D sẽn tõe n sõng d roagdb nins sẽn pa tẽedbã to-to

1-2. Bõe n tõe n kɩt tɩ yɩ toog tɩ tõnd ne d roagdb nins sẽn pa tẽedbã moor yɩ noogo?

DAAR a ye, a Zeezi yeela rao sẽn da rat n lebg a karen-biig yaa: “Leb yir f roagdbã nengẽ, n tɩ togs-b bũmb nins fãa a Zeova sẽn maan n kõ foomã.” (Mark 5:19) A Zeezi yeela woto, bala a miime tɩ nebã fãa la bal sã n paam bõn-sõngo, b nong n gomda rẽ yell ne b roagdba.

² Yãmb ket n tẽra y tagsg sẽn da yaa to-to y sẽn wa n bãng sɩdã paalmã bɩ? Sãmbg sẽn kae, y sũur da nooma wʋsgo, hal tɩ y rat n togs y roagdbã bũmb ning y sẽn bãngã. La tõe tɩ y roagdbã sũur da pa noom ne y sẽn zãmsd Biiblã ne a Zeova Kaset rãmbã ye. Pa rẽ bɩ yaa y sẽn moon-b koɛɛgã to-to wã n pa yɩ ne bʋgsem, tɩ kɩt tɩ b sũyã yiki. Sã n yaa woto, bõe la y tõe n maan tɩ yãmb ne y roagdbã moor le yɩ noog wall kell n yɩ noogo, n pa kɩɩs a Zeova noyã me?

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ, d na n goma bũmb a naas yelle. Pipi, d na n yãa nimbãan-zoeerã sẽn tõe n sõng tõnd to-to tɩ d wilg tɩ d roagdb nins sẽn pa tẽedbãa yell pak-d lame, baa b sã n pa rat n kelg koe-noogã. Yiibu, d na n yãa d sẽn tõe n maan to-to, d roagd sã n wa yeel gomd wall a maan bũmb sẽn tõe n yik d sũuri. Tãabo, d na n yãame tɩ d sã n maand sũ-mar ne d roagdbã la d saagdẽ tɩ b na n wa sɩnga a Zeova tũubu, tõe n sõng-b-la wʋsgo. La naase, d na n yãa d sẽn tõe n wilg d roagdbã to-to tɩ d nong-b lame.

KƲMD-Y B NIMBÃANEGA

4. A Zeezi manesem yɩɩ wãn ne neb nins sẽn da pa rat n kelg koɛɛg ning a sẽn da moondã?

⁴ A Zeezi pa yɩ tao-tao n bas neb nins sẽn da pa rat n kelg koɛɛg ning a sẽn da moondã sõngr ye. A maka a meng ne viyn koaad sẽn maan bũmb toor-toor sẽn na yɩl tɩ kankang sẽn da pa womd biis wome. (Luk 13:6-9) A Zeezi sẽn wa n na n yeel woto wã t’a sẽn sɩng Zʋɩf-rãmbã sõngrã yɩɩda yʋʋm a tãabo. Bõe yĩng t’a ra ket n modgd n sõngd-ba? A ra zoeta b nimbãanega, tɩ kɩt t’a maan sũ-mar ne-ba.

5. Bõe n kɩt t’a Zeezi ra zoet Zʋɩf-rãmbã nimbãanega?

⁵ A Zeezi ra zoeta Zʋɩf-rãmbã nimbãanega, bala a ra miime tɩ b tũudmã taoor dãmb pa sõng-b tɩ b bãng sɩdã a Zeova zug ye. A ra getame tɩ nin-buiidã “yaa wa piis sẽn ka tar pe-kɩɩm ye.” (Mark 6:34) Bilf sẽn deng a Zeezi kũumã a yãba Zerizalɛm yĩng menga, bala a ra miime tɩ tẽngã neb wʋsg na n kiime, b sẽn pa tall tẽebã yĩnga. (Luk 19:41-44) Tõnd me sã n kʋmd d roagdbã nimbãanega, na n kɩtame tɩ d rat n sõng-ba.

