Yãmb sogsgã leoore

◼ Rẽ yĩnga segdame t’a Zeova Kaset soab kẽng n tɩ tɩbs a meng tũudum a taab logtor yirẽ, bɩ n kẽng n tɩ zĩnd zĩig b sẽn so n get sẽn kʋʋl-bã yell bɩ?

Tũudum toɛy-toɛyã mi n mee logtor yiy n tɩbsd neba, pa rẽ bɩ n me zĩig n get sẽn kʋʋl-bã yelle. Naoor wʋsgo, b pa met logtor yiyã b tũudmã teelg yĩng ye. (Wil. 18: 2, 4) Yaa sẽn na n tʋm n bao ligdi. Rũndã-rũndã, logtor yiy kẽer tara tũudum yʋy tɩ yaool n pa tũudmã n so-b ye. Logtor yiy a taab me n be tɩ yaa tũudmã rãmb n so n tɩbsd nebã pa rẽ bɩ n get-b yelle.

A Zeova Kaset soab sã n bẽed n dat logtor yir n kenge, bɩ a sã n dat zĩig a sẽn tõe n tɩ zĩnd tɩ b get a yelle, yaa yẽ meng n segd n yãk a sẽn na n kẽng zĩig ningã. Nina tõe n dat n kẽnga zĩig tũudum sẽn so pʋgẽ t’a sũur kasetã pa ningd-a taale, tɩ nina me sũur kaset ningd-a taale. (1 Tɩm. 1:5) La sẽn yaa a soab fãa, yɛl kẽer yell la d segd n tags sõma.

Wala makre, tõe tɩ yãmb sẽn vɩ zĩig ningã, logtor yir bɩ zĩig b sẽn get neb yell yaa a ye tãa n yaool n tar tũudum yʋʋre. Tõe me t’a to sã n beẽ, yaa zĩig ning sẽn tar tũudum yʋʋrã la b tɩpd nebã sõma bɩ n get b yell neer n yɩɩda. Tõeeme me tɩ yaa logtor yi-kãng pʋgẽ bal la y tõe n paam tɩbsg ning y sẽn datã, pa rẽ bɩ yaa zĩ-kãng bal la yãmb logtorã tõe n ges y yell sõma. Sasa ning me, logtor yiy nins sẽn yaa tũudum n so wã pʋsẽ, b tõe n sak n tɩbsa yãmb n pa ning-y zɩɩm, tɩ logtor yiy nins sẽn pa tũudum n so wã pʋsẽ bɩ b zãgse. Woto fãa yaa yɛl y sẽn segd n tags b zutu, y sã n wa rat n yãk logtor yir n tɩ tɩp y menga.

Y sã n wa kẽng logtor yir tũudum sẽn so pʋgẽ, bɩ zĩig tũudum neb sẽn get neb yelle, y segd n ninga y yamẽ tɩ y ratame tɩ b tɩbs-y bɩ b ges y yelle, tɩ y yao-b rẽ yĩnga. Yaa wa y sẽn na n yao neb tɩ b tʋm y tʋʋmd n kõ-yã. Dẽnd woto pa rat n yeel tɩ y sẽn yao-bã yaa sẽn na yɩl n teel ziri tũudum ye. Yaa tʋʋmd ning b sẽn tʋm n kõ-yã la y yaooda.

Tõnd sẽn yaa kiris-nebã, d sã n wa be yel-kãngã buud taoore, d segd n gũusame n da wa kẽes d mens ziri tũudmã yɛlẽ ye. Sẽn paase, d pa segd n bool tʋm-tʋmdbã bɩ neb nins sẽn wat n get bãad dãmbã tɩ ‘Mõnpɛɛr’ bɩ ‘Masɛɛr’ ye. (Mat. 23:9) D segd n ninga d yamẽ bal tɩ yaa tʋʋm zĩig bɩ logtor yir tɩ tõnd me wa n na tɩp d menga.

B sã n wa gãneg-y logtor yir tũudum sẽn so pʋgẽ, y segd n wilgame tɩ y yaa a Zeova Kaset soaba, la tɩ y ratame tɩ y tigingã kãsem dãmb wat n get yãmba. Kãsem dãmbã na n gesa y yell tẽebã wɛɛngẽ.—1 Tes. 5:14.

Saam-biig bɩ saam-bi-poak sẽn kʋʋl sã n wa be zĩigẽ b sẽn get sẽn kʋʋl-bã yelle, a zakã neb nins sẽn yaa a Zeova Kaset dãmbã, tigingã kãsem dãmbã, n paas tigingã neb a taabã segd n gesa a yell tẽebã wɛɛngẽ. Sẽn yɩɩd fãa, zĩig ning a sẽn be wã sã n yaa tũudum n so. D sã n modg n maan woto, na n kenga nin-kãensã raoodo, la kogl-b tɩ b ra wa tudg n kẽes b mens b tũudmã yɛlẽ bɩ b kibs rãmbã pʋsẽ ye.

D sẽn paam sagl-kãensã wã, ned kam fãa segd n tagsa yɛlã zut neer n yaool n yãk logtor yir ning a sẽn dat n kẽng n tɩ tɩp a menga, bɩ zĩig a sẽn dat n kẽng n tɩ zĩnd tɩ b ges a yelle.—Gal. 6:5.