2026, SA-SIK RASEM A 3-9
YƖƖLL 113 Laafɩ la zems-n-taar bee tõnd sʋka
Ra kao-y y taabã bʋʋd b yam-yãkr yĩng ye
“Ra kao[-y] ned bʋʋd a tagsa sẽn yaa toor ne yãmb yĩng ye.”—ROM. 14:1.
D SẼN NA N BÃNGE
D na n yãa d sẽn tõe n maan to-to n da kaood d tẽed-n-taasã bʋʋdo, baa b sã n wa yãk yam tɩ d tagsdẽ tɩ pa sõma.
1-2. Bõe yĩng tɩ d mi n yãkd yam sẽn yaa toor-toore?
YÃMB zoe n yãka yam bũmb ning wɛɛngẽ tɩ ned a to ning-y taal bɩ? Yãmb zoe n ninga y tẽed-n-taag taal a yam-yãkr yĩng bɩ? Yaa vẽeneg tɩ tõnd fãa la bal na n leoka sogs-kãensã b yiibã tɩ n-yẽe.
2 D sẽn mi n yãkd yam sẽn yaa toor-toorã pa segd n ling-d ye. Bõe yĩnga? Bala d yaa toor-toore. Tõnd sẽn get yɛlã to-to wã yaa toor-toore. Rẽ mi n bee ne d buudã neb minundã, b sẽn wub tõnd to-to wã, la yɛl nins d sẽn yã wã. La d pa segd n bas tɩ d sẽn get yɛlã to-to wã sẽn yaa toor-toorã kɩt tɩ laafɩ la zems-n-taar ra zĩnd tigingã pʋgẽ ye.—Efɛɛ. 4:3.
3. Bõe n tõe wa kɩt tɩ d ning d tẽed-n-taag taal a yam-yãkr yĩnga?
3 D tẽed-n-taag sã n wa yãk yam tɩ d tagsdẽ tɩ pa sõma, d tõe n makame n na n kɩt t’a toeem yam, wall d gomd rẽ yell ne neb a taaba. Yaa vẽeneg tɩ yaa d sẽn dat a neerã yĩnga. D nonga d tẽed-n-taasã, n dat tɩ b vɩɩmã yɩ sõma. (Yel. 17:17) Rẽ n so tɩ d pa rat tɩ b yãk yam n maan bũmb n wa maand b bãngẽ, wall sẽn na n sãam bãmb ne a Zeova zoodã ye.
4-5. D tẽed-n-taag sã n yãk yam tɩ d tagsdẽ tɩ pa sõma, bõe la d segd n maane?
4 D tẽed-n-taag sã n yãk yam tɩ d tagsdẽ tɩ pa sõma, d segd n tɩ goma ne-a bɩ? Rẽ bee ne yɛlã sẽn yaa to-to wã. Wala makre, d sã n bãng tɩ d tẽed-n-taag n dat n maan bũmb sẽn kɩɩsd Biiblã noore, d sẽn nong-a wã yĩnga d na n bao n sõng-a lame t’a toeem yam. (Yel. 27:5, 6) La d tẽed-n-taag sã n yãk yam n na n maan bũmb sẽn pa kɩɩsd Wẽnnaam noore, tɩ yaa tõnd bal n tagsd tɩ pa sõma, d maanda wãna? Sõs-kãngã sẽn tik vɛrse ning zugã leokda sokrã. A yeelame: “Ra kao[-y] ned bʋʋd a tagsa sẽn yaa toor ne yãmb yĩng ye.”—Rom. 14:1.
5 La wakat ninga, tõe n yɩɩ toog tɩ d ra ning d tẽed-n-taag taal a yam-yãkr yĩng ye. Sõs-kãngã pʋgẽ, d na n baoo n bãnga bũmb nins sẽn kɩt tɩ d pa segd n kao d taabã bʋʋd b yam-yãkr yĩngã, la d sẽn tõe n wilg to-to tɩ d pa kaood b bʋʋdo. La bõe n tõe n wa kɩt tɩ d kao d tẽed-n-taag bʋʋd a yam-yãkr yĩnga? D na n goma makr a wãn yelle.
BÕE N TÕE N WA KƖT TƖ D KAO D TO BƲƲD A YAM-YÃKR YĨNGA?
6-7. Rɩk-y makr n wilg bũmb sẽn tõe n wa kɩt tɩ d kao d tẽed-n-taag bʋʋd a yam-yãkr yĩnga.
