RĨM-DÃMB SEBR A YIIB-N-SOABA

1 A Akaab kũumã poore, Mowaab nebã+ tõdgame tɩ b kõn le sak tɩ Israyɛll soog-b ye.

2 Daar a yembre, Samari rĩm a Akaziya yii a yĩngr doogã võorẽ b sẽn da lud ne yʋkã n lʋɩ n pogle. Dẽ, yẽ tʋma neb n yeel-b yaa: “Kẽng-y Ekron+ nebã wẽnnaam a Baal-zebuub nengẽ n tɩ sok n ges m sã n na n sãoogame.”+ 3 La a Zeova malɛkã yeela Tisbe rao a Eli*+ yaa: “Yik n tɩ seg neb nins Samari rĩmã sẽn tʋmã n sok-b yaa: ‘Yaa Wẽnnaam n pa be Israyɛll bɩ, tɩ yãmb dabd n na n tɩ sok Ekron nebã wẽnnaam a Baal-zebuubi?+ 4 Woto wã, ad a Zeova sẽn yeele: “Fo pa na n yik gãag ning fo sẽn gãeyã zug ye. Hakɩɩka, fo na n kiime.”’” A Eli yeela woto n bas n looge.

5 Nebã sẽn lebg n kẽng rĩmã nengẽ wã, zĩig pʋgẽ a sok-b lame yaa: “Yaa noog tɩ yãmb zoe n lebge?” 6 Tɩ b leok-a yaa: “Rao n wa n seg tõnd n yeel-d yaa: ‘Leb-y rĩm ning sẽn tʋm-a yãmbã nengẽ n tɩ yeel-a yaa: “Ad a Zeova sẽn yeele: ‘Yaa Wẽnnaam n pa be Israyɛll bɩ, tɩ fo tʋm neb tɩ b tɩ sok Ekron nebã wẽnnaam a Baal-zebuubi? Woto wã, fo pa na n yik gãag ning fo sẽn gãeyã zug ye. Hakɩɩka, fo na n kiime.’”’”+ 7 Rĩmã sẽn wʋm dẽ wã, a sok-b lame yaa: “Rao ning sẽn seg yãmb n togs-y gom-kãensa wã yaa wãn-wãna?” 8 Tɩ b leok-a yaa: “A ra yera fuug sẽn maan ne rũms kõbdo,+ n sẽbg a sɛɛgã ne gãong sẽbdga.”+ Zĩig pʋgẽ, rĩmã yeelame: “Yaa Tisbe rao a Eli.”

9 Dẽ, rĩmã tʋma tãb-biis pis-nu naab ne a tãb-biis pis-nu a Eli nengẽ. A sẽn dʋ n ta a Eli nengẽ wã a mikame t’a zĩ tãngã zugu. Yẽ yeel-a lame yaa: “Wẽnnaam daoa,+ rĩmã yeelame tɩ f sigi.” 10 La a Eli leoka tãb-biis pis-nu naabã yaa: “Be neere. Mam sã n yaa Wẽnnaam daoa, bɩ bugum yi yĩngr+ n dɩ foo ne f rap pis-nu wã.” La bugum yii yĩngr n dɩ yẽ ne a rap pis-nu wã.

11 Rĩmã le tʋma tãb-biis pis-nu naab a to ne a tãb-biis pis-nu a Eli nengẽ. Yẽ kẽngame n tɩ yeel-a yaa: “Wẽnnaam daoa, rĩmã yeelame tɩ f sig tao-tao.” 12 La a Eli leok-b lame yaa: “Mam sã n yaa Wẽnnaam daoa, bɩ bugum yi yĩngr n dɩ foo ne f rap pis-nu wã.” La Wẽnnaam kɩtame tɩ bugum yi yĩngr n dɩ yẽ ne a rap pis-nu wã.

13 Dẽ, naoor a tãab-n-soaba, rĩmã tʋma tãb-biis pis-nu naab ne a tãb-biis pis-nu. La naab a tãab-n-soabã rʋʋme n tɩ yĩgimd a Eli taoore, n yõk a sɛɛg n yeele: “Wẽnnaam daoa, mam kot-y lame tɩ y zoe maam ne rap pis-nu wã nimbãaneg n da kʋ-d ye.* 14 Bugum zoe n yii yĩngr n dɩ tãb-biis pis-nu nanambs a yiibã sẽn deng maamã ne b tãb-biis pis-nu wã. Rẽ wã, zoe-y mam nimbãaneg n da kʋ-m ye.”*

15 Dẽ, a Zeova malɛkã yeela a Eli yaa: “Sig n tũ-a la f ra maan rabeem ye.” Woto, yẽ yikame n sig n tũ-a n kẽng rĩmã nengẽ. 16 A Eli yeela rĩmã yaa: “Ad a Zeova sẽn yeele: ‘Fo tʋma neb tɩ b tɩ sok Ekron+ nebã wẽnnaam a Baal-zebuub n ges f sã n na n sãoogame. Yaa Wẽnnaam n pa be Israyɛll bɩ?+ Bõe yĩng tɩ fo pa sok-a? Woto wã, fo pa na n yik gãag ning fo sẽn gãeyã zug ye. Hakɩɩka, fo na n kiime.’” 17 Dẽ, rĩmã kii wa a Zeova sẽn da kɩt t’a Eli togsã. A sẽn da pa tar bi-riblã yĩnga, a yao a Zoram+ n ledg a zĩigẽ n lebg rĩma. Yɩɩ a Zozafat biig a Zoram sẽn yaa Zida rĩmã naamã yʋʋm a yiib-n-soabã.+

18 A Akaziya+ vɩɩmã kibay nins sẽn kellã, la bũmb nins a sẽn maanã, b gʋlsa rẽ fãa Israyɛll rĩm-dãmbã kibay sebrã pʋgẽ.

2 A Zeova sẽn wa n na n dɩk a Eli+ ne sob-kẽeng+ n kẽng saasẽ wã, a Eli ne a Eliize+ ra yii Gilgall+ n watẽ. 2 A Eli yeela a Eliize yaa: “M bõos tɩ f pa ka t’a Zeova tʋma maam Betɛlle.” La a Eliize yeelame yaa: “Mam wẽenda ne a Zeova sẽn vɩ wã, la m wẽenda ne yãmb sẽn vɩ wã, tɩ m pa na n lebg n bas-y ye.” Dẽ, bãmb tũu taab n kẽng Betɛlle.+ 3 No-rɛɛsdbã kom-dibli* wã sẽn be Betɛllã waa a Eliize nengẽ n yeel-a yaa: “Rẽ yĩnga, fo miime tɩ rũndã, a Zeova na n dɩka f zu-soabã n bas foo, t’a ra le yɩ f zu-soab sɩda?”+ T’a leok yaa: “Mam zoe n miime. Sĩnd-y-yã.”

4 A Eli le yeela a Eliize yaa: “M bõos tɩ f pa ka t’a Zeova tʋma maam Zeriko.”+ La a Eliize yeelame yaa: “Mam wẽenda ne a Zeova sẽn vɩ wã, la m wẽenda ne yãmb sẽn vɩ wã, tɩ m pa na n lebg n bas-y ye.” Dẽ, bãmb tũu taab n kẽng Zeriko. 5 No-rɛɛsdbã kom-dibli wã sẽn be Zeriko wã kolga a Eliize n yeel-a yaa: “Rẽ yĩnga, fo miime tɩ rũndã, a Zeova na n dɩka f zu-soabã n bas foo, t’a ra le yɩ f zu-soab sɩda?” T’a leok yaa: “Mam zoe n miime. Sĩnd-y-yã.”

6 A Eli le yeela a Eliize yaa: “M bõos tɩ f pa ka t’a Zeova tʋma maam Zʋrdẽ kʋɩlgẽ wã.” La a Eliize yeelame yaa: “Mam wẽenda ne a Zeova sẽn vɩ wã, la m wẽenda ne yãmb sẽn vɩ wã, tɩ m pa na n lebg n bas-y ye.” Dẽ, bãmb b yiibã tũu taab n looge. 7 No-rɛɛsdbã kom-dibli pis-nu me n da tɩ yas yɩɩga, n get b yiibã sẽn yas Zʋrdẽ kʋɩlgã noore. 8 Dẽ, a Eli rɩka a fuugã*+ n vil-vil n wẽ koomã, la koomã welga goabg la rɩtgo, tɩ b yiibã tab koɛɛng n dʋʋge.+

9 B sẽn dʋʋg kʋɩlgã, a Eli yeela a Eliize yaa: “Kos maam bũmb ning fo sẽn dat tɩ m maan n kõ-fo, nand tɩ b rɩk-m n loog n bas-fo.” Dẽ, a Eliize yeelame yaa: “M kotame tɩ y kõ maam Wẽnnaam vʋʋsmã+ sẽn be ne yãmbã pʋɩɩr a yiibu.”+ 10 T’a Eli leok-a yaa: “Fo sẽn kos bũmb ningã yaa toogo. La f sã n yã maam m dɩkrã sasa, fo na n paama f sẽn kosã. La f sã n pa yã maam, f pa na n paam ye.”

11 B sẽn tũud taab n kẽnd la b sõsdã, zĩig pʋgẽ, bugum saar* ne bugum wed-moos+ n pɩʋʋg b yiibã sʋk n welg-ba, n dɩk a Eli n dʋʋg saasẽ sob-kẽengã pʋgẽ.+ 12 A Eliize ra getame la a zẽk a koɛɛgã n yetẽ yaa: “M ba, m ba! Israyɛll saarã ne a wed-rʋʋdbã!”+ A sẽn wa n pa le ne a Eli wã, a gãda a mengã fuugã n pãrg zĩis a yiibu.+ 13 Rẽ poore, a rɩka a Eli fuugã*+ sẽn lʋɩ wã n lebg n loogdẽ. Yẽ taa Zʋrdẽ kʋɩlgã noor n yalse. 14 Dẽ, yẽ rɩka a Eli fuugã sẽn lʋɩ wã n wẽ koomã n yeel yaa: “A Eli Wẽnnaam a Zeova bee yɛ?” A Eliize sẽn wẽ koomã, koomã welga goabg la rɩtgo, t’a rʋʋge.+

15 No-rɛɛsdbã kom-dibli wã sẽn be Zeriko wã sẽn pa yɩɩg n yã-a wã, b yeelame yaa: “Wẽnnaam vʋʋsmã sẽn da be ne a Eli wã siga a Eliize.”+ Woto, bãmb kẽngame n tɩ seg-a n wõgemd a taoore. 16 Bãmb yeel-a lame yaa: “Rap pis-nu sẽn tar pãng n be ne tõnd ka. D bõos tɩ f bas tɩ b kẽng n tɩ gẽes f zu-soabã. Tõe t’a Zeova vʋʋsmã rɩk-a lame n tɩ lob tãng ning zugu, bɩ long ning pʋgẽ.”+ La yẽ yeela bãmb tɩ b ra tʋm-b ye. 17 La bãmb kell n pẽdg-a lame hal t’a kong n yeel tɩ b tʋm-ba. Bãmb tʋma rap pis-nu wã tɩ b tɩ gẽes-a rasem a tãabo, la b pa yã-a ye. 18 B sẽn lebg n wa a Eliize nengẽ wã t’a bee Zeriko.+ A yeel-b lame yaa: “Mam da pa yeel yãmb tɩ y ra kẽng sɩda?”

19 Tẽngã nebã wa n yeela a Eliize yaa: “D zu-soaba, wa yãmb sẽn ne wã, tẽngã sẽn be zĩig ningã yaa sõma.+ La a koomã pa sõma, tẽngã pa sakd kood me ye.”* 20 Rẽ la a yeel-b yaa: “Bao-y la-bil sẽn yaa paalle, n ning yamsem a pʋgẽ wã n wa kõ-ma.” Dẽ, bãmb tallame n wa kõ-a. 21 A kẽnga ko-bundgã zĩigẽ n tɩ fãeeg yamsmã+ n yeel yaa: “Ad a Zeova sẽn yeele: ‘Mam kɩtdame tɩ ko-kãngã lebg sõma. A pa na n le kʋ neda, bɩ n kɩt tɩ pag yɩ kir ye.’”* 22 La hal n tãag rũndã, koomã lebga sõma wa a Eliize sẽn yeelã.

23 A Eliize yii be n kẽng Betɛlle. A sẽn wa n be sorẽ n loogdẽ wã, kom-dibli n yi tẽngã pʋgẽ n sɩng-a yaalg+ n yetẽ yaa: “Zu-kõogã, looge! Zu-kõogã, looge!” 24 A Eliize kong n wẽnemdame n ges kambã, n kãab-b ne a Zeova yʋʋre. Dẽ, urs-yãans*+ a yiib n yi weoogẽ wã n yõg bãmb pis-naas la a yiib n kʋ.+ 25 A Eliize sãagame n kẽng Karmell+ tãngẽ wã, n tɩ yi be n leb Samari.

3 Zida rĩm a Zozafat naamã yʋʋm piig la a nii-n-soabã, a Akaab biig a Zoram+ lebga Israyɛll rĩma, n dɩ naam Samari yʋʋm piig la a yiibu. 2 A Zoram ra maanda sẽn yaa wẽng a Zeova nifẽ. La a pa maan wẽng n ta a ba wã ne a ma wã ye. Bala a luba kugr ning a ba wã sẽn da kɩt tɩ b lugl a Baal yĩng n pʋʋsdẽ wã.+ 3 La a ra ket n maanda yel-wẽn nins a Nebat biig a Zerobowam sẽn da kɩt tɩ Israyɛll nebã maanã,+ n pa tol n bas-b ye.

4 Mowaab rĩm a Mesa ra yaa pe-gʋʋnda. Yẽ ra kõta Israyɛll rĩmã fadgo.* Ra yaa pe-bi tus-koabga, la pe-raad tus-koabg sẽn pa wõrse. 5 A Akaab kũumã poor bala,+ Mowaab rĩmã tõdgame t’a kõn le sak Israyɛll rĩmã ye.+ 6 Wakat kãnga, rĩm a Zoram yii Samari n tigim Israyɛll tãb-biisã fãa. 7 Yẽ tʋma neb Zida rĩm a Zozafat me nengẽ n yeel-a yaa: “Mowaab rĩmã tõdga maam. Yãmb na n tũu maam tɩ d tɩ zab ne Mowaab bɩ?” T’a Zozafat leoke: “Mam na n yãag-y lame.+ Tõnd yaa bũmb a yembre. Mam nebã yaa yãmb neba, tɩ m wed-moosã me yaa yãmb wed-moose.”+ 8 Rẽ poore, a Zozafat sokame yaa: “So-bʋg la d na n tũ n kẽnge?” T’a Zoram leoke: “D na n dɩka Edom we-raoogã sore.”

9 Woto, Israyɛll rĩmã ne Zida rĩmã n paas Edom+ rĩmã rɩka sore. Bãmb tũu so-gõdem-gõdem n kẽn dasem a yopoe. La koom wa n pa le be bãmb ne rũmsã sẽn da be ne bãmbã sẽn na n yũ ye. 10 Woto, Israyɛll rĩmã yeelame yaa: “Ad yaa yel-beedo! A Zeova peega tõnd d tãabã n na n tɩ ning Mowaab nebã nugẽ!” 11 Rẽ la a Zozafat sok-yã: “A Zeova no-rɛɛs pa be ka tɩ d kos t’a sok a Zeova n gese?”+ Tɩ Israyɛll rĩmã tãb-biig a ye leok yaa: “A Safat biig a Eliize+ sẽn da yaa a Eli sõangdã*+ n be ka.” 12 A Zozafat yeelame yaa: “A tõe n togsa tõnd a Zeova raabo.” Woto, Israyɛll rĩmã ne a Zozafat n paas Edom rĩmã tũu taab n kẽng a Eliize nengẽ.

13 A Eliize yeela Israyɛll rĩmã yaa: “Bõe yĩng tɩ fo wat mam nengẽ?*+ Kẽng f ba wã no-rɛɛsdbã ne f ma wã no-rɛɛsdbã nengẽ.”+ La rĩmã leok-a lame yaa: “Ayo, bala yaa a Zeova n peeg tõnd d tãabã n na n ning Mowaab nebã nugẽ.” 14 T’a Eliize yeel-a yaa: “Mam wẽenda ne tãb-biis naab a Zeova sẽn vɩ wã, soab ning mam sẽn sakdã* tɩ sã n pa Zida rĩm a Zozafat+ yĩnga, mam da pa na n ges foo wall m maan wa m yã-f lame meng ye.+ 15 Tall-y ned sẽn wẽed pɛndg n wa ne.”+ Pɛndgã soab sẽn sɩng wẽebã, a Zeova vʋʋsmã* siga a Eliize.+ 16 Yẽ yeelame yaa: “Ad a Zeova sẽn yeele: ‘Tu-y bogd wʋsg lon-kãngã* pʋgẽ, 17 bala a Zeova yeelame: “Yãmb pa na n yã sobg tɩ b gomd saag ye. La lon-kãngã* na n pida ne koom+ tɩ yãmb ne y rũm-bõonegã la y rũms a taabã sẽn zɩlg zɩɩbã yũ.”’ 18 La bõn-kãngã pa baa fʋɩ ne a Zeova ye.+ Bala a na n ninga Mowaab nebã yãmb nugẽ me.+ 19 Sãam-y tẽns nins fãa sẽn gũbg ne lalsã,+ tẽns nins fãa sẽn yaa sõma n yɩɩdã la tɩɩs nins fãa sẽn yaa sõma wã. Yẽd-y ko-bundsã fãa la y wʋk kug n lob b pʋt nins sẽn yaa sõma wã fãa pʋsẽ n sãam-ba.”+

20 Vẽkembeoogã yibeoogo, sẽn wa n zems yibeoog kood biis kũunã wakate,+ koom n tiig n yi Edom sẽnes n zoet n watẽ, n wa pid longã fãa.

21 Mowaab nebã fãa wʋmame tɩ rĩm-dãmbã watame n na n zab ne-ba. Woto, bãmb tigma rap nins fãa sẽn tõe n bob zab-teedo,* n kẽng n tɩ yals toadgẽ wã. 22 Bãmb sẽn yik yibeoog pĩnda, wĩntoogã vẽenem ra tʋrsda koomã zugu, tɩ Mowaab nebã sẽn be kɩreng a ye wã getẽ tɩ yaa miuug wa zɩɩm. 23 Woto bãmb yeelame: “Yãoã yaa zɩɩm! Hakɩɩka, rĩm-dãmbã wẽneg n kɛɛ taab ne b sʋʋsã n kʋ. Mowaab neba, wa-y tɩ d tɩ zɛ b teedã!”+ 24 La bãmb sẽn ta Israyɛll nebã tãb-sikẽ wã, Israyɛll nebã yikame n sɩng b kʋʋb tɩ b zoe.+ La Israyɛll nebã pʋgla bãmb poore, n tall b kʋʋb n tãag Mowaabe. 25 Bãmb sãama b tẽnsã, tɩ b ned kam fãa lobg kugr b pʋtã pʋsẽ n pids-b ne kuga. Bãmb yẽda b ko-bundsã zĩis fãa,+ la b kɛ tɩɩs nins fãa sẽn yaa sõma wã.+ Yaa Kɩɩr-haresɛt+ lalgã sẽn me ne kugã bal n da ket n yasẽ. La tãb-biis nins sẽn tar loobsã gũbg-a lame, n lub-a.

26 Mowaab rĩmã sẽn yã tɩ b tõoga bãmbã, a peega rap kobs-yopoe sẽn bob sʋʋse, tɩ b wẽdg n na n paam Edom+ rĩmã la b pa tõog ye. 27 Woto, yẽ rɩka a bi-ribl-kãsengã sẽn da na n wa ledg-a naamẽ wã, n kʋ n maan maoong sẽn yõogd bugum+ lalgã zugu. Dẽ, nebã sũy sãama wʋsg ne Israyɛll hal tɩ b bas zabrã n leb b soolmẽ wã.

4 Daar a yembre, no-rɛɛsdbã kom-dibli wã+ nin-yend pag n wa a Eliize nengẽ, n zẽk a koɛɛg n yõk a Eliize sɛɛg n yeel-a yaa: “Mam sɩdã sẽn yaa y tʋm-tʋmdã maana kaalem. Yãmb mengã miime t’a ra zoeta a Zeova.+ A ra tara ned a ye samde, la a soabã waame n dat n yõg m kamb a yiibã n tɩ maan a yembse.” 2 A Eliize soka pagã yaa: “Fo ratame tɩ m maan bõe n kõ-fo? Bõe n be fo roogã pʋgẽ?” T’a leoke: “Yãmb tʋm-tʋmd-poakã pa tar baa fʋɩ a roogã pʋgẽ ye. Yaa kaam sẽn be rʋk pʋgẽ bala.”+ 3 Dẽ, a Eliize yeel-a lame yaa: “Kẽng f yagsã nengẽ n tɩ kos b fãa rʋg-vɩɩdo. Ra kos rʋgd bilf bal ye. 4 La f tɩ peeg f kom-dibli wã tɩ y kẽ roogã pʋgẽ n lebs kʋɩlengã n page. Rẽ poor bɩ f kiig kaamã rʋgdã fãa pʋsẽ. Rʋk ning fãa sẽn pid bɩ f rɩk n dɩgl kɛɛnga.” 5 Woto, pagã basa a Eliize n looge.

A tɩ peega a kom-dibli wã tɩ b kẽ roogẽ n lebs kʋɩlengã n page, t’a kambã rɩgsd rʋgdã n kõt-a t’a kiigd kaamã.+ 6 A sẽn pids rʋgdã fãa n sa wã, a yeela a bi-ribl a yembr t’a rɩk rʋk a to n wa.+ Tɩ biigã leok-a tɩ rʋg-vɩʋʋg pa ket ye. Dẽ, kaamã sẽn da yitã yalsame.+ 7 Woto, pagã kẽnga Wẽnnaam daoã nengẽ n tɩ togs-a. La a yeelame yaa: “Kẽng n tɩ koos kaamã n yãk n yao f samã, tɩ foo ne f kambã rɩ sẽn ketã.”

8 Daar a yembre, a Eliize kẽnga Sunem+ tẽngã. Pag sẽn yaa nin-kãseng n da be beenẽ. Yẽ pẽdga a Eliize t’a wa yir tɩ b rɩ.+ A Eliize sã n da wa tũud Sunem fãa, a yalsda pagã yirã n dɩ. 9 La pagã wa n yeela a sɩdã yaa: “Mam miime tɩ rao ning sẽn nong n wat ka wã yaa Wẽnnaam daoa. 10 M kotame tɩ d me ro-bil doogã zugẽ+ n dɩgl gãaga, taable, goeel n paas fɩtl-doagendga. Dẽ, a sã n wa fãa, a tõe n kẽe be.”+

11 Daar a yembre, a Eliize waa b nengẽ, n kẽ yĩngr doogã pʋgẽ n na n gãande. 12 Yẽ yeela a sõangd a Geyaazi+ yaa: “Bool Sunem+ pagã n kõ-ma.” Woto, yẽ tɩ bool-a lame t’a wa yals a Eliize taoore. 13 La a Eliize yeela a Geyaazi yaa: “M kotame tɩ f yeel-a yaa: ‘Fo namsa f meng wʋsg n maan woto fãa tõnd yĩnga.+ Bõe la fo rat tɩ m maan n kõ-fo?+ Fo ratame tɩ m kos bũmb rĩmã+ wall tãb-biis naabã nengẽ n kõ-f bɩ?’” Tɩ pagã leok yaa: “Mam sẽn be m nebã sʋkã yĩnga, bũmb pa paoog maam ye.” 14 Rẽ la a Eliize sok a Geyaazi yaa: “Woto wã, bõe la tõnd tõe n maan n kõ-a?” T’a Geyaazi leoke: “A pa tar biig ye.+ La a sɩdã kʋʋlame.” 15 Zĩig pʋgẽ, a Eliize yeelame t’a bool pagã. La a Geyaazi tɩ bool-a lame t’a wa yals roogã noore. 16 T’a Eliize yeel-a yaa: “Vẽer woto wẽnd tɩ fo yẽgda bi-ribla.”+ La pagã leokame: “Aba! M zu-soaba. Wẽnnaam daoa, ra n belg-y y tʋm-tʋmd-poakã ye.”