6. Bõe yĩng tɩ d segd n maan sũ-mar ne d roagdb nins sẽn nan pa tũud a Zeova wã? (Galat-rãmbã 6:9)

⁶ Karm-y Galat-rãmb 6:9. Baa d roagdbã sã n nan pa rat n bao n bãng a Zeova, d segd n maana sũ-mar ne-ba, n da “koms raood n bas sẽn yaa sõma maaneg ye.” D miime tɩ yɩl tɩ ned sẽn kɩs sɩd ne bũmb nins a sẽn tẽedã toeem n tẽ a Zeova rɩkda sẽka. Wakat n zĩnd tɩ yãmb “da pa tẽed manegre, la y ra pa mi Wẽnnaam dũniyã pʋgẽ” bɩ? (Efɛɛ. 2:12) Sã n da yaa woto, yaa vẽeneg tɩ ned n sõng-yã. Rẽ pa kɩt tɩ yãmb me rat tɩ sã n tõe bɩ y sõng y roagdbã tɩ b bãng a Zeova sɩda?

Y ROAGD SÃ N WA YEEL GOMD WALL A MAAN BŨMB N SÃAM Y SŨURI

7. Tõe tɩ bõe n kɩt t’a Zeezi ma-biisã ra pa tẽed-a?

⁷ Sãmbg sẽn kae, a Zeezi ma-biisã wʋma yel-soalem nins a sẽn maan Galile wã kibare. (Luk 4:14, 22-24) La sɩngrẽ wã b ra pa tẽed-a ye. (Zã 7:5) Bõe yĩnga? Biiblã pa togs rẽ ye. La a wilga bũmb a yiib sẽn kɩt tɩ Zʋɩf-rãmb kẽer pa sak n lebg a Zeezi karen-biisã. Sãnda ra yɛɛsda nebã na wa n daag-b n base. (Zã 9:18-22) Kẽer da mii a Zeezi hal a yãadmẽ, tɩ kɩt tɩ b pa rat n sak n deeg t’a gomda Wẽnnaam yʋʋr yĩng ye. (Mark 6:1-4) Tõe tɩ yaa tagsa a woto buud n kɩt t’a Zeezi ma-biisã ra pa tẽed-a wã. Tõe n yɩɩ woto ne yãmb roagdbã me bɩ?

8. Bõe n tõe n kɩt tɩ d roagd sẽn pa tẽed togs gomd wall a maan bũmb n sãam d sũuri?

⁸ Bao-y n bãng-y bũmb ning sẽn kɩt t’a gom wall a maan woto wã. Tõe t’a Zeezi ma-biisã ra naaga a roagdb nins sẽn yeel t’a “zugã lebgame” wã. (Mark 3:21) Tõe tɩ yaa bõe n wa n kɩt tɩ b yeel woto? Kibarã wilgame t’a Zeezi ra moonda koɛɛgã la a sãoogd bãad-rãmbã wʋsgo, hal n pa tar sẽk n na n dɩ meng ye. (Mark 3:20) A roagdbã tagsame t’a yẽesmã looga noor bɩ? Tõe tɩ yɩɩ woto. Tõnd roagdbã me tõe n wa getame tɩ d nonga d tũudmã tɩ loog noore. Sã n yaa woto la b tagsda, yɩta sõma tɩ d wilg ne d no-goamã la d tʋʋm-tʋmdɩ wã tɩ d pa neb sẽn zẽnd tũudmã yɛl ye.

9. Bõe n tõe n sõng tɩ d roagdbã toeem b tagsg sẽn yaa a soab ne a Zeova Kaset rãmbã? (1 Pɩyɛɛr 3:1, 2) (Ges-y fot-rãmbã me.)

⁹ Ket-y n maand-y-b neere. D sã n gomd ne d roagdbã ne bʋgsem la d maand-b neere, tõe n kɩtame tɩ b toeem b tagsg sẽn yaa a soab ne a Zeova Kaset rãmbã. (Karm-y 1 Pɩyɛɛr 3:1, 2.) Wala makre saam-bi-poak sã n tar sɩd sẽn pa tẽeda, a sẽn kẽnd tigissã la a yit n moond koɛɛgã tõe n kɩtame t’a sɩdã getẽ t’a pa get a yell sõma, wall yikd a sũur menga. A sẽn pa rat t’a sɩdã tags woto wã yĩnga, a tõe n toeema a sẽn moond koɛɛgã wakat ningã sẽn na yɩl n paamd weer n be ne a sɩdã. A tõe n moonda koɛɛgã a sɩdã sẽn wat n tar tʋʋma, wall a sẽn wat n pa be yiri. Saam-bi-poak sã n maand woto sẽn na yɩl n noog a sɩd sũuri, tõe n kɩtame t’a toeem a tagsg sẽn yaa a soab ne a Zeova Kaset rãmbã.

