहे. कारण मी जे सांगितलं त्यापेक्षाही तू जास्त करशील हे मला माहीत आहे. २२ पण त्यासोबतच, माझ्या मुक्कामासाठी तयारी करून ठेव. कारण तुमच्या प्रार्थनांप्रमाणे मी तुमच्याकडे परत येईन* अशी आशा मी बाळगतो.+

२३ ख्रिस्तासोबत ऐक्यात असलेला माझा सोबतीचा कैदी एपफ्रास+ तुला नमस्कार सांगतो. २४ तसंच मार्क, अरिस्तार्ख,+ देमास+ आणि लूक+ हे माझे सहकारीसुद्धा तुला नमस्कार सांगतात.

२५ तू दाखवत असलेल्या चांगल्या वृत्तीमुळे, तुझ्यावर प्रभू येशू ख्रिस्ताची अपार कृपा असो.