A Zeova zãmsda maam hal m yãadmẽ

Nand tɩ m togs-y yel-kãng sẽn baas to-to, m na n lebg n sɩnga hal sɩngrẽ wã. M doga dũni gill zabr a yiib-n-soabã sasa Kalgari sẽn yaa Kanada tẽngã. Na maan yʋʋm pis-yopoe la a nu rũndã, so-pakd sẽn yaa bi-bɩɩg t’a yʋʋr boondẽ t’a Donald Fraser n wa n moon koɛɛgã tõnd zakẽ wã. M ma sak n na n zãmsa Biiblã. A ra nonga bũmb nins a sẽn zãmsdã wʋsgo, la a yĩnsã sẽn da pa noomã kɩtame t’a ra pa tõe n naag tigingã neb n maan bũmb wʋsg ye. Baa ne rẽ, a kell n modgame n wa reeg lisg yʋʋmd 1950 wã. Zu-bʋko a lisgã poore, pa yã n maan yʋʋm a yiib la a ki ye. Wakat kãng tɩ m baaba ra nan pa sak sɩdã ye. La a sakame t’a Zeova Kaset soab na n wɛgs mumbã sõsgã.

Rasem a wãn m ma kũumã poore, saam-bi-poak yʋʋm sẽn vẽsg t’a yʋʋr boondẽ t’a Alice n bool maam tɩ m wa tigsga. Ra yaa saam-bi-poak sẽn paam vʋʋsem sõngã zaeebo. A ra mii maam, bala m ma yĩnsã sã n da são t’a na n kẽng wɩkɛndã tigsgã, m da tũud-a lame. M kosa m baaba sor n na n kẽnge. A sakame, la a yeel t’a na n yãaga maam “vugr bala,” sẽn na yɩl n pʋʋs saam-biig ning sẽn wɛgs m ma mumbã sõsgã barka. Yʋn-kãnga, b maana Wẽnnaam tʋʋmdã lekollã la Tʋʋmdã tigsga. Tigsgã yɩ m baaba noog wʋsgo. Lekollẽ wã, a zãmsa b sẽn tõe n wɛgs sõsg to-to zãma sʋk tɩ yɩ sõma, tɩ rẽ kɩt t’a sũur da yaa noog wʋsg ne saam-biisã sẽn wɛgs sõssã sõma to-to tigsgã sasa wã. M baaba yãka yam n na n kẽnd tigis-kãng semen fãa. Bilf-bilfã, a wa n kẽnda tigissã fãa.

Wakat kãnga, Wẽnnaam tʋʋmdã lekoll yel-gɛt sã n da na n sɩng tigsgã, a boonda neb nins sẽn gʋls b yʋy lekollã yĩngã tɩ ned ning fãa sẽn wʋm a yʋʋr leok yaa: “M bee ka.” Yʋng a ye, mam kos-a lame t’a bool mam yʋʋrã tigsg ning sẽn watã. Saam-biigã pẽga maam sõma. La a pa sok maam n ges m sã n wʋmda m sẽn kos bũmb ningã võor ye.

M da pa mi tɩ m sẽn kos tɩ b bool m yʋʋrã tigsgã sasa wã rat n yeelame tɩ m sak n na n wɛgsa sõsg lekollã sasa ye. Mam sẽn da rat bal yaa b bool m yʋʋrã. Semen ning sẽn pʋglã, a boola mam yʋʋrã tɩ m wɩsg m meng n yeel tɩ m bee ka. Tigsgã poore, saam-biisã la saam-bi-pogsã pẽga maam sõma. Semen a wãn poore, b kõo maam seb-pɛdg ning yell m sẽn gom sɩngrẽ wã.