17 La pagã wa n dɩka pʋga. Yʋʋmdã sẽn vẽke, a roga bi-ribl wakat ning a Eliize sẽn da yeel-a t’a na n dogame wã. 18 Biigã wa n bɩɩme. La daar a yembre, a ba wã wa n bee ne neb sẽn kẽebd a pʋʋgo, tɩ biigã wa a nengẽ. 19 La a ra kelemdame n yet a ba wã yaa: “M zugã, wuii, m zugã!” T’a ba wã yeel a tʋm-tʋmd a ye t’a rɩk-a n tɩ kɩs a ma wã. 20 Woto, yẽ tall-a lame n tɩ kɩs a ma wã, t’a reeg-a n zĩnig a naoẽ hal tɩ ta wĩnto-sʋka, la biigã maana kaalem.+ 21 A ma wã tall-a lame n dʋ yĩngr doogã pʋgẽ, n gãneg-a Wẽnnaam daoã gãagã zugu,+ n lebs kʋɩlengã n pag la a looge. 22 Rẽ poore, a boola a sɩdã n yeel-a yaa: “M kotame tɩ y tʋm y tʋm-tʋmd a ye t’a wa ne bõanga, tɩ m babs Wẽnnaam daoã tao-tao la m wa.” 23 La a sɩdã sok-a lame yaa: “Yaa noog tɩ fo rabd a nengẽ dũndã? Pa ki-paalga,+ leb n pa vʋʋsg daar ye.” T’a leok tɩ yell kae ye. 24 Woto, yẽ ninga bõangã yolgo, n yeel a tʋm-tʋmdã yaa: “Kẽn tao-tao. Sã n pa maam n yeel tɩ f kẽn bilf-bilf bɩ f ra boog ye.”

25 Dẽ, yẽ babsa Wẽnnaam daoã Karmell tãngẽ wã. La Wẽnnaam daoã sẽn yã a sẽn be yɩɩg n watẽ, a yeela a sõangd a Geyaazi yaa: “Gese! Yaa Sunem pagã la sẽn watã. 26 M bõos tɩ f zoe n tɩ seg-a n sok-a n ges a keemame, la f sok-a a sɩdã ne a biigã gãase.” Pagã leoka a Geyaazi tɩ yaa laafɩ. 27 A sẽn ta Wẽnnaam daoã nengẽ tãngẽ wã, tao-tao bala, a mobga a naoã.+ A Geyaazi kolgame n na n tus-a n lake. La Wẽnnaam daoã yeel-a lame: “Bas-a t’a sũurã sãama hal wʋsgo, la a Zeova solga maam bõn-kãngã n pa togs-m ye.” 28 Dẽ, pagã yeelame: “M zu-soaba, mam kosa yãmb biig sɩda? M pa pĩnd n yeel-y tɩ y ra belg-ma?”+

29 Zĩig pʋgẽ, a Eliize yeela a Geyaazi yaa: “Kolemd f fuugã n sẽb f sɛɛga,+ n deeg mam dasaarã n kẽnge. Fo sã n seg ned sorẽ bɩ f ra pʋʋs-a, la ned sã n pʋʋs-f me bɩ f ra leok-a ye. Fo sã n ta bɩ f rɩk mam dasaarã n dogl biigã nengã zugu.” 30 La biigã ma yeelame yaa: “Mam wẽenda ne a Zeova sẽn vɩ wã, la ne yãmb mengã sẽn vɩ wã tɩ m pa na n loog n bas yãmb ye.”+ Woto, a Eliize yikame n tũ pagã n looge. 31 A Geyaazi renga taoor n tɩ rɩk rasaarã n dogl biigã nengã zugu, la bũmb pa maan ye.+ A lebgame n seg a Eliize n yeel-a yaa: “Biigã pa nek ye.”

32 A Eliize sẽn kẽ zakã pʋgẽ, a mikame tɩ biigã kiime tɩ b tɩ gãneg-a yẽ gãagã zugu.+ 33 A peega a Geyaazi tɩ b kẽ roogã pʋgẽ n lebs kʋɩlengã n page, n sɩng a Zeova pʋʋsgo.+ 34 Rẽ poore, a yikame n dʋ gãagã zug n tẽeg a meng biigã zugu, n dɩk a noor n tugl biigã noor t’a ninã tees biigã nini, la a rɩk a nus-pʋsã n ning biigã nus-pʋsẽ. A kell n paa biigã zug t’a yĩnsã wa sɩng wɩngre.+ 35 A Eliize yikame n gilim doogã pʋgã, n leb n tɩ rʋ gãagã n tẽeg a meng biigã zugu. La biigã tĩsa naoor a yopoe, n puk a ninã.+ 36 A Eliize boola a Geyaazi n yeel-a t’a bool Sunem pagã. La a tɩ boola pagã. Pagã sẽn wa wã, a Eliize yeel-a lame yaa: “Rɩk f biigã.”+ 37 Pagã kẽeme n wõgemd a Eliize naoẽ wã, n fõgen a neng tẽnga. Rẽ poore, a rɩka a biigã n yi.

38 A Eliize wa n leba Gilgalle, la a tɩ mikame tɩ kom n kẽ tẽngã.+ No-rɛɛsdbã kom-dibli wã+ ra wa n zĩi a taoore, t’a yeel a tʋm-tʋmdã+ yaa: “Rɩk rʋg-yalengã n segl dɩɩb n kõ no-rɛɛsdbã kom-dibli.” 39 Dẽ, bãmb sʋkã nin-yend n yik n kẽng weoogẽ n na n tɩ bao vãado, n yã niri n wʋk n yondg ne a fuugã. A tall n kuilame n tɩ pẽese, n bog n ning rʋkã pʋgẽ. La a ra pa mi sẽn yaa bũmb ning ye. 40 B wa n yãka niri wã sẽn dʋgã n kõ rapã. La bãmb sẽn lembe, b kelmame n yeele: “Wẽnnaam daoa! Kũum n be rʋkã pʋgẽ.” La bãmb pa tõog n dɩ-a ye. 41 Dẽ, a Eliize yeelame yaa: “Tall-y zom n wa kõ-ma.” Yẽ reega zomã n fãeeg rʋkã pʋgẽ n yeel-b tɩ b yãk n tɩ kõ rapã. La bũmb sẽn tõe n maan ned yell ra pa le be rʋkã pʋgẽ ye.+

42 Rao a yembr n yi Baal-salisa+ n wa, n zɩ bur bãmb pisi sẽn maan ne orz*+ dẽenem biisi, la kood b sẽn kẽeb paalem yolg a ye+ n wa kõ Wẽnnaam daoã. A Eliize yeelame tɩ b rɩk n kõ nebã tɩ b rɩ. 43 La a sõangdã yeel-a lame: “Mam na n maana wãn tɩ yãoã sek neb koabga?”+ T’a Eliize leok-a yaa: “Kõ nebã tɩ b rɩ. Bala a Zeova yeelame yaa: ‘Bãmb na n dɩɩme n tɩg tɩ kelle.’”+ 44 Woto, yẽ rɩkame n kõ-ba, la b rɩɩme n tɩg hal tɩ kelle,+ wa a Zeova sẽn da yeelã.

5 A Naama ra yaa Siiri tãb-biisã naaba, n da yaa nin-kãsenga. A zu-soabã ra nong-a-la wʋsgo, bala a Zeova ra tũnuga ne-a n kɩt tɩ Siiri tõog a bɛɛba. A ra yaa zabr gãndaoogo, la a ra bẽeda wãoodo.* 2 Siiri nebã ra wa n tɩ zaba ne Israyɛll nebã n yõk Israyɛll bi-pugl sẽn yaa bilfu, t’a tɩ lebg a Naama pagã tʋʋm-biiga. 3 Biigã yeela a zu-soben-poakã yaa: “M zu-soabã sã n da kẽngẽ no-rɛɛsã nengẽ+ Samari, a ra na n maaga a wãoodã!”+ 4 Dẽ, a* kẽngame n tɩ togs a zu-soabã Israyɛll bi-puglã sẽn yeelã.

5 La Siiri rĩmã yeel-a lame yaa: “Kẽng mas-masã! Mam na n gʋlsa sebr n tool Israyɛll rĩmã.” Woto, yẽ kẽngame. La a zãa wanzuri talã* piiga, sãnem sɩkl* tus a yoobe, n paas fut piiga. 6 Yẽ zãa sebrã n tɩ kõ Israyɛll rĩmã. Sebrã pʋga, b yeelame: “Mam toola yãmb seb-kãngã la m tʋm m tʋm-tʋmd a Naama yãmb nengẽ sẽn na yɩl tɩ y sãoog a wãoodã.” 7 Israyɛll rĩmã sẽn karem sebrã bala, a pãrsa a futã, la a yeel yaa: “Maam la Wẽnd n tõe n kʋ neda, la m tõe tɩ ned vɩɩmd bɩ?+ Bala yẽ tʋma rao-kãngã mam nengẽ, n yeel tɩ m sãoog a wãoodã. Yãmb mensã neeme tɩ yaa mam noor la a baooda.”

8 La Wẽnnaam dao a Eliize sẽn wʋm tɩ Israyɛll dĩmã pãrsa a futã, zĩig pʋgẽ a tʋma koɛɛg a nengẽ n yeel-a yaa: “Bõe yĩng tɩ fo pãrs f futã? Kɩt t’a wa mam nengẽ, t’a na bãng tɩ no-rɛɛs bee Israyɛlle.”+ 9 Dẽ, a Naama kẽnga ne a wed-moosã la a zabr saar-dãmbã* n tɩ yals a Eliize zakã noore. 10 La a Eliize tʋma ned t’a yi n yeel-a yaa: “Kẽng n tɩ lis Zʋrdẽ kʋɩlgã+ pʋgẽ naoor a yopoe,+ tɩ f yĩngã na n lebga wa pĩndã, tɩ f lebg yɩlemde.” 11 A Naama sũurã yikame, t’a lebg n loogdẽ n yetẽ yaa: “M da tagsdame t’a na n yiime n seg maam, n yals mam taoor n pʋʋs ne a Wẽnnaam a Zeova yʋʋre, n dɩk a nugã n pɩʋʋg m wãoodã zug tɩ sa. 12 Rẽ yĩnga, Abana ne Farpaar sẽn yaa Damaas+ kʋɩlsã pa são Israyɛll kʋɩlsã fãa sɩda? Mam pa tõe n tɩ lis be tɩ m yĩngã lebg yɩlemd sɩda?” Dẽ, yẽ wẽnemdame n loog ne sũ-puugri.

13 La a tʋm-tʋmdbã kolgame n yeel-a yaa: “M zu-soaba,* no-rɛɛsã sã n da yeelẽ yãmb tɩ y maan bũmb sẽn yaa toogo, y kõn maan sɩda? A yaool n yeela yãmb bal tɩ y tɩ lis koomẽ wã tɩ y yĩngã na n lebga yɩlemde.” 14 Woto, a Naama kẽngame n tɩ lis Zʋrdẽ koomã pʋgẽ naoor a yopoe wa Wẽnnaam daoã sẽn da yeel-a wã.+ La a yĩngã lebga wa bi-bilf yĩnga,+ t’a lebg yɩlemde.+

15 Rẽ poore, a Naama ne a nebã fãa* lebg n tũu taab n kẽng Wẽnnaam daoã nengẽ,+ t’a tɩ yals a taoor n yeele: “Masã, mam miime tɩ Wẽnnaam ka be zĩig a to dũniyã zug tɩ pa Israyɛll ye.+ Woto wã, mam kotame tɩ y sak n deeg kũun* y tʋm-tʋmdã nugẽ.” 16 La a Eliize yeelame: “Mam wẽenda ne a Zeova sẽn vɩ wã, soab ning mam sẽn sakdã,* tɩ m pa na n deeg kũunã ye.”+ A Naama pẽdg-a lame, la a kell n tõdgame t’a pa na n deeg ye. 17 Dẽ, a Naama yeelame: “Sã n yaa rẽ, m kotame tɩ y kõ maam tẽn-kãngã tomã sẽn zems bõn-wees* a yiib zɩɩbo. Bala mam pa na n le maan maoong sẽn yõogd bugum wall maoong a to n kõ wẽnnaam a to tɩ pa a Zeova ye. 18 La bɩ a Zeova kõ a tʋm-tʋmdã sugr yell a ye yĩnga: Yaa tɩ mam zu-soabã sã n dabd a wẽnnaam a Rimon doogẽ wã n na n tɩ wõgemde, a tikda mam kangã. Woto wã, yaa tɩlɛ tɩ mam sã n ta a Rimon doogẽ wã bɩ m wõgemde. M kotame tɩ m sã n wa wõgemd a Rimon doogẽ wã, bɩ a Zeova maan-m sugr dẽ yĩnga.” 19 Dẽ, a Eliize yeel-a lame yaa: “Kẽng ne laafɩ.” La yẽ sẽn loog n zãag bilfu, 20 Wẽnnaam dao+ a Eliize sõangd a Geyaazi+ yeela a sũurẽ yaa: “M zu-soabã basa Siiri rao a Naama+ t’a loog n pa reeg bũmb ning a sẽn wa ne wã ye. Mam wẽenda ne a Zeova sẽn vɩ wã tɩ m na n wudg n babs-a lame n tɩ reeg bũmb a nengẽ.” 21 Woto, a Geyaazi wudgame n babs a Naama. La a Naama sẽn yã ned sẽn zoet n wat a nengẽ wã, a siga a saarã zug n seg-a. Yẽ sok-a lame yaa: “Yaa noogo?” 22 T’a leok yaa: “Noog bala! Yaa m zu-soabã n tʋm maam tɩ m wa yeel-y yaa: ‘Yãmb sẽn loogã bala, no-rɛɛsdbã kom-dibli sẽn be Efrayim soolmã zĩig ning sẽn yaa tãensã kom-bɩɩs a yiib n wa mam nengẽ. Dẽ wã, m kotame tɩ y kõ-m wanzuri talã a yembre, la fut a yiibu.’”+ 23 A Naama yeel-a lame yaa: “Yell kae ye. Reeg talã a yiibu.” La a Naama kell n pẽdg-a lame+ n dɩk wanzuri talã a yiib n sui yond a yiib la a paas fut a yiibu, n sẽbg n kõ a tʋm-tʋmdb a yiibu, tɩ b reeg n lʋɩ a Geyaazi taoore.

24 Bãmb sẽn ta Ofɛlle,* a Geyaazi reega teedã n bĩng a roogẽ wã, la a kɩt tɩ rapã lebge. Rapã sẽn looge, 25 a kẽnga a zu-soabã nengẽ. A Eliize sok-a lame yaa: “Geyaazi, fo ra kẽnga yɛ?” T’a leoke: “Yãmb tʋm-tʋmdã ra pa kẽng ni ye.”+ 26 T’a Eliize yeel-a yaa: “Fo tẽedame tɩ raoã sẽn wa n sigd a saarã zug n na n seg foo wã, mam pa bãng la? Rẽ yĩnga, fo tẽedame tɩ yaa wakat fo sẽn segd n dees fut bɩ wanzuri, viyn bɩ oliiv pʋto, pa rẽ bɩ piis wall niisi, bɩ tʋm-tʋmdb wall tʋm-tʋmd-pogs sɩda?+ 27 Masã, a Naama wãoodã+ na n leba foo ne f yagensã wakat fãa yĩnga. La zĩig pʋgẽ, wãood n yõk-a t’a lebg pɛɛlg faga,+ n yi a Eliize nengẽ n looge.

6 No-rɛɛsdbã kom-dibli wã+ yeela a Eliize yaa: “Ges-y-yã, zĩig ning tõnd sẽn be ne yãmbã yaa sẽk wʋsg ne tõndo.” 2 D kotame tɩ y bas tɩ d kẽng Zʋrdẽ kʋɩlgã noore, tɩ ned kam fãa kɛɛg tɩɩg be, tɩ d tilg roog beenẽ d sẽn tõe n kẽ. T’a leoke: “Kẽng-y-yã.” 3 La bãmb ned a ye soka a Eliize yaa: “Yãmb na n sak n yãaga y tʋm-tʋmdbã bɩ?” T’a leoke: “M na n yãag-y lame.” 4 Dẽ, yẽ yãag-b lame, la b taa Zʋrdẽ kʋɩlgã noor n sɩng tɩɩsã kɛɛbo. 5 Bãmb ned a ye n da kɛɛd tɩɩga, tɩ larã baag n lʋɩ koomã pʋgẽ, t’a kelem n yeele: “Kayto m zu-soaba! Yaa lar mam sẽn penge!” 6 Wẽnnaam daoã sok-a lame yaa: “Yɛ la lʋɩ-yã?” T’a wilg-a zĩigã. A Eliize kɛɛga raoog n lobg koomã pʋgẽ tɩ larã zug ruk koomã zugu, 7 t’a yeel raoã yaa: “Yaag-a!” La yẽ tẽega a nug n yaage.

8 Siiri rĩmã wa n yiime n na n tɩ zab ne Israyɛll nebã.+ A yẽsa ne a tãb-biis nanambsã n wilg-b zĩig ning bãmb ne yẽ sẽn na n tɩ tilg b sikã. 9 Dẽ, Wẽnnaam daoã+ tʋma koɛɛg Israyɛll rĩmã nengẽ n yeel-a yaa: “Gũus n da tũ zĩ-kãngã tɩ Siiri nebã wata be.” 10 Dẽ, Israyɛll rĩmã tʋma koɛɛg neb nins sẽn da be zĩig ning Wẽnnaam daoã sẽn keoog-a t’a ra kẽngã. A Eliize ra tara rĩmã keoogre, tɩ rĩmã gũus a meng naoor wʋsg ne zĩ-kãens kẽngre.+

11 Rẽ kɩtame tɩ Siiri rĩmã sũur puugi, t’a tigim a tãb-biisã n yeel-b yaa: “Togs-y maam! Tõnd sʋkã, ãnd dãmb n be Israyɛll rĩmã poorẽ?” 12 La a tãb-biig a ye n leok-a yaa: “Ned baa a ye, m zu-soab la m dĩmã! Yaa no-rɛɛs a Eliize sẽn be Israyɛllã n togsd Israyɛll rĩmã goam nins yãmb sẽn gomd y ro-gãagẽ wã.”+ 13 Dẽ, rĩmã yeelame: “Kẽng-y n tɩ bãng-y a sẽn beẽ, tɩ m tʋm neb tɩ b tɩ yõk-a.” La b wa n yeel-a lame t’a Eliize bee Dotan.+ 14 Zĩig pʋgẽ, a tʋma wed-moos la zabr saar-dãmba,* n paas tãb-biis kʋʋngo. Bãmb waa ne yʋngo, n gũbg tẽngã.

15 Wẽnnaam daoã sõangdã sẽn yik yibeoog pĩnd n yi yɩnga, a yãa tãb-biis ne wed-moos la zabr saar-dãmb sẽn gũbg tẽngã. Tao-tao bala, a Eliize sõangdã yeel-a lame yaa: “Kayto, m zu-soaba! Tõnd na n maana wãna?” 16 La a yeel-a lame yaa: “Da zoe rabeem ye!+ Bala sẽn be-b ne tõndã sõor yɩɩda sẽn be-b ne bãmbã.”+ 17 Dẽ, a Eliize sɩnga pʋʋsgo, n yeel yaa: “Zeova! M kotame tɩ y puk a ninã t’a yã.”+ La zĩig pʋgẽ, a Zeova puka sõangdã nin t’a yã. La ade! Soolmã zĩig ning sẽn yaa tãensã ra pida ne wed-moos la zabr saar-dãmb sẽn wit bugum,+ n gũbg a Eliize.+

18 Siiri nebã sẽn wa n kolgd a Eliize wã, a Eliize pʋʋsa a Zeova n yeel yaa: “M kotame tɩ y lob nin-kãensã* zondo.”+ La Wẽnnaam lob-b-la zond wa a Eliize sẽn kosã. 19 Dẽ, a Eliize yeel-b lame yaa: “Sorã pa ka ye. Pa tẽn-kãngã me ye. Pʋg-y maam tɩ m tall-y n kẽng rao ning yãmb sẽn baoodã nengẽ.” La yẽ tall-b lame n kẽng Samari.+

20 Bãmb sẽn ta Samari wã, a Eliize yeelame yaa: “Zeova, puk-y b ninã tɩ b yã.” Dẽ, a Zeova puka b ninã, la b mikame tɩ b bee Samari tẽngã sʋka. 21 Israyɛll rĩmã sẽn yã-bã, a soka a Eliize yaa: “M kʋ-b bɩ? M ba, m kʋ-b bɩ?” 22 La a Eliize leokame yaa: “Ra kʋ-b ye. Fo sã n yõg neb zabr sasa* n maan yembse, f kʋʋd-b lame sɩda? Kõ-b koom la rɩɩb tɩ b rɩ la b yũ,+ la b leb b zu-soabã nengẽ.” 23 Woto, yẽ maana tig-kãseng b yĩnga, tɩ b rɩ la b yũ. Rẽ poore, a bas-b lame tɩ b leb b zu-soabã nengẽ. La Siiri fãadb sul+ pa tol n le wa Israyɛll nebã soolmẽ ye.

24 Rẽ zugẽ, Siiri rĩm a Bɛn-hadaad tigma a tãb-biisã fãa tɩ b tɩ gũbg Samari n na n zab ne-a.+ 25 Dẽ, kom-kãseng+ n kẽ Samari. La b kell n gũbga tẽngã, hal tɩ bõang zug+ wa koosd wanzuri ligd-koeems pis-nii, tɩ marwall bĩnd sẽn pit nus a yiib ra yaa wanzuri ligd-koeems a nu. 26 Daar a yembre, Israyɛll rĩmã wa n kẽnda lalgã zugu, tɩ pag a ye kelem n yeel yaa: “M zu-soab la m dĩmã, sõng-y-do!” 27 La rĩmã leokame yaa: “A Zeova sã n pa sõng foo, mam na n yãa sõngr yɛ n kõ foo? Fo tagsdame tɩ m tõe n paama koodo, divẽ bɩ kaam n kõ-f la?” 28 Rĩmã sok-a lame yaa: “Yaa bõe n tar foom?” T’a leoke: “Pʋg-kãngã ra yeela maam tɩ m wa ne m biigã tɩ d wãbe, tɩ vẽkembeoog bɩ d wãb yẽ biigã.+ 29 Woto, tõnd dʋga mam biigã n wãbe.+ La vẽkembeoogã, mam yeel-a lame t’a wa ne a biigã tɩ d wãbe, la a rɩk-a lame n solge.”

30 Rĩmã sẽn wʋm pagã goamã, zĩig pʋgẽ a pãrsa a futã.+ A sẽn wa n kẽnd lalgã zugã, nebã yãame t’a ra yera bot a futã tẽngre. 31 Dẽ, yẽ yeelame yaa: “Mam sã n pa kɩt tɩ b rok a Safat biig a Eliize zugã rũndã, bɩ Wẽnnaam sɩbg maam ne sɩbg-kãsenga!”+

32 A Eliize ra zĩi a zakẽ wã, tɩ kãsem-dãmbã ra be ne-a. Rĩmã tʋma ned t’a reng a taoore. La nand t’a soabã ta, a Eliize yeela kãsem-dãmbã yaa: “Yãmb neeme, nin-kãngã sẽn yaa nin-kʋʋd biigã+ tʋma ned t’a wa rok mam zugã. Gũus-y t’a sã n wa bɩ y gãd kʋɩlengã n pag t’a ra kẽ ye. A zu-soabã bee a poorẽ n watẽ. Yãmb pa wʋmd a naoã rãamd sɩda?” 33 A sẽn wa n ket n gomd ne-bã, ned ning rĩmã sẽn tʋmã taame, tɩ rĩmã me be waoongẽ, n yeele: “Yaa a Zeova n wa ne yel-beedã! Bõe yĩng tɩ m na n ket n gũud a Zeova?”

7 A Eliize yeelame yaa: “Kelg-y-yã a Zeova koɛɛga. Ad a Zeova sẽn yeele: ‘Beoog woto wẽnde, b na n koosa zom-bãaneg seya* sɩkl a yembre, la b na n koosa orz* seya a yiib sɩkl* a ye Samari tẽngã noore.’”*+ 2 La tãb-biis naab ning rĩmã sẽn kɩs sɩdã soka Wẽnnaam daoã yaa: “Baa a Zeova sã n wurg sa-gãongã, bõn-kãngã tõe n yɩɩme sɩda?”+ T’a Eliize leok-a yaa: “Fo na n yãa bõn-kãngã ne f nifu,+ la f kõn dɩ-a ye.”+

3 Wãoob a naas n da be tẽngã rignoore.+ Bãmb yeela taab yaa: “Bõe yĩng tɩ d na n zĩnd ka n wa ki? 4 Tõnd sã n kẽng tẽngã pʋga, komã sẽn be be wã,+ d na n tɩ kiime. D sã n pa ka me, d na n kiime. Woto wã, wa-y tɩ d kẽng Siiri nebã sikã zĩigẽ. B sã n pa kʋ-do, d na n vɩɩmdame. La b sã n na n kʋ-do, bɩ b kʋ-do.” 5 Woto, bãmb yika ne zĩ-sobd n tɩ kẽ Siiri nebã sikẽ. B sẽn ta sikã noorã, b pa mik ned baa a yembr ye.

