Sɩngr goama

WẼNNAAM Sẽn-tõe-a-fãa wã n yaa yĩngr la tẽng Zu-soaba. Tõnd vɩɩmã la d beoog-daarã bee yẽ nugẽ. A tara tõog n tõe n keo, n sɩbge, n kõ vɩɩm la a reeg-a. D sã n tat a yam, d yɛlã na n yɩɩ sõma, la d sã n pa tat a yam, d yɛlã pa na n yãk neng ye. Dẽnd tara yõod tɩ d sẽn tũud-a to-to wã ta a yam!

Nebã sẽn tũud Wẽnnaam to-to wã yaa toor-toore. D tõe n maka tũudum toɛy-toɛyã ne soaya. Woto wã, so-kãens fãa tata Wẽnnaam yam bɩ? Ayo. A Zeezi sẽn yɩ Wẽnnaam no-rɛɛsã wilgame tɩ yaa soay a yiib bal n be. A yeelame: “Rigno-yalengã, la so-yalengã tar n dabda sãoong zĩigẽ, la neb wʋsg tũuda be. La sor ning sẽn tar n dabd vɩɩm zĩigẽ wã yaa sẽka, t’a rignoorã yaa bãanega, la a yãtbã sõor paoodame.”—Matiye 7:13, 14.

Tũudum buud a yiib bal n be: A yembr tar n dabda vɩɩm zĩigẽ, t’a to wã tar n dabd sãoong zĩigẽ. B yiisa seb-kãngã n na n sõng yãmb tɩ y yã sor ning sẽn tar n dabd vɩɩm sẽn pa sat zĩigẽ wã.