M da pa mi m sẽn maandg ye! Wakat kãnga, karen-biig fãa sõsg ra segd n kaoosa minit a yoob n tar n dabd minit a nii. Biibl kareng bal ra ka be ye. M baaba sõnga maam tɩ m segl sõsgã la a kɩt tɩ m togs n yɩlem naoor pisi n yaool n tɩ wɛgs-a tigsgã sasa. Rẽ poore, yel-gɛtã kõo maam sagls sẽn sõng-m wʋsgo. Yʋʋm wʋsg pʋgẽ, a Zeova tũnuga ne m baaba, saam-biis la saam-bi-pogs sẽn tar minim, n paas a siglgã n zãms-m bũmb wʋsgo.

A ZEOVA KELL N ZÃMSA MAAM BŨMB WƲSGO

M sẽn wa n sɩng koɛɛgã moonegã, a Alice sẽn yaa saam-bi-poak ning yell m sẽn zoe n gomã sõng-m lame. Wakat kãnga, b ra sagenda tõnd tɩ d sã n seg ned t’a sak n na n kelg bɩ d karem vɛrse-rãmb a tãab la d kãab-a sebre. D sã n da ta zak noor tɩ yaa maam n segd n gome, a Alice ra togsda a yʋʋr la a sɩng goamã. Rẽ poore a kɩtdame tɩ mam karem pipi vɛrse wã la m kell n gome, n wa karem yiib-n-soab la tãab-n-soab vɛrse wã, la m kãab a soabã sebre. Kaoosg zugẽ, m wa n bãnga m sẽn tõe n sɩng sõsg ne ned to-to m toore. M baaba sẽn deeg lisg yʋʋmd 1954 baasgẽ wã poore, lebga yẽ n zãmsd maam bũmb wʋsg koɛɛgã mooneg wɛɛngẽ. A sẽn da yaa a ye n wubd maamã yĩnga, a maana a sẽn tõe fãa sẽn na yɩl tɩ m nong a Zeova. Tũudmã tʋʋm wɛɛngẽ, a ra pa reemd ye. Wakat fãa m da miime tɩ tigissã kẽnd la koɛɛgã mooneg yaa tɩlɛ.

M karma lekoll yʋʋm piig la a yiibu, n zãms bũmb wʋsg sẽn naf-m kaoosg zugẽ. Wala makre m zãmsa gɛɛla, la Ãngilindã goam sẽn wʋgd to-to wã. D sẽn wa n zãmsd Ãngilindã, b wilg-d-la d sẽn tõe n mams kibar n gʋls to-to. M sẽn tʋmd biru ning sẽn get sɛbã gʋlsg yellã pʋgẽ rũndã-rũndã wã, rẽ nafd-m-la wʋsgo.

Nebã wae n sokda maam bũmb ning sẽn kɩt tɩ m nong mizikã. M baaba ne m ma fãa ra nonga miziki. M sẽn wa n tar yʋʋm a yopoe wã, m zãmsa piano wẽeb wakat a wãna. La karen-saambã ra pa tagsd tɩ m tõe n paama minim sõma rẽ wɛɛngẽ ye. A sagla m baaba t’a kɩt tɩ m bas zãmsgã. M da wʋmda rẽ võore. Bala piano wã wẽebã ra pa noom maam wakat kãng ye.

Kiis a wãn poore, m baaba baoo karen-saamb a to. So-kãngã, m da zãmsda piano wẽeb la yɩɩla, hal tɩ m minimã ra paasdẽ. M sẽn wa n yaa bilfã, m koɛɛgã ra noomame. M maana wags-taab n paam kũun naoor a wãna. M da rat n lebga mizik karen-saamba, n tõog n ges m meng yell la m yɩ so-pakda. La m wa n bãngame tɩ sẽn na yɩl n zãms mizikã n segl m meng ɛgzame-rãmbã yĩngã na n dɩka sẽk wʋsgo. Rẽ n so tɩ m bas la m lebg wakat fãa so-pakda. Yɩɩ yʋʋmd 1963.