6 Bala a Zeova kɩtame tɩ Siiri nebã wʋm zabr saar-dãmb* ne wed-moos bʋʋre, la tãb-biis kʋʋng rãamde.+ Dẽ, bãmb yeela taab yaa: “Ade! Israyɛll nebã tɩ kõo Hɛt nebã rĩm-dãmbã ne Ezɩpt nebã rĩm-dãmbã ligdi, tɩ b wat n na n zab ne tõndo!” 7 Zĩig pʋgẽ, bãmb yika ne zĩ-sobdã n bas b fu-rotã, b wed-moosã ne b bõensã la b tãb-sikã wa sẽn da yaa to-to wã n na n zoe n põse.

8 Wãoobã sẽn ta sikã noore, b kẽe fu-roog a ye pʋgẽ n dɩ la b yũ. Bãmb wʋka wanzuri, sãnem la fut beenẽ n tɩ solge. B lebg n wa kẽe fu-roog a to pʋg n wʋk teed be me n tɩ solge.

9 La bãmb wa n yeela taab yaa: “Tõnd sẽn maandã pa zems ye. Rũndã yaa koe-noog raare! Tõnd sã n bas tɩ zĩigã yẽeg-d ka, d toga ne sɩbgre. Wa-y tɩ d kẽng na-yirã n tɩ togs kiba-noogã.” 10 Woto, bãmb kẽngame n tɩ bool sẽn gũud-b tẽngã rignoorã n yeel-b yaa: “Tõnd kẽnga Siiri nebã sikã zĩigẽ la d pa yã neda, d pa wʋm ned koɛɛg me ye. Yaa b wed-moosã ne b bõensã b sẽn loe wã, n paas b fu-rotã b sẽn zoe n basã bal n be beenẽ.” 11 Zĩig pʋgẽ, sẽn gũud-b tẽngã rignoorã mooname tɩ b tɩ taas koɛɛgã na-yirã.

12 Tao-tao bala, rĩmã yika ne yʋngã n yeel a tʋm-tʋmdbã yaa: “Bas-y tɩ m togs-y Siiri nebã sẽn maan tõnd bũmb ningã. B miime tɩ komã namsda tõndo.+ Rẽ n so tɩ b bas b sikã n zoe n tɩ solg weoogẽ wã n yetẽ yaa: ‘B na n yii tẽngã tɩ d yõg-b vɩɩse, la d kẽ tẽngã pʋgẽ.’”+ 13 La rĩmã tʋm-tʋmd a yembr yeelame yaa: “D bõos tɩ y kõ neb wed-moos a nu wed-moos nins sẽn ketã sʋka, n tʋm-b tɩ b tɩ gese. Bala bãmb na n baasa wa Israyɛll neb kʋʋngã sẽn ket ka wã sẽn na n ki wã. Ade! B na n kii wa Israyɛll neb kʋʋngã sẽn ki wã.” 14 Woto, bãmb yãka saar-dãmb a yiib ne wed-moose, tɩ Israyɛll rĩmã tʋm neb Siiri nebã sikã zĩigẽ n yeel-b yaa: “Kẽng-y n tɩ ges-y-yã.” 15 Bãmb pʋgla Siiri nebã n tãag Zʋrdẽ kʋɩlgã. La bãmb yãa fut la teed Siiri nebã sẽn lob sorã zugu, b sẽn wa n yɛɛs n zoetẽ wã. Neb nins rĩmã sẽn tʋmã lebg n wa togs-a lame.

16 Dẽ, nin-buiidã yiime n kẽng Siiri nebã sikã zĩigẽ n tɩ zɛ b teedã. La b wa n koosda zom-bãaneg seya sɩkl a yembre, la b koosd orz* seya a yiib sɩkl a ye wa a Zeova sẽn da yeelã.+ 17 Rĩmã ra yãka tãb-biis naab ning a sẽn kɩs sɩdã t’a gũ tẽngã rignoore. La nebã tab-a lame t’a ki rignoorẽ wã, wa Wẽnnaam daoã sẽn da yeel rĩmã wakat ning rĩmã sẽn wa yẽ nengẽ wã. 18 Kell n yɩɩ wa Wẽnnaam daoã sẽn da yeel rĩmã. Yẽ ra yeelame: “Beoog woto wẽnde, b na n koosa zom-bãaneg seya sɩkl a yembre, la b na n koosa orz* seya a yiib sɩkl a ye Samari tẽngã noore.”+ 19 La tãb-biis naab ning rĩmã sẽn kɩs sɩdã ra soka Wẽnnaam daoã yaa: “Baa a Zeova sã n wurg sa-gãongã, bũmb a woto tõe n yɩɩme sɩda?” T’a Eliize ra leok-a yaa: “Fo na n yãa bõn-kãngã ne f nifu, la f kõn dɩ-a ye.” 20 Bũmb ning Wẽnnaam daoã sẽn da yeelã paama tãb-biis naabã kɛpɩ. Bala nebã tab-a lame n kʋ tẽngã rignoorẽ wã.

8 A Eliize yeela pag ning a sẽn da vʋʋg a bi-riblã yaa:+ “Yik tɩ foo ne f zakã rãmb kẽng zĩig ning y sẽn tõe n tɩ zĩnd sãando, bala a Zeova na n kɩtame tɩ kom kẽ soolmã+ pʋgẽ yʋʋm a yopoe.” 2 Woto, pagã yikame n maan wa Wẽnnaam daoã sẽn yeelã. Yẽ ne a zakã rãmb yik n kẽnga Filisti nebã soolmẽ+ n tɩ zĩnd yʋʋm a yopoe.

3 Yʋʋm a yopoe wã loogr poore, pagã yii Filisti nebã soolmẽ n leb a tẽngẽ wã. Yẽ kẽnga rĩmã nengẽ n na n tɩ kos-a t’a sõng-a t’a paam a zakã ne a pʋʋgã. 4 Rĩmã ra gomda ne Wẽnnaam daoã sõangd a Geyaazi. Yẽ yeel-a lame yaa: “M bõos tɩ f togs-m bõn-kãsems nins fãa a Eliize sẽn maanã.”+ 5 A sẽn wa n togsd rĩmã a Eliize sẽn vʋʋg kũumã to-to wã,+ pag ning a Eliize sẽn da vʋʋg a bi-riblã waa rĩmã nengẽ, n na n kos-a t’a sõng-a t’a paam a zakã ne a pʋʋgã.+ A Geyaazi sẽn yã-a wã, a yeelame yaa: “M zu-soab la m dĩma, ad pagã ne a biigã a Eliize sẽn vʋʋgã.” 6 Dẽ, rĩmã soka pagã, tɩ pagã togs-a kibarã sẽn yɩ to-to. Rẽ poore, a boola na-yirã tʋm-tʋmd a ye n yeel-a yaa: “Ges tɩ b lebs pagã bũmb nins fãa a sẽn so wã, la b lebs-a a pʋʋgã ne b sẽn yõd n ko n paam yõod ningã, sẽn sɩng ne daar ning a sẽn yi tẽngẽ wã, hal tɩ ta rũndã wã.”

7 A Eliize wa n kẽnga Damaase,+ la rẽ tɩ Siiri rĩm a Bɛn-hadaad+ bẽedame. Dẽ, b yeela rĩmã yaa: “Wẽnnaam sɩd-sɩdã raoã+ waa ka.” 8 Rĩmã sẽn wʋmã, a yeela a Azayɛll+ yaa: “Bao kũun n kẽng Wẽnnaam daoã nengẽ.+ Kos-a t’a sok a Zeova n ges m bãagã sã n na n sãoogame.” 9 A Azayɛll baoo kũun n na n kẽng Wẽnnaam daoã nengẽ. Yɩɩ Damaas bõn-sõma buud toor-toor b sẽn zɩlg yʋgma pis-naase. Yẽ taame n tɩ yals a taoor n yeel yaa: “Yãmb biig a Bɛn-hadaad sẽn yaa Siiri rĩmã n tʋm maam tɩ m wa sok-y n ges a bãagã sã n na n sãoogame.” 10 T’a Eliize leok-a yaa: “Kẽng n tɩ yeel rĩmã t’a bãagã na n sãoogame. La a Zeova yaool n wilga maam t’a na n kiime.”+ 11 Wẽnnnaam daoã gesa a Azayɛll kuii hal tɩ yãnd wa yõk a Azayɛlle, la Wẽnnaam daoã sɩnga yãbre. 12 A Azayɛll sokame yaa: “M zu-soaba, bõe yĩng tɩ y yãbda?” T’a leoke: “Yaa mam sẽn mi fo sẽn na n maan Israyɛll nebã wẽng ningã.+ Fo na n ninga b tẽns nins sẽn gũbg ne lalsã bugum, n kʋ b gãndaadã ne sʋʋga. Fo na n kʋʋ b kambã, la f weed b pagb nins sẽn tʋtã pʋse.”+ 13 T’a Azayɛll yeele: “Yãmb tʋm-tʋmdã sẽn yaa wa baag balã na n yɩɩ wãn n tõog n maan bõn-kãnga?” La a Eliize leokame yaa: “A Zeova vẽnega maam tɩ m bãng tɩ fo na n lebga Siiri rĩma.”+

14 Dẽ, a Azayɛll loogame n bas a Eliize, n kẽng a zu-soabã nengẽ, t’a sok-a yaa: “Bõe la a Eliize yeel foo?” T’a leoke: “A yeela maam tɩ y bãagã na n sãoogame.”+ 15 La vẽkembeoogã, a Azayɛll losa fu-gob-taok koomẽ n dɩk n dĩ rĩmã nengã hal t’a ki.+ Rẽ poore, a Azayɛll ledg-a lame n lebg rĩma.+

16 Israyɛll rĩm a Akaab biig a Zoram+ naamã yʋʋm a nu soabã, Zida rĩm a Zozafat biig a Zoram+ lebga Zida rĩma, t’a Zozafat ra ket n yaa Zida rĩma. 17 A sẽn wa n deeg naamã t’a tara yʋʋm pis-tã la a yiibu, la a rɩɩ naam yʋʋm a nii Zerizalɛm. 18 Yẽ rɩka Israyɛll rĩm-dãmbã naoore,+ n maan wa a Akaab roogã rãmba.+ Bala yẽ rɩka a Akaab bi-pugl n maan a paga,+ la a ra maanda sẽn yaa wẽng a Zeova nifẽ.+ 19 La a Zeova ra pa rat n sãam Zida, a tʋm-tʋmd a Davɩɩd yĩnga.+ Bala a ra pʋlmame t’a na n kõo a Davɩɩd ne a kom-dibli wã fɩtl*+ wakat fãa yĩnga.

20 A Zoram naamã wakate, Edom nebã tõdgame tɩ b pa na n le sak Zida ye.+ Bãmb yãka b toorẽ dĩma.+ 21 Dẽ, a Zoram kẽnga Zayɩɩr ne a saar-dãmbã* fãa. Yẽ yika ne yʋng n zab ne Edom nebã sẽn da gũbg yẽ ne a saar-dãmbã nanambsã, n tõog-b tɩ b zoe n kẽng b fu-rotẽ wã. 22 La Edom nebã kell n tõdga fasɩ tɩ b kõn sak Zida n tãag rũndã. Wakat kãnga, Libna+ me tõdga Zida.

23 A Zoram vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 24 Dẽ, a Zoram kii wa a yaab-rãmbã, tɩ b mum-a a Davɩɩd tẽngẽ wã+ ne a yaab-rãmbã. Rẽ poore, a biig a Akaziya+ n ledg-a n lebg rĩma.

25 Israyɛll rĩm a Akaab biig a Zoram naamã yʋʋm piig la a yiib-n-soabã, Zida rĩm a Zoram biig a Akaziya lebga rĩma.+ 26 A Akaziya sẽn wa n lebg rĩmã t’a tara yʋʋm pisi la a yi, la yẽ rɩɩ naam Zerizalɛm yʋʋmde. A ma wã yʋʋr la a Atali,+ n da yaa Israyɛll rĩm a Omri+ yagenga.* 27 Yẽ rɩka a Akaab roogã rãmb naoore,+ n da maand sẽn yaa wẽng a Zeova nifẽ wa bãmba. Bala yẽ ra yaa a Akaab roogã rãmb rɛɛmba.+ 28 Yẽ tũu a Akaab biig a Zoram n kẽng Ramot-galaad+ n na n tɩ zab ne Siiri rĩm a Azayɛlle. La Siiri nebã tãoo a Zoram n pogle.+ 29 Dẽ, rĩm a Zoram leba Zizreyɛll+ n na n tɩ tɩp poglg ning Siiri nebã sẽn da pogl-a Rama wã, a sẽn wa n zabd ne Siiri rĩm a Azayɛllã.+ La a Zoram biig a Akaziya sẽn yaa Zida rĩmã kẽnga Zizreyɛll n na n tɩ ges a Akaab biig a Zoram, a sẽn paam sãmpogrã yĩnga.*

9 No-rɛɛs a Eliize boola no-rɛɛsdbã kom-dibli wã nin-yend n yeel-a yaa: “Kolemd f futã n sẽbg f sɛɛga, n deeg kaamã ne tʋkã n kẽng Ramot-galaad+ tao-tao. 2 Fo sã n ta be, bɩ f gẽes a Nimsi biig a Zozafat biig a Zehu.+ Peeg-a n yi a saam-biisã sʋka, n tall-a n tɩ kẽ taoor-taoor doogẽ wã. 3 Rɩk kaamã ne tʋkã n sudg a zugã n yeele: ‘Ad a Zeova sẽn yeele: “Mam yãka* foo tɩ f na n lebg Israyɛll rĩma.”’+ Rẽ poor bɩ f pak roogã n zoe n loog la f ra yals ye.”

4 Dẽ, no-rɛɛsã tʋm-tʋmdã rɩka sor n loog Ramot-galaade. 5 A sẽn ta wã tɩ tãb-biis nanambsã ra zĩi be. Yẽ yeelame: “Naaba, m tara koɛɛg n na n taas-yã.” T’a Zehu sok-a tɩ yaa ãnd la a rat n taas koɛɛgã. T’a leoke: “Yaa yãmba, m naaba.” 6 Woto, a Zehu yikame n kẽ roogẽ wã, tɩ no-rɛɛsã tʋm-tʋmdã sudg a zugã kaamã n yeele: “Ad Israyɛll Wẽnnaam a Zeova sẽn yeele: ‘Mam yãka foo tɩ f na n lebg Israyɛll sẽn yaa a Zeova nin-buiidã rĩma.+ 7 Fo segd n kʋʋ f zu-soab a Akaab roogã rãmba, tɩ m dok m sũur m no-rɛɛsdbã zɩɩm yĩnga, la a Zeova tʋm-tʋmdb nins fãa a Zezabɛll sẽn kʋ wã yĩnga.+ 8 A Akaab roogã rãmb fãa na n menemame, la mam na n menesa a Akaab roogã rap fãa Israyɛlle, baa yaa ned sẽn pa tar sõangda, bɩ sẽn ka barka.+ 9 La mam na n maana a Akaab roogã rãmb wa m sẽn maan a Nebat biig a Zerobowam roogã rãmbã,+ la a Ahiya biig a Baasa roogã rãmba.+ 10 La baas n na n wãb a Zezabɛll Zizreyɛll pʋʋgẽ wã.+ Ned baa a yembr pa na n mum-a ye.’” A sẽn yeel woto n sa, a paka roogã n zoe.+

11 A Zehu sẽn lebg n kẽng a zu-soabã tʋm-tʋmdbã nengẽ wã, b sok-a lame: “Yaa noogo? Bõe yĩng tɩ gãeeng kãngã wa fo nengẽ?” T’a leok-b yaa: “Yãmb mengã mii nin-kãensã buudã ne goam nins b sẽn gomdã.” 12 La b yeelame yaa: “Bas rẽ! Fo we n togs tõnd a sẽn yeelã.” Dẽ, a Zehu togs-b-la bũmb nins fãa raoã sẽn yeelã. La a paas tɩ raoã yeelame yaa: ‘Ad a Zeova sẽn yeele: “Mam yãka* foo tɩ f na n lebg Israyɛll rĩma.”’+ 13 B sẽn wʋm dẽ, b ned kam fãa yeega a fuug n dɩgl rʋʋdsã zug a Zehu naoã tẽngre,+ n peeb baorg n yeele: “A Zehu lebga rĩma!”+ 14 Woto, a Nimsi biig a Zozafat biig a Zehu+ sɩngame n na n lub a Zoram.

A Zoram ne Israyɛll tãb-biisã fãa ra bee Ramot-galaad+ n gũud tẽngã, sẽn na yɩl tɩ Siiri rĩm a Azayɛll+ da reeg-a ye. 15 Rĩm a Zoram wa n leba Zizreyɛll+ n na n tɩ tɩp poglg ning Siiri nebã sẽn da pogl-a, a sẽn wa n zabd ne Siiri rĩm a Azayɛllã.+

A Zehu yeelame yaa: “Yãmb sã n bee mam poorẽ, bɩ y ra bas tɩ ned baa a ye yi tẽngã n kẽng Zizreyɛll n tɩ togs bũmb ning sẽn maanã ye.” 16 Dẽ, a Zehu zomba a saarã* n kẽng Zizreyɛlle. Bala a Zoram ra paama sãmpogr n gãe be, tɩ Zida rĩm a Akaziya kẽng n na n tɩ ges-a. 17 Gũudã ra bee Zizreyɛll gasgã zugu, n yã a Zehu ne a tãb-biis kʋʋngã sẽn wate. Tao-tao bala, a yeelame: “Mam nee tãb-biis kʋʋng sẽn wate.” T’a Zoram yeel-a yaa: “Bao wed-rʋʋd n tʋm-a t’a tɩ sok-b n ges b waoongã sã n yaa laafɩ.” 18 Dẽ, wed-rʋʋd n kẽng n tɩ seg-b n yeel-b yaa: “Rĩmã tɩ m wa sok-y n ges y waoongã sã n yaa laafɩ. T’a Zehu leok-a yaa: “Bõe yĩng tɩ fo gomd laafɩ yelle?” Leb poorẽ n tũ maam!”

Tɩ gũudã yeele: “Wed-rʋʋdã taa b nengẽ la a pa lebgd ye.” 19 Woto, yẽ leb n tʋma wed-rʋʋd a to t’a seg-b n yeel yaa: “Rĩmã tɩ m wa sok-y n ges y waoongã sã n yaa laafɩ. T’a Zehu leok-a yaa: “Bõe yĩng tɩ fo gomd laafɩ yelle?” Leb poorẽ n tũ maam!”

20 Gũudã yeelame yaa: “Wed-rʋʋdã taa b nengẽ la a pa lebgd ye. La ned ning sẽn be taoorã sẽn zoet ne a saarã to-to wã wõnda a Nimsi yageng* a Zehu. Bala a zoeta ne a saarã wa gãeenga.” 21 La a Zoram yeelame yaa: “Sog-y m saarã!” Dẽ, bãmb soga a saarã. Israyɛll rĩm a Zoram ne Zida rĩm a Akaziya+ zomba b saar-dãmbã, n yi n na n tɩ seg a Zehu. Bãmb paam-a-la Zizreyɛll rao a Nabot+ pʋʋgẽ wã.

22 A Zoram sẽn yã a Zehu wã, a sok-a lame yaa: “Yãmb waoongã yaa laafɩ bɩ?” T’a Zehu leok yaa: “Laafɩ na n yɩɩ wãn n zĩnd tɩ fo ma a Zezabɛll+ ket n yood* la a maand tɩt wʋsgo?”+ 23 Zĩig pʋgẽ, a Zoram wẽnemda a saarã n na n zoe, la a yeel a Akaziya yaa: “Akaziya, b bẽda tõndo!” 24 A Zehu yãaga a tãpã n tão a Zoram bãgdã sʋka, tɩ peemdã tɩ kõs a sũurã n sãag n yi, t’a lʋɩ a saarã pʋgẽ. 25 Rẽ poore, a yeela a tãb-biisã naab a Bidkaar yaa: “Rɩk-a n lob Zizreyɛll rao a Nabot+ pʋʋgẽ wã. Tẽeg tɩ foo ne maam ra zaoo d wed-moosã n pʋgd a Zoram ba a Akaabe, t’a Zeova mengã togs gom-kãngã a wɛɛngẽ:+ 26 Ad maam a Zeova sẽn yeele: ‘“Zaamẽ, mam yãa a Nabot ne a kom-dibli wã zɩɩmã.”+ Hakɩɩka, maam a Zeova na n dola+ foo f tʋʋmdã pʋ-kãngã pʋgẽ.’ Dẽ wã, rɩk-a n lob pʋʋgã pʋgẽ wa a Zeova sẽn yeelã.”+

27 Zida rĩm a Akaziya+ sẽn yã bũmb ning sẽn maanã, a rɩka zẽedã zĩig roogã sor n na n zoe. (La a Zehu wa n pʋgl-a lame n yeele: “Kʋ-y yẽ me!” Dẽ, bãmb tão-a-la ne tãpo, a sẽn wa n be a saar pʋgẽ n zoet n teesd Guur sẽn pẽ Ibleyammã.+ La yẽ kell n zoeeme n ta Megido, n tɩ ki be. 28 A Akaziya tʋm-tʋmdbã tall-a-la ne saar n kẽ Zerizalɛm. Bãmb tɩ mum-a-la a yaoogẽ wã ne a yaab-rãmba, a Davɩɩd tẽngã pʋgẽ.+ 29 Yɩɩ a Akaab biig a Zoram naamã yʋʋm piig la a ye soabã pʋgẽ la a Akaziya+ ra lebg Zida rĩma.)

30 A Zehu sẽn ta Zizreyɛllã,+ a Zezabɛll+ wʋmame. Dẽ, yẽ yikame n dẽes a ninã ne kɩrʋ la a nags a zugã, n lɩk roogã fenetrẽ n getẽ. 31 A Zehu sẽn ta tẽngã noorã, a Zezabɛll sok-a lame yaa: “A Zimri sẽn kʋ a zu-soabã,+ a baasa neer sɩda?” 32 La a Zehu nakame n ges roogã fenetr n sok yaa: “Yaa ãnda n be mam poorẽ? Ãnda?”+ Zĩig pʋgẽ, na-yirã neb a yiib bɩ a tãab n lɩk n ges a Zehu. 33 La yẽ yeela bãmb yaa: “Lob-y-yã-a tẽnga!” Woto, bãmb lob-a-la tẽng t’a zɩɩmã yɩg n fãe lalgã la wed-moosã, t’a Zehu tab-a ne a wed-moosã. 34 Rẽ poore, yẽ kẽeme n dɩ la a yũ. A wa n yeelame yaa: “Kẽng-y n tɩ rɩk-y pʋg-wẽngã n mumi. Bala a yaa rĩm bi-pugla.”+ 35 La bãmb sẽn kẽng n na n tɩ rɩk-a n mumã, b yãame tɩ yaa a zu-wangã ne a naoã la a nusã bal n kete.+ 36 Bãmb lebg n kẽngame n tɩ togs a Zehu b sẽn yã wã, t’a yeele: “Bõn-kãng pidsda a Zeova gomdã,+ a sẽn da kɩt tɩ Tisbe rao a Eli sẽn yaa a no-rɛɛsã togsã. A ra yeelame: ‘Baas n na n wãb a Zezabɛll Zizreyɛll pʋʋgẽ wã.+ 37 La a Zezabɛll kũumã na n lebga wa birg Zizreyɛll pʋʋgẽ wã, tɩ ned ra wa yeel t’a Zezabɛll la woto ye.”’

10 A Akaab+ ra tara kom-dibli pis-yopoe Samari. Dẽ, a Zehu gʋlsa sɛb n tool Samari, Zizreyɛll nanambsã, kãsem-dãmbã+ la a Akaab kambã gũudbã* n yeele: 2 “Yãmb zu-soabã kom-dibli wã bee ne yãmba, n paas zabr saar-dãmba,* wed-moose, tẽng sẽn gũbg ne lalse, la zab-teedo. Woto wã, sebrã mam sẽn toolã sã n ta yãmba, 3 bɩ y yãk y zu-soabã biig ning sẽn são a taabã la a yaa tɩrg n yɩɩdã, n kɩt t’a ledg a ba wã n lebg rĩma. Rẽ poor bɩ y zab y zu-soabã roog yĩnga.”

