Mamsd-y Biiblã kibay y yamẽ

Biiblã tara kibay wʋsg sẽn tõe n sõng tõnd tɩ d bãng bũmb toor-toor sẽn tar yõodo. D sã n mams kiba-kãens d yamẽ, tõe n sõng-d lame tɩ d wʋm d sẽn karemdã võor sõma, tɩ naf-d wʋsgo. Ad bũmb a wãn y sẽn tõe n maan tɩ sõng-y tɩ y mamsd Biiblã kibay y yamẽ.

• Zẽkd-y y koɛɛg n karemdẽ. Y sã n zẽkd y koɛɛg n karemd Biiblã, tõe n sõng-y lame tɩ y mamsd bũmb ning sẽn maanã y yamẽ nana-nana. Y sã n wa karemd Biiblã kibar ne y zakã rãmba, y tõe n pʋɩɩme tɩ ned kam fãa karemd nin-yend goama. Rẽ la karengã na n maneg n yɩ noogo.

• Mamsd-y yɛlã sẽn yɩ to-to. Mams-y neb nins yell b sẽn gomd kibarã pʋgẽ wã tagsg sẽn da yaa a soaba. Wala makre, sok-y y meng yaa: ‘Bõe n kɩt t’a gom woto, wall a maan bũmb ning a sẽn maanã? M sã n da be a zĩigẽ, m tagsg wall m manesem da na n yɩɩ wãna?’

• Maand-y desẽ-rãmba. Y sã n minim n maand desẽ-rãmb sẽn bilgd Biiblã sẽn gomd kibay nins yellã, tõe n sõng-y lame tɩ y maneg n wʋm kiba-kãens võor sõma, baa y sã n pa mi desẽ-rãmb maaneg sõma.