Sik-m-meng sẽn yaa toogã võore

NEB wʋsg tõe n tagsdame tɩ sik-m-meng pa tar yõod rũndã-rũndã ye. Sẽn yaa-b taoor dãmb rũndã-rũndã wã, la neb nins sẽn wõnd b tõogame tɩ b vɩɩmã yaa sõma wã nong n zẽkda b mense. B wukda b mense, la b maand sẽn noom bãmb bala. Nebã fãa la bal baooda yʋʋr la arzɛgse, b pa baood n na n yɩ sik-m-mens rãmb ye. Neb nins sẽn wõnd b tõogame tɩ b vɩɩmã yaa sõma wã nong n wukda b mense, n yetẽ tɩ yaa bãmb mens modgr yĩng n kɩt tɩ b yaa sõma wã. B sẽn tagsd woto wã kɩtame tɩ b pa tõe n yɩ sik-m-mens rãmb ye.

Bãngd a ye sẽn yit Kanada goma a tẽngã neb yell n yeel tɩ b wʋsg lebga rat-m-yembr la wuk-m-meng rãmba. Rũndã-rũndã, kẽer tagsdame tɩ f sẽn na n maand f sẽn dat n são n f sẽn na n modgd n maand sẽn segde. B getame tɩ masã, yaa ned kam fãa meng yell n pak-a n yɩɩda. Woto kɩtame tɩ nebã tagsdẽ tɩ sik-m-meng pa tar yõod ye.

Yaa sɩd tɩ neb wʋsg yetame tɩ sik-m-meng yaa sõma. La b mensã pa rat n yɩ sik-m-mens rãmb ye. B miime tɩ sik-m-meng yaa sõma, bala sik-m-meng rãmbã zĩid-n-taar yaa noogo. La rũndã-rũndã nebã sẽn wagsd taabã yĩng kɩtame tɩ kẽer tagsdẽ tɩ b sã n sik b mense, b taabã na n sãmbame tɩ b ka võor ye.

Biiblã sẽn yaa Wẽnnaam Gomdã ra pĩnd n togsame tɩ tõnd zamaanã neb na n yɩɩ “wilg-m-mens rãmba, tɩtaam dãmba.” (2 Tɩmote 3:1, 2) Rẽ yĩnga yãmb pa ne tɩ gom-kãngã pidsame sɩda? Yãmb tagsdame tɩ sik-m-meng yaa sõma bɩ? Bɩ y tẽedame tɩ ned sã n yaa sik-m-meng soaba, b na n getame t’a ka võore, la tɩ yaa ned b sẽn tõe n wẽg nana-nana bɩ?

Biiblã wilgdame tɩ sik-m-meng tara yõodo, la a wilgd-d bũmb ning sẽn kɩt tɩ d segd n bao n yɩ sik-m-mens rãmbã. A wilgda vẽeneg tɩ sik-m-meng yaa sõma la a sagend nebã tɩ b modg n yɩ sik-m-mens rãmba. A leb n wilgdame tɩ ned sã n yaa sik-m-meng soaba, pa rat n yeel t’a soab ka võor ye.

[Foto, seb-neng a 3]

D tagsg segd n yɩɩ wãn to ne bũmb nins d sẽn tõog n maanã?