10. Nebã sã n wa wɩt tõndo, wãn to la d tõe n dɩk a Zeezi togs-n-taare?

¹⁰ Ra tags-y tɩ yaa tɩlɛ tɩ y leok wakat fãa ye. B sẽn wa n dõd a Zeezi t’a yaa yão-be-ned la ned sẽn nong divẽ yũubã, a pa yik a sũuri, wall a bao n na n wilg tɩ b sẽn yetã pa sɩd ye. A yeela nebã bal tɩ b ges a manesmã n bãng rẽ sã n yaa sɩd bɩ pa sɩda. (Mat. 11:19) Sẽn paase a ra wilgda ne a manesmã t’a yaa maan-tɩ-zems soaba. (Ges-y Zã 2:2, 6-10.) Nebã sã n wa wɩt yãmb me bɩ y rɩk a Zeezi togs-n-taare. Ra tags-y tɩ yaa tɩlɛ tɩ y wilg wakat fãa tɩ b sẽn yetã pa sɩd ye. Y tõe n wilga ne y tʋʋm-tʋmdɩ wã tɩ y yaa maan-tɩ-zems soaba, la tɩ y sũur nooma ne y vɩɩmã. Rẽ la y roagdbã na n tagse, n wʋm yɛlã vɩʋʋgo. B sã n yã woto, tõe n kɩtame tɩ b bãng tɩ kibay nins b sẽn wʋm a Zeova Kaset rãmbã zugã yaa ziri.

MAAN-Y SŨ-MAR NE Y ROAGDBÃ, LA Y SAAG TƖ B NA N TOEEMAME

11. A Zeezi manesem yɩɩ wãn ne a ma-biisã sẽn da pa tẽed-a wã?

¹¹ Evãnzill-dãmbã wilgame t’a Zeezi kell n maana sũ-mar ne a ma-biisã. Wala makre, d miime t’a sẽn wa n na n maan a pipi yel-solemdã Kana wã t’a ma-biisã ra bee be. (Zã 2:11, 12) Baa ne rẽ, a Zeezi ma-biisã ra pa tẽed-a wa d sẽn zoe n yã wã. La a pa bas n pa le sõng-b ye. Biiblã wilgame t’a Zeezi sẽn maan a pipi yel-solemdã Kana wã yʋʋm a tãab poore, a ra ket n gomda ne a ma-biisã ne bʋgsem.—Zã 7:5-8.

12. Bõe n tõe n sõng-d tɩ ket n saagdẽ tɩ d roagdb kẽer na n wa yãka yam n tũ a Zeova?

¹² D sẽn maneg n wʋm a Zeova nimbãan-zoeerã võor n paasã tõe n sõng-d lame tɩ d kell n saag tɩ d roagdb kẽer na n wa yãka yam n sɩng a tũubu. B sã n wa sãam ziri tũudmã, tõnd roagdbã tõe n tẽegame tɩ tõnd ra goma rẽ yell ne-ba.b (Vẽn. 17:16) B tõeeme meng n wa naag tõnd tũudum hakɩɩkã pʋgẽ to-kãsengã sɩngr poore. La baa rũndã-rũndã menga, d roagdbã sã n wa tar zu-loeese, d na n maana d sẽn tõe fãa n sõng-ba. B sã n wa bãng tɩ tõnd sɩd nong-b lame, tõe n kɩtame tɩ b sak n zãms Biiblã.

WILG-Y Y ROAGDBÃ TƖ Y NONG-B LAME

13. Baa d sẽn tar tʋʋm wʋsg a Zeova tʋʋmdã pʋgẽ wã, d segd n gũusa ne bõe?

¹³ Baa d sẽn tʋmd wʋsg a Zeova yĩngã, d pa rat tɩ d roagdbã wa getẽ tɩ d pa tar b sẽka, wall tɩ d pa le nong-b ye. (Mat. 7:12) Bõe la d tõe n maan n wilg tɩ b yell pak-d lame? D na n goma bũmb a wãn yelle.

