Tall-y-yã a Zeova sik-m-mengã buudu

1. Bõe yĩng t’a Zeova sẽn yaa sik-m-meng soabã noom yãmba?

YÃMB sã n get neb nins sẽn tar naam rũndã-rũndã wã, y na n yeelame tɩ b yaa sik-m-mens rãmb bɩ? Ayo. La a Zeova sẽn yaa Sẽn tõe-a fãa wã yaa sik-m-meng soaba. (Yɩɩn. 113:5-8) Ned kae n yaa sik-m-meng soab wa a Zeova ye. Wuk-m-meng baa bilf pa be a sũurẽ wã ye. Sõs-kãngã pʋgẽ d na n goma zʋg-sõma a naas a Zeova sẽn tar yelle, la d bao n bãng zʋg-sõma-kãens sẽn wilgd to-to t’a yaa sik-m-meng soaba. D leb n na n yãa a Zeezi sẽn dɩk a Ba wã togs-n-taar sik-m-mengã wɛɛngẽ to-to. D sẽn na n gom rẽ yellã na n sõng-d lame tɩ d kolg a Zeova n paase, la kɩt tɩ d maneg n dat n dɩk a togs-n-taar sik-m-mengã wɛɛngẽ.

A ZEOVA PẼNEGR YAA NANA

2. Yɩɩn-sõamyã 62:8 wilgda tõnd bõe a Zeova zugu? (Ges-y fotã me.)

² Ned sẽn yaa wuk-m-meng soab pẽnegr pa wae n yaa nana ye. Wuk-m-mengã kɩtdame t’a tar manesem sẽn kɩtd tɩ nebã pa rat n pẽneg-a, wall sẽn kɩtd tɩ nebã lakd b mens fasɩ ne-a. La a Zeova yẽ pa woto baa bilf ye! Tõnd Ba sẽn be saasẽ wã sẽn yaa sik-m-meng soabã yĩnga, a sagend-d lame tɩ d pʋʋsd-a n togsd bũmb nins sẽn namsd tõndã, la sẽn kɩt tɩ d maand yɩɩrã. (Karm-y Yɩɩn-sõamyã 62:8.) A Zeova kelgda neb nins sẽn tũud-a wã pʋʋsg hal t’a sũur noom ne rẽ, wa ba sẽn nong a kamb sẽn maagd a yĩng n kelgd-b n dat n bãng bũmb ning sẽn pak-bã. Sɩd me, a kɩtame tɩ b gʋls neb wʋsg sẽn pʋʋs-a goam Biiblã pʋgẽ. Rẽ wilgdame t’a pẽnegr sɩd yaa nana. (Zoz. 10:12-14; 1 Sãm. 1:10-18) La d sẽn kongd naoor wʋsgã yĩnga, wakat ninga d tõe n getame tɩ d pa zems ne a Zeova pẽnegr ye.

3. Bõe n kɩt tɩ y tõe n bas y yam t’a Zeova ratame tɩ y pʋʋsd-a wakat fãa?

³ Baa d sã n getẽ tɩ d pa zems ne a Zeova nonglmã, d tõe n pʋʋs-a lame. Bõe n kɩt tɩ d yet woto? A Zeezi sẽn wa n wẽ yel-bũnd n gom biig sẽn sãam a ba paoong yellã, a maka a Zeova ne ba sẽn yaa nimbãan-zoɛta. La biigã ra tagsdame t’a ba wã pa na n le sak n deeg-a a zakẽ wã ye. Baasgo, biigã sẽn wa n yãk yam n na n lebg n kuilã, ba wã manesem yɩɩ wãna? A Zeezi yeelame tɩ ba wã sẽn wa n yã a biigã t’a ket n be yɩɩga, a “wudgame n tɩ mobg-a, la a mok-a sõma.” (Luk 15:17-20) A Zeova yaa wa bi-kãng ba wã. A sã n wʋm tɩ d pʋʋsd-a d sũur sẽn sãam yel-wẽnd d sẽn maan yĩnga, pa rẽ bɩ d sẽn maand yɩɩr yĩnga, a sẽn yaa sik-m-meng soabã, a maagda a yĩng n kelg tõndo. (Wiis. 3:19, 20) A Zeova sẽn zoet d nimbãanega yĩnga, a yɩta tao-tao n bels-d la a sõng-d tɩ d bas d yam t’a nong-d lame, tɩ yaa wa ba ning yell a Zeezi sẽn gomã sẽn maanã. (Eza. 57:15) La wãn to la a Zeova maand rẽ? A mi n tũnugda ne kãsem-dãmbã, d zakã neb nins sẽn tũud-a wã la d tẽed-n-taas a taab n belsd tõndo. (Zak 5:14, 15) A Zeova sõngda tõnd a woto, bala a ratame tɩ d kell n yɩ a zo-rãmba.