6 D zoe n yãame tɩ d sẽn get yɛlã to-to wã bee ne b sẽn wub tõnd to-to wã, wall yɛl nins d sẽn yã wã. D tõe n tagsdame tɩ d taabã geta yɛlã wa tõndo, la tõe tɩ b tagsgã yaa toore. D gom makr a wãn yelle. Pipi makrã: Nand tɩ saam-biig a ye lebg a Zeova Kaset soaba, a ba wã ra yũuda rãam wʋsgo. Saam-biigã wa n kẽnga soaare, n yã a tẽed-n-taas sẽn yũud rãam. A sũurã sãamame, t’a yeel tɩ b sẽn maandã pa sõma ye. Makr a 2: Saam-bi-poak n lʋɩ bã-kɛgenga, n tõog n tɩp tɩ sãooge. A wa n wʋmame tɩ saam-bi-poak a to n bẽed bã-kãnga, n dat n sõng-a. Rẽ n so t’a pẽdgd-a, n dat t’a tɩp a meng wa yẽ sẽn tɩp a meng to-to wã. Tõe t’a na n wilg-a-la rɩbd kẽer n yeel t’a rɩt rẽ bala, wall tɩt nins a sẽn tall n tɩp a mengã. Makr a 3: Saam-biig n da be ziri tũudmã pʋgẽ. A kisa ziri tũudmã yel-maandɩ. La a wa n wʋmame t’a tẽed-n-taag n kẽng wẽnd-doogẽ a ned kũum yĩnga, t’a sũur sãam wʋsgo.a
7 D gom makr a wãn yell n paase. Makr a 4: Saam-biig a ye bi-bɩɩlem wakatẽ, nebã fãa la bal ra tagsdame tɩ pa zems tɩ saam-biig bas toɛɛnga, wall tɩ saam-bi-poak ning pãntalõ n kẽng tigsga, tigis-kãseng wall n yi koɛɛgã mooneg ye. Saam-biigã miime tɩ tʋm-tʋmd sẽn tũud sɩd la sẽn tar yamã wilgame masã tɩ pa wẽng tɩ saam-biig bas toɛɛnga, wall tɩ saam-bi-poak ning pãntalõ ye. Baasgo a ket n yetame tɩ pa zems tɩ rao sẽn yaa kiris-ned bas toɛɛnga, wall tɩ saam-bi-poak ning pãntalõ n kẽng tigsga, tigis-kãseng wall n yi koɛɛgã mooneg ye. Makr a 5: Kãsem-soab n mi saam-biig sẽn yãk yam n karem n zãage, n wa bas a Zeova tũubu. Masã, b tigingã bi-bɩɩg a ye n yãk yam n dat n karem n zãage. Kãsem-soabã maanda yɩɩre, tɩ kɩt t’a maood n dat tɩ bi-bɩɩgã ne a roagdbã toeem yam.
8. a) Bõe n tõe n wa kɩt tɩ roagd ningd roagdb a taab taale? b) D sã n ningd tigingã neb a taab taale, tõe n waa ne bõe?
8 Ad makr a to, roagdbã yĩnga. Makr a 6: Y sẽn yaa roagdã, y maanda y sẽn tõe fãa n wubd y kambã “a Zeova kiblgã la a saglsã pʋsẽ.” (Efɛɛ. 6:4) La tõe tɩ y getame tɩ roagdb kẽer basda b kambã tɩ b maand bũmb sãnda y sẽn pa sakd tɩ y kambã maane. Wala makre, tõe tɩ y yãka lɛɛr sẽn pa segd n paam y kambã yɩnga, tɩ roagdb kẽer basd b kambã tɩ b yit n zʋʋgd lɛɛr-kãnga. Tõe tɩ roagdb sãnda basda b kambã tɩ b tãood ze-video-rãmb sẽn pa naag ne nen-kɛglem tʋʋma, wall b raad telefõn-dãmb n kõt b kambã tɩ b ket n paoodẽ. Rẽ tõe n kɩtame tɩ y kambã getẽ tɩ y yaa dem-dem wʋsgo. B tõe n soka yãmb yaa: “Bõe yĩng tɩ yãmb pa wa d zo-rãmbã roagdbã?” Sã n yaa woto, y tõeeme n wa ningd roagdb a taabã taale. Sɩd-sɩda kiris-neb a taab sã n yãk yam tɩ tõnd getẽ tɩ pa sõma, tõe n sãama d sũuri, la kɩt tɩ d ningd-b taale. Tõe n yɩɩ b sẽn daad bũmb ninsã wɛɛngẽ, b sẽn mi n dɩk vʋʋsem n tog sorã, wall b sẽn maand bũmb nins n deemdẽ wã wɛɛngẽ. La d pa segd n bas tɩ d sẽn get yɛlã to-to wã wa kɩt tɩ d maan bũmb sẽn na n sãam tigingã neb zems-n-taarã ye.