14-15. Bõe la d tõe n maan n wilg tɩ d nonga d roagdb nins sẽn pa tẽedbã? Rɩk-y makre.

¹⁴ Sõsd-y ne-ba, la y wae n wilgdẽ tɩ y nong-b lame. D sã n wae n kɩtdẽ tɩ d roagdbã bãngd d keelem, d wilgdame tɩ d nong-b lame. Wala makre d tõe n tool-b-la mesaaze, wall d tool-b fot d sẽn yõk bũmb d sẽn maan tɩ yɩ-d noog sasa. D sã n kõ d roagd kũun baa pa waooge, wall d gʋls-a lɛtr n togs-a gom-noodo, tõe n kɩtame t’a bãng t’a yell pak-d lame, la kɩt tɩ d moorã noomẽ. D sã n maand d sẽn tõe fãa n maand d roagdbã neere, tõe n sõngame tɩ b bãng tɩ d sɩd nong-b lame.

¹⁵ D na n goma a Ana sẽn yaa saam-bi-poak sẽn be Armeni wã yelle. B zakã rãmb nong n bee ne taaba. Sẽn yɩɩd fãa, b nin-yɛng rogem daar tẽegr kibs la tig a taab sasa. A Ana sẽn wa n lebg a Zeova Kaset soabã a roagdbã ra maanda yɩɩre, n tagsdẽ t’a pa na n le nong n be ne bãmb ye. B leb n da maanda yɩɩre, n tagsdẽ t’a sẽn yãk yam n na n lebg a Zeova Kaset soabã na n kɩtame t’a vɩɩmã lebg toogo. Bõe la a Ana maan tɩ b yam gãand bãane? A yeelame: “M sã n wa tɩ kaag m doagdbã, m togsd-b-la bũmb kẽer sẽn maan tɩ m sũur noomẽ, la bũmb sãnda m sẽn maande. Sẽn paase, m nong n boond-b-la m zakẽ wã n wilgd-b m zo-rãmb kẽere. Rẽ kɩtame tɩ m roagdbã fãa la bal mi m zo-rãmbã, n nong b zĩigẽ.” A paasame: “M doagdb wʋsg yeelame tɩ b neeme tɩ mam tara sũ-noogo. B pa le maand yɩɩr mam yĩng ye.”

16. Bõe la a Zeezi maan n wilg t’a ma-biig a Zak yell pak-a lame? (Ges-y tẽngr notã me.)

¹⁶ Wilgd-y tɩ b tara yõod y nifẽ. A Zeezi vʋʋgrã poore a vẽnega a meng ne a ma-biig a Zake, tɩ wilg t’a yell pak-a lame. (1 Kor. 15:7) A Zak sẽn wa n bãng t’a Zeezi ket n nong-a lame wã, a sũur segd n yɩɩ noog wʋsgo. Tõe tɩ yɩɩ a Zeezi sẽn vẽneg a meng ne a Zakã n kɩt t’a kɩs sɩd t’a Zeezi n yaa Mesi wã. Tõe tɩ rẽ poore a Zak goma ne b zakã neb a taaba, sẽn na yɩl n sõng-b tɩ b bãng t’a Zeezi n sɩd yaa Mesi wã.c—Tʋʋ. 1:14.

17. Wãn to la d tõe n tũ Rom dãmb 12:15 goamã? (Ges-y fotã me.)

¹⁷ Karm-y Rom dãmb 12:15. D sã n wilgdẽ tɩ d roagdbã yell pak-d-la wakat ning b sẽn dat sõngr n tɩ yɩɩdã, noog wall toog wakate, tõe n sõngame tɩ b toeem b tagsg sẽn yaa a soab ne a Zeova Kaset rãmbã.d Wala makre, b sã n paam bi-pɛɛlga d tõe n tɩ ges-b lame, la d bao kũun n kõ-b tɩ wilg tɩ d sũur nooma ne rẽ. Ned b sẽn nong sã n maan kaalem d tõe n bels-b lame, wall d maan bũmb n sõng-ba. Sẽn paase d tõe n boonda d roagdbã ne telefõnne, n gʋlsd-b mesaaz-rãmb wall d kẽnd n kaagd-ba, sẽn yɩɩd fãa b sã n wa tar zu-loeese.