4. Bõe n wilgd t’a Zeezi pẽnegr da yaa nana?

⁴ A Zeezi rɩkda a Ba wã togs-n-taare. A Zeezi yaa sik-m-meng soab wa a Ba wã. Rẽ n so t’a sẽn wa n be tẽngã zugã nebã ra nong n kẽngda a nengẽ. B ra mi n sokd-a-la sogsg n pa yɛɛsdẽ ye. (Mark 4:10, 11) A sã n da sok nebã b tagsgo, b togsd-a-la sẽn sɩd be b sũurẽ wã. (Mat. 16:13-16) B sã n da tudg me b pa yɛɛsd t’a Zeezi sũur na n yika ne-b ye. Bala b miime t’a yaa nin-bʋgsgo, nimbãan-zoɛt la sũ-mar soaba. (Mat. 17:24-27) A Zeezi sẽn da rɩkd a Ba wã togs-n-taar kɛpɩ wã kɩtame t’a karen-biisã bãng a Zeova sõma. (Zã 14:9) B bãngame t’a Zeova yaa toor fasɩ ne b wakatẽ tũudmã taoor dãmb sẽn da yaa nin-toose, wuk-m-mens rãmb la nin-pa-nandbã. B bãngame t’a Zeova yaa sik-m-meng soaba, la t’a pẽnegr yaa nana.

5. Wãn to la sik-m-mengã tõe n sõng tõnd tɩ d yɩ ned pẽnegr sẽn yaa nana?

⁵ Wãn to la d tõe n dɩk a Zeova togs-n-taare? D sã n bɩɩsd sik-m-menga, d pẽnegr na n lebgda nana n paasdẽ. D sã n pa sik-m-meng soaba d tõe n wa maanda sũ-kiir ne d taabã, d tõe n wa tagsdame tɩ d são-b lame, la d pa sakd n kõt-b sugr b sã n wa beeg-d ye. D sã n maand woto, neb a taabã pa na n dat n pẽneg tõnd ye. La sik-m-mengã na n sõngame tɩ d yɩ nin-bʋgsgo, sũ-mar soab la sug-kõata, tɩ kɩt tɩ neb a taabã rat n pẽneg-do. (Kolo. 3:12-14) Sẽn yɩɩd fãa, kãsem-dãmbã segd n modgame n yɩ neb pẽnegr sẽn yaa nana. Rẽ n so tɩ kãsem-dãmbã segd n wae n be ne b tẽed-n-taasã. B maanda b sẽn tõe fãa n kẽnd Rĩungã roogẽ n maand tigissã, n pa maand ne videokõnferãns tɩ sã n pa wa n mikame tɩ yaa tɩlɛ ye. Sẽn paase, b maanda b sẽn tõe fãa n moond koɛɛgã zak-zak ne b tẽed-n-taasã.

A ZEOVA PA DEM-DEM YE

6-7. Rɩk-y makr n wilg tɩ neb nins sẽn tũud a Zeova wã sã n kos-a, a mi n toeema yam.