SO-PAKRÃ KÕO MAAM SŨ-NOOG WƲSGO

M sẽn lebg wakat fãa so-pakdã yʋʋmd poore, b yãka maam tɩ m lebg zall so-pakda, n tʋm maam Kapuskasing sẽn be Õntariyo soolmẽ wã. M tũud-n-taagã ra yaa a Daniel Skinner. A yʋʋmã ra yɩɩda maam naoor a yiibu. A zãmsa maam tigingã tʋʋm wʋsgo. Mam sẽn wa n tar yʋʋm pisi wã, b yãka maam tɩ m naag kãsem-dãmbã sull ning sẽn get koe-moonegã yellã. Rẽnd bũmb wʋsg la m da segd n zãmse. Siglgã sẽn ket n sagend kãsem-dãmbã tɩ b zãms kom-bɩɩsã noom-m-la wʋsgo. B sã n wɩsg b menga, b tõe n tʋma tʋʋm wʋsg a Zeova yĩnga, baa b sã n ket n paoodẽ.

Kapuskasing vɩɩmã ra pa nana ye. Bala waoodã tara pãng wʋsg be. Sẽn paase, maam ne a Daniel ra kẽnda nao zĩig fãa la bala. La bũmb a ye n maan be tɩ yɩ-m noog wʋsgo. Yaa m sẽn bãng saam-bi-poak a Linda Cole sẽn wa n lebg m pagã.

A Linda ra yaa koe-moond sẽn tar yẽesem. A ra tara lebg-n-tɩ-ges-rãmb wʋsgo. A ra yaa kõata, la a nong neba. A ma wã yʋʋr la a Goldie. Ra yaa saam-bi-poak sẽn maand sɩd ne a Zeova. Sɩngrẽ wã, a Linda ba a Allen ra pa nong sɩdã ye. Baa ne rẽ, a Goldie ra tara a Linda n paas a John ne a Gordon sẽn yaa a Linda tãopã n kẽnd Rĩungã roogẽ wakat fãa, la a zãmsd-b koɛɛgã moonego. A Goldie, a Linda, a John ne a Gordon fãa yɩɩ so-pakdba. Yʋʋm wʋsg poore, a Allen saka sɩdã, n da tʋmd wʋsg tigingã pʋgẽ.

Yʋʋmd 1965 wã, b boola maam Kanada Betɛllẽ wã tɩ m na n maan Rĩungã tʋʋmd lekoll sẽn da kaoosd kiuugã. M sẽn wa n be lekollẽ wã, b kõo maam Galaad lekollã demand tɩ m gʋlse. M da zɩ n tags tɩ m tõe n yɩɩ misioneer ye. La m gʋlsa demandã. B bool-m-la Galaad lekoll 42 soabã. Galaad lekollẽ wã, karen-saam-dãmbã ra kõta tõnd rapoor-dãmb wakat-wakate, n wilgd zĩig ning d sẽn modgde, la zĩig ning d sẽn segd n modg n paasã. Pipi rapoorã b sẽn kõ maamã pʋgẽ, b sagl-m lame tɩ m modg n bãng a Zeova siglgã sẽn sigl to-to wã sõma. Ra yaa saglg sẽn zemse, bala rẽ tɩ m tara yʋʋm pisi la a ye bala.

Bũmb a ye d sẽn zãms Galaad lekollẽ wã yaa d sẽn tõe n sõs ne zʋrnalis-rãmbã to-to wã: sẽn tʋmd-b radioẽ wã, televiziõ-rãmbẽ wã la sẽn yiisd-b zʋrnall-dãmbã. Rẽ zãmsgã ra noom-m-la wʋsgo. M da pa mi tɩ bũmb nins m sẽn bãngã na n wa naf-m-la wʋsg ye. M na n gomã rẽ yell taoorã.

B TƲMA MAAM SENEGALLE

Galaad lekollã poore, b tʋma maam ne a Michael Höhle Senegall sẽn yaa Afirik tẽngã. Wakat kãng tɩ yaa na maan koe-moondb koabg n be tẽn-kãnga.