4 La rabeem-kãseng yõka bãmba, tɩ b yeele: “Ges-y-yã! Rĩm-dãmb a yiib sã n pa tõog n yals a taoore,+ tõnd na n yɩɩ wãn n tõoge?” 5 Dẽ, na-yirã yel-gɛtã, ne tẽngã guvɛrneerã, n paas kãsem-dãmbã ne gũudbã tʋma koɛɛg a Zehu nengẽ n yeele: “Tõnd yaa yãmb tʋm-tʋmdba. D na n maana bũmb ning fãa yãmb sẽn na n yeel tõndã. Tõnd pa na n yãk ned baa a ye t’a lebg d rĩm ye. Maan-y yãmb sẽn date.”

6 A Zehu lebs n gʋlsa sebr a to n yeele: “Yãmb sã n bee mam poorẽ la y rat n sak maam, bɩ y wa ne y zu-soabã kom-dibli wã zut beoog woto wẽnd Zizreyɛll ka.”

Rĩmã kom-dibli pis-yopoe wã ra bee ne tẽngã nin-kãsemsã sẽn da wubd bãmbã. 7 Bãmb sẽn paam sebrã, tao-tao bala, b yõga rĩmã kom-dibli pis-yopoe wã n kʋ.+ Bãmb ninga b zutã yaas pʋsẽ, n tʋm tɩ b kẽng Zizreyɛll n tɩ kɩs a Zehu. 8 Ned n kẽ n togs a Zehu tɩ b waa ne rĩmã kom-dibli wã zutu. Dẽ, a Zehu yeelame: “Rʋʋg-y zutã zĩis a yiib tẽngã rignoorẽ n bas tɩ ta beoog yibeoogo.” 9 Vẽkembeoogã yibeoogo, a Zehu yalsa nin-buiidã fãa taoor n yeele: “Yãmb pa tar taal ye.* Hakɩɩka, maam n zãmb m zu-soabã n kʋ-a.+ La ãnd n kʋ nin-kãensã fãa? 10 Bãng-y t’a Zeova gomd baa a ye a Zeova sẽn togs a Akaab roogã wɛɛngẽ pa na n vaal ye.*+ A Zeova pidsa bũmb ning a sẽn da kɩt t’a tʋm-tʋmd a Eli togsã.”+ 11 Sẽn paase, a Zehu kʋʋ a Akaab roogã neb nins sẽn kellã fãa Zizreyɛlle, n paas a nin-kãsemsã, a zo-rãmbã ne a maan-kʋʋdbã+ fãa, n pa bas ned baa a ye t’a põs ye.+

12 Rẽ poore, a yikame n dɩk Samari sore. Roog ning pʋgẽ pe-kɩɩmbã sẽn wõrsd piisã* ra bee so-kãng zugu. 13 A Zehu sega Zida rĩm a Akaziya+ ba-biisã be, n sok-b yaa: “Yãmb yaa ãnd rãmba?” Tɩ b leoke: “Tõnd yaa a Akaziya ba-biisi, n dabd n na n tɩ ges rĩmã kom-dibli wã ne na-poakã kom-dibli wã sã n bee laafɩ.” 14 Tao-tao bala, a Zehu yeelame yaa: “Yõg-y-b vɩɩse!” Dẽ, bãmb yõg-b-la vɩɩse, n kʋ-b bulgã sẽn be rũmsã wõrsg roogã* sɛɛgẽ. Ra yaa bãmb pis-naas la a yiibu. A Zehu pa bas tɩ b ned baa a ye põs ye.+

15 A Zehu sẽn yi be n loogdẽ wã, a sega a Rekaab+ biig a Zonadaab+ sẽn da wat n na n seg-a. A Zehu pʋʋs-a lame* n sok-a yaa: “Fo sũurã bee ne maam zãng-zãng* wa mam sũurã sẽn be ne foo wã bɩ?”

A Zonadaab leokame tɩ n-ye.

T’a Zehu yeele: “Sã n yaa rẽ bɩ f kõ maam f nugã.”

Dẽ, a Zonadaab tẽega a nugã, t’a Zehu gãd-a n tak n kẽes a saarã* pʋgẽ. 16 Rẽ poore, a yeelame: “Wa tũ maam n ges mam sẽn pa sakd to-to tɩ b tũ bũmb a to tɩ pa a Zeova wã.”*+ Dẽ, a Zehu kẽesa a Zonadaab a saarã pʋgẽ. 17 Woto, a Zehu taa Samari n kʋ a Akaab zakã neb nins fãa sẽn kellã, hal n menes-b zãng+ wa a Zeova sẽn da kɩt t’a Eli togsã.+

18 Sẽn paase, a Zehu tigma nin-buiidã fãa n yeel-b yaa: “A Akaab tũu a Baal bilfu,+ la a Zehu na n tũ-a-la wʋsgo. 19 Woto wã, tigm-y-yã a Baal no-rɛɛsdbã fãa,+ ne neb nins fãa sẽn tũud-a wã la a maan-kʋʋdbã fãa+ n kõ-ma. Modg-y tɩ ned baa a ye da pa ye. Bala mam na n maana maoon-kãseng a Baal yĩnga. Sẽn pa wa-a fãa na n kiime.” La a Zehu ra maanda sɩlem n na n paam n menes neb nins sẽn tũud a Baallã.

20 A Zehu paasame: “Moon-y tigr a Baal yĩnga.” Dẽ, bãmb moona tigrã. 21 Rẽ poore, a Zehu tʋma koɛɛg Israyɛll soolmã fãa, la neb nins fãa sẽn tũud a Baallã waame. B ned baa a ye pa kell ye. Bãmb kẽe a Baal roogẽ wã,+ tɩ roogã pid zãnga. 22 A Zehu yeela ned ning sẽn da get futã bĩngr yellã yaa: “Tall fut n wa kõ neb nins fãa sẽn tũud a Baallã.” Dẽ, yẽ talla futã n wa kõ-ba. 23 La a Zehu ne a Rekaab biig a Zonadaab+ waa a Baal roogẽ wã, t’a Zehu yeel neb nins sẽn tũud a Baallã yaa: “Gẽes-y neer tɩ ned sẽn tũud a Zeova ra zĩnd ka ye. Yaa sẽn tũud-b a Baalã bal n segd n zĩnd ka.” 24 Rẽ poore, bãmb kẽeme n na n maan maand la maand sẽn yõogd bugum. A Zehu ra kɩtame tɩ rap pis-nii yals yɩngã, n yeel-b yaa: “Yãmb sã n bas tɩ neb nins mam sẽn ning yãmb nugẽ wã nin-yend põse, yãmb n na n deeg a zĩig n ki.”

25 Bãmb sẽn maan maand sẽn yõogd bugmã n sa wã bala, a Zehu yeela gũudbã* ne tãb-biis nanambsã yaa: “Kẽ-y n kʋ-y-ba! Ra bas-y tɩ b ned baa a ye põs ye!”+ Dẽ, gũudbã ne tãb-biis nanambsã kʋʋ bãmb ne sʋʋga, n lob-b yɩnga. Bãmb kell n kẽeme n tãag a Baal doogã taoor-taoor do-pʋgã.* 26 Bãmb yiisa a Baal roogã kugã b sẽn da lugl n pʋʋsd-a wã,+ n yõog-b fãa bugum.+ 27 B luba kugã b sẽn da lugl n pʋʋsd+ a Baallã, la b lub a Baal roogã+ n kɩt t’a lebg we-kɛɛng zĩig hal n tãag rũndã.

28 Woto, a Zehu menesa a Baal Israyɛll soolmã pʋgẽ. 29 La a Zehu pa lak a meng ne yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye. Yẽ pa sãam sãnem nag-bi wã sẽn da be Betɛll ne Dannã ye.+ 30 Dẽ, a Zeova yeela a Zehu yaa: “Fo sẽn tʋm tʋʋm-sõma la f maan sẽn yaa tɩrg mam nifẽ, n pids bũmb ning fãa mam sẽn da sar n na n maan a Akaab roogã rãmbã+ yĩnga, fo yagensã zãmaan a naas n na n zomb Israyɛll naam geerã zugu.”+ 31 La a Zehu pa tũ Israyɛll Wẽnnaam a Zeova Tõogã ne a sũur fãa ye.+ A pa lak a meng ne yel-wẽn nins a Zerobowam sẽn da kɩt tɩ Israyɛll nebã maanã ye.+

32 Wakat kãng tɛka, a Zeova basame tɩ b reesd Israyɛll tẽnsã bilf-bilfu. A Azayɛll kell n zaba ne Israyɛll nebã b soolmã fãa pʋgẽ,+ 33 sẽn sɩng ne Zʋrdẽ kʋɩlgã sẽn be yaang sẽnesã, Galaad soolmã fãa, rat n yeel tɩ Gaad buudã nebã soolmã, n paas Rubɛn ne Manase buudã nebã+ soolmã, la sẽn sɩng ne Arowɛɛr sẽn be Arno longẽ* wã n tãag Galaad ne Basan.+

34 A Zehu vɩɩmã kibay nins sẽn kellã, bũmb nins fãa a sẽn maanã, n paas a pãn-kãsengã, b gʋlsa rẽ fãa Israyɛll rĩm-dãmbã kibay sebrã pʋgẽ. 35 Dẽ, a Zehu kii wa a yaab-rãmbã, la b mum-a-la Samari, t’a biig a Yowakaaz+ ledg-a n lebg rĩma. 36 A Zehu sẽn zĩnd Samari n dɩ naam Israyɛllã yɩɩ yʋʋm pisi la a nii.

11 A Akaziya ma a Atali+ sẽn yã t’a biigã kiime wã,+ a yikame n na n kʋ na-roogã kom-dibli wã fãa.+ 2 La rĩm a Zoram bi-pugl a Zoseba sẽn yaa a Akaziya tãoã soos n dɩka a Akaziya bi-ribl a Zowas+ rĩmã kom-dibli wã b sẽn da segd n kʋ wã sʋka. B tɩ solga a Zowas ne a yaoolã ro-gãag pʋgẽ, sẽn na yɩl t’a Atali ra paam-a ye. Woto, b pa kʋ a Zowas ye. 3 A Zowas kell n paa ne a yaoolã* yʋʋm a yoobe, n da solg a Zeova roogẽ wã. Wakat kãng t’a Atali rɩta naam soolmã pʋgẽ.

4 Yʋʋm a yopoe-n-soabã pʋgẽ, a Zehoyada tʋmame tɩ b tɩ bool rĩmã gũudb* la na-yirã gũudb*+ koabg-koabg nanambsã, tɩ b babs yẽ a Zeova roogẽ wã. Yẽ maana kaool ne bãmb n kɩt tɩ b wẽen a Zeova roogẽ wã, n yaool n wilg bãmb rĩmã bi-riblã.+ 5 Yẽ kõo bãmb noor n yeele: “Ad yãmb sẽn segd n maane: Yãmb neb nins sẽn tʋmd vʋʋsg daarã na n pʋɩɩ y nebã sul a tãabo, tɩ sull a yembr gũud na-yirã sõma,+ 6 tɩ sull a yiib-n-soabã gũ rignoor ning b sẽn boond tɩ Yẽbgrã rignoorã, tɩ sull a tãab-n-soabã yals rignoor ning sẽn be na-yirã gũudbã zĩig poorã. Yãmb na n gũuda roogã n deesd taaba. 7 Yãmb sul a yiib nins sẽn pa tʋmd vʋʋsg daarã segd n gũu a Zeova roogã sõma, n kogl rĩmã. 8 Yãmb ned kam fãa segd n zãa a zab-teedo, tɩ y gũbg rĩmã. Ned ning sẽn na n kẽ yãmb sʋkã, bɩ y kʋ-a. Pa-y ne rĩmã zĩig ning fãa a sẽn na n kẽnge.”

9 Tãb-biis koabg-koabg nanambsã+ maana wa maan-kʋʋd a Zehoyada sẽn yeelã bal kɛpɩ. Bãmb ned kam fãa peega a neb nins sẽn tʋmd vʋʋsg daarã, la sẽn pa tʋmd-b vʋʋsg daarã tɩ b kẽng maan-kʋʋd a Zehoyada nengẽ.+ 10 Dẽ, maan-kʋʋdã rɩka rĩm a Davɩɩd kãnã ne a gãn-gilsã sẽn da be a Zeova roogẽ wã, n kõ tãb-biis koabg-koabg nanambsã. 11 La na-yirã gũudbã+ ned kam fãa ra zãada a zab-teed n yas a zĩigẽ, sẽn sɩng ne wẽnd-doogã nug-rɩtgo, n tãag a nug-goabgã. Kẽer da bee tẽn-kugrã sɛɛgẽ,+ tɩ sãnda be wẽnd-doogã sɛɛgẽ n gũbg rĩmã. 12 Rẽ poore, a Zehoyada talla rĩmã biigã+ n yi n fõgn-a maanfã, la a rɩk Kasetã*+ n dogl a zugã. Bãmb sudga a zugã kaam n kɩt t’a lebg rĩma, la b sɩng nug-pogs wẽeb n yetẽ: “Wẽnd na kaoos rĩmã!”+

13 A Atali sẽn wʋm nin-buiidã sẽn zoetã nao rãamdã, tao-tao bala, yẽ kẽnga nin-buiidã nengẽ a Zeova roogẽ wã.+ 14 A tɩ yãa rĩm a Zowas sẽn yas ra-lukã sɛɛgẽ wa rĩm-dãmbã sẽn minim n maandẽ wã.+ Nanambsã ne sẽn peebd-b tãntãadã+ ra bee ne rĩmã, tɩ nin-buiidã fãa kɩdemdẽ la b peebd tãntãado. Zĩig pʋgẽ, a Atali pãrsa a futã n zẽk a koɛɛg n yeele: “Yaa zãmbo! Yaa zãmbo!” 15 La maan-kʋʋd a Zehoyada goma ne tãb-biis koabg-koabg nanambsã,+ b rãmb nins sẽn da get tãb-biisã yellã, n yeel-b yaa: “Tall-y-yã-a n yi nebã sʋka. Ned sã n pʋg-a bɩ y kʋ-a ne sʋʋga!” Bala maan-kʋʋdã ra yeelame tɩ b ra kʋ-a a Zeova roogẽ wã ye. 16 Woto, bãmb tall-a lame n looge, la b sẽn ta na-yirã+ zĩig ning b sẽn tũud n kẽed ne wed-moosã, b kʋ-a lame.

17 A Zehoyada kɩtame tɩ rĩmã ne nin-buiidã maan kaool ne a Zeova,+ n yeel tɩ b na n kell n yɩɩ a Zeova nin-buiidu. Yẽ kɩtame me tɩ rĩmã ne nin-buiidã maan kaool ne taaba.+ 18 Rẽ poore, tẽngã nin-buiidã fãa waa a Baal roogẽ wã n siig a tẽn-kugã,+ n pãb a bõn-naandsã n sãeege,+ la b kʋ a Baal maan-kʋʋd a Matã+ tẽn-kugã taoore.

Dẽ, maan-kʋʋd a Zehoyada yãka neb n kɩt tɩ b lebg a Zeova roogã yel-gɛtba.+ 19 Sẽn paase, maan-kʋʋdã kɩtame tɩ tãb-biis koabg-koabg nanambsã,+ rĩmã gũudbã* n paas na-yirã gũudbã+ ne tẽngã nin-buiidã fãa yãag rĩmã n yi a Zeova roogẽ wã, n dɩk na-yirã gũudbã rignoor sorã, n kẽng n ta rĩmã roogẽ. B sẽn ta be wã, a Zowas tɩ zomba rĩm-dãmbã naam geerã zugu.+ 20 Woto, tẽngã nin-buiidã fãa kɩdma sũ-noogo, la tẽngã zĩnda bãane. Bala b kʋʋ a Atali ne sʋʋg na-yirã sɛɛgẽ.

21 A Zowas+ sẽn wa n na n deeg naamã+ t’a tara yʋʋm a yopoe.

12 A Zehu+ naamã yʋʋm a yopoe-n-soabã, a Zowas+ lebga rĩma, n dɩ naam Zerizalɛm yʋʋm pis-naase. A ma yʋʋr da yaa a Zibiya, n yit Bɛɛr-seba.+ 2 A Zowas maana sẽn yaa tɩrg a Zeova nifẽ, wakat ning fãa maan-kʋʋd a Zehoyada sẽn yɩ a sagendã. 3 La b pa sãam zĩ-zãntsã* ye.+ Nin-buiidã ra ket n maanda maando, la maoong sẽn nusd bug-zõos zĩ-zãntsẽ wã.

4 A Zowas yeela maan-kʋʋdbã yaa: “Rɩk-y ligd ning fãa b sẽn tall n wa a Zeova roogẽ wã tɩ yaa kũun sẽn welg toorã:+ Yaa ligd ning ned fãa sẽn segd n yao wã,+ la ligd ning b sẽn mag tɩ ned sẽn maan pʋleng segd n yao wã, n paas ligd ning ned kam fãa sẽn wat n kõt a Zeova roogẽ wã ne yamleoogã.+ 5 Yaa maan-kʋʋdbã n na n deeg kũunã kõatbã* nengẽ, n tall n maneg wẽnd-doogã zĩis nins fãa sẽn sãamã.”+

6 La rĩm a Zowas naamã yʋʋm pisi la a tãab-n-soabã tɩ maan-kʋʋdbã ra ket nan pa maneg wẽnd-doogã zĩis nins sẽn sãamã ye.+ 7 Dẽ, rĩm a Zowas boola maan-kʋʋd a Zehoyada+ ne maan-kʋʋdb a taabã n sok-b yaa: “Bõe yĩng tɩ yãmb ket n nan pa maneg wẽnd-doogã? Woto wã, da le reeg-y ligd kõatbã nengẽ, sã n pa wẽnd-doogã manegr yĩng bala.”+ 8 Dẽ, maan-kʋʋdbã sakame tɩ b pa na n le reeg ligd nin-buiidã nengẽ, la tɩ b pa na n le ges wẽnd-doogã manegr yell ye.

9 Maan-kʋʋd a Zehoyada rɩka koglg+ n poog võor a limdã zugu. Yẽ rɩgl-a-la tẽn-kugrã sɛɛgẽ, zĩig ning nebã sẽn tũud n kẽed a Zeova roogẽ wã nug-rɩtgo. Yaa be la maan-kʋʋdb nins sẽn gũud rignoyã na n ningd ligdã fãa nebã sẽn tar n wat a Zeova roogẽ wã.+ 10 B sã n da wa yã tɩ ligdã lebga wʋsg koglgã pʋgẽ, rĩmã seb-gʋlsdã ne maan-kʋʋdb kãsmã wat n vaaga ligdã nebã sẽn tall n wa a Zeova roogẽ wã n sẽbe, n tall n tɩ sõde.+ 11 Dẽ, bãmb dɩkda ligdã b sẽn sõdã n kõ neb nins sẽn get a Zeova roogã tʋʋm yellã, tɩ b reeg n yao ra-wãadbã ne neb nins sẽn tʋmd a Zeova roogã tʋʋmã,+ 12 n paas tãn-metbã ne kug-pɛɛsdbã. B ra tara ligdã me n daad raad la kug b sẽn peese, a Zeova roogã zĩis nins sẽn sãamã manegr yĩnga. Ligd-kãng me la b ra tar n maand bũmb a taabã fãa wẽnd-doogã manegr yĩnga.

13 La b pa rɩk ligdã nebã sẽn da tar n wat a Zeova roogẽ wã n maan wanzuri la-pogdo, teed b sẽn tar n kiisd fɩtl-dãmbã, laase, tãntãad+ bɩ sãnem teed wall wanzuri teed a Zeova roogã yĩng ye.+ 14 B ra rɩkda ligdã n kõt neb nins sẽn tʋmd wẽnd-doogã tʋʋm balã, tɩ b tall n maneg a Zeova roogã. 15 Bãmb sã n da kõ rapã ligdã tɩ b yao tʋm-tʋmdbã, b pa sokd-b b sẽn tall ligdã n maan bũmb ning ye. Bala b ra yaa pʋ-peelem dãmba.+ 16 La b ra pa wat ne taal maoongã ligd+ ne yel-wẽnã maoongã ligd a Zeova roogẽ wã ye. Yaa maan-kʋʋdbã n da so rẽ.+

17 Wakat kãnga, Siiri rĩm a Azayɛll+ kẽngame n tɩ zab ne Gat+ n deeg-a. Rẽ poore, yẽ yãka yam n na n zab ne Zerizalɛm.+ 18 Dẽ, Zida rĩm a Zowas rɩka kũun nins sẽn welg toorã a yaab a Zozafat ne a Zoram la a Akaziya sẽn yɩ Zida rĩm-dãmbã sẽn da kõ Wẽnnaamã, n paas kũun nins yẽ mengã sẽn kõ Wẽnnaamã, ne sãnem ning fãa sẽn da be a Zeova roogã laogã bĩngr zĩigẽ la na-yirã laogã bĩngr zĩigẽ wã, n tʋm tɩ b tɩ kõ Siiri rĩm a Azayɛlle.+ Woto, yẽ loogame n pa zab ne Zerizalɛm ye.

19 A Zowas vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 20 La a tʋm-tʋmdbã naaga taab n zãmb-a,+ n kʋ-a Milo wã*+ roogã pʋgẽ, sor ning sẽn dabd Silla wã zugu. 21 A tʋm-tʋmdb nins sẽn kʋ-a wã+ yaa a Simeyat biig a Zozakaar ne a Someer biig a Yehozabaade. Bãmb mum-a-la a Davɩɩd tẽngẽ wã ne a yaab-rãmbã, t’a biig a Amazɩya ledg-a n lebg rĩma.+

13 Zida rĩm a Akaziya+ biig a Zowas+ naamã yʋʋm pisi la a tãab-n-soabã, a Zehu+ biig a Zowakaaz lebga Israyɛll rĩma, n zĩnd Samari n dɩ naam yʋʋm piig la a yopoe. 2 La yẽ ra maanda sẽn yaa wẽng a Zeova nifẽ. A kell n maana yel-wẽnd ning a Nebat biig a Zerobowam sẽn da kɩt tɩ Israyɛll nebã maanã.+ Yẽ pa bas yel-wẽn-kãng maaneg ye. 3 Woto, a Zeova sũur puuga wʋsg+ ne Israyɛll nebã,+ t’a ning-b Siiri rĩm a Azayɛll+ nugẽ, la a biig a Bɛn-hadaad+ nugẽ wakat kãng fãa.

4 A Zowakaaz wa n yõka a Zeova sɛɛga, t’a Zeova kelg-a, a sẽn yã Siiri rĩmã sẽn da namsd Israyɛll nebã to-to wã yĩnga.+ 5 Dẽ, a Zeova yãka fãagd+ n kõ Israyɛll nebã t’a fãag bãmb Siiri nebã nugẽ. Woto, Israyɛll nebã tõog n zĩnda b zagsẽ wa pĩndã.* 6 (Baasgo, bãmb pa bas yel-wẽnd ning a Zerobowam sẽn da kɩt tɩ Israyɛll nebã maanã ye.+ Bãmb kell n maana yel-wẽn-kãnga. Ra-lukã b sẽn lugl n pʋʋsdẽ* wã+ me ra ket n yasa Samari.) 7 A Zowakaaz sodaasã sẽn kellã ra yaa wed-rʋʋdb pis-nu bala, ne saar-dãmb* piiga, la sodaas tus-piig sẽn kẽnd nao. Bala Siiri rĩmã ra kʋʋ sodaasã,+ n tab-b wa b sẽn tabd tom zɛɛgẽ kood pãbr wakate.+

8 A Zowakaaz vɩɩmã kibay nins sẽn kellã, bũmb nins fãa a sẽn maanã, la a pãngã, b gʋlsa rẽ fãa Israyɛll rĩm-dãmbã kibay sebrã pʋgẽ. 9 Dẽ, a Zowakaaz kii wa a yaab-rãmbã tɩ b mum-a Samari,+ t’a biig a Zowas ledg-a n lebg rĩma.

10 Zida rĩm a Zowas naamã yʋʋm pis-tã la a yopoe-n-soabã, a Zowakaaz biig a Zowas+ lebga Israyɛll rĩma, n zĩnd Samari n dɩ naam yʋʋm piig la a yoobe. 11 Yẽ ra maanda sẽn yaa wẽng a Zeova nifẽ, n pa bas yel-wẽn nins fãa a Nebat biig a Zerobowam sẽn da kɩt tɩ Israyɛll nebã maanã ye.+ Yẽ ra ket n maanda yel-wẽn-kãense.