⁶ Wuk-m-mens rãmbã wae n yaa dem-dem ne neb a taabã. La baa a Zeova sẽn mi bũmb fãa wã a pa woto ye. A sẽn yaa sik-m-meng soabã yĩnga, a sakd n kelga neb a taabã goama, tɩ wakat ning t’a tik rẽ n toeem a sẽn da yãk yam n na n maan bũmb ninga. Tẽeg-y-yã a manesem sẽn yɩ to-to ne a Miryam sẽn yaa a Moyiiz tãoã. Yẽ ne a Aarõ yẽgma ne a Moyiiz sẽn da gomd a Zeova yʋʋr yĩngã. Rẽnd d tõe n yeelame tɩ yaa a Zeova meng la a Miryam sẽn paoogã. Rẽ kɩtame t’a Zeova sũurã puug ne a Miryam t’a lob-a wãoodo. La a Aarõ sẽn kos a Moyiiz t’a sõng-a, t’a Moyiiz yõk a Zeova sɛɛg t’a sãoog-a wã, bõe la a maan-yã? A Zeova sã n da yaa wuk-m-meng soaba, a pa na n sak n toeem a sẽn kao a bʋʋdã to-to wã ye. La a sẽn yaa sik-m-meng soabã yĩnga, a toeema yam n sãoog a Miryam.—Sõd. 12:1-15.

⁷ D sã n ges a Zeova manesem sẽn yɩ to-to ne rĩm a Ezekɩyaasã me, d yãta vẽeneg t’a yaa sik-m-meng soaba. A Zeova tʋma a no-rɛɛsã t’a tɩ togs rĩmã t’a na n kiime. A Ezekɩyaas sẽn wʋm dẽ wã, a kosa a Zeova ne nintãm t’a sãoog a bãagã. A Zeova zoee rĩmã nimbãanega, n yeel t’a na n kɩtame t’a vɩɩmd yʋʋm piig la a nu n paase. (2 Rĩm. 20:1, 5, 6) Hakɩɩka, sik-m-mengã kɩtame t’a Zeova zoet ninsaalbã nimbãanega, la a sakd n kelgd-ba.

8. Bõe n wilgd t’a Zeezi pa dem-deme? (Mark 3:1-6)

⁸ A Zeezi rɩkda a Ba wã togs-n-taare. A Zeezi sẽn wa n be tẽngã zugã, a sã n da tõe n maan bũmb n sõng ned fãa, a pa basd n pa sõng-a ye. Wala makre, a Zeezi ra sãoogda nebã vʋʋsg daare, baa tũudmã taoor dãmb sũy sẽn da riglmã sẽn da tagsd t’a pa segd n maan woto wã. (Karm-y Mark 3:1-6.) A sẽn wilgd kiris-neb tigingã sor rũndã-rũndã to-to wã yaa kaset t’a ket n pa dem-dem ye. Bũmb sẽn wilgd rẽ yaa tɩ tigingã ned sã n maan yel-wẽn-kãsenga, a maanda sũ-mar ne a soabã, n kõ-a weer sẽn na yɩl t’a toeeme.—Vẽn. 2:2-5.

9. Wãn to la d tõe n wilg tɩ d yaa ned sẽn pa dem-deme? (Ges-y fot-rãmbã me.)

⁹ Wãn to la d tõe n dɩk a Zeova togs-n-taare? D segd n modgd n dɩkda a Zeova togs-n-taare, tɩ d tagsa wã la d manesmã wilgdẽ tɩ d pa dem-dem ye. (Zak 3:17) Wala makre, roagdb sẽn pa dem-dem pa na n dat tɩ b kambã maan bũmb sẽn yɩɩd b pãnga, baa b sẽn pa na n bas-b tɩ b maand b yamã. Ned sẽn kõ mak-sõng zĩ-kãng wɛɛngẽ yaa a Zakoob sẽn da tagsd a kambã sẽn pa tar pãng wʋsgã yellã. (Sɩng. 33:12-14) Roagdb sẽn yaa sik-m-mens rãmb la sẽn pa dem-dem pa na n makd b kambã ne taaba, bala b miime tɩ rẽ pa zems ye. Tigingã kãsem-dãmb me pa segd n yɩ dem-dem ye. Wala makre, kãsem-soab pa segd n pẽdgd n dat t’a taabã sak yẽ sẽn tagsdã ye. A na n saka kãsem-dãmbã wʋsg sẽn yãk yam ningã, sã n mik tɩ pa kɩɩsd Biiblã noore. (1 Tɩm. 3:2, 3) Tõnd ned kam fãa me segd n modg n wʋma a taabã sẽn get yɛlã to-to wã võore, baa a tagsg sã n wa yaa toor ne a taabã rẽndã. (Rom. 14:1) Sɩd-sɩda, tigingã ned kam fãa segd n modgame tɩ ‘nebã fãa yã t’a yaa ned sẽn pa dem-dem ye.’—Fili. 4:5.