9. Bõe la d pa segd n yĩmi? (Ges-y fotã me.)
9 Kiris-neb a yiib sã n yãk yam bõn-yɛng wɛɛngẽ tɩ b yam-yãkrã yaa toor-toore, pa rat n yeel tɩ yam-yãkr a ye n yaa sõma t’a to wã pa sõma ye. (Rom. 14:5) Yaa sɩd tɩ Biiblã yeelame tɩ kiris-nebã segd n ‘talla yam a yembre.’ La yaa a Zeova noyã sakr wɛɛngẽ. Pa rat n yeel tɩ d segd n talla tagsg a ye bũmb fãa wɛɛngẽ ye. (2 Kor. 13:11) D tõe n dɩka d yam-yãkr toor-toorã n mak ne d sẽn na n maan to-to n tog sor n kẽng zĩ-yɛnga. Naoor wʋsgo d sẽn na n maan to-to wã tõe n yɩɩ toor-toore, la d fãa na n taa be. D sẽn na n maan to-to wã bee ne bũmb nins sẽn noom tõndo, la d yɛlã sẽn yaa to-to wã. Woto me, kiris-nebã tõe n yãka yam toor-toor bũmb kẽer wɛɛngẽ, la d fãa bõn-daabã yaa a ye. Yaa noog a Zeova sũuri. Rẽnd d pa segd n ning d to taal a yam-yãkr yĩng ye.—Mat. 7:1; 1 Tes. 4:11.
Neb sã n dat n tog sor n kẽng zĩ-yɛnga, b sẽn na n maan to-to n ta be wã tõe n yɩɩ toor-toore. Woto me, kiris-nebã tõe n yãka yam toor-toor bũmb kẽer wɛɛngẽ (Ges-y sull a 9)
BÕE YĨNG TƖ D PA SEGD N KAO D TO BƲƲD A YAM-YÃKR YĨNGA?
10. Sã n yaa ne Zak 4:12, bõe la d pa tar sor n na n maane, la bõe yĩnga?
10 Biiblã wilgda bũmb wʋsg sẽn kɩt tɩ d pa segd n kao d to bʋʋd a yam-yãkr yĩnga. D na n goma bãmb b wãn yelle. D pa tar sor n na n kao d taabã bʋʋd b yam-yãkr yĩng ye. (Karm-y Zak 4:12.) A Zeova n yaa tõog lugunda, la bʋ-kaood sẽn yaa tɩrgã. Yaa yẽ bal n tar sor n na n wilg d sẽn segd n maan la d sẽn pa segd n maane. Rẽnd yaa a Zeova n tõe n sok d tẽed-n-taasã b yam-yãkr toor-toorã yĩnga, pa tõnd ye. (Rom. 14:10) Baa d tẽed-n-taag sã n yãk yam tɩ d tagsdẽ tɩ pa sõma, d pa tar sor n na n kao a bʋʋd wall d ning-a taal ye.b
11. Bõe la d tõe n maan n sõng tɩ zems-n-taar zĩnd tigingã pʋgẽ? (Ges-y fotã me.)
11 A Zeova ratame tɩ neb nins sẽn tũud-a wã zemsd taaba, a pa yeel tɩ b wõnd taab ye. D sẽn yaa toor-toorã nooma a Zeova. D sã n ges bũmb nins a sẽn naanã, d nee rẽ vẽenega. Wala makre, baa tɩ-yɛng meng vãad pa zems taab kɛpɩ ye. Tags-y ninsaalbã me yelle. Neb milyaar a nii la zak n be tẽngã zugu. La neb a yiib ka be tɩ b yalẽ wã wall b zʋgã yaa a yembr kɛpɩ ye. A Zeova naana tõnd tɩ d yaa toor-toore. A pa rat tɩ d bũmbã fãa wõnd taab ye. La a ratame tɩ d zemsd taaba. Rẽ n so tɩ d maand sẽn tõe fãa tɩ zems-n-taar ket n be d sʋka, n pa basdẽ tɩ d sẽn yaa toor-toorã welg-d ye. D miime tɩ tigingã neb zems-n-taarã tara yõod n yɩɩd tõnd mengã sẽn get yɛlã to-to wã, la sẽn noom tõndã.—Rom. 14:19.