18. Wãn to la d tõe n dɩk a Zeezi karen-biig a Ãndere togs-n-taare?

¹⁸ Maan-y tɩ y roagdbã bãng y tẽed-n-taasã. A Ãndere sẽn wa n bãng t’a Zeezi n yaa Mesi wã, a yɩɩ tao-tao n tɩ tall a ba-biig a Pɩyɛɛr n wa a Zeezi nengẽ. (Zã 1:40-42) Tõnd me tõe n maana a buudu. Wala makre, d tõe n boola d roagd t’a wa d tigsga, wall t’a wa naag tõnd ne d zo-rãmb n dɩ. D sã n maan tɩ d roagdbã bãng d tẽed-n-taasã, tõe n kɩtame tɩ b bãng t’a Zeova Kaset rãmbã yaa wa neb a taabã, la tɩ b yaa nin-sõma.

19. Baa d roagdbã sã n pa wʋmd bũmb kẽer d sẽn tẽed võor sõma, manesem-bʋg la d segd n tall ne-ba? (1 Pɩyɛɛr 3:15)

¹⁹ Karm-y 1 Pɩyɛɛr 3:15. D zakã rãmb tõeeme n pa wʋmd bũmb ning sẽn kɩt tɩ d pa rat n sak n maan bũmb kẽerã võor sõma ye. La d sã n maand-b neer la d waoogd-ba, b na n tẽegda rẽ yell wakat fãa. Baa d sẽn pa le naagd-b n maand tig kẽer wall yel-maandɩ sãnda wã, b sã n neẽ tɩ d maanda modgr n mi n be ne-ba, b sũur na n yɩɩ noogo. Wala makre d tõe n mi n kẽnd n kaagd-b lame, n wae n naagd-b n dɩtẽ, la d mi n bao kũun n kõ-ba.

KET-Y N SAAGD-Y TƖ B NA N TOEEMAME

20. Bõe yĩng t’a Zak kibarã tõe n keng d raoodo?

²⁰ A Zak ra pa pʋgd a Zeezi a sẽn wa n be tẽngã zug n moond koɛɛgã ye. La a wa n lebga a Zeezi karen-biiga. (Gal. 1:18, 19; 2:9) D tõe n yeelame t’a wa n bãnga bũmb nins a Zeezi sẽn da zãmsd nebã, n da tẽed rẽ ne a sũur fãa. Wala makre, Wẽnnaam sẽn wa n vẽneg-a t’a gʋls lɛtrã, a kõo kiris-nebã sagls sẽn wõnd sagls nins a Zeezi sẽn kõ nebã a sẽn wa n sõsd ne-b tãngã zugã.e

21. Bõe yĩng tɩ d segd n ket n saagdẽ tɩ d roagdbã na n wa yãka yam n sɩng a Zeova tũubu?

²¹ Baa d sã n modgd n maand d roagdbã neere, la d wilgdẽ tɩ b yell pak-d lame, b tõe n ket n yaa gãs-gãs ne tõndo, wall b pa rat n bao n bãng a Zeova ye. La bõe yĩng tɩ d pa segd n koms raood n bas b sõngre? Bala d sã n maand-b neere, d rɩkda d Wẽnnaam a Zeova sẽn yaa nimbãan-zoɛtã ne a Biig a Zeezi togs-n-taare. (Luk 6:33, 36) Tar-n-tarẽ, d sẽn wilgd tɩ d nong-b lame wã tõe n wa kɩtame tɩ b toeem b tagsg sẽn yaa a soab ne tõndã. B tõeeme meng n wa tẽeg bũmb kẽer d sẽn yeel-b a Zeova la a pʋlemsã zugu. D sã n pa koms raood n bas d roagdbã sõngre, b kẽer tõe n wa yãka yam n wa naag tõnd n tũ a Zeova tɩ kõ-d sũ-noog wʋsgo.