A ZEOVA YAA SŨ-MAR SOABA

10. Bõe la a Zeova maan n wilg t’a yaa sũ-mar soaba?

¹⁰ Tõe tɩ y gũus n gesame tɩ wuk-m-mens rãmbã pa tõe n maag b yĩng n gũ bũmb ye. Wuk-m-mengã kɩtame tɩ b pa tar sũ-mar ye. La a Zeova pa woto baa bilf ye. A maanda sũ-mar n yɩɩd ned buud fãa. Wala makre, a Nowe wakatẽ wã a Zeova yeelame t’a na n gũu yʋʋm koabg la pisi n yaool n sãam nin-wẽnsã. (Sɩng. 6:3) Rẽ kõo a Nowe weer t’a rog kamba, tɩ yẽ ne a zakã rãmb sõng taab n ka koom-koglgã. Kaoosg zugẽ, a Zeova maaga a yĩng n kelg a Abrahaam t’a sok-a sogsg Sodom la Gomoor sãoongã wɛɛngẽ. A Zeova sã n da yaa wuk-m-meng soabã a ra tõe n sokame yaa: “Fo tagsdame tɩ mam pa mi m sẽn maand bũmb ningã bɩ?” La a Zeova sẽn yaa sik-m-meng soabã yĩnga, a talla sũ-mar ne a Abrahaam.—Sɩng. 18:20-33.

11. Bõe yĩng t’a Zeova maand sũ-mar rũndã-rũndã? (2 Pɩyɛɛr 3:9)

¹¹ A Zeova maanda sũ-mar rũndã-rũndã me. A maaga a yĩng n gũudẽ tɩ wakat ning a sẽn yãkã ta t’a yaool n sãam dũni-kãngã. Bõe yĩng t’a maand sũ-mare? “Bala a pa rat tɩ ned baa a ye sãam ye. A ratame tɩ nebã fãa tek yam n kos sugri.” (Karm-y 2 Pɩyɛɛr 3:9.) A Zeova sẽn maand sũ-marã womda biis bɩ? N-ye. Neb milyõ-rãmb sẽn yaa pʋ-peelem dãmb n lebg a zo-rãmba. D saagdame me tɩ neb milyõ-rãmb n nan na n maan woto. La a Zeova sũ-marã tara koaka. A nonga nebã, la a pa na n bas tɩ b maand b sẽn dat wakat fãa ye. A pa na n bas tɩ wẽnemã be wakat fãa yĩng ye.—Hab. 2:3.

12. Bõe n wilgd t’a Zeezi rɩkda a Zeova togs-n-taar sũ-marã wɛɛngẽ?

¹² A Zeezi rɩkda a Ba wã togs-n-taare. Yʋʋm tusa la woto a Zeezi sẽn dɩkd a Zeova togs-n-taar sũ-marã wɛɛngẽ. A wʋmda a Sʋɩtãan sẽn yelgd ziri a Zeova ne neb nins sẽn tũud-a ne b sũy fãa wã zugu. (Sɩng. 3:4, 5; Zoob 1:11; Vẽn. 12:10) A Zeezi leb n nee neb wʋsg sẽn namsde, yel-beed sẽn paam-b yĩnga. Mams-y n ges-y-yã a sẽn yãgd to-to “n na n sãam Sʋɩtãanã tʋʋmã”! (1 Zã 3:8) Bõe n sõngd a Zeezi t’a maand sũ-mar n gũud wakat ning a Zeova sẽn na n kõ-a sor t’a sãam Sʋɩtãanã tʋʋmã zãngã? Bũmb a ye yaa t’a Zeezi yaa sik-m-meng soaba. A miime tɩ yaa a Zeova n tar sor n na n yãk wakat ning a sẽn na n kɩt tɩ dũniyã sa wã.—Tʋʋ. 1:7.