Mam sẽn ta be wã kiis a wãn poore, b yeelame tɩ m kẽnd n sõngd Betɛllẽ wã vugr semen fãa. Wakat kãng tɩ Betɛllã ra yaa ro-pʋg a ye bal sẽn be misioneer-dãmb zakẽ. Baa ne rẽ, a Emmanuel Paterakis sẽn da yaa filyallã taoor lʋɩtã ra tẽegda maam wakat fãa tɩ Betɛllã gomda a Zeova siglgã yʋʋr yĩng tẽn-kãng pʋgẽ. Daar a ye, saam-biig a Paterakis yãka yam tɩ d na n gʋls lɛtr n keng misioneer-dãmbã raoodo. Wakat kãnga, yɩl n maan fotokopi-rãmb ra pa nana, tɩ ligdã me ra yaa toogo. Rẽ n so tɩ d ra segd n gʋls lɛta wã yembr-yembr ne masĩn. Yɩɩ tʋʋm-saalga, bala d sã n da tudg fãa, d ra segd n lebg n sɩngame.

Daar-n-kãng zaabre, m sẽn wa n segl n sa n na n kuilã, saam-biig a Paterakis kõo maam ãnvelop n yeel yaa: “Davɩɩde, sosiete wã gʋls-a foo lɛtre.” Mam sẽn wa n pak ãnvelopã, m mikame tɩ yaa lɛta nins mam sẽn gʋlsã a ye. Rẽ kɩtame tɩ m bãng tɩ Betɛllã yaa bedr t’a yaa kɩdg me, a sẽn gomd siglgã yʋʋr yĩngã kɩtame tɩ d segd n nand-a.

M yõga zood ne neb wʋsg d tigingã pʋgẽ, tɩ sibr zaabr fãa la bal bɩ d mi n seg taab n kok pemsem. Rẽ ra kõt-d-la sũ-noog wʋsgo. D ket n tara taab kibay hal baa ne rũndã. Mam zãmsa Farend Senegalle. Ket n nafda maam m sã n mi n gilgd n kaagd filyall-dãmbã dũniyã gill zugu.

Yʋʋmd 1968 wã, maam ne a Linda yãka yam n na n kẽ kãadem. Kiis a wãn pʋgẽ, mam makame n na n bao tʋʋmd sẽn pa rɩkd m sẽkã wʋsg sẽn na yɩl tɩ maam ne a Linda wa tõog n yɩ so-pakdb Senegalle. La tʋʋmã taoor dãmb ra pa wae n dɩkd sãambã tʋʋm ye. Yaa tẽng-n-dãmbã la b ra baooda. Rẽ n so tɩ m lebg n leb Kanada tɩ d kẽ kãadem. D kãadmã poore, b yãk-d lame tɩ d lebg zall so-pakdba, n tʋm-d Edmundston sẽn be Nuvo-Brõnswik soolmẽ wã. Edmundston yaa tẽn-bil sẽn be Kebɛk soolmã toadgẽ.

D YƖƖ SO-PAKDB NUVO-BRÕNSWIK LA KEBƐK

Koe-moondb ra pa be tẽngã pʋgẽ ye. Biiblã karen-biisã me ra yaa bãmb b wãn bala. Katolikã tũudum ra tara pãng wʋsgo. Zagsã fãa la bal noyã, b ra gʋlsame yaa: “D pa rat a Zeova Kaset rãmbã ka ye.” Rũndã-rũndã, d sã n yã zak noor sẽn gʋls woto, d pa na n tɩ moon be ye. La wakat kãnga ra pa yell ye. Rẽ n so tɩ d ra moond zagsã fãa pʋsẽ. Semen fãa, Katolikã taoor dãmb ra kɩtdame tɩ b gʋls zʋrnallẽ wã yaa: “D gẽes a Zeova Kaset rãmbã n dig-b n yiis tẽngã.” Yaa a Zeova Kaset rãmb a naas bal n da be Edmundston wakat kãnga. Yaa a Victor ne a Velda Norberg n paas maam ne a Linda. Rẽnd d ra mi sẽn yaa neb nins yell la b sẽn gomdã.

