Bõe yĩng t’a Zeova Kaset rãmbã pa kẽesd b toog politikã yɛlẽ?
A Zeova Kaset rãmbã sẽn pa kẽesd b toog politikã yɛlẽ wã, yaa b sẽn zãms n bãng bũmb nins sẽn be Biiblã pʋgẽ wã yĩnga. Rẽ n so tɩ d pa votde, d pa baood n na n yɩ politik taoor soaba, d pa makd n na n kɩt tɩ b toeem tẽngã taoor dãmba, la d pa baood me tɩ politikã rãmb tũ d raab ye. Ad bʋʋm a wãn sẽn be Biiblã pʋgẽ sẽn kɩt tɩ d pa kẽesd d toog politikã yɛlẽ:
D rɩkda a Zeezi sẽn pa sak n na n yɩ politik taoor soabã togs-n-taare. (Zã 6:15) A yeela a karen-biisã tɩ b “pa dũniyã rẽnd” ye. Rẽ n so t’a wilg-b vẽeneg tɩ b pa segd n kẽes b toog politikã yɛlẽ ye.—Zã 17:14, 16; 18:36; Mark 12:13-17.
D maanda sɩd ne Wẽnnaam Rĩungã. A Zeezi goma a yell n yeel yaa: “Rĩungã koe-no-kãngã na n moona dũniyã tɛk fãa.” (Matiye 24:14) D sẽn yaa Rĩun-kãng koe-taasdbã, d pa kẽesd d toog tõnd tẽngã, wall tẽng a to politik yɛlẽ ye.—2 Korẽnt rãmbã 5:20; Efɛɛz rãmbã 6:20.
D sẽn pa kẽesd d toog politikã yɛlẽ wã kɩtame tɩ yaa nana tɩ d tõe n moon politik sula toor-toor neb Wẽnnaam Rĩungã koe-noogo. D wilgda ne d no-goamã la ne d manesmã tɩ d kɩsa sɩd tɩ yaa Wẽnnaam Rĩungã n na n wa welg dũniyã zu-loeese.—Yɩɩn-sõamyã 56:11.
Sẽn mik tɩ d pa basd tɩ politikã welgd tõndã, zems-n-taar bee d sʋka. D yaa wa zag-yɛng neba. (Kolos rãmbã 3:14; 1 Pɩyɛɛr 2:17) La pa woto tũudum a taabã pʋsẽ ye. B sẽn kẽesd b toog politikã yɛlẽ wã yĩnga, kɩtame tɩ welsg be b nebã sʋka.—1 Korẽnt rãmbã 1:10.
D waoogda goosneema-rãmbã. Yaa sɩd tɩ d pa kẽesd d toog politikã yɛlẽ ye. La d waoogda nanambs nins sẽn dɩt naam tõnd zugã. Woto zemsa ne Biiblã sẽn sagend tõnd tɩ d maan bũmb ningã. A yeelame: “Bɩ ned kam fãa sak nanambsã.” (Rom dãmbã 13:1) D sakda laloa wã sẽn yet tɩ d maan bũmb ningã, d yaooda lampo-rãmba, la d teend bũmb nins goosneema wã sẽn maand nebã neer yĩngã. Sẽn paase, d pa makd n na n kɩt tɩ b toeem tẽngã taoor dãmb ye. D tũuda Biiblã saglg ning sẽn yet tɩ d pʋʋs “rĩm-dãmbã ne neb nins fãa sẽn tar naamã yĩngã,” sẽn yɩɩd fãa nin-kãens sã n wa rɩkd sard sẽn tõe n kɩt tɩ ned paam lohorem, wall a ra paam lohorem n tũ a tũudum wa a sẽn date.—1 Tɩmote 2:1, 2.
D sak n deegame tɩ neb a taabã tara sor n tõe n yãk b toorẽ yam politikã wɛɛngẽ. Wala makre, d pa makd n na n sãam vot-rãmbã, bɩ n baood n na n kɩt tɩ neb a taabã ra vot ye.
D sẽn pa kẽesd d toog politikã yɛlẽ wã yaa yam-paall bɩ? Ayo. Tẽn-tʋmdbã la pipi kiris-nebã me ra pa kẽesd b toog politikã yɛlẽ ye. Sebr ning b sẽn boond tɩ Au-delà des bonnes intentions wã pʋgẽ, b yeelame yaa: “Yaa sɩd tɩ pipi kiris-nebã ra miime tɩ b segd n waooga goosneema-rãmbã. La b ra miime me tɩ b pa segd n kẽes b toog politikã yɛlẽ ye.” Sur le chemin de la civilisation sebrã me wilgame tɩ pipi kiris-nebã pa maan politik ye.
D sẽn pa kẽesd d toog politikã yɛlẽ wã wata ne gudgr bɩ? Ayo. Goosneema-rãmbã pa segd n maand yɩɩr tɩ d na n waa ne gudgri, bala d yaa neb sẽn nong laafɩ. Yʋʋmd 2001, lekoll a ye (Académie nationale des sciences) sẽn be Ikrɛnnã goma a Zeova Kaset rãmbã sẽn pa kẽesd b toog politikã yɛlẽ wã yell n yeel yaa: “Rũndã-rũndã, neb kẽer n pa nong a Zeova Kaset rãmbã b sẽn pa kẽesd b toog politikã yɛlẽ wã yĩnga. Yaa rẽ yĩng la b sẽn nams a Zeova Kaset rãmbã nazi-rãmbã la kominist-rãmbã naam sasa wã.” Iniyõ Sovietik naamã sasa me, b namsa a Zeova Kaset rãmbã wʋsgo. La baa ne rẽ, wa lekollã sẽn wilgã, “b kell n yɩɩ neb sẽn sakd laloa wã sẽn yet tɩ b maan bũmb ningã. Wala makre, kominist-rãmbã sã n da tall-b n kẽng pʋtẽ wã la izin-dãmbẽ wã, b tʋmda sõma. A Zeova Kaset rãmbã pa maan bũmb b sẽn da tõe n tik n geelg-b wa bɛɛb ye.” Lekollã wilga a baasg goamã pʋgẽ tɩ rũndã-rũndã me, a Zeova Kaset rãmbã sẽn tẽed la b maand bũmb ninsã pa wat ne gudgr tẽng pʋgẽ ye.