13. Wãn to la a Zeezi maan sũ-mar ne a tẽn-tʋmdbã, la bõe yĩnga?

¹³ A Zeezi sẽn wa n be tẽngã zugã me, a maana sũ-mar ne a tẽn-tʋmdbã. Wala makre, baa tẽn-tʋmdbã sẽn wẽ no-koɛɛm naoor wʋsg n na n bãng sẽn yaa-a kãseng n yɩɩd bãmb sʋkã, a Zeezi pa koms raood n bas b sõngr ye. A kell n maana sũ-mar ne-ba. (Luk 9:46; 22:24-27) A ra kɩsa sɩd tɩ b na n wa toeemame. Yãmb maanda yel-wẽnd ning n yɩlemdẽ bɩ? Sã n yaa rẽ, y sẽn paam tɩ d Rĩmã yaa sik-m-meng soab la sũ-mar soab woto wã pa noom-y sɩda?

14. Bõe la d tõe n maan tɩ sõng-d tɩ d bɩɩs sũ-mare?

¹⁴ Wãn to la d tõe n dɩk a Zeova togs-n-taare? D sã n dat tɩ d tagsa wã la d tʋʋm-tʋmdɩ wã wõnegd a Zeova rẽndã n paasdẽ, d segd n modg n talla “Kiristã yamã buudu.” (1 Kor. 2:16) Bõe la d tõe n maan n tall Kirist yamã buudu? Bõn-kãseng a ye d sẽn tõe n maan yaa d karemd a Zeezi vɩɩmã kibar sẽn be Biiblã pʋgẽ wã. Kareng fãa poor bɩ y bʋgs a Zeezi sẽn maan bũmb ningã zugu, la bũmb ning sẽn kɩt t’a maan dẽ wã zug tɩ rẽ la y na n bãng a sẽn da get yɛlã to-to wã. Sẽn paase, d segd n pʋʋsa a Zeova, n kos t’a sõng-d tɩ d bɩɩs sik-m-meng wa a Zeezi. D sã n bɩɩsd Kiristã yamã buud n paasdẽ, d na n maneg n dɩkda Wẽnnaam togs-n-taare, n maand sũ-mar ne d taabã la ne d mengã.—Mat. 18:26-30, 35.