12 A Zowas vɩɩmã kibay nins sẽn kellã, bũmb nins fãa a sẽn maanã, a pãngã, la a sẽn zab ne Zida rĩm a Amazɩya+ to-to wã, b gʋlsa rẽ fãa Israyɛll rĩm-dãmbã kibay sebrã pʋgẽ. 13 La a Zowas wa n kii wa a yaab-rãmbã t’a Zerobowam*+ ledg-a. B muma a Zowas Samari n naag Israyɛll rĩm-dãmbã.+

14 A Eliize+ wa n lʋɩɩ bãaga, la ra yaa a yõor bãaga. Dẽ, Israyɛll rĩm a Zowas kẽnga a nengẽ n tɩ yãbd la a yetẽ: “M ba, m ba! Israyɛll saarã ne a wed-rʋʋdbã!”+ 15 La a Eliize yeela yẽ yaa: “Rɩk tãp ne pɛɛm n wa.” Woto, a rɩka tãpã ne pɛɛmã n wa. 16 A Eliize yeela Israyɛll rĩmã yaa: “Gãd tãpã.” La yẽ gãdame, t’a Eliize rɩk a nusã n palg rĩmã nusi. 17 Rẽ poore, a yeel-a lame t’a pak roogã fenetr ning sẽn tees yaang sẽnesã. Yẽ pakame, t’a Eliize yeel-a yaa: “Tão!” La a tãoome, t’a Eliize yeele: “Yaa a Zeova tõogr* peemde, peemd ning sẽn na n tõog Siiri wã. Fo na n tõoga Siiri nebã Afɛke,+ hal n sãam-b zãnga.”

18 A Eliize leb n yeela Israyɛll rĩmã t’a rɩk pɛɛmã, la yẽ rɩkame. T’a Eliize yeel-a yaa: “Pãb tẽnga.” La yẽ wẽe tẽngã naoor a tãab bala, n base. 19 Dẽ, Wẽnnaam daoã sũur puuga ne-a t’a yeel-a yaa: “Fo ra segd n wẽe tẽngã naoor a nu bɩ a yoobe. Dẽ, fo ra na n tõoga Siiri nebã hal n menes-b zãnga. La masã, yaa naoor a tãab bal+ la fo na n tõog Siiri.”

20 Rẽ zugẽ, a Eliize kiime tɩ b mum-a. La fãadb+ n da yit Mowaab yʋʋmd fãa sɩngrẽ, n wat soolmẽ wã. 21 Neb n da wa n solgd kũum, n yã fãadbã sẽn wate. La tao-tao bala, bãmb loba kũumã a Eliize yaoogẽ wã, la b zoe. Kũumã sẽn sɩɩs a Eliize kõabã, a vʋʋgame+ n yik n yalse.

22 Siiri rĩm a Azayɛll+ namsa Israyɛll nebã+ a Zowakaaz naamã fãa sasa. 23 La a Zeova zoee Israyɛll nebã nimbãaneg n maan-b neere,+ kaool ning yẽ sẽn da maan ne a Abrahaam,+ a Izaak+ la a Zakoobã+ yĩnga. A ra pa rat n sãam-b ye. Hal n tãag rũndã, Wẽnnaam pa menes Israyɛll nebã a taoor ye. 24 Siiri rĩm a Azayɛll wa n kiime, t’a biig a Bɛn-hadaad ledg-a n lebg rĩma. 25 A Zowakaaz biig a Zowas lebs n deega Israyɛll tẽnsã a Azayɛll biig a Bɛn-hadaad nugẽ. Yaa tẽns nins a Bɛn-hadaad ba wã sẽn da reeg a Zowas ba a Zowakaaz nengẽ wã. A Zowas tõoga a Bɛn-hadaad hal naoor a tãabo,+ n deeg Israyɛll tẽnsã.

14 Israyɛll rĩm a Zowakaaz biig a Zowas+ naamã yʋʋm a yiib-n-soabã, Zida rĩm a Zowas biig a Amazɩya lebga rĩma. 2 A sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm pisi la a wɛ. A ma wã yʋʋr la a Zewowadin, n yit Zerizalɛm.+ 3 Yẽ ra maanda sẽn yaa tɩrg a Zeova nifẽ, la a pa maan wa a yaab a Davɩɩd ye.+ A maana bũmb nins fãa a ba a Zowas sẽn da maanã.+ 4 La b pa sãam zĩ-zãntsã* ye.+ Nin-buiidã ra ket n maanda maando, la maoong sẽn nusd bug-zõos zĩ-zãntsẽ wã.+ 5 A Amazɩya naamã sẽn wa n paam pãngã, a kʋʋ a tʋm-tʋmdb nins sẽn da kʋ a ba wã sẽn da yaa rĩmã.+ 6 La a pa kʋ neb nins sẽn kʋ a ba wã kambã, wa sẽn zems ne a Zeova sẽn yeel a Moyiiz tõogã pʋgẽ wã: “B pa segd n kʋ ba-rãmb b kamb yel-wẽn yĩng ye. B pa segd n kʋ kamb me b ba-rãmb yel-wẽn yĩng ye. La yaa ned kam fãa yel-wẽnd yĩng la b segd n kʋ-a.”+ 7 Yẽ kʋʋ Edom neb+ tus-piig Yamsem longã pʋgẽ.+ A zabame n deeg Sela,+ n toeem tẽngã yʋʋr tɩ lebg Yokteyɛll n tãag rũndã.

8 Rẽ zugẽ, a Amazɩya tʋma koɛɛg Israyɛll rĩm a Zehu biig a Zowakaaz biig a Zowas nengẽ n yeel-a yaa: “Wa tɩ d seg taab n zabe.”+ 9 Israyɛll rĩm a Zowas tʋmame tɩ b tɩ yeel Zida rĩm a Amazɩya yaa: “Libã gõos tuugã tʋma koɛɛg Libã sɛɛdr tɩɩgã nengẽ n yeel-a yaa: ‘Rɩk f bi-puglã n kõ mam biigã t’a maan a paga.’ La Libã we-rũng n pɩʋʋg be, n tab gõos tuugã. 10 Yaa sɩd tɩ fo zab n tõoga Edom+ tɩ rẽ me kɩt tɩ f lebg wuk-m-meng soaba. Bɩ f kɩdem sũ-noog f tõogrã yĩnga, la f kell n pa f zakẽ wã.* Bõe yĩng tɩ f na n bao yel-beed n kõ f meng tɩ wa ne f lʋɩɩse, la Zida me lʋɩɩse?” 11 La a Amazɩya pa kelg ye.+

Woto, Israyɛll rĩm a Zowas kẽngame tɩ yẽ ne Zida rĩm a Amazɩya na n seg taab Bɛt-semes+ sẽn be Zida soolmẽ wã+ n zabe. 12 Israyɛll nebã tõoga Zida nebã, tɩ bãmb ned kam fãa zoe n kuil a yiri.* 13 Israyɛll rĩm a Zowas yõka Zida rĩm a Amazɩya sẽn yaa a Akaziya biig a Zowas biigã Bɛt-semes. Rẽ poore, b waa Zerizalɛm, n siig a lalgã kãntɩɩg kobs-naase,* sẽn sɩng ne Efrayim rignoorã+ n tãag Gõdrã zĩigẽ rignoorã.+ 14 A Zowas wʋka sãnemã ne wanzuri wã, la teed nins fãa sẽn da be a Zeova roogẽ wã ne na-yirã laog bĩngr zĩigẽ wã, la a yõg neb me. Rẽ poore, a leba Samari.

15 A Zowas vɩɩmã kibay nins sẽn kellã, bũmb nins fãa a sẽn maanã, a pãngã ne a sẽn zab ne Zida rĩm a Amazɩya to-to wã, b gʋlsa rẽ fãa Israyɛll rĩm-dãmbã kibay sebrã pʋgẽ. 16 Rẽ poore, a Zowas kii wa a yaab-rãmbã tɩ b mum-a Samari+ ne Israyɛll rĩm-dãmbã, t’a biig a Zerobowam*+ ledg-a n lebg rĩma.

17 A Zowas biig a Amazɩya+ sẽn yaa Zida rĩmã vɩɩmda yʋʋm piig la a nu Israyɛll rĩm a Zowakaaz biig a Zowas+ kũumã poore. 18 A Amazɩya vɩɩmã kibay nins sẽn kellã, b gʋlsa rẽ fãa Zida rĩm-dãmbã kibay sebrã pʋgẽ. 19 Kaoosg zugẽ, neb n wa n yik Zerizalɛm n sɩɩg taab noor n na n maan-a wẽnga,+ t’a zoe n kẽng Lakiise. La b tʋma neb tɩ b pʋgl-a n tɩ kʋ-a beenẽ. 20 Dẽ, bãmb tall-a-la ne wed-moos n leb Zerizalɛm n tɩ mum-a a Davɩɩd tẽngẽ wã+ ne a yaab-rãmbã. 21 Dẽ, Zida nin-buiidã fãa yãka a Azariya*+ sẽn da tar yʋʋm piig la a yoobã+ n kɩt t’a ledg a ba a Amazɩya+ n lebg rĩma. 22 Rĩmã* sẽn ki wa a yaab-rãmbã poore,+ yẽ lebs n mee Elat+ tẽngã n kɩt t’a le naag Zida soolmã tẽnse.

23 Zida rĩm a Zowas biig a Amazɩya naamã yʋʋm piig la a nu soabã, Israyɛll rĩm a Zowas biig a Zerobowam+ lebga rĩm Samari, n dɩ naam yʋʋm pis-naas la a yembre. 24 A ra maanda sẽn yaa wẽng a Zeova nifẽ. Yẽ pa bas yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye.+ 25 Yẽ lebs n deega Israyɛll todsã, sẽn sɩng ne Lebo-hamat*+ n tãag Araba wã mogrã,*+ wa Israyɛll Wẽnnaam a Zeova sẽn da kɩt t’a tʋm-tʋmd a Zonas+ togsã. A Zonas ra yaa a Amitayi biiga, n yaa Gat-hefɛɛr+ no-rɛɛsa. 26 Bala a Zeova ra yãa Israyɛll nebã sẽn da namsd wʋsg to-to wã.+ Ned da kae sẽn na n sõng Israyɛlle, baa ned sẽn pa são baa bilf ra kae ye. 27 La a Zeova ra pʋlmame t’a pa na n menes Israyɛll yʋʋrã tẽngã zug ye.+ Woto, yẽ kɩtame t’a Zowas+ biig a Zerobowam fãag Israyɛll nebã.

28 A Zerobowam vɩɩmã kibay nins sẽn kellã, bũmb nins fãa a sẽn maanã, n paas a pãngã, a sẽn zab zabã to-to wã, la a sẽn dɩk Damaas+ ne Hamat+ n lebs Zida sẽn be Israyɛll soolmẽ wã, b gʋlsa rẽ fãa Israyɛll rĩm-dãmbã kibay sebrã pʋgẽ. 29 Rẽ zugẽ, a Zerobowam kii wa a yaab-rãmbã tɩ b mum-a ne Israyɛll rĩm-dãmbã, t’a biig a Zakari+ ledg-a n lebg rĩma.

15 Israyɛll rĩm a Zerobowam* naamã yʋʋm pisi la a yopoe-n-soabã, Zida rĩm a Amazɩya+ biig a Azariya*+ lebga rĩma.+ 2 A sẽn deeg naamã t’a tara yʋʋm piig la a yoobe, la a rɩɩ naam yʋʋm pis-nu la a yiib Zerizalɛm. A ma wã yʋʋr la a Zekoliya, n yit Zerizalɛm. 3 Yẽ ra maanda sẽn yaa tɩrg a Zeova nifẽ wa a ba a Amazɩya.+ 4 La b pa sãam zĩ-zãntsã ye.+ Nin-buiidã ra ket n maanda maando, la maoong sẽn nusd bug-zõos zĩ-zãntsẽ* wã.+ 5 A Zeova kɩtame tɩ wãood yõk rĩmã, la yẽ kell n yɩɩ wãoor+ a yõor tɛka. A ra bee roog pʋgẽ kɛɛnga,+ t’a biig a Zotam+ da get na-yirã yelle, n kaood soolmã nin-buiidã bʋʋdo.+ 6 A Azariya+ vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 7 Dẽ, a Azariya kii wa a yaab-rãmbã,+ tɩ b mum-a a Davɩɩd tẽngẽ wã ne a yaab-rãmbã. La a biig a Zotam n ledg-a n lebg rĩma.

8 Zida rĩm a Azariya+ naamã yʋʋm pis-tã la a nii-n-soabã, a Zerobowam biig a Zakari+ lebga rĩm Israyɛlle, n zĩnd Samari n dɩ naam kiis a yoobe. 9 Yẽ maana sẽn yaa wẽng a Zeova nifẽ wa a yaab-rãmbã. A pa bas yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye.+ 10 Dẽ, a Zabɛs biig a Salum sɩfame n na n lub rĩmã n kʋ-a+ Ibleyam.+ A sẽn kʋ-a wã poore, a ledg-a lame n lebg rĩma. 11 A Zakari vɩɩmã kibay nins sẽn kellã, b gʋlsa rẽ fãa Israyɛll rĩm-dãmbã kibay sebrã pʋgẽ. 12 Rẽ pidsa gomd ning a Zeova sẽn da yeel a Zehu wã. A da yeel-a lame yaa: “Fo yagensã zãmaan a naas+ n na n zomb Israyɛll naam geerã zugu.”+ La sɩd yɩɩ woto.

13 Zida rĩm a Ozɩyas*+ naamã yʋʋm pis-tã la a wɛ soabã, a Zabɛs biig a Salum lebga rĩma, n dɩ naam Samari kiuugu. 14 Dẽ, a Gadi biig a Menahɛm yii Tɩrza+ n wa Samari, n kʋ a Zabɛs biig a Salum+ beenẽ. A sẽn kʋ-a wã poore, a ledg-a lame n lebg rĩma. 15 A Salum vɩɩmã kibay nins sẽn kellã, a sẽn sɩf n lub rĩmã to-to wã, b gʋlsa rẽ fãa Israyɛll rĩm-dãmbã kibay sebrã pʋgẽ. 16 Yaa wakat kãng la a Menahɛm yi Tɩrza n wa Tifsa, n kʋ neb nins fãa sẽn be Tifsa wã ne a soolmã fãa neba, b sẽn pa pak tẽngã rignoy n kõ-a wã yĩnga. A kʋʋ Tifsa nin-buiidã, n weed pagb nins sẽn da tʋtã pʋse.

17 Zida rĩm a Azariya naamã yʋʋm pis-tã la a wɛ soabã, a Gadi biig a Menahɛm lebga rĩm Israyɛlle, n zĩnd Samari n dɩ naam yʋʋm piiga. 18 A ra maanda sẽn yaa wẽng a Zeova nifẽ. A vɩɩmã tɛka, a pa bas yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye.+ 19 Asiiri rĩm a Pull+ waa soolmã pʋgẽ, t’a Menahɛm kõ-a wanzuri talã* tusri, n kos-a t’a sõng-a t’a rĩungã paam pãnga.+ 20 Woto, a Menahɛm modga tẽngã nin-kãsemsã sẽn yaa rakãag-rãmbã+ n deeg wanzuri wã. Yẽ reega wanzuri sɩkl* pis-nu b ned kam fãa nengẽ n kõ Asiiri rĩmã. Dẽ, Asiiri rĩmã lebg n kuilame n ka pa tẽngẽ wã ye. 21 A Menahɛm+ vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Israyɛll rĩm-dãmbã kibay sebrã pʋgẽ. 22 Dẽ, a Menahɛm kii wa a yaab-rãmbã, t’a biig a Pekaya ledg-a n lebg rĩma.

23 Zida rĩm a Azariya naamã yʋʋm pis-nu soabã, a Menahɛm biig a Pekaya lebga rĩm Israyɛlle, n zĩnd Samari n dɩ naam yʋʋm a yiibu. 24 A ra maanda sẽn yaa wẽng a Zeova nifẽ. A pa bas yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye.+ 25 A Remaliya biig a Peka+ sẽn da yaa rĩmã tãb-biis naabã zãmb-a lame, n kʋ yẽ ne a Argoob la a Ariye Samari, na-yirã gasg ning sẽn tar pãngã pʋgẽ. Galaad rap pis-nu n da be ne a Peka. La yẽ sẽn kʋ a Pekaya wã poore, a ledg-a lame n lebg rĩma. 26 A Pekaya vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Israyɛll rĩm-dãmbã kibay sebrã pʋgẽ.

27 Zida rĩm a Azariya naamã yʋʋm pis-nu la a yiib-n-soabã, a Remaliya biig a Peka+ lebga rĩm Israyɛlle, n zĩnd Samari n dɩ naam yʋʋm pisi. 28 Yẽ ra maanda sẽn yaa wẽng a Zeova nifẽ, la a pa bas yel-wẽn nins a Nebat biig a Zerobowam sẽn da kɩt tɩ Israyɛll nebã maanã ye.+ 29 Israyɛll rĩm a Peka naamã wakate, Asiiri rĩm a Tiglat-pilezɛɛr+ waa soolmã pʋgẽ n zab n deeg Iyon, Abɛll-bɛt-maaka,+ Zanowa, Kedɛɛse,+ Hazoore, Galaade,+ Galile, Naftali soolmã+ fãa. Yẽ talla b nin-buiidã n loog yembd Asiiri.+ 30 Dẽ, a Ela biig a Ooze+ sɩfame n na n lub a Remaliya biig a Peka n kʋ-a, n ledg-a n lebg rĩma. Yɩɩ a Ozɩyas biig a Zotam+ naamã yʋʋm pisi soabã. 31 A Peka vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Israyɛll rĩm-dãmbã kibay sebrã pʋgẽ.

32 Israyɛll rĩm a Remaliya biig a Peka naamã yʋʋm a yiib-n-soabã, Zida rĩm a Ozɩyas+ biig a Zotam+ lebga rĩma. 33 A sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm piig la a yoobe. A ma wã yʋʋr la a Zerusa, n da yaa a Zadok bi-pugla.+ 34 A ra maanda sẽn yaa tɩrg a Zeova nifẽ wa a ba a Ozɩyase.+ 35 La b pa sãam zĩ-zãntsã* ye. Nin-buiidã ra ket n maanda maando, la maoong sẽn nusd bug-zõos zĩ-zãntsẽ wã.+ Yaa yẽ n me a Zeova roogã yĩngr dignoorã.+ 36 A Zotam vɩɩmã kibay nins sẽn kellã, bũmb nins a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 37 Wakat kãnga, a Zeova kɩtame tɩ Siiri rĩm a Rezĩn ne a Remaliya biig a Peka+ yik n zabd ne Zida.+ 38 A Zotam kii wa a yaab-rãmbã tɩ b mum-a ne a yaab-rãmbã, a yaab a Davɩɩd tẽngẽ wã. La a biig a Akaaz n ledg-a n lebg rĩma.

16 A Remaliya biig a Peka naamã yʋʋm piig la a yopoe-n-soabã, Zida rĩm a Zotam biig a Akaaz+ lebga rĩma. 2 A Akaaz sẽn deeg naamã t’a tara yʋʋm pisi, la a rɩɩ naam Zerizalɛm yʋʋm piig la a yoobe. A pa maan sẽn yaa tɩrg a Wẽnnaam a Zeova nifẽ wa a yaab a Davɩɩd ye.+ 3 Yẽ rɩka Israyɛll rĩm-dãmbã togs-n-taare,+ hal n dɩk a bi-ribl n yõog bugum n maan maoongo,+ n tʋm tʋʋm-beed nins fãa bu-zẽms+ nins a Zeova sẽn dig n yiis Israyɛll nebã taoorã sẽn maanã. 4 Yẽ leb n da maanda maand la maoong sẽn nusd bug-zõos zĩ-zãntsẽ* wã,+ kunkubẽ wã la tɩ-bedr sẽn tar vãad wʋsg fãa tẽngre.+

5 Wakat kãnga, Siiri rĩm a Rezĩn ne a Remaliya biig a Peka sẽn yaa Israyɛll rĩmã waame n na n zab ne Zerizalɛm.+ Bãmb tilga b sik n gũbg a Akaaze, la b pa tõog n deeg tẽngã ye. 6 Wakat kãng me la Siiri rĩm a Rezĩn deeg Elat+ n lebs Edom, n dig Zʋɩf-rãmbã* n yiis Elate. Woto, Edom nebã kẽe Elat tẽngã pʋgẽ, n soog-a hal n tãag rũndã. 7 A Akaaz tʋma neb Asiiri rĩm a Tiglat-pilezɛɛr+ nengẽ n yeel-a yaa: “Mam yaa yãmb tʋm-tʋmd la y biiga. Woto wã, bɩ y wa fãag maam Siiri rĩmã ne Israyɛll rĩmã sẽn zabd ne maamã nusẽ.” 8 Dẽ, a Akaaz rɩka wanzuri wã ne sãnemã sẽn da be a Zeova roogẽ wã, la na-yirã laogã bĩngr zĩigẽ wã n kõ Asiiri rĩmã tɩ yɩ noor-madgre.+ 9 La Asiiri rĩmã saka a Akaaz raabã, n yik n kẽng Damaas n tɩ zab n deeg-a, n yõg a nebã n kẽng Kɩɩre,+ la a kʋ a Rezĩn.+

10 Rĩm a Akaaz wa n kẽng n tɩ sega Asiiri rĩm a Tiglat-pilezɛɛr Damaase. A sẽn yã tẽn-kugr ning sẽn be Damaasã, a toola a mamsg maan-kʋʋd a Uuri, n wilg-a a meebã sẽn yaa to-to wã ball-balle.+ 11 Maan-kʋʋd a Uuri+ mee tẽn-kugrã+ wa sẽn zems bũmb nins fãa rĩm a Akaaz sẽn pa Damaas n toolã. A mee tẽn-kugrã n sa tɩ rĩm a Akaaz nan pa yi Damaas n wa ye. 12 Rĩmã sẽn yi Damaas n wa yã tẽn-kugrã, a kolgame n maan maand tẽn-kugrã zugu.+ 13 Yẽ kell n maana maand sẽn yõogd bugum, la a yõog kood biis kũun tɩ bug-zõos nus tẽn-kugrã zugu. Yẽ pʋdga divẽ kũunã, la a mes zems-n-taar maand zɩɩm tẽn-kugrã zugu. 14 Rĩm a Akaaz rɩka zũud tẽn-kugr+ ning sẽn da be a Zeova roogã taoorã, rat n yeel tɩ yẽ meng tẽn-kugrã ne a Zeova roogã sʋkã, n tɩ ning-a a meng tẽn-kugrã rɩtgo. 15 A yeela maan-kʋʋd a Uuri+ yaa: “Maan yibeoog maoongã sẽn yõogd bugmã tẽn-kug-kãsengã zugu,+ ne zaabr kood biis kũunã,+ rĩmã maoong sẽn yõogd bugmã, n paas nin-buiidã maand sẽn yõogd bugmã, kood biis kũunã la b divẽ kũunã beenẽ. Sẽn paase, fo segd n mesa maand sẽn yõogd bugmã ne maand a taabã zɩɩm tẽn-kug-kãng zugu. La sã n yaa ne zũud tẽn-kugrã, mam na n wa wilga bũmb ning d sẽn na n maan ne-a.” 16 Maan-kʋʋd a Uuri maana bũmb ning fãa rĩm a Akaaz sẽn yeel-a t’a maanã.+

17 Sẽn paase, rĩm a Akaaz pãba bilim-bilmã+ bõn-paklsã sẽn be kɩremsã n wã, la a yãgs la-pogdã+ sẽn da be b zutã. Yẽ roka zũud mogrã sẽn da be lolsã zutã,+ n dɩgl kug b sẽn gãneg zugu.+ 18 La a yãgsa zãongã b sẽn da maan wẽnd-doogẽ wã vʋʋsg daarã yĩngã, ne yɩng rignoorã rĩmã sẽn da tũud n kẽed a Zeova roogẽ wã, n toeem b zĩisi. Yẽ maana woto fãa Asiiri rĩmã yĩnga.

19 A Akaaz vɩɩmã kibay nins sẽn kellã, bũmb nins a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ.+ 20 Dẽ, a Akaaz kii wa a yaab-rãmbã, tɩ b mum-a a Davɩɩd tẽngẽ wã ne a yaab-rãmbã. La a biig a Ezekɩyaas*+ n ledg-a n lebg rĩma.

