B paam n maanda tigissã ne videokõnferãns maasem

Dũniyã gill zugu, tẽns wʋsg taoor dãmb yiisa noor n wilg tɩ b pa rat tɩ nin-buiidã le pẽnegd taaba, la tɩ b pa rat me tɩ nebã le tigim zamã ye. A Zeova Kaset rãmbã rata ne b sũur fãa n tũ noy nins tẽngã taoor dãmb sẽn yiisã, la b rat me n ket n maand b tigissã. Sẽn na yɩl tɩ rẽ tõoge, tigimsã tũnugda ne videokõnferãns aplikasiyõ-rãmb wa Zoom, n maand b tigissã.

Rẽ wɛɛngẽ, siglgã taoor lʋɩtb sull kõo sor tɩ b yãk ligdã nebã sẽn kõtã n da Zoom aplikasiyõ wã, sẽn na yɩl tɩ d tõog n ket n maand tigissã. Siglgã sẽn maan woto wã sõnga tigims kẽer wʋsgo, bala b ra pa tõe n paam 8 500 F CFA wall 10 000 F CFA bɩ sẽn yɩɩd rẽ, n da aplikasiyõ b sẽn tõe n tall n maan videokõnferãns ye. Tigims kẽer ra kong n tũnugda ne aplikasiyõ ning sẽn pa yaoodã. La neb nins sẽn da tõe n konɛgtã sõor pa waooge, rẽ me, leb n pa aplikasiyõ sẽn kogl sõma ye. Ne Zoom aplikasiyõ ning siglgã sẽn da wã maasem, neb wʋsg tõe n paam n konɛgtame, tigimsã me tõe n gesame tɩ baa fʋɩ ra tiis tigissã ye. Hal n tãag masã, yaa sẽn yɩɩd tigims 65 000 sẽn be tẽns 170 la zak pʋsẽ, n maand tigissã ne aplikasiyõ wã siglgã sẽn da wã maasem.

Ẽndonezi soolmẽ wã, Kairagi tigingã sẽn be Manado, Sulawesi rɩtg babgã basa videokõnferãns aplikasiyõ sẽn pa yaoode, n maand tigissã masã ne Zoom aplikasiyõ ning siglgã sẽn da wã. Saam-biig a Hadi Santoso wilga rẽ yõodã, n yeele: “Baa saam-biis la saam-bi-pogs nins sẽn pa mi telefõnnã bɩ tablɛtã tall n tʋm sõma wã tõeeme masã n konɛgt n maan tigissã la b rɩ a yõodo, bala pa le yaa tɩlɛ tɩ tigissã sasa bɩ b konɛgt naoor ka tɛk ye.”

A Lester Jijón Jr. yaa kãsem-soaba, n be Guayakanes tigingã sẽn be Guayakuil, Ekoatɛɛr soolmẽ wã. A yeelame yaa: “D tẽed-n-taasã sẽn pa tar ligdã yĩnga, ra na n yɩɩ toog ne tigims kẽer tɩ b tõog n da Zoom aplikasiyõ wã, n paam n maand tigissã. Masã, ne Zoom aplikasiyõ ning siglgã sẽn da wã maasem, neb wʋsg tõe n paam n konɛgtame. Kɩtame me tɩ d tõe n yeel neb a taab tɩ b konɛgt n naag tõnd n maan tigissã, n pa yɛɛsd nebã sõor na n wa loog ye.”

A Johnson Mwanza, yaa kãsem-soab sẽn be Lusaka, Ngwerere Nord tigingẽ wã, Zãmbi soolmẽ wã. A yeelame: “D saam-biis la d saam-bi-pogs wʋsg yetame tɩ Zoom aplikasiyõ ning siglgã sẽn da wã sõngame tɩ bãmb ne b tẽed-n-taasã zoodã pãng paase, la tɩ kɩtame me tɩ b neẽ t’a Zeova nong-b lame la a get b yelle.”

Yaa ligdã d sẽn kõt sabab-wẽns yĩngã la siglgã yãk n da aplikasiyõ wã. Yaa yamleoog kũun toor-toorã nebã sẽn kõt dũniyã gill zugã n sõngd tɩ b tõogd n maand woto. Naoor wʋsgo, yaa ne donate.jw.org maasem la nebã kõt ligdã. D pʋʋsd-y-la bark wʋsgo, kũun toor-toorã y sẽn kõtã yĩnga. Sõngdame me tɩ d tõogd n sõngd neb a taab sẽn be dũniyã gill zugu.—2 Korẽnt rãmbã 8:14.