A Zeova naana tõnd tɩ d yaa toor-toore, la a ratame tɩ zems-n-taar zĩnd d sʋka (Ges-y sull 11)
D SẼN TÕE N WILG TO-TO TƖ D PA KAOOD D TAABÃ BƲƲDO
12-13. D sã n wa tagsdẽ tɩ ned ‘rɩka so-wẽnga,’ bõe la d pa segd n yĩmi? (Galat-rãmbã 6:1; ges-y zĩ-gũbrã me: “Y sã n wa tagsdẽ tɩ ned yam-yãkr pa sõma.”)
12 Ned sã n wa yãk yam tɩ y tagsdẽ tɩ pa sõma. Sok-y y meng yaa: ‘A sɩd “rɩka so-wẽng” bɩ, bɩ yaa a yam-yãkrã n yaa toor ne maam bala?’ Sã n mik t’a sɩd rɩka so-wẽnga, sor sẽn na n kɩt t’a wa maan bũmb sẽn kɩɩsd Biiblã noore, bɩ y sok y menga: ‘Yaa maam n segd n sagl-a bɩ, bɩ yɩta sõma tɩ ned a to sagl-a, wala makre, kãsem-soaba?’ Sã n mik tɩ y tõe n sagl-a lame bɩ y modg n maan dẽ ne bʋgsem. (Karm-y Galat-rãmb 6:1.) La naoor wʋsgo, y mikdame t’a soabã pa maan sẽn yaa wẽng ye. Yaa a sẽn get yɛlã to-to wã n yaa toor ne yãmb bala. Sã n yaa woto bɩ y ra ning-a taal a yam-yãkrã yĩng wall y wɩd-a ye. Sak-y n deeg-y t’a tara sor n na n yãk a toorẽ yam, la y ra kao a bʋʋd ye.—Rom. 14:2-4.
13 D rɩk makre. Yãmb ne y zoa sã n tũ taab n kẽng rɩɩb zĩigẽ, y na n pẽdgdame n dat t’a ra rɩɩb ning yãmb sẽn na n da wã bɩ? Ayo. Y na n basame t’a ra rɩɩb ning a sẽn date. Baa yãmb sã n pa nong rɩɩb ning a sẽn na n da wã, pa yell ye. Bala pa yãmb n na n dɩ ye. Yaa vẽeneg tɩ y pa na n dat tɩ y zoa wã pẽdg yãmb tɩ y ra rɩɩb ning sẽn noom yẽ wã ye. Woto me, d na n basdame tɩ d taabã yãkd b toorẽ yam, n pa pẽdgd-b n dat tɩ b maand yɛlã wa tõnd sẽn datã ye.
14. Y sã n wa rat n yãk yam, wãn to la y tõe n sõng tɩ zems-n-taar kell n zĩnd tigingã pʋgẽ? (1 Korẽnt rãmbã 8:12, 13)
14 Y sã n wa rat n yãk yam. Y sã n maand y sẽn tõe fãa sẽn na yɩl n da maan bũmb n sãam y taabã sũuri, y sõngdame tɩ zems-n-taar ket n be tigingã pʋgẽ. (Karm-y 1 Korẽnt rãmb 8:12, 13.) Wakat ninga y tõe n miime tɩ y sẽn dat n yãk yam ningã pa wẽng ye. La sã n mik tɩ na n sãama y tẽed-n-taag sũuri, “bee nafr” sɩda?c (1 Kor. 10:23, 24) Sã n wa yaa woto d na n tagsa d taabã yelle, n da maan sẽn noom tõnd mengã bal ye. (Rom. 15:1) Yaa sɩd tɩ d zoe n yãame tɩ d taabã segd n sak n deegame tɩ tõnd tara sor n tõe n yãk d toorẽ yam, wa tõnd me sẽn segd n sak n deeg tɩ b tara sor n na n yãk b toorẽ yamã. La segdame me tɩ d ning Biiblã saglg ning sẽn be Rom dãmb 12:18 pʋgẽ wã d yamẽ. Be b yetame: “Sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka.” Rẽ n so tɩ d maand d sẽn tõe fãa sẽn na yɩl tɩ laafɩ zĩnd tõnd ne d taabã sʋka, n pa maand bũmb sẽn na n sãam b sũy zaalem ye.