17 Zida rĩm a Akaaz naamã yʋʋm piig la a yiib-n-soabã, a Ela biig a Ooze+ lebga rĩm Israyɛlle, n zĩnd Samari n dɩ naam yʋʋm a wɛ. 2 A ra maanda sẽn yaa wẽng a Zeova nifẽ, la a pa maan wẽng n ta Israyɛll rĩm-dãmb nins sẽn deng yẽ wã ye. 3 Asiiri rĩm a Salmanasaar wa n zaba ne a Ooze,+ la yẽ lebga a tʋm-tʋmd n yaood-a fadgo.*+ 4 La Asiiri rĩmã wa n bãngame t’a Ooze rat n zãmb-a lame. Bala a tʋma neb Ezɩpt rĩm a So nengẽ,+ la a pa yao Asiiri rĩmã fadg* ning a sẽn yaood yʋʋmd fãa wã ye. Rẽ kɩtame tɩ Asiiri rĩmã yõk-a n balg bãens roogẽ.

5 Asiiri rĩmã wa n kẽe soolmã pʋgẽ ne pãnga, n tɩ tilg sik Samari n gũbg-a yʋʋm a tãabo. 6 Rĩm a Ooze naamã yʋʋm a wɛ soabã, Asiiri rĩmã tõog n deega Samari.+ Yẽ talla Israyɛll nebã n kẽng yembd+ Asiiri, n tɩ zĩnig-b Hala ne Haboor sẽn be Gozan kʋɩlgã noorã,+ la Meed-rãmbã tẽnsã pʋsẽ.+

7 Bõn-kãng paama Israyɛll nebã, bãmb sẽn beeg b Wẽnnaam a Zeova sẽn da yiis bãmb Ezɩpti, n fãag-b Ezɩpt rĩm a Farawõ nugẽ wã yĩnga.+ Bãmb tũu* bu-zẽmsã wẽnnaam-dãmba,+ 8 n tũ bu-zẽms nins a Zeova sẽn da rig n yiis bãmb taoorã minundã, la b tũ minund nins Israyɛll rĩm-dãmbã sẽn luglã.

9 Israyɛll nebã ra maanda yɛl sẽn pa tɩrs b Wẽnnaam a Zeova nifẽ. Bãmb da meta zĩ-zãnts* soolmã fãa pʋgẽ,+ tɩ yaa gasd wall tẽns sẽn gũbg ne lals* pʋgẽ. 10 Bãmb ra lugunda kug la ra-lugs+ tãn-bil fãa zugu, la tɩ-bedr sẽn tar vãad wʋsg fãa tẽngr+ n pʋʋsdẽ. 11 Bãmb da maanda maoong sẽn nusd bug-zõos zĩ-zãntsẽ* wã fãa, wa bu-zẽms nins a Zeova sẽn da rig n yiis bãmb taoorã sẽn da maandã.+ Bãmb da maanda sẽn yaa wẽng n beegd a Zeova.

12 Bãmb da pʋʋsda bõn-naandsã sẽn yaa bõn-yoodã*+ a Zeova sẽn yeel-b tɩ b ra pʋʋsã.+ 13 A Zeova ra ket n tʋmda a no-rɛɛsdbã la a bãngdbã* fãa tɩ b keoogd Israyɛll nebã+ n yetẽ yaa: “Lebg-y n wa-y la y bas y tʋʋm-wẽnsã!+ Tũ-y mam noyã la m tõodã wa sẽn zems bũmb nins fãa b sẽn gʋls tõog ning mam sẽn kõ y yaab-rãmbã pʋgẽ wã, la m sẽn kɩt tɩ m no-rɛɛsdbã sẽn yaa m tʋm-tʋmdbã taas yãmbã.” 14 La bãmb pa kelg ye. Bãmb kell n diglma b sũyã* wa b yaab-rãmbã sẽn pa tall tẽeb ne b Wẽnnaam a Zeova wã.+ 15 Bãmb da ket n zãgsda Wẽnnaam noyã ne a kaoolã+ a sẽn da maan ne b yaab-rãmbã, la a sẽn da keoogd bãmb tʋʋm-wẽnsã wɛɛngẽ wã.+ B ra pʋʋsda bõn-naandsã sẽn ka yõodã,+ tɩ bãmb mensã lebg neb sẽn ka yõodo.+ Woto, bãmb maana wa bu-zẽms nins fãa sẽn da gũbg bãmba, t’a Zeova ra yeel tɩ b ra rɩk b naoorã.+

16 Bãmb basa b Wẽnnaam a Zeova noyã fãa tũubu, n dõog sãnem nag-bi a yiibu,+ la b lugl ra-luk n pʋʋsdẽ.*+ Bãmb wõgemdame n pʋʋs bũmb nins fãa sẽn be saasẽ wã*+ la b tũ a Baalle.+ 17 Sẽn paase, b rɩka b kom-dibli la b kom-pugli n yõog bugum n maan maando.+ B ra bʋgda bagre,+ n get bãn n baood n na n bãng beoog yɛla, la b bas b yam* n maand sẽn yaa wẽng a Zeova nifẽ n beegd-a.

18 Woto kɩtame t’a Zeova sũur puug wʋsg ne Israyɛll nebã t’a menes-b a taoore.+ A pa kell buud baa a yembre, sã n pa Zida buudã bala.

19 La baa Zida buudã neb pa kell n tũ b Wẽnnaam a Zeova tõodã ye.+ Bãmb me tũu Israyɛll nebã minundã.+ 20 A Zeova basa a Israyɛll yagensã fãa n ka le rat-b ye. Yẽ ning-b-la yãnde, n bas-b fãadb nusẽ hal n menes-b zãng a taoore. 21 A gʋsga Israyɛll a Davɩɩd roogã rãmb nugẽ, tɩ Israyɛll nebã yãk a Nebat biig a Zerobowam t’a lebg b rĩma.+ La a Zerobowam kɩtame tɩ Israyɛll nebã bas a Zeova tũubu, la a kɩt tɩ b maan yel-wẽn-kãsenga. 22 Israyɛll nebã kell n dɩka a Zerobowam naoor n maan yel-wẽn nins fãa a sẽn maanã.+ Bãmb pa bas yel-wẽn-kãens maanego, 23 hal t’a Zeova menes-b a taoore, wa a sẽn da kɩt t’a no-rɛɛsdbã fãa togsã.+ Woto, b yõga Israyɛll nebã b tẽngẽ wã n tall n kẽng yembd Asiiri,+ tɩ b tɩ zĩnd be n tãag rũndã.

24 Asiiri rĩmã tɩ talla Babilon neba, Kut neba, Ava ne Hamat la Sefarvayim+ neb n wa zĩnig Samari tẽnsã pʋsẽ tɩ b ledg Israyɛll nebã. Bãmb sooga Samari n zĩnd a tẽnsã fãa pʋsẽ. 25 Bãmb sẽn ta be paalmã, b ra pa zoet* a Zeova ye. Woto, a Zeova tʋma gɩgma bãmb sʋk+ tɩ b kʋ bãmb neb kẽere. 26 La neb n kẽng n tɩ yeel Asiiri rĩmã yaa: “Buud nins neb yãmb sẽn tall n wa kẽes Samari tẽnsã pʋsẽ wã pa mi tẽngã Wẽnnaamã tũudmã ye. Rẽ n so tɩ Wẽnnaam-kãng tʋmd gɩgma tɩ b kʋʋd-ba, bãmb sẽn pa mi tẽngã Wẽnnaamã tũudmã yĩnga.”

27 Asiiri rĩmã sẽn wʋm dẽ, a yeelame yaa: “Kɩt-y tɩ maan-kʋʋdb nins yãmb sẽn yõg n wa ne wã nin-yend leb beenẽ n tɩ zãms nebã tẽngã Wẽnnaamã tũudmã.” 28 Woto, maan-kʋʋdb nins bãmb sẽn yõg Samari n wa wã nin-yend leba Betɛll+ n na n tɩ zĩnd be. Yẽ sɩngame n zãmsd nin-buiidã b sẽn segd n zoe* a Zeova to-to.+

29 La buud fãa neb maana b meng wẽnnaam,* n ning pʋʋsg rotã sẽn be zĩ-zãnts* nins Samari nebã sẽn da me wã zugu. Buud fãa neb maana woto tẽng ning b sẽn be wã pʋgẽ. 30 Woto, Babilon nebã maana b wẽnnaam a Sukot-benot, tɩ Kut nebã maan b wẽnnaam a Nergall, tɩ Hamat+ nebã maan b wẽnnaam a Asima. 31 Ava nebã maana b wẽnnaam-dãmb a Nibaaz ne a Taartak, tɩ Sefarvayim+ nebã yõogd b kom-dibli bugum n kõt a Adramelɛk ne a Anamelɛk sẽn yaa bãmb wẽnnaam-dãmbã. 32 Baa bãmb sẽn da zoet a Zeova wã, bãmb yãka maan-kʋʋdb b nin-buiidã sʋk zĩ-zãntsã* yĩnga. Nin-kãens n da yaa pʋʋsg rotã sẽn be zĩ-zãntsẽ wã+ maan-kʋʋdba, n tʋmd bãmb yĩnga. 33 Woto, bãmb da zoeta a Zeova, la b ra pʋʋsda b wẽnnaam-dãmbã wa tẽns nins pʋsẽ bãmb sẽn yi wã neb sẽn maandã.+

34 Hal n tãag rũndã, bãmb tũuda b pĩnd tũudmã. Bãmb ned baa a ye pa tũud* a Zeova ye. B baa a yembr pa sakd a tõodã, a bʋ-kaoor toor-toorã, Tõogã, ne noy la sagls nins a Zeova sẽn kõ a Zakoob yagensã, soab ning yʋʋr a sẽn toeem tɩ lebg a Israyɛllã+ ye. 35 A Zeova sẽn maan kaoolã ne Israyɛll nebã,+ a ra yeel-b lame: “Yãmb pa segd n zoe wẽnnaam-dãmb a taaba, la y pa segd n wõgemd b taoore, bɩ n tũ-b wall y maan maand n kõ-b ye.+ 36 La yaa a Zeova sẽn yaa soab ning sẽn yiis yãmb Ezɩpt ne pãn-kãsenga, la ne kang sẽn tar pãngã*+ la y segd n zoe,+ n wõgemd a taoor la y kʋ maand n kõ-a. 37 Yãmb segd n tũu a noyã, a bʋ-kaoor toor-toorã, la y sak Tõogã ne noy nins a sẽn gʋls n kõ yãmbã+ neer wakat fãa, la y pa segd n zoe wẽnnaam-dãmb a taab ye. 38 Yãmb pa segd n yĩm kaool ning mam sẽn maan ne yãmbã ye.+ Y pa segd n zoe wẽnnaam-dãmb a taab me ye. 39 La yaa yãmb Wẽnnaam a Zeova la y segd n zoe. Bala yẽ n na n fãag yãmb y bɛɛbã fãa nusẽ.”

40 La bu-zẽmsã pa sak ye. Bãmb tũu b pĩnd tũudmã.+ 41 Woto, bu-zẽmsã neb wa n zoeta a Zeova,+ la b ra tũuda bõn-naands nins bãmb mens sẽn maanã. Bãmb kambã ne b yagensã kell n maana wa b yaab-rãmbã, hal n tãag rũndã.

18 Israyɛll rĩm a Ela biig a Ooze+ naamã yʋʋm a tãab-n-soabã, Zida rĩm a Akaaz+ biig a Ezekɩyaas+ lebga rĩma. 2 A sẽn deeg naamã t’a tara yʋʋm pisi la a nu, la a rɩɩ naam yʋʋm pisi la a wɛ Zerizalɛm. A ma wã yʋʋr la a Abi,* n yaa a Zakari bi-pugla.+ 3 A ra maanda sẽn yaa tɩrg a Zeova nifẽ+ wa a yaab a Davɩɩde.+ 4 Yaa yẽ n sãam zĩ-zãntsã,*+ n wã kugã b sẽn da lugl n pʋʋsdẽ wã, la a kɛ ra-lukã b sẽn lugl n pʋʋsdẽ* wã n lubi.+ Leb n yaa yẽ n sãam zũud waafã a Moyiiz sẽn da maanã.+ Bala hal n tãag wakat kãnga, Israyɛll nebã ra ket n maanda maand sẽn nusd bug-zõos n kõt-a, la b boond bõn-naandgã tɩ zũud waafã.* 5 Yẽ teega Israyɛll Wẽnnaam a Zeova.+ Sẽn deng yẽ wall a loogr poore, rĩm pa zĩnd Zida rĩm-dãmbã fãa sʋk sẽn yɩ wa yẽ ye. 6 A ra gãda a Zeova kãn-kãe,+ n pa bʋdg n bas-a ye. Yẽ kell n tũu noy nins a Zeova sẽn da kõ a Moyiizã. 7 A Zeova ra bee ne-a. A sẽn kẽngẽ fãa, a ra tʋmda ne yam. Yẽ tõdgame t’a kõn le sak Asiiri rĩmã, n yɩ a tʋm-tʋmd ye.+ 8 Sẽn paase, a tõoga Filisti nebã+ hal n tãag Gaaza ne a soolmã, tɩ yaa gasg wall tẽng sẽn gũbg ne lalse.*

9 Rĩm a Ezekɩyaas naamã yʋʋm a naas-n-soabã, rat n yeel tɩ Israyɛll rĩm a Ela biig a Ooze+ naamã yʋʋm a yopoe-n-soabã, Asiiri rĩm a Salmanasaar waame n na n zab ne Samari, n tilg tãb-sik n gũbg-a.+ 10 Bãmb tõogame n deeg Samari+ yʋʋm a tãab poore. Yɩɩ a Ezekɩyaas naamã yʋʋm a yoob-n-soabã, sẽn yaa Israyɛll rĩm a Ooze naamã yʋʋm a wɛ soabã la b reeg Samari. 11 Asiiri rĩmã yõga Israyɛll nebã n kẽng yembd+ Asiiri, n tɩ zĩnig-b Hala ne Haboor sẽn be Gozan kʋɩlgã noorã, la Meed-rãmbã tẽnsã pʋsẽ.+ 12 Bõn-kãng paama bãmba, b sẽn da pa kelgd b Wẽnnaam a Zeova koɛɛgã n tar a kaoolã kɩɩsgo, n da pa maand bũmb nins fãa a Zeova sẽn da kɩt t’a tʋm-tʋmd a Moyiiz kõ-b noor tɩ b maanã.+ Bãmb pa kelge, wall b sak ye.

13 Rĩm a Ezekɩyaas naamã yʋʋm piig la a naas-n-soabã, Asiiri+ rĩm a Senakeriib wa n zaba ne Zida tẽns nins fãa sẽn gũbg ne lalsã, n deeg-ba.+ 14 Dẽ, Zida rĩm a Ezekɩyaas tʋma neb Asiiri rĩmã nengẽ Lakiis n yeele: “Mam beegame. Loog-y n bas-y-ma, tɩ mam na n yaoo yãmb yaood ning fãa y sẽn na n dogl-ma.” Asiiri rĩmã yaoolga Zida rĩm a Ezekɩyaas wanzuri talã* kobs-tã, ne sãnem talã pis-tã. 15 Dẽ, a Ezekɩyaas kõo Asiiri rĩmã wanzuri wã fãa sẽn da be a Zeova roogẽ wã ne na-yirã laog bĩngr zĩigẽ wã.+ 16 Yaa wakat kãng me la Zida rĩm a Ezekɩyaas yãgs a Zeova roogã kʋɩlensã,+ ne a lugã yẽ mengã sẽn da bol sãnemã,+ n kõ Asiiri rĩmã.

17 Asiiri rĩmã tʋma Tartannã,* Rabsariisã,* ne Rabsake wã,* n paas tãb-biis kʋʋng tɩ b yi Lakiis+ n na n kẽng rĩm a Ezekɩyaas nengẽ Zerizalɛm. Bãmb taa Zerizalɛm+ n tɩ yals yĩngr bãkã ko-sorã noore, so-kõodr ning sẽn dabd gar-loasdã pʋʋgẽ wã noore.+ 18 Bãmb yeelame tɩ b bool rĩmã t’a wa, la yɩɩ a Hilkiya biig a Eliyakim+ sẽn get na-yirã yellã, ne a Sebna+ sẽn yaa seb-gʋlsdã, la a Azaf biig a Yowa sẽn yaa seb-bĩngdã n yi n seg-ba.

19 Rabsake wã yeel-b lame yaa: “Mam kotame tɩ y yeel a Ezekɩyaas yaa: ‘Ad Asiiri rĩmã sẽn yaa rĩm-kãsengã sẽn yeele: “Yaa bõe la fo teeg-yã?+ 20 Fo yetame tɩ f tara yam la pãng n tõe n zabe. La yaa gom-vɩɩd bala. Fo teega ãnda, n dat n tõdg maam?+ 21 Gese! Fo teega Ezɩpt+ sẽn yaa wa tãnwĩig sẽn kao wã. Ned sã n tik-a, a kõsda a nug-pʋgã n sãage. Ezɩpt rĩm a Farawõ yaa woto ne neb nins fãa sẽn teeg-a wã. 22 La yãmb sã n yeel maam tɩ yaa yãmb Wẽnnaam a Zeova la y teeg-yã,+ rẽ yĩnga, pa yẽ zĩ-zãntsã* ne a tẽn-kugã la a Ezekɩyaas sẽn sãame,+ n yaool n yeel Zida ne Zerizalɛm nebã tɩ yaa Zerizalɛm tẽn-kugrã taoor la b segd n wõgemdã sɩda?”+ 23 Masã, m bõos tɩ f par ne Asiiri rĩmã sẽn yaa m zu-soabã: Mam na n kõo foo wed-moos tus a yi, tɩ d ges f na paam neb sẽn na n zomb-ba.+ 24 Baa Ezɩpt sã n sõng foo ne saar-dãmb* la wed-rʋʋdba, fo tõe n zaba ne mam zu-soabã guvɛrneer a ye sẽn yaa a tʋm-tʋmd ning sẽn yaa bilf n yɩɩd a taabã n tõog-a sɩda? 25 Sẽn paase, fo tẽedame tɩ mam sooga m meng n na n wa zab ne zĩ-kãngã n sãam-a tɩ pa tũ ne a Zeova raab la? Yaa a Zeova meng n yeel maam yaa: ‘Kẽng n tɩ zab ne tẽn-kãngã n sãam-a!’”

26 A Hilkiya biig a Eliyakim ne a Sebna+ la a Yowa sẽn wʋm Rabsake wã+ goamã, bãmb leok-a lame yaa: “D kotame tɩ y gom ne y tʋm-tʋmdbã ne Arameyẽ*+ tɩ tõnd wʋmdame. Ra n gom-y ne tõnd ne Zʋɩf-rãmbã goam tɩ neb nins sẽn be lalgã zugã wʋm ye.”+ 27 La Rabsake wã yeel-b lame yaa: “Yaa yãmb ne y zu-soabã bal la mam zu-soabã tʋm maam tɩ m wa taas koe-kãngã la? Yaa neb nins sẽn zĩ lalgã zugã me yĩnga. Bãmb ne yãmb fãa na n dɩɩ y bĩndã la y yũ y rʋʋd-koomã.”

28 Dẽ, Rabsake wã yalsame n zẽk a koɛɛg n gom ne Zʋɩf-rãmbã buud-gomdã n yeel yaa: “Kelg-y Asiiri rĩmã sẽn yaa rĩm-kãsengã koɛɛga!+ 29 Ad rĩmã sẽn yeele: ‘Ra n bas-y t’a Ezekɩyaas belg-y ye. Bala a pa tõe n fãag yãmb mam nugẽ ye.+ 30 Ra n bas-y t’a belg-y me tɩ y teeg a Zeova, n yeel-y t’a Zeova na n fãaga yãmba, la tɩ Asiiri rĩmã pa na n tõog n deeg tẽn-kãngã ye.+ 31 Ra n kelg-y-yã a Ezekɩyaas ye. Bala ad Asiiri rĩmã sẽn yeele: “Bao-y laafɩ ne maam la y sak tɩ m soog-yã. Woto, yãmb ned kam fãa na n dɩɩ a viyn tɩɩs biisi, a kankang biisi, la a yũ a bulg koom, 32 hal tɩ m wa tall-y n kẽng tẽng sẽn wõnd yãmb tẽngã.+ Yaa tẽng sẽn tar kood ne divẽ-paalga, tẽng sẽn pid ne bur la viyn pʋto, ne tẽng sẽn tar oliiv tɩɩs la sɩɩdo. Dẽ, yãmb na n vɩɩmdame n da ki ye. Ra n kelg-y-yã a Ezekɩyaas t’a belgda yãmba, n yetẽ t’a Zeova na n fãaga yãmba. 33 Buud a taabã wẽnnaam-dãmb tõog n fãaga bãmb Asiiri rĩmã nugẽ sɩda? 34 Hamat+ ne Arpaad wẽnnaam-dãmbã bee yɛ? Sefarvayim+ ne Hena la Iva wẽnnaam-dãmbã bee yɛ? Bãmb tõog n fãaga Samari mam nugẽ sɩda?+ 35 Tẽnsã fãa wẽnnaam-dãmbã sʋka, bʋs n tõog n fãag b tẽng mam nugẽ, t’a Zeova na n wa tõog n fãag Zerizalɛm mam nugẽ.”’”+

36 La nin-buiidã sĩnda b noor n pa leok tɩ bũmb ye. Bala rĩmã ra yeelame tɩ b ra leok-a ye.+ 37 La a Hilkiya biig a Eliyakim sẽn get na-yirã yellã, ne a Sebna sẽn yaa seb-gʋlsdã la a Azaf biig a Yowa sẽn yaa seb-bĩngdã pãrsa b futã, n kẽng a Ezekɩyaas nengẽ n tɩ togs-a Rabsake wã goamã.

19 Rĩm a Ezekɩyaas sẽn wʋm gom-kãensa wã, zĩig pʋgẽ, a pãrsa a futã la a yeelg boto, n kẽng a Zeova roogẽ wã.+ 2 Dẽ, yẽ tʋma a Eliyakim sẽn get na-yirã yellã, ne a Sebna sẽn yaa seb-gʋlsdã la maan-kʋʋdbã taoor dãmb tɩ b kẽng no-rɛɛs a Ezayi+ sẽn yaa a Amooz biigã nengẽ. Bãmb yeelga bot n kẽnge. 3 Bãmb yeela a Ezayi yaa: “Ad a Ezekɩyaas sẽn yeele: ‘Rũndã yaa sũ-sãang daare, tãsga,* la yãnd daare. Bala tõnd yaa wa pag sẽn kʋmd rogem, tɩ pãng kae n na n dog ye.+ 4 Tõe tɩ yãmb Wẽnnaam a Zeova na n wʋma goam nins fãa Rabsake wã* zu-soab sẽn tʋm-a t’a wa gom n bao Wẽnnaam ning sẽn vɩ wã noorã,+ n sok-a goam nins yãmb Wẽnnaam a Zeova sẽn wʋmã yĩnga. Woto wã, pʋʋs-y+ kellã sẽn põsã yĩnga.’”

