Zerizalɛm-paalgã yaa bõe?

Biiblã sẽn yete

Yaa naoor a yiib la b gom “Zerizalɛm-paalgã” yell Biiblã pʋgẽ. Pa tẽng sɩd-sɩd ye. Makda kiris-neb sull sẽn na n tɩ rɩ naam saasẽ ne a Zeezi, Wẽnnaam Rĩungã pʋgẽ. (Vẽnegre 3:12; 21:2) Biiblã wilgdame tɩ b boonda kiris-nin-kãens tɩ Kiristã pʋg-paala.

Bũmb nins sẽn kɩtd tɩ d bãng Zerizalɛm-paalgã

1. Zerizalɛm-paalgã bee saasẽ. Biiblã sã n wa gomd Zerizalɛm-paalgã yell fãa, a yetame t’a yii saasẽ n sigda, la tɩ malɛgs n gũud tẽngã rignoyã. (Vẽnegre 3:12; 21:2, 10, 12) Sẽn paase, tẽngã yalmã sẽn yaa to-to wã wilgdame t’a pa tõe n zĩnd tẽngã zug ye. A tara kɩrems a naas sẽn zem taaba. Fãa sẽn naag taab yaa staad 12 000.a (Vẽnegre 21:16; La Bible du roi Jacques) Kɩreng fãa zãntlem tog n taa kilo 560. Dẽnd a ra pa tõe n zĩnd tẽngã zug ye.

2. Zerizalɛm-paalgã yaa kiris-neb sull b sẽn boond tɩ Kiristã pʋg-paala. B boonda Zerizalɛm-paalgã tɩ “pʋg-paalã sẽn yaa Pe-bilã pagã.” (Vẽnegre 21:9, 10) Pe-bilã makda a Zeezi Kirist. (Zã 1:29; Vẽnegre 5:12) “Pe-bilã pagã” bɩ Kiristã pʋg-paalã makda kiris-neb nins sẽn na n tɩ zĩnd ne a Zeezi saasẽ wã. Biiblã pʋgẽ, b wilgame tɩ zems-n-taar ning sẽn be kiris-nin-kãensã ne a Zeezi sʋkã, yaa wa zems-n-taar ning sẽn be pag ne a sɩd sʋkã. (2 Korẽnt rãmbã 11:2; Efɛɛz rãmbã 5:23-25) Sẽn paase, Zerizalɛm-paalgã yẽbgrã kug zutu, b gʋlsa “Pe-bilã tʋm-tʋmdb piig la a yiibã yʋy piig la a yiibã.” (Vẽnegre 21:14) Gom-kãensã sõngdame tɩ d bãng Zerizalɛm-paalgã sẽn yaa a soaba, bala b mee kiris-neb nins sẽn na n kẽng saasẽ wã “tʋm-tʋmdbã ne no-rɛɛsdbã yẽbgrã zugu.”​—Efɛɛz rãmbã 2:20.

3. Zerizalɛm-paalgã na n naagame n dɩ naam. Pĩnd wẽndẽ, Zerizalɛm n da yaa Israyɛll na-tẽngã. Yaa be la rĩm a Davɩɩde, a biig a Salomo, la b yagensã zĩnd a Zeova naam geerã zug n dɩ naam. (1 Kibayã 29:23) B ra boonda Zerizalɛm tɩ “tẽn-sõngã.” Dẽnd a ra makda Wẽnnaam Rĩungã, bala Rĩung kãng Rĩmã ra na n yɩɩ a Davɩɩd yagenga. (Neemi 11:1) Zerizalɛm-paalgã b sẽn boond me tɩ “tẽn-sõngã” yaa neb nins sẽn na n tɩ naag a Zeezi saasẽ n ‘dɩ naam tẽngã zugã.’​—Vẽnegre 5:9, 10; 21:2.

4. Neb nins sẽn be tẽngã zugã na n paama bark Zerizalɛm-paalgã maasem yĩnga. B sã n wa gomd Zerizalɛm-paalgã yelle, b yetame t’a yita “Wẽnnaam nengẽ saasẽ n sigda,” tɩ wilgdẽ tɩ ne Zerizalɛm-paalgã maasem, Wẽnnaam na n manega yɛlã tẽngã zugu. (Vẽnegre 21:2) Dẽnd Zerizalɛm-paalgã naaga Wẽnnaam Rĩungã, tɩ Wẽnnaam na n tũnug ne-b n pids a raabã “tẽngã zugu, wa sẽn maand saasẽ wã.” (Matiye 6:10) Wẽnnaam daabã sã n pidsi, neb nins sẽn be tẽngã zugã na n paama barka. Ad bãmb b wãna:

   • Yel-wẽnã yẽesgo. “Vɩɩm koom kʋɩlg” n yit Zerizalɛm-paalgã pʋgẽ n zãgsd “vɩɩm tɩɩsã” sẽn yaa “buud fãa neb bãas tɩɩmã.” (Vẽnegre 22:1, 2) Nebã sẽn na n paam laafɩ tẽebã la yĩnsã wɛɛngẽ wã yĩnga, yel-wẽn pa na n le zĩndi, na n sõng-b lame me tɩ b zems zãng wa Wẽnnaam sẽn da sɩng n datã.​—Rom dãmbã 8:21.

   • Zems-n-taar na n zĩnda Wẽnnaam ne ninsaalbã fãa sʋka. Yel-wẽndã kɩtame tɩ ninsaalbã zãag ne Wẽnnaam. (Ezayi 59:2) Yel-wẽnd sã n pa le be, a Zã bãngr-gomdã na n pidsame. A ra yeelame: “Ges-y-yã! Wẽnnaam fu-roogã bee ne ninsaalbã. Wẽnnaam na n paa ne ninsaalbã, la b na n yɩɩ bãmb neba. Wẽnnaam mengã na n zĩnda ne bãmba.”​—Vẽnegre 21:3.

   • Namsg la kũum pa na n le zĩnd ye. Ne Rĩungã maasem, Wẽnnaam na n “yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye.”​—Vẽnegre 21:4.