M pa na n tol n yĩm tigims sull yel-gɛtã sẽn wa n kaag-d pipi wã ye. A sẽn zĩnd ne tõnd semen poore, a yeelame yaa: “Tõe tɩ yãmb sẽn tõe n maan bal yaa sõng nebã tɩ b toeem b tagsg sẽn yaa a soab a Zeova Kaset rãmbã zugã.” Rẽ tɛka, d yãka yam n na n maan dẽ. Yãka nenga. Bilf-bilfu, nebã wa n neeme t’a Zeova Kaset rãmbã sẽn yaa sik-m-mens rãmbã yaa taoor ne Katolikã taoor dãmb sẽn yaa wuk-m-mens rãmbã. Rũndã-rũndã, tigin-bil n be tẽn-kãnga.

D sẽn zĩnd be yʋʋmd poore, b yeel-d lame tɩ d tɩ teel Kebɛk tigin-bedr a ye. Tigin-kãng nebã ra nonga sãamb reegre. D sẽn zĩnd be kiis a yoob poore, b kos-d lame tɩ d gilgd n kaagd tigimsã.

Yʋʋm piig la a naas la d gilg n kaag tigimsã Kebɛk soolmẽ wã. Ra noom-d-la wʋsgo. Wakat kãng tɩ koe-moonegã ra paamda pãng Kebɛk soolmẽ wã. D sẽn wa n gilgd n kaagd tigimsã, d ra wae n yãta zag-yɛng neb sẽn zãmsd Biiblã, n modgd n na n wa reeg lisgu.

D TẼRA SAAM-BIIS SẼN TƲM WƲSG YELLE

Yaa nana tɩ f yõg zood ne saam-biis nins sẽn be Kanada babg ning b sẽn gomd Farendã. B gomda ne pʋ-peelem, n nong laado, la b tar yẽesem. Pa yɩ nana ne b sʋkã wʋsg tɩ b sak sɩdã ye. Sẽn paase, b zagsã rãmb nams-a-la wʋsg b tũudmã yĩnga. Saam-biis la saam-bi-pogs sẽn yaa kom-bɩɩs kẽer roagdb yeel-b lame yaa: “F sã n pa na n bas Biiblã zãmsg bɩ f yi m zakẽ wã!” B kell n maana sɩd ne a Zeova, baa ne namsgã. Yaa vẽeneg t’a Zeova sũur nooma ne-ba.

Neb a taab n be tɩ m pa segd n yĩm b yell ye. Yaa wakat fãa so-pakdb la zall so-pakdb nins sẽn moon koɛɛgã wakat kang Kebɛkã. Wʋsgã yii Kanada babs a taab n wa be. B sẽn da segd n zãms Farendã sẽn yãk a toogo, b ra segd n zãmsa tẽngã nebã minundã la b bao n bãng b sẽn get yɛlã to-to wã, baa b wʋsg sẽn da yaa Katolik-rãmbã.

B wae n tʋmda zall so-pakdbã zĩis koe-moondb sẽn kae. Nebã sẽn da pa nong a Zeova Kaset rãmbã kɩtame tɩ ra yaa toog tɩ b paam ro-gãaga. Yɩl n paam tʋʋmd sẽn pa rɩkd b sẽkã zãng n da yaa toog n yɩɩda. Baa so-pakdb sẽn kẽ kãadem paalem ra naagda taab bãmb b naase, b yoob wall b nii n dɩk roog n naag taab n yaooda. B sã n da pa maan woto, depãens-rãmbã ra na n looga b nugu. So-pakdb-kãens ra tara yẽsem wʋsgo. B sã n da paam ned sẽn sak n sɩng Biiblã zãmsgo, b maanda b sẽn tõe fãa n sõng-a. Rũndã-rũndã, Kebɛk koe-moondbã sõor sẽn lebg wʋsgã, so-pakdb-kãens wʋsg kẽnga zĩis a taab koe-moondb sẽn pa waooge.