15. Bõe la kãsem-dãmbã tõe n maan n sõng tɩ zems-n-taar kell n zĩnd tigingã pʋgẽ? (1 Korẽnt rãmbã 4:6)
15 Kãsem-dãmbã sẽn tõe n wilg to-to tɩ b sak n deegame tɩ neb a taabã tara sor n tõe n yãk b toorẽ yam. Kãsem-dãmbã sã n pa lugund noy bũmb nins wɛɛngẽ sẽn yaa ned kam fãa n yãkd a toorẽ yamã, n pa maandẽ tɩ “zʋʋg bũmb nins sẽn gʋls” Biiblã pʋgẽ wã, b sõngdame tɩ laafɩ kell n zĩnd tigingã pʋgẽ. (Karm-y 1 Korẽnt rãmb 4:6.) Woto rat n yeelame me tɩ b pa na n yeel bũmb sẽn pa zems ne sagls nins sẽn be tõnd sɛbã pʋsẽ wã sẽn tik Biiblã zugã ye. Sẽn paase, kiris-ned sã n kos kãsem-soab sõngre, a pa na n tik a bãngrã la a minimã bal n kõ-a saglg ye. A na n tika Wẽnnaam Gomdã n sagl-a.—Eza. 48:17, 18.
16. Kãsem-dãmbã sull sã n yãk yam bũmb ning wɛɛngẽ, wãn to la kãsem-soab fãa tõe n wilg t’a teenda rẽ?
16 Kãsem-dãmbã sull sã n yãk yam bũmb ning wɛɛngẽ, b ned kam fãa teenda rẽ. B rengd n pʋʋsa Wẽnnaam n kos-a a vʋʋsem sõngã, la b ges Biiblã sẽn yet bũmb ning rẽ wɛɛngẽ wã n yaool n yãk yam. Rẽ poore kãsem-soab fãa segd n teela yam-yãkrã, baa sã n pa zems ne a sẽn da tagsdã. (Efɛɛ. 5:17) Sẽn paase, kãsem-dãmbã modgd n tũuda sagls nins Biiblã la tõnd sɛbã sẽn kõtã, n pa golemd goamã sẽn na yɩl tɩ zems wa bãmb sẽn tagsdã ye. Wala makre, kãsem-soab pa na n tik gomd sẽn be tõnd sebr pʋgẽ n teel a tagsgo, n pa reng n bao n wʋm sebrã sẽn yetã võor sõma ye.
17. D sã n wilgdẽ tɩ d sak n deegame tɩ ned kam fãa tara sor n na n yãk a toorẽ yam, wãn to la na n naf tigingã?
17 Sõs-kãngã pʋgẽ, d yãame tɩ d yaa toor-toore. D sẽn get yɛlã to-to wã, la d sẽn nong bũmb ninsã yaa toor-toore. La rẽ yaa bõn-sõngo! D sẽn yaa neb sẽn yit zĩis toor-toore, tɩ d zʋgã me yaa toor-toorã kɩtame tɩ tigingã pʋgẽ zĩndg be yamleoogo. Rẽ n so tɩ d pa na n bas tɩ d sẽn yaa toor-toorã welg-d ye. D modgdame tɩ laafɩ be d sʋka. D gũusdame n da wa maan bũmb sẽn na n sãam d taabã sũy ye. D sak n deegame tɩ ned kam fãa tara sor n na n yãk a toorẽ yam. D sẽn modgd n maand woto wã nafda tõndo. Kɩtame tɩ d tigingã neb zemsd taab la b tar sũ-noogo.—Yɩɩn. 133:1; Mat. 5:9.
YƖƖLL 89 Kelg la f sake, n paam barka
a Nand tɩ kiris-ned yãk yam a sã n na n kẽnga wẽnd-doogẽ ned kũum yĩng wall yi-kãadem yĩnga, a segd n tagsa bũmb kẽer zug sõma. Ges-y yʋʋmd 2002 sigr kiuug pipi daar Gũusg Gasgã sõsg ning gom-zug sẽn yaa: “Karemdbã sogsgo.”
b Wakat ninga, mi n yaa tɩlɛ tɩ kãsem-dãmbã kao ned sẽn maan yel-wẽn-kãseng bʋʋdo. La b segd n tẽegame tɩ b kaooda bʋʋdã a Zeova yĩnga. Rẽ n so tɩ b tikd a Zeova noyã sẽn yaa tɩrsã n kaood bʋʋdo, n pa tikd b mensã tagsg ye.—Ges-y 2 Kibay 19:6.
c Wala makre, ges-y Vɩɩmd-y wakat sẽn kõn sa! sebrã sak 35, nimero a 5 wã.