5 Dẽ, rĩm a Ezekɩyaas tʋm-tʋmdbã kẽnga a Ezayi nengẽ+ 6 t’a yeel-b yaa: “Ad yãmb sẽn segd n tɩ yeel y zu-soabã: ‘Ad a Zeova sẽn yeele: Ra yɛɛs+ goam nins fo sẽn wʋmã yĩng ye. Ra zoe rabeem, goam nins Asiiri rĩmã tʋm-tʋmdbã sẽn gom n paoog maamã yĩng ye.+ 7 Gese! Mam na n ninga bũmb a yamẽ wã. A na n wʋma kibar n lebg n leb a tẽngẽ wã, la mam na n kɩtame tɩ b kʋ-a ne sʋʋg a meng tẽngã pʋgẽ.’”+

8 Rabsake wã sẽn wʋm tɩ Asiiri rĩmã loog n basa Lakiisã,+ a leba a nengẽ n tɩ mik t’a zabda ne Libna.+ 9 La Asiiri rĩmã wʋmame tɩ Etiyopi rĩm a Tiraka yi n na n zaba ne-a. Woto, yẽ tʋma koe-taasdb+ a Ezekɩyaas nengẽ n yeel-b yaa: 10 “Ad yãmb sẽn segd n tɩ yeel rĩm a Ezekɩyaas bũmb ninga: ‘Ra bas tɩ f Wẽnnaamã fo sẽn teegã belg-fo, n yeel tɩ Asiiri rĩmã pa na n tõog n deeg Zerizalɛm ye.+ 11 Gese! Fo wʋma Asiiri rĩm-dãmbã sẽn maan tẽnsã fãa bũmb ningã. B sãam-b lame.+ Fo tagsdame tɩ f na n põsame la? 12 Buud nins mam yaab-rãmbã sẽn sãamã wẽnnaam-dãmbã fãag-b lame sɩda? Gozan ne Haran+ la Rezɛf bɛɛ? Edɛn nin-buiidã sẽn da be Tɛll-asaarã bɛɛ? 13 Hamat rĩmã ne Arpaad rĩmã bɛɛ? Sefarvayim ne Hena la Iva tẽnsã rĩmã bɛɛ?’”+

14 A Ezekɩyaas reega sɛbã koe-taasdbã nugẽ n karme, la a kẽng a Zeova roogẽ wã n tɩ yadg sɛbã a Zeova taoore.+ 15 A Ezekɩyaas sɩnga pʋʋsg+ a Zeova taoor n yeel yaa: “Israyɛll Wẽnnaam a Zeova sẽn zao a geerã sẽn be seribẽ-rãmbã zugã.*+ Yaa yãmb y ye bal n yaa dũniyã soolem toɛy-toɛyã fãa Wẽnnaam sɩd-sɩda.+ Yãmb n naan saasã la tẽngã. 16 Zeova, kɩll-y y tʋbr n kelge!+ Zeova, puk-y y nin+ n gese! Kelg-y goam nins a Senakeriib sẽn tʋm tɩ b wa gom n bao Wẽnnaam ning sẽn vɩ wã noorã. 17 Zeova, yaa sɩd tɩ Asiiri rĩm-dãmbã sãama buud toɛy-toɛy ne b tẽnse.+ 18 La bãmb loba b wẽnnaam-dãmbã bugmẽ, bala b yaa ninsaalb nus tʋʋma,+ b pa wẽnnaam-dãmb ye.+ B yaa raad ne kuga. Rẽ n so tɩ b tõog n sãam-ba. 19 La masã, tõnd Wẽnnaam a Zeova, d kotame tɩ y fãag tõnd a nugẽ tɩ dũniyã soolem toɛy-toɛyã fãa bãng tɩ yãmb a Zeova y yembr bal n yaa Wẽnnaam.”+

20 Dẽ, a Amooz biig a Ezayi tʋmame tɩ b tɩ taas a Ezekɩyaas koe-kãngã: “Ad Israyɛll Wẽnnaam a Zeova sẽn yeele: ‘Mam wʋma fo sẽn pʋʋs+ maam Asiiri rĩm a Senakeriib wɛɛngẽ wã.+ 21 Ad a Zeova sẽn yet yẽ bũmb ninga:

“Siyõ bi-puglã sẽn yaa pa-kuilã yaanda foo la a paoogd foo.

Zerizalɛm bi-puglã girda a zug n laad foo.

22 Yaa ãnda noor la fo sẽn bao wã, la yaa ãnda la fo sẽn paoogã?+

Yaa Israyɛll Sõng soabã!+

Mam na n kɛɛ a sɛɛdr tɩɩsã sẽn yaa wogdã, ne a zenevirie tɩɩs nins sẽn yaa sõma n yɩɩdã.

Mam na n kẽe a zĩ-solgdsã sẽn zãr n yɩɩdã, ne a kãg nins wẽdgr sẽn yaa toogã.

25 Fo pa wʋm la? Yaa hal daar zãr la mam yãk yam n na n maan yãoã.+

Yaa hal wakat sẽn loog la mam segl bõn-kãngã.+

La masã, mam na n pids-a lame.+

Fo na n luba tẽns sẽn gũbg ne lals tɩ b lebg raboodo.+

29 “Ad bãnd ning mam sẽn kõt foom a Ezekɩyaase: Rõandã, yãmb na n dɩɩ kood nins sẽn yi b toorã. La vẽere, yãmb na n dɩɩ kood-kãens sẽn na n sʋʋg n bul n yi wã.+ La yʋʋm a tãab-n-soabã, yãmb na n bʋdame la y kẽebe. Yãmb na n sela viyn tɩɩs n dɩ b biisã.+ 30 Zida neb nins sẽn põsã, b rãmb nins sẽn ketã+ na n kɩɩ yẽg tẽngre, la b wom biis yĩngri. 31 Bala kell n na n yi Zerizalɛm, la neb n na n põs n yi Siyõ tãngã zugu. Tãb-biis naab a Zeova yẽesmã n na n maan tɩ yɩ woto.+

32 “‘Woto yĩnga, ad a Zeova sẽn yet Asiiri rĩmã wɛɛngẽ:+

35 Baraar yʋngo, a Zeova malɛkã yiime n kʋ tãb-biis tus-koabg la pis-nii la a nu Asiiri nebã tãb-sikã zĩigẽ.+ Nebã sẽn yik yibeoog pĩnda, b yãa kũ-rãmbã fãa sẽn dʋre.+ 36 Dẽ, Asiiri rĩm a Senakeriib lebgame n leb Niniiv+ n tɩ zĩnd be.+ 37 La yẽ sẽn wa n wõgemded a wẽnnaam a Nisrok roogẽ wã, a kom-dibli a Adramelɛk ne a Sarezɛɛr kʋ-a-la ne sʋʋga,+ la b zoe n kẽng Ararat+ soolmẽ wã. Rẽ poore, a biig a Esar-hadon+ ledg-a lame n lebg rĩma.

20 Wakat kãnga, a Ezekɩyaas lʋɩɩ bãaga, hal n dat n ki.+ A Amooz biig a Ezayi sẽn yaa no-rɛɛsã waa a nengẽ, n yeel-a yaa: “Ad a Zeova sẽn yeele: ‘Togs f zakã rãmb f yaoolem koees tɩ f na n kiime. Fo bãagã pa na n sãoog ye.’”+ 2 A sẽn wʋm dẽ, a wẽnemda a neng n tees roogã lalg n sɩng a Zeova pʋʋsg n yeel yaa: 3 “Zeova, mam kotame tɩ y tẽeg mam sẽn tũ yãmb ne sɩd la ne m sũur fãa wã, la mam sẽn maan sẽn yaa sõma yãmb nifẽ wã yelle.”+ Rẽ poore, a Ezekɩyaas yãba wʋsgo.

4 Nand t’a Ezayi ta na-yirã samandã tẽn-sʋka, a Zeova yeel-a lame yaa:+ 5 “Lebg n tɩ yeel a Ezekɩyaas sẽn yaa mam nin-buiidã taoor soabã yaa: ‘Ad fo yaab a Davɩɩd Wẽnnaam a Zeova sẽn yeele: “Mam wʋma fo pʋʋsgã. Mam yãa fo nintãmã.+ Mam na n sãooga foom.+ Ka la rasem a tãabo, fo na n kẽnga a Zeova roogẽ wã.+ 6 Mam na n paasa fo yõorã woglem yʋʋm piig la a nu, la m fãag foom ne tẽn-kãngã Asiiri rĩmã nugẽ.+ Mam na n zab n sõnga tẽn-kãngã la m fãag-a mam mengã yʋʋr yĩnga, la m tʋm-tʋmd a Davɩɩd yĩnga.”’”+

7 Rẽ poore, a Ezayi yeelame yaa: “Bao-y kankam-gil koɛɛng n wa ne.” Bãmb tallame n wa ning nod-tãoodrã. Rẽ poore, rĩmã yĩnsã sãooga bilf-bilfu.+

8 A Ezekɩyaas ra soka a Ezayi yaa: “Bõe n na n yɩ bãnd+ n wilg t’a Zeova na n sãooga m bãagã, la tɩ ka ne rasem a tãabo, m na n kẽnga a Zeova roogẽ wã?” 9 A Ezayi leok-a lame yaa: “Ad bãnd ning a Zeova sẽn na n kõ n wilg t’a Zeova na n pidsa a gomdã. Fo ratame tɩ maasmã sẽn be rʋʋdsã zugã kẽng taoor nao-yakem piig bɩ, bɩ f ratame tɩ tar n leb poorẽ nao-yakem piiga?”+ 10 A Ezekɩyaas leokame yaa: “Yaa nana tɩ maasmã kẽng taoor nao-yakem piiga, la yɩl t’a leb poorẽ nao-yakem piig pa nana ye.” 11 Woto, no-rɛɛs a Ezayi pʋʋsa a Zeova t’a kɩt tɩ maasmã sẽn da zoe n sig a Akaaz rʋʋdsẽ wã leb poorẽ nao-yakem piiga.+

12 Wakat kãnga, a Baladan biig a Merodak-baladan sẽn yaa Babilon rĩmã tʋma neb tɩ b tɩ kõ a Ezekɩyaas lɛta ne kũuni. Bala yẽ wʋmame t’a Ezekɩyaas ra lʋɩɩ bãaga.+ 13 A Ezekɩyaas reeg-b lame,* la a wilg-b a laogã bĩngr roogã zãnga:+ Wanzuri wã, sãnemã, bomiye kaamã* ne ka-sõng a to, a zab-teedã, la bũmb nins fãa sẽn be a laogã bĩngr zĩigẽ wã. Bũmb pa be a na-yirã ne a soolmã fãa pʋgẽ a sẽn pa wilg-b ye.

14 Rẽ poore, no-rɛɛs a Ezayi waa rĩm a Ezekɩyaas nengẽ n sok-a yaa: “Nin-kãensã yeelame tɩ bõe, la b yii yɛ?” T’a Ezekɩyaas leok yaa: “Bãmb yii zĩ-zãrgẽ, Babilon soolmẽ wã.”+ 15 A Ezayi leb n sokame yaa: “Bõe la b yã na-yirã pʋgẽ?” T’a Ezekɩyaas leok yaa: “B yãa bũmb nins fãa sẽn be na-yirã. Bũmb pa be mam laogã bĩngr zĩigẽ m sẽn pa wilg-b ye.”

16 A Ezayi yeela a Ezekɩyaas yaa: “Kelg-y-yã a Zeova koɛɛga.+ 17 Ad a Zeova sẽn yeele: ‘Gese! Wakat n wat tɩ b na n wʋk bũmb nins fãa sẽn be na-yirã la bũmb nins fãa f yaab-rãmbã sẽn bĩng n tãag masã wã n kẽng Babilonne.+ Bũmb baa a ye pa na n kell ye.’ 18 ‘Sẽn paase, b na n yõga kamb nins fo sẽn na n dogã kẽer n tall n kẽng+ Babilonne, tɩ b tɩ lebg Babilon rĩmã na-yirã tʋm-tʋmdba.’”+

19 A Ezekɩyaas sẽn wʋm rẽ, a yeela a Ezayi yaa: “A Zeova goamã fo sẽn togsã yaa sõma.”+ La a paasame: “Mam sũur yaa noogo, m sẽn paam tɩ laafɩ la bãan na n zĩnd m vɩɩmã tɛkã.”+

20 A Ezekɩyaas vɩɩmã kibay nins sẽn kellã, a pãn-kãsengã, n paas a sẽn maan bãkã+ ne ko-sorã to-to n tak koomã n kẽes tẽngã pʋgẽ wã,+ b gʋlsa rẽ fãa Zida rĩm-dãmbã kibay sebrã pʋgẽ. 21 A Ezekɩyaas wa n kii wa a yaab-rãmbã,+ t’a biig a Manase+ ledg-a n lebg rĩma.+

21 A Manase+ sẽn deeg naamã t’a tara yʋʋm piig la a yiibu, la a rɩɩ naam Zerizalɛm yʋʋm pis-nu la a nu.+ A ma wã yʋʋr da yaa a Hɛfziba. 2 Yẽ maana sẽn yaa wẽng a Zeova nifẽ, n da tʋmd tʋʋm-yood nins bu-zẽmsã+ a Zeova sẽn dig n yiis Israyɛll nebã taoorã+ sẽn da tʋmdã. 3 A lebs n mee zĩ-zãnts* nins a ba a Ezekɩyaas sẽn da sãamã,+ n me tẽn-kug a Baal yĩnga, la a kɩt tɩ b pees ra-luk b sẽn pʋʋsde,+ wa Israyɛll rĩm a Akaab sẽn da maanã.+ Yẽ wõgemda bũmb nins fãa sẽn be saasẽ wã* taoore, n tũ-ba.+ 4 Sẽn paase, a mee tẽn-kug a Zeova roogẽ wã,+ roog ning wɛɛngẽ a Zeova sẽn da yeele: “Mam na n ninga m yʋʋrã Zerizalɛm zugu.”+ 5 A mee tẽn-kug a Zeova roogã saman a yiibã pʋsẽ,+ bũmb nins fãa sẽn be saasẽ wã yĩnga.+ 6 Yẽ rɩka a bi-ribl n yõog bugum n maan maoongo. Sẽn paase, a maana tɩto, a gesa bãn n bao n bãng beoog yɛla,+ a yãka neb tɩ b gomd ne kɩɩmse, la neb tɩ b yɩ bag-bʋgdba.+ Yẽ maana sẽn yaa wẽng wʋsg a Zeova nifẽ n beeg-a.

7 A Manase rɩka ra-lukã*+ a sẽn kɩt tɩ b peesã, n kẽes roog ning pʋgẽ a Zeova sẽn da gom a yell ne a Davɩɩd la ne a biig a Salomo n yeele: “Mam na n ninga m yʋʋrã wakat fãa ro-kãngã zugu, la Zerizalɛm sẽn yaa tẽng ning mam sẽn yãk Israyɛll buud toɛy-toɛyã fãa sʋkã zugu.+ 8 Israyɛll nebã sã n tũ bũmb nins fãa mam sẽn yeel-bã neere,+ sẽn yaa Tõog ning mam tʋm-tʋmd a Moyiiz sẽn yeel bãmb tɩ b tũ wã tõrã, mam pa na n le kɩt tɩ b yi tẽng ning mam sẽn kõ b yaab-rãmbã pʋgẽ n yeeb ye.”+ 9 La Israyɛll nebã pa kelg ye. A Manase ra kẽesd-b-la moogo, tɩ b maand wẽng n yɩɩd bu-zẽms nins a Zeova sẽn da sãam bãmb taoorã.+

10 A Zeova ra gomda ne a no-rɛɛsdbã maasem+ n yetẽ yaa: 11 “Zida rĩm a Manase maana bõn-wẽn-kãensã fãa. Yẽ maana wẽng n yɩɩg Amoor nebã+ sẽn deng yẽ wã fãa,+ la ne a bõn-naandsã sẽn yaa bõn-yoodã,* a kɩtame tɩ Zida nebã maan yel-wẽna. 12 Woto wã, ad Israyɛll Wẽnnaam a Zeova sẽn yeele: ‘Mam na n kɩtame tɩ yel-beed paam Zerizalɛm+ ne Zida nebã, hal tɩ ned ning fãa sẽn na n wʋm bɩ a yɛɛse.*+ 13 Mam na n tẽega wĩ-makdg+ ning b sẽn tall n mak Samari+ wã Zerizalɛm zugu, la m tall a Akaab roogã rãmb+ makdgã* n mak Zerizalɛm, n nedg-a wa ned sẽn nedgd laag n lebg n fõgnã.+ 14 Mam na n daaga m pʋɩɩrã sẽn yaa Israyɛll neb nins sẽn kellã n base,+ la m ning-b b bɛɛbã nugẽ tɩ b bɛɛbã fãa zɛ-b la b fã-ba.+ 15 Bala bãmb maana sẽn yaa wẽng mam nifẽ, la b beegd maam n ka basdẽ, sẽn sɩng ne daar ning b yaab-rãmbã sẽn yi Ezɩptã n tãag rũndã.’”+

16 A Manase sẽn kɩt tɩ Zida nebã maan sẽn yaa wẽng a Zeova nifẽ n beeg-a wã sẽn yãk a toogo, a raaga bʋʋm dãmb wʋsg zɩɩm hal tɩ Zerizalɛm fãa pid ne b zɩɩmã.+ 17 A Manase vɩɩmã kibay nins sẽn kellã, bũmb nins fãa a sẽn maanã, n paas yel-wẽn nins a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 18 A Manase wa n kii wa a yaab-rãmbã, tɩ b mum-a na-yirã zẽedã zĩigẽ, a Uuza zẽedã zĩigẽ.+ Rẽ poore, a biig a Amo ledg-a lame n lebg rĩma.

19 A Amo+ sẽn deeg naamã t’a tara yʋʋm pisi la a yiibu, la a rɩɩ naam Zerizalɛm yʋʋm a yiibu.+ A ma wã yʋʋr da yaa a Mesulemet, n yaa Zotba rao a Haruuz bi-pugla. 20 A ra maanda sẽn yaa wẽng a Zeova nifẽ wa a ba a Manase.+ 21 Yẽ rɩka a ba wã togs-n-taar n maan bũmb nins fãa a sẽn maanã. Yẽ ra tũuda bõn-naandsã sẽn yaa bõn-yoodã* a ba wã sẽn tũ wã, n wõgemd b taoore.+ 22 Woto, yẽ basa a yaab-rãmbã Wẽnnaam a Zeova, n pa maan wa a Zeova sẽn datã ye.*+ 23 A Amo tʋm-tʋmdbã wa n sɩɩga taab noor n kʋ-a a roogẽ wã. 24 La tẽngã nebã kʋʋ neb nins fãa sẽn sɩɩg taab noor n kʋ rĩm a Amo wã, la b kɩt t’a biig a Zoziyas ledg-a n lebg rĩma.+ 25 A Amo vɩɩmã kibay nins sẽn kellã, bũmb nins a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 26 Bãmb mum-a-la a yaoogã sẽn be a Uuza zẽedã zĩigẽ+ wã, t’a biig a Zoziyas ledg-a n lebg rĩma.+

22 A Zoziyas+ sẽn deeg naamã t’a tara yʋʋm a nii, la a rɩɩ naam yʋʋm pis-tã la a yembr Zerizalɛm.+ A ma wã yʋʋr ra yaa a Yedida, n yaa Boozkat+ rao a Adaya bi-pugla. 2 A maana sẽn yaa tɩrg a Zeova nifẽ. Yẽ rɩka a yaab a Davɩɩd naoore,+ n pa bʋdg goabg wall rɩtg ye.

3 Rĩm a Zoziyas naamã yʋʋm piig la a nii-n-soabã, a tʋma a Mesulam biig a Azaliya biig a Safan sẽn yaa seb-gʋlsdã a Zeova roogẽ wã+ n yeele: 4 “Kẽng maan-kʋʋdb kãsem a Hilkiya+ nengẽ n tɩ yeel-a t’a tigs ligd ning fãa nebã sẽn tar n wat a Zeova roogẽ wã,+ sẽn yaa ligd ning rignoorã gũudbã sẽn deeg nebã nengẽ wã.+ 5 Kɩt-y tɩ b rɩk ligdã n kɩs neb nins b sẽn yãk tɩ b get a Zeova roogã tʋʋmdã yellã, tɩ bãmb rɩk n yao tʋm-tʋmdb nins sẽn segd n maneg a Zeova roogã zĩis nins sẽn sãamã,*+ 6 nug-tʋʋm dãmbã, roogã tʋm-tʋmdbã ne tãn-metbã, la b tall ligdã n da raad ne kug b sẽn peese, wẽnd-doogã manegr yĩnga.+ 7 Yãmb pa segd n sok-b b sẽn na n tall ligdã n maan bũmb ning ye. Bala b yaa pʋ-peelem dãmba.”+

8 Rẽ zugẽ, maan-kʋʋdb kãsem a Hilkiya yeela a Safan sẽn yaa seb-gʋlsdã+ yaa: “Mam yãa Tõogã sebr+ a Zeova roogã pʋgẽ.” Dẽ, a Hilkiya rɩka sebrã n kõ a Safan t’a sɩng karengo.+ 9 Seb-gʋlsd a Safan kẽnga rĩmã nengẽ n tɩ yeel-a yaa: “Yãmb tʋm-tʋmdbã vaaga ligdã sẽn da be wẽnd-doogẽ wã, n dɩk n kõ rap nins b sẽn yãk tɩ b get a Zeova roogã tʋʋmdã yellã.”+ 10 Seb-gʋlsd a Safan leb n yeela rĩmã yaa: “Ad sebr+ maan-kʋʋd a Hilkiya sẽn kõ maam.” Dẽ, a Safan sɩnga sebrã kareng rĩmã taoore.

11 Rĩmã sẽn wʋm Tõogã sebrã goamã, tao-tao bala, a pãrsa a futã.+ 12 Rĩmã yeela maan-kʋʋd a Hilkiya, a Safan biig a Ahikam,+ a Mikaya biig a Akboore, seb-gʋlsd a Safan la rĩmã tʋm-tʋmd a Aazaya yaa: 13 “Kẽng-y n tɩ sok-y-yã a Zeova mam yĩnga, nin-buiidã yĩnga, la Zida tõrã yĩnga, sebrã b sẽn yã wã goamã wɛɛngẽ. Bala a Zeova sũur puuga wʋsg ne tõndo,+ d yaab-rãmbã sẽn pa tũ goam nins sẽn be seb-kãngã pʋgẽ wã yĩnga. Bãmb pa tũ bũmb ning fãa b sẽn gʋls sebrã pʋgẽ tõnd yĩngã ye.”

14 Woto, maan-kʋʋd a Hilkiya ne a Ahikam la a Akboore, n paas a Safan ne a Aazaya kẽnga no-rɛɛs-poak a Ulda nengẽ.+ Yẽ ra yaa a Haraas biig a Tikva biig a Salum sẽn get futã bĩngr yellã paga. A Ulda ra bee Zerizalɛm sak a yiib-n-soabã pʋgẽ. Yaa be la bãmb tɩ gom ne-a.+ 15 A yeel-b lame: “Ad Israyɛll Wẽnnaam a Zeova sẽn yeele: ‘Kẽng-y n tɩ yeel-y rao ning sẽn tʋm yãmb mam nengẽ wã yaa: 16 “Ad a Zeova sẽn yeele: ‘Mam na n kɩtame tɩ yel-beed paam tẽn-kãngã ne a nebã. Zida rĩmã sẽn karem sebr ningã+ goamã fãa na n pidsame. 17 Bala bãmb basa maam n maand maand sẽn nusd bug-zõos n kõt wẽnnaam-dãmb a taaba,+ n na n beeg maam ne b nusã tʋʋmã fãa.+ Rẽ n so tɩ mam sũurã na n puug wʋsg ne tẽn-kãngã, la mam sũurã pa na n sig ye.’”+ 18 La y segd n tɩ yeela Zida rĩmã sẽn tʋm yãmb tɩ y wa sok a Zeova wã yaa: “Ad Israyɛll Wẽnnaam a Zeova sẽn yeele: ‘Goam nins fo sẽn wʋmã wɛɛngẽ, 19 fo sũur sẽn sãam tɩ f sik f meng+ a Zeova taoore, fo sẽn wʋm mam sẽn yeel tɩ m na n maana tẽn-kãngã ne a nebã bũmb ningã, m sẽn yeel tɩ kãab-wẽng n na n paam bãmb tɩ nebã yɛɛsã, tɩ fo pãrs f futã+ n yãb mam taoorã yĩnga, ma-me wʋma f pʋʋsgã. Yaa a Zeova meng n gome. 20 Rẽ n so tɩ mam na n kɩt tɩ fo babs f yaab-rãmbã,* tɩ b mum foo ne laafɩ f yaoogẽ wã. Fo ninã pa na n yã yel-beed nins fãa mam sẽn na n kɩt tɩ paam tẽn-kãngã ne a nebã ye.’”’” Dẽ, bãmb tɩ togsa rĩmã a Ulda sẽn yeelã fãa.