D sẽn wa n gilgd n kaagd tigimsã, d ra modgdame tɩ sibr fãa yibeoog bɩ d moon ne kom-bɩɩsã. Woto kɩtame tɩ d bãng zu-loees nins b sẽn maood ne wã. Rũndã-rũndã, kom-bɩɩs nins d sẽn sõng wakat kãngã kẽer bee tẽn-zẽms n yaa misioneer-dãmb wall b tʋmd tʋʋm a taab a Zeova yĩnga.

Wakat kãnga, tigims kẽer ra pa tõe n sõng tõnd tɩ d ra esãens la rɩɩb ye. Rẽ n so tɩ kiuugã sẽn wat n na n ki bɩ d mi n pa le tar wakɩr d poaasẽ wã ye. Sã n wa yaa woto, d teegda a Zeova zãng-zãnga. Bala yẽ n mi d yɛlã sẽn yaa to-to wã. A zɩ n daag-d n bas ye. D ra tõogdame n tɩ kaag tiging ning sẽn pʋgdã.

MAM DƖKA YAM SAAM-BƖƖS SẼN MAAND SƖD NENGẼ

Mam da zoe n yeelame tɩ d sẽn zãms d sẽn tõe n sõs ne zʋrnalis-rãmb to-to Galaadã naf-m-la wʋsgo. D sẽn wa n be Kebɛkã, d paama segb naoor wʋsg n tũnug ne radio wã, tele wã la zʋrnall-dãmbã n gom sɩdã yelle. B ra mi n kɩtame tɩ maam ne a Léonce Crépeault me sẽn da yaa tigims sull yel-gɛtã tɩ sõs ne zʋrnalis-rãmbã. A Léonce Crépeault ra mii rẽ maaneg sõma. A sã n da na n tɩ sõs ne zʋrnalis-rãmb taoor soaba, a ra pa maand wa a mii fãa ye. A ra mi n yeelame yaa: “Patrõ, maam ne m tũud-n-taagã yaa koe-moondb bala. D pa mi d sẽn na n gom to-to radio wã wall tele wã pʋgẽ ye. La b yãka tõnd tɩ d sõng tɩ nebã bãng t’a Zeova Kaset rãmbã rat n maana tigis-kãsenga. D sã n paam tɩ y sõng-do d sũur na n yɩɩ noogo.” A sẽn da sikd a meng woto wã kɩtame tɩ zʋrnalis-rãmb wʋsg sak n sõng-do.

Filyallã wa n yãka maam tɩ m naag saam-biig a Glen How sẽn yaa sosiete wã avoka a ye wã n tʋme. Bũmb sã n da maan tɩ zʋrnalis-rãmbã ra tõe n wa gom a yelle, tõnd n da segd n ges rẽ yelle. Zãmsg ning m sẽn paam Galaadã ne minim ning m sẽn paam a Léonce nengẽ wã naf-m-la wʋsgo. M da getame tɩ m sẽn paam n tʋmd ne saam-biig a How wã yaa zu-zẽkre. Sã n da wa yaa tɩlɛ t’a gom n wilg tɩ siglgã tũuda laloa wã, a ra pa yɛɛsd ye. La sẽn yɩɩd fãa, a ra nong a Zeova ne a sũur fãa.

Yʋʋmd 1985 wã, b kɩtame tɩ d kẽng Kanada wĩndg sẽn lʋɩtẽ sẽnesã n tɩ gilgd n kaagd tigimsã. Ra yaa sẽn na yɩl tɩ d pẽneg m baaba, n paam n sõngd-a. A maana kaalem kiuug a tãab poore. D kell n paa Kanada wĩndg sẽn lʋɩtẽ sẽnesã n gilgd n kaagd tigimsã n tãag yʋʋmd 1989 wã. Yʋʋm-kãnga, b boola tõnd tɩ d wa tʋm Etazĩni Betɛllẽ wã hal tɩ ling-du. Rẽ tɩ m sẽn lebg tigims sull yel-gɛtã kolga yʋʋm piig la a wɛ. D sẽn wa n gilgd n kaagd tigimsã, d gãanda rot kobs pʋsẽ. Saam-biis la saam-bi-pogs sẽn nong sãamb reegr n bool tõnd naoor tusa tɩ d naag taab n dɩ. D sũur yaa noog wʋsg ne neb nins fãa sẽn sak n deeg tõnd b zakẽ, la sẽn bool-d tɩ d naag taab n dɩ wã.

