Maremagnum/Corbis Documentary via Getty Images
ഉണർന്നിരിക്കുക!
അർമഗെദോൻ ഇസ്രായേലിൽ തുടങ്ങുമോ?—ബൈബിളിനു പറയാനുള്ളത്
ഭൂമിയിൽ ഏതെങ്കിലും ഒരു പ്രത്യേക ഭാഗത്ത് നടക്കുന്ന ഒരു യുദ്ധത്തെയല്ല, പകരം എല്ലാ മനുഷ്യഗവൺമെന്റുകളും ദൈവവും തമ്മിൽ ലോകമെങ്ങുമായി നടക്കുന്ന യുദ്ധത്തെയാണ് അർമഗെദോൻ എന്നു ബൈബിൾ വിളിക്കുന്നത്.
“ആ അരുളപ്പാടുകൾ ഭൂതങ്ങളിൽനിന്നുള്ളവയാണ്. ഭൂമിയിൽ എല്ലായിടത്തുമുള്ള രാജാക്കന്മാരെ സർവശക്തനായ ദൈവത്തിന്റെ മഹാദിവസത്തിലെ യുദ്ധത്തിനു. . .എബ്രായ ഭാഷയിൽ അർമഗെദോൻ എന്ന് അറിയപ്പെടുന്ന സ്ഥലത്ത് കൂട്ടിച്ചേർത്തു.”—വെളിപാട് 16:14, 16.
അർമഗെദോൻ