23 Dẽ, rĩmã tʋmame tɩ b tɩ bool Zida ne Zerizalɛm kãsem-dãmbã fãa tɩ b wa tigmi.+ 2 Rẽ poore, rĩmã kẽnga a Zeova roogẽ wã ne Zida nebã fãa, Zerizalɛm nebã fãa, n paas maan-kʋʋdbã la no-rɛɛsdbã. Yɩɩ nin-buiidã fãa, sẽn sɩng ne kom-bõonegã n tãag kãsembã. A karma kaoolã sebrã+ b sẽn yã a Zeova roogã pʋgẽ wã+ goamã fãa tɩ nebã kelge. 3 Rĩmã yalsa ra-lukã sɛɛg n maan kaool* a Zeova taoore,+ n yeel t’a na n tũu a Zeova la a sak a noyã, a saglsã la a tõodã ne a sũur fãa la ne a sɩɩgã* fãa, n tũ kaool-kãng goamã b sẽn gʋls sebrã pʋgẽ wã fãa. La nin-buiidã fãa wilgame tɩ b saka kaoolã.+

4 Rĩmã kõo noore, tɩ maan-kʋʋdb kãsem a Hilkiya+ ne maan-kʋʋdb nins sẽn sõngd-a wã, n paas neb nins sẽn gũud rignoyã kẽ a Zeova roogẽ wã, n yiis teed nins fãa b sẽn maan a Baal yĩngã, ra-lukã b sẽn lugl n pʋʋsdẽ*+ wã yĩngã, la bũmb nins fãa sẽn be saasẽ wã* yĩngã. Rẽ poore, yẽ yii Zerizalɛm n tɩ yõog-b bugum pʋtã sẽn be Sedrõ longẽ wã, la a wʋk b tompɛglmã n tall n kẽng Betɛlle.+ 5 A sika wẽn-sãamsã maan-kʋʋdbã, b rãmb nins Zida rĩm-dãmbã sẽn da yãk tɩ b maand maoong sẽn nusd bug-zõos Zida tẽnsã zĩ-zãntsẽ* wã, la Zerizalɛm tẽngã kɩremsã. Yẽ riga neb nins me sẽn da maand maoong sẽn nusd bug-zõos a Baal yĩnga, wĩntoogã, kiuugã, ãd-sulã, la bũmb nins fãa sẽn be saasẽ wã yĩngã.+ 6 A yiisa ra-lukã b sẽn lugl n pʋʋsdẽ*+ wã a Zeova roogã pʋgẽ, n kẽng Zerizalɛm tẽngã kɩrenga, Sedrõ longẽ wã n tɩ yõog-a+ longã pʋga, n wer-a t’a lebg tompɛglem, la a wʋk tompɛglmã n fãeeg nin-buiidã yaad zutu.+ 7 Yẽ leb n siiga rap nins sẽn da koosd b mens pʋʋsg zĩisẽ wã rotã+ sẽn da be a Zeova roogẽ wã, zĩig ning pagbã sẽn da wʋgd fu-rot ra-lukã b sẽn lugl n pʋʋsdẽ* wã yĩngã.

8 Rẽ poore, a riga maan-kʋʋdbã fãa n yiis Zida tẽnsẽ wã, la a rẽgem zĩ-zãntsã* tɩ nebã pa le tõe n pʋʋs beenẽ ye. Zĩ-kãens la maan-kʋʋdbã sẽn da maand maoong sẽn nusd bug-zõosã, sẽn sɩng ne Geba+ n tãag Bɛɛr-seba.+ A leb n siiga zĩ-zãnts nins sẽn be tẽngã naab a Zozuwe rignoorẽ wã. Fo sã n da kẽed tẽngã rignoorẽ wã, zĩ-zãnt-kãens ra bee f nug-goabga. 9 Zĩ-zãntsã* maan-kʋʋdbã ra pa maand maoong a Zeova tẽn-kugrẽ wã Zerizalɛm ye.+ La b ra wãbda bur sẽn pa ning rabɩll ne b ba-biisã. 10 A rẽgma Tofɛt+ me sẽn be a Hinom kom-dibli wã longẽ*+ wã tɩ ned da pa le tõe n pʋʋs beenẽ, sẽn na yɩl tɩ ned ra rɩk a bi-ribl bɩ a bi-pugl n yõog bugum n kõ a Molɛk ye.+ 11 A leb n gɩdgame tɩ wed-moos nins Zida rĩm-dãmbã sẽn yãk wĩntoogã pʋʋsg yĩngã ra tũ na-yirã tʋm-tʋmd a Natã-melɛk roogã* sẽn be zãongẽ* wã, n kẽ a Zeova roogẽ wã ye. A yõoga wĩntoogã saar-dãmbã*+ me bugum. 12 Rĩmã leb n siiga tẽn-kug nins Zida rĩm-dãmbã sẽn me a Akaaz yĩngr doogã zugã,+ la tẽn-kug nins a Manase sẽn me a Zeova roogã saman a yiibã pʋsẽ wã.+ A wã-b lame n sãeeg b tomã Sedrõ longẽ wã. 13 Rĩmã rẽgma zĩ-zãntsã sẽn tees Zerizalɛmmã tɩ ned pa le tõe n pʋʋs be ye. Yaa zĩ-zãnts* nins sẽn da be Sãoong tãngã* nug-goabga, Israyɛll rĩm a Salomo sẽn da me n kõ Sɩdõ nebã wẽn-pog-yoog a Astarte, ne Mowaab nebã wẽn-yoog a Kemos la Amon nebã+ wẽn-yoog a Milkommã.+ 14 A wãa kugã b sẽn da lugl n pʋʋsdẽ wã, n kɛ ra-lugsã b sẽn lugl n pʋʋsdẽ* wã,+ la a wʋk ninsaalb kõab n pids b zĩisã. 15 Sẽn paase, a tɩ siiga tẽn-kugr ning sẽn be Betɛllã, ne zĩ-zãntgã* a Nebat biig a Zerobowam sẽn da me n kɩt tɩ Israyɛll nebã maan yel-wẽndã.+ A sẽn siig tẽn-kug-kãng ne zĩ-zãntgã poore, a yõoga zĩ-zãntgã bugum n wer-a t’a lebg tom, la a yõog ra-lukã b sẽn lugl n pʋʋsdẽ* wã+ bugum.

16 A Zoziyas sẽn wẽnemd n yã yaadã sẽn be tãngã zugã, a kɩtame tɩ b vaag kõabã sẽn be b pʋsẽ wã n yõog tẽn-kugrã zugu. Yẽ maana woto n na n kɩt tɩ b pa le tõe n pʋʋs beenẽ, wa sẽn zems a Zeova sẽn da kɩt tɩ Wẽnnaam daoã moon n togsã. A ra pĩnd n togsame tɩ bõn-kãensã na n maaname.+ 17 Rẽ poore, rĩmã sokame yaa: “Yaa ãnd yaoog kugr la sẽn tondã?” Tɩ tẽngã nebã leok-a: “Yaa Wẽnnaam daoã yaoogo, soab ning sẽn da yi Zida n wa+ pĩnd n togs yãmb sẽn maan Betɛll tẽn-kugrã bũmb ningã.” 18 Dẽ, a yeelame yaa: “Bɩ ned ra sɩɩs a kõabã ye. Bas-y-b beenẽ.” Woto, bãmb basa a kõabã ne no-rɛɛs ning sẽn da yi Samari n wa wã kõabã sɩɩ.+

19 A Zoziyas kɩtame me tɩ b sãam pʋʋsg rot nins fãa sẽn da be Samari tẽnsã zĩ-zãntsẽ* wã.+ Yaa pʋʋsg rot nins Israyɛll rĩm-dãmbã sẽn da me n beeg Wẽnnaamã. A maana bãmb me wa a sẽn maan Betɛllã.+ 20 A kʋʋ zĩ-zãntsã* maan-kʋʋdb nins fãa sẽn da be beenẽ wã tẽn-kugã zugu, la a yõog ninsaalb kõab tẽn-kugã zutu.+ Rẽ poore, yẽ leba Zerizalɛm.

21 Rĩmã yeela nin-buiidã fãa yaa: “Maan-y Pak tigr+ yãmb Wẽnnaam a Zeova yĩnga, wa sẽn gʋls kaoolã seb-kãngã pʋgẽ wã.”+ 22 Hal sẽn sɩng bʋ-kaoodbã sẽn da bʋʋd Israyɛllã tɛka, la Israyɛll rĩm-dãmbã ne Zida rĩm-dãmbã zãmaanã fãa tɛka,+ b ra zɩ n maan Pak tigr sẽn wõnd woto ye. 23 La yɩɩ rĩm a Zoziyas naamã yʋʋm piig la a nii-n-soabã la b maan Pak tig-kãng a Zeova yĩng Zerizalɛm.

24 A Zoziyas leb n kɩtame tɩ b menes neb nins sẽn gomd ne kɩɩmsã, bag-bʋgdbã,+ zak neb wẽnnaam-dãmbã,*+ bõn-naandsã sẽn yaa bõn-yoodã* la yel-yaals nins fãa sẽn da be Zida soolmã ne Zerizalɛm pʋgẽ wã, sẽn na yɩl n sak goam nins b sẽn gʋls Tõogã sebrã pʋgẽ,+ sebr ning maan-kʋʋd a Hilkiya sẽn yã a Zeova roogẽ wã.+ 25 Sẽn deng yẽ, rĩm sẽn lebg n wa a Zeova nengẽ ne a sũur fãa, ne a sɩɩg* fãa+ la ne a pãng fãa wa a Moyiiz Tõogã sẽn yeelã pa zĩnd ye. A to me pa zĩnd a loogr poor ye.

26 Baasgo, a Zeova sũur da ket n puuda wʋsg ne Zida, bõn-wẽns nins fãa a Manase sẽn da maan n beeg-a wã yĩnga.+ 27 A Zeova yeelame yaa: “Mam na n menesa Zida me m nifẽ+ wa m sẽn menes Israyɛllã.+ Mam na n basa Zerizalɛm, tẽng ning mam sẽn da yãkã, la roog ning mam sẽn da yeel tɩ m yʋʋrã na n zĩnda a zug wakat fãa wã.”+

28 A Zoziyas vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ. 29 A Zoziyas wakatẽ wã, Ezɩpt rĩm a Farawõ Neko wa n kẽngame n na n tɩ seg Asiiri rĩmã Efrat kʋɩlgã sɛɛga, tɩ rĩm a Zoziyas yi n na n tɩ zab ne a Farawõ Neko. La a sẽn yã a Zoziyasã, a kʋ-a-la Megido.+ 30 Dẽ, a tʋm-tʋmdbã rɩka a kũumã n kẽes saar* pʋgẽ n yi Megido n kẽng Zerizalɛm n tɩ mum-a a yaoogẽ wã. Rẽ poore, tẽngã nin-buiidã sudga a Zoziyas biig a Zowakaaz zugã kaam t’a ledg a ba wã n lebg rĩma.+

31 A Zowakaaz+ sẽn wa n deeg naamã t’a tara yʋʋm pisi la a tãabo, la a rɩɩ naam Zerizalɛm kiis a tãabo. A ma wã yʋʋr da yaa a Hamutalle,+ n yaa Libna rao a Zeremi bi-pugla. 32 A ra maanda sẽn yaa wẽng a Zeova nifẽ. A maana bõn-wẽns nins fãa a yaab-rãmbã sẽn maanã.+ 33 A Farawõ Neko+ kẽes-a-la bãens roogẽ Ribla,+ Hamat soolmẽ wã, sẽn na yɩl t’a ra le rɩ naam Zerizalɛm ye. Rẽ poore, yẽ kɩtame tɩ tẽngã nebã yao yaood wanzuri talã* koabga, la sãnem talã a ye.+ 34 Sẽn paase, a Farawõ Neko kɩtame t’a Zoziyas biig a Eliyakim ledg a ba wã n lebg rĩma, la a toeem a yʋʋrã tɩ lebg a Zowakim. La yẽ talla a Zowakaaz n kẽng Ezɩpti,+ t’a wa ki be.+ 35 A Zowakim kõo a Farawõ wanzuri wã ne sãnemã, la a kɩtame tɩ tẽngã nin-buiidã yao lampo, t’a paam wanzuri wã a Farawõ sẽn da yet tɩ b yao wã. Yẽ modga tẽngã ned fãa t’a yao wanzuri ne sãnem wa sẽn zems a tarmã, tɩ yẽ rɩk n kõ a Farawõ Neko.

36 A Zowakim+ sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm piig la a yembre.+ A ma wã yʋʋr da yaa a Zebida, n yaa Ruma rao a Pedaya bi-pugla. 37 Yẽ ra maanda sẽn yaa wẽng a Zeova nifẽ,+ n maan bõn-wẽns nins fãa a yaab-rãmbã sẽn maanã.+

24 A Zowakim wakatẽ wã, Babilon rĩm a Nebukadnezaar+ wa n zaba ne-a, n kɩt t’a lebg a tʋm-tʋmd yʋʋm a tãabo. La a Zowakim wa n tõdgame t’a kõn le sak a Nebukadnezaar ye. 2 Woto, a Zeova sɩngame n tʋmd fãadb sẽn yit Kalde nebã+ soolmẽ, Siiri, Mowaab la Amon nebã soolmẽ tɩ b wat n fãad-a. Wẽnnaam kɩtame tɩ b ra kẽnd n zabd ne Zida n na n sãam-a, wa sẽn zems goam nins+ a Zeova sẽn da kɩt t’a no-rɛɛsdbã togsã. 3 Hakɩɩka, yaa a Zeova n kɩt tɩ bõn-kãng paam Zida, sẽn na yɩl n menes-b a nifẽ,+ yel-wẽn nins fãa a Manase sẽn maanã yĩnga,+ 4 la a sẽn daag bʋʋm dãmb zɩɩmã yĩnga.+ Bala a Manase ra kɩtame tɩ Zerizalɛm pid ne bʋʋm dãmb zɩɩm, t’a Zeova tõdg t’a kõn kõ Zida sugr ye.+

5 A Zowakim vɩɩmã kibay nins sẽn kellã, bũmb nins fãa a sẽn maanã, b gʋlsa rẽ fãa Zida rĩm-dãmbã kibay sebrã pʋgẽ.+ 6 Dẽ, a Zowakim kii wa a yaab-rãmbã.+ La a biig a Zowakin n ledg-a n lebg rĩma.

7 Ezɩpt rĩmã pa le saag n yi a soolmẽ wã ye. Bala Babilon rĩmã ra reega tẽns nins fãa Ezɩpt rĩmã sẽn so wã,+ sẽn sɩng ne Ezɩpt kosoogã*+ n tãag Efrat kʋɩlgã.+

8 A Zowakin+ sẽn deeg naamã t’a tara yʋʋm piig la a nii, la a rɩɩ naam Zerizalɛm kiis a tãabo.+ A ma wã yʋʋr da yaa a Nehusta, n yaa Zerizalɛm rao a Ɛlnatan bi-pugla. 9 A ra maanda sẽn yaa wẽng a Zeova nifẽ. Yẽ maana bũmb nins fãa a ba wã sẽn maanã. 10 Wakat kãnga, Babilon rĩm a Nebukadnezaar tãb-biisã waame n na n zab ne Zerizalɛm, n tilg b sik n gũbg tẽngã.+ 11 Tãb-biisã sẽn wa n gũbg tẽngã, Babilon rĩm a Nebukadnezaar meng waame.

12 Zida rĩm a Zowakin yii ne a ma wã, a tʋm-tʋmdbã, a nanambsã, la na-yirã tʋm-tʋmdbã,+ n na n kõ b mens Babilon rĩmã.+ Yaa Babilon rĩmã naamã yʋʋm a nii-n-soabã+ la a yõk a Zowakin n kẽes yembdo. 13 Babilon rĩmã wʋka bõn-sõma nins fãa sẽn da be a Zeova roogẽ wã ne na-yirã laog bĩngr zĩigẽ wã.+ Yẽ wãa sãnem teed nins fãa Israyɛll rĩm a Salomo sẽn da maan a Zeova roogẽ wã,+ wa a Zeova sẽn da reng n togsã. 14 Yẽ yõga Zerizalɛm nebã fãa n tall n kẽng yembdo. Yaa nanambsã fãa,+ gãndaadã fãa, nug-tʋʋm dãmbã la sãabã.+ Yɩɩ neb tus-piig la yẽ sẽn tall n kẽng yembdã. A pa bas neda, sã n pa tẽngã neb nins sẽn yaa-b naong rãmb n yɩɩdã bala.+ 15 Woto, a Nebukadnezaar talla a Zowakin+ n kẽng yembd Babilon.+ A talla rĩmã ma, a pagbã, na-yirã tʋm-tʋmdbã la tẽngã nin-kãsemsã n yi Zerizalɛm n tɩ kẽes-b yembd Babilon. 16 Babilon rĩmã leb n yõga gãndaadã fãa n kẽng yembdo. Yɩɩ bãmb tus a yopoe, n paas nug-tʋʋm dãmb ne sãab tusri. A sẽn yõg b rãmbã fãa ra yaa gãndaad sẽn mi zabr sõma. 17 Babilon rĩmã kɩtame t’a Zowakin baaba-bil a Mataniya+ ledg-a n lebg rĩma, la a toeem a yʋʋrã tɩ lebg a Sedesiyaas.+

18 A Sedesiyaas sẽn deeg naamã t’a tara yʋʋm pisi la a yembre, la a rɩɩ naam yʋʋm piig la a ye Zerizalɛm. A ma wã yʋʋr da yaa a Hamutalle,+ n yaa Libna rao a Zeremi bi-pugla. 19 A ra maanda sẽn yaa wẽng a Zeova nifẽ. Yẽ maana bũmb nins fãa a Zowakim sẽn maanã.+ 20 Yɩɩ a Zeova sũ-puugrã yĩng la bõn-kãensã sẽn maan Zerizalɛm la Zida pʋgẽ wã, hal t’a wa menes-b a nifẽ.+ Sẽn paase, a Sedesiyaas tõdgame t’a kõn sak Babilon rĩmã ye.+

25 A Sedesiyaas naamã yʋʋm a wɛ soabã, kiuug piigã rasem piig soabã daare, Babilon rĩm a Nebukadnezaar+ waa ne a tãb-biisã fãa n na n zab ne Zerizalɛm.+ Yẽ wa n tilga sik-zĩigã, n me lalg n gũbg tẽngã.+ 2 Bãmb gũbga tẽngã n tãag rĩm a Sedesiyaas naamã yʋʋm piig la a ye soabã. 3 Kiuug a naas-n-soabã rasem a wɛ soabã daare, komã wɩnga+ tẽngã pʋgẽ hal tɩ rɩɩb ra kae nin-buiidã sẽn na n dɩ ye.+ 4 B pooga tẽngã lalg+ tɩ sodaasã fãa tũ rignoor ning sẽn be lals a yiibã sʋka, rĩmã zẽedã zĩig sɛɛgã n zoe ne yʋngo. Rẽ tɩ Kalde nebã gũbga tẽngã. Rĩmã rɩka Araba wã sor n zoe.+ 5 La Kalde nebã sodaasã pʋgla rĩmã n tɩ paam-a Zeriko we-rasempʋɩɩgã sẽn yaa tẽn-nabrẽ wã, t’a sodaasã fãa sãeeg n bas-a. 6 Dẽ, bãmb yõka rĩmã+ n tall-a n kẽng Babilon rĩmã nengẽ Ribla, tɩ b kao a bʋʋdo. 7 Bãmb kʋʋ a Sedesiyaas kom-dibli wã a nifẽ. Rẽ poore, Babilon rĩmã leoa a ninã la a balg-a ne zũud bãens n tall-a n kẽng Babilon.+

8 Babilon rĩm a Nebukadnezaar naamã yʋʋm piig la a wɛ soabã, kiuug a nu wã rasem a yopoe-n-soabã daare, a Nebuzaradan+ sẽn yaa gũudbã naaba, n leb n yaa Babilon rĩmã tʋm-tʋmdã waa Zerizalɛm.+ 9 Yẽ yõoga a Zeova roogã,+ rĩmã zakã,*+ la Zerizalɛm zagsã fãa.+ A yõoga nin-kãsemsã fãa zags me.+ 10 Kalde tãb-biisã fãa sẽn da be ne gũudbã naabã tusa lals nins fãa sẽn da gũbg Zerizalɛmmã n lubi.+ 11 Gũudbã naab a Nebuzaradan talla neb nins sẽn da ket tẽngã pʋgẽ wã, ne sẽn da zoe-b n tɩ sak Babilon rĩmã, la nin-buiidã sẽn kellã+ n loog yembdo. 12 La gũudbã naabã basa tẽngã neb nins sẽn yaa naong rãmb n yɩɩdã kẽere. Yẽ modg-b lame tɩ b na n yõd n kood viyn pʋtã la pʋt a taabã.+ 13 Kalde nebã wãa a Zeova roogã zũud ra-lugsã,+ n paas bilim-bilim toɛy-toɛyã+ ne zũud Mogrã+ sẽn da be a Zeova roogẽ wã, la b wʋk zũudã n kẽng Babilon.+ 14 Bãmb wʋka tompeglɛm laasã, pɛll-dãmbã, teed nins b sẽn tar n kiisd fɩtl-dãmbã bugmã, wũmbli wã, la teed nins fãa sẽn maan ne zũudã b sẽn da tar n tʋmd wẽnd-doogẽ wã. 15 Gũudbã naab wʋka bugum laasã la la-bõoneg nins sẽn maan ne sãnem halaal+ la ne wanzuri halaalã.+ 16 La sã n yaa ne ra-lugs a yiibã, Mogrã la bilim-bilim toɛy-toɛyã a Salomo sẽn da maan a Zeova roogã yĩngã, b ra pa tõe n mak te-kãensã fãa zũudã zɩslem n bãng ye.+ 17 Ra-luk a ye fãa zãntlem da yaa kãntɩɩg* piig la a nii,+ tɩ pugli wã sẽn da be b zutã ra yaa ne zũudu. Pugl fãa zãntlem da yaa kãntɩɩg a tãabo, tɩ gãmbrã ne gernaad tɩɩs biisã fãa b sẽn maan n gilg pugli wã ra yaa ne zũudu.+ Ra-luk a to wã ne a gãmbrã me ra yaa woto.

18 Gũudbã naab yõka maan-kʋʋdbã taoor soab a Seraya,+ n paas maan-kʋʋd a Sofoni+ sẽn yaa a pʋgdgã, ne rigno-gũudb a tãabã.+ 19 Yẽ leb n yõka tẽngã na-yirã tʋm-tʋmd a ye sẽn da get sodaasã yelle, n paas rĩmã sagendb a nu, ne sodaasã naab seb-gʋlsdã sẽn da yãkd sodaas nin-buiidã sʋkã, la rap pis-yoob nin-buiidã sẽn da ket tẽngã pʋgẽ wã sʋka. 20 Gũudbã naab a Nebuzaradan+ talla bãmb n kẽng Babilon rĩmã nengẽ Ribla.+ 21 Babilon rĩmã kʋʋ bãmb Ribla, Hamat+ soolmẽ wã. Yɩɩ woto la b yiis Zida nebã b soolmẽ wã, n tall-b n kẽng yembdo.+

22 Babilon rĩm a Nebukadnezaar yãka a Safan+ biig a Ahikam+ biig a Gedaliya+ t’a na n soog nin-buiidã a sẽn da bas Zida soolmẽ wã.+ 23 Tãb-biisã nanambsã fãa ne b nebã sẽn wʋm tɩ Babilon rĩmã yãka a Gedaliya wã, zĩig pʋgẽ, bãmb waa a Gedaliya nengẽ Mizpa. Yɩɩ a Netaniya biig a Ismayɛlle, a Kareya biig a Zohananne, ne Netofa rao a Tanumet biig a Seraya, ne a Yaazaniya sẽn yaa Maakat raoã biigã, n paas b rapã.+ 24 A Gedaliya wẽena nanambsã ne b nebã taoor n yeel-b yaa: “Ra zoe-y rabeem, y sẽn lebg Kalde nebã tʋm-tʋmdbã yĩng ye. Zĩnd-y soolmã pʋgẽ n tʋm n kõ Babilon rĩmã, tɩ bũmb fãa na n yɩɩ sõma ne-yã.”+

25 Kiuug a yopoe-n-soabã pʋgẽ, a Elisama biig a Netaniya biig a Ismayɛll+ sẽn yaa na-roogã nedã peega rap piiga, tɩ b wa kʋ a Gedaliya ne Zʋɩf-rãmbã la Kalde nebã sẽn da be ne-a Mizpa wã.+ 26 Rẽ poore, nin-buiidã fãa, sẽn sɩng ne kom-bõonegã n tãag kãsembã, la tãb-biisã nanambsã yikame n zoe n kẽng Ezɩpti,+ bala bãmb da zoeta Kalde nebã.+

27 B sẽn tall Zida rĩm a Zowakin+ n kẽng yembdã yʋʋm pis-tã la a yopoe-n-soabã kiuug piig la a yiib-n-soabã rasem pisi la a yopoe-n-soabã daare, Babilon rĩm a Evɩll-merodak yiis-a-la bãensã roogẽ.*+ Yɩɩ yʋʋmd ning a Evɩll-merodak sẽn deeg naamã. 28 A goma ne a Zowakin noog-noogo, la a kõ-a naam n yɩɩg rĩm-dãmb a taabã sẽn da be ne-a Babilonnã. 29 Woto, a Zowakin yeesa a bãens roog futã. Hal a yõor tɛka, yẽ ra rɩta rĩmã taoor daar fãa. 30 Rĩmã ra kɩtame tɩ b kõt-a rɩɩb daar fãa, hal a yõor tɛka.