D YIK N TƖ ZĨNDA ETAZĨNI

D sẽn ta Burkilinnã, b kɩtame tɩ m tɩ tʋm biru ning sẽn get koɛɛgã mooneg yellã pʋgẽ. M pa na n tol n yĩm bũmb nins m sẽn bãng be wã ye. Bũmb a ye m sẽn bãng yaa tɩ m pa segd n tags tɩ m mii bũmbu, n pa reng n bao n bãng a vɩʋʋg ye. Yʋʋmd 1998 wã, b kɩtame tɩ m tɩ tʋm biru ning sẽn get sɛbã gʋlsg yellã pʋgẽ. Hal n tãag rũndã, m ket n zãmsdã sɛbã gʋlsgo. Yʋʋm wʋsg pʋgẽ, m da sõngda saam-biig a John Barr sẽn da yaa sull ning sẽn get sɛbã gʋlsg yellã taoor lʋɩtã. M sũur ket n nooma ne zãmsg ning m sẽn paam a nengẽ wã, la wakat ning d sẽn da be ne taabã. Ra yaa saam-biig sẽn sɩd rɩkda a Zeezi togs-n-taare.

Mam sẽn paam n tʋmd ne biru ning sẽn get sɛbã yiisg yellã saam-biis la saam-bi-pogsã sẽn yaa sik-m-mens rãmbã noom-m-la wʋsgo. B kota a Zeova sõngr b tʋʋmdã pʋgẽ wakat fãa, n miẽ tɩ bũmb nins b sẽn tõogd n maandẽ wã yaa vʋʋsem sõngã maasem yĩnga. Pa bãmb minim wall b bãngr yĩng ye.

Sẽn paase, maam ne a Linda paam n tɩ kaaga d tẽed-n-taas sẽn be tẽns koabg la piig pʋsẽ. D paam n sõsa ne misioneer-dãmbã, filyall taoor lʋɩtb sull neba, la neb a taab sẽn kẽes b mens zãng a Zeova tʋʋmdã pʋgẽ, n yã tɩ b sɩd nong a Zeova. D leb n yãame tɩ tẽn-kãens koe-moondbã tara yẽesem la b maand sɩd ne a Zeova baa ne zabã, naongã, la b sẽn namsd-b b tũudmã yĩngã. Yaa vẽeneg t’a Zeova nong-b-la wʋsgo.

Yʋʋm wʋsg pʋgẽ, a Linda teela maam m tʋʋm toor-toorã pʋgẽ. A nonga neba, n baood n na n sõng-b wakat fãa. A tõe n sɩnga sõsg ne ned nana. A tõog n sõnga neb wʋsg tɩ b bãng sɩdã, la a sõng neb kẽer sẽn da bas a Zeova tũub tɩ b lebg n sɩnge. A Linda sɩd yaa kũun sẽn yita a Zeova nengẽ! D sẽn kʋʋndã, d sũur nooma wʋsg d sẽn paamd tɩ kom-bɩɩs sõngd-d bũmb toor-toor pʋgẽ wã.—Mark 10:29, 30.

M sã n lebg n tags yʋʋm pis-nii wã sẽn loogã yelle, m sũur nooma wʋsgo. M sak n deega Yɩɩn-gʋlsdã sẽn yeel bũmb ningã. A yeelame: “Mam Wẽnnaam, yãmb sɩng n zãmsda maam hal m yãadmẽ, la hal n tãag masã, mam moonda yãmb tʋʋm-kãsemsã n pa basdẽ ye.” (Yɩɩn. 71:17) Mam dat n kell n maana woto m yõor tɛka.