A ZEOVA NANDA SIK-M-MENS RÃMBÃ

15. Bõe n wilgd t’a Zeova nanda sik-m-mens rãmbã? (Yɩɩn-sõamyã 138:6)

¹⁵ Karm-y Yɩɩn-sõamyã 138:6. Sik-m-mens rãmbã sẽn paam tɩ yĩngr la tẽng Naabã mi-bã pa zu-zẽkr tɛkẽ sɩda? D na n goma neb a wãn sẽn da yaa sik-m-mens rãmb yelle, t’a Zeova wilg t’a nand-b lame. Tõe tɩ d pa mi b kẽer sõma ye. La a Zeova kɩtame tɩ b gom b yell Biiblã pʋgẽ. Wala makre, a Zeova vẽnega a Moyiiz t’a gom bi-yaool a ye sẽn zĩnd pĩnd wẽndẽ wã yelle, t’a yʋʋr boondẽ t’a Deboora. A Deboora tʋma a Izaak ne a Zakoob zakã rãmb yĩng ne a sũur fãa n kaoos yʋʋm koabg la pisi la a nu. Baa d sẽn pa mi bũmb wʋsg pʋg-kãng sẽn da maand sɩdã zugã, a Zeova kɩtame t’a Moyiiz gʋls bũmb sẽn wilgd tɩ b ra nong-a-la wʋsgo. (Sɩng. 24:59; 35:8, notã) Yʋʋm kobs poore, a Zeova yãka a Davɩɩd sẽn da yaa pe-kɩɩmã t’a lebg Israyɛll rĩma. (2 Sãm. 22:1, 36) A Zeezi rogmã poor bilfu, Wẽnnaam tʋma malɛgs tɩ b tɩ gom ne pe-kɩɩmba, tɩ b yɩ pipi n bãng tɩ Mesi wã roga Betlehɛm. (Luk 2:8-11) Sẽn paase, a Zozɛf ne a Maari sẽn wa n tall a Zeezi n kẽng wẽnd-doogẽ wã, a Zeova kɩtame t’a Sɩmeyõ ne a Ann sẽn da kʋʋl wʋsgã bãng t’a Zeezi n yaa a Biigã, tɩ wilg t’a nand-b lame. (Luk 2:25-30, 36-38) Hakɩɩka, “baa a Zeova sẽn be yĩngrã, a gũusd n geta sik-m-mens rãmbã.”

16. Wãn to la a Zeezi wilg t’a rɩkda a Ba wã togs-n-taare?

¹⁶ A Zeezi rɩkda a Ba wã togs-n-taare. A nanda sik-m-mens rãmbã wa a Ba wã. A sõnga neb sẽn “pa paam zãmsg n le yaa nin-tals” tɩ b bãng bũmb wʋsg Wẽnnaam Rĩungã zugu. (Tʋʋ. 4:13; Mat. 11:25) Sẽn paase, a Zeezi maaga bãad-rãmba, la a sẽn maan dẽ to-to wã kɩtame tɩ b ra neẽ t’a nong-b lame la a nand-ba. (Luk 5:13) A yõkrã yʋng me, a maana bũmb sẽn da yaa tʋʋm-biig n segd n maane: A waasa a tẽn-tʋmdbã naoã. (Zã 13:5) Nand t’a rʋ saasẽ, a kõo a karen-biisã ne neb nins fãa sẽn da na n wa lebg a karen-biisã tʋʋmd sẽn yaa zu-zẽkr tʋʋmde. A yeel-b lame tɩ b sõng neb a taabã sẽn na yɩl tɩ b wa paam vɩɩm sẽn kõn sa wã.—Mat. 28:19, 20.

17. Bõe la d tõe n maan n wilg tɩ d nanda d taabã? (Ges-y fotã me.)

¹⁷ Wãn to la d tõe n dɩk a Zeova togs-n-taare? D sã n moond neb buud fãa koe-noogã n pa get b sẽn yitẽ, b yĩngã kõbg wall b sã n karem n zãagame, d wilgdame tɩ d nand-b lame. Sẽn paase d sã n tagsdẽ tɩ d tẽed-n-taasã yɩɩda tõndo, n pa get d minimã wall tʋʋmd ning d sẽn tar tigingã pʋgẽ wã, d wilgdame tɩ d nand-b lame. (Fili. 2:3) D sã n “yɩt pipi” n waoogd d taabã bõn-kãensã la bũmb a taab wɛɛngẽ, nooma a Zeova.—Rom. 12:10; Sof. 3:12.

18. Bõe yĩng tɩ y rat n dɩk a Zeova togs-n-taar sik-m-mengã wɛɛngẽ?

¹⁸ D sã n modgd n bɩɩsd d Ba sẽn be saasẽ wã sẽn nong-dã sik-m-mengã buudu, d na n maneg n lebga ned pẽnegr sẽn yaa nana, ned sẽn pa dem-deme, la sũ-mar soaba. Sẽn paase d na n nanda d taabã wa a Zeova. La tẽeg-y tɩ d sã n maand d sẽn tõe fãa n dɩkd d Wẽnnaamã sẽn yaa sik-meng soabã togs-n-taare, na n kɩtame tɩ d ned kam fãa maneg n tall yõod a nifẽ.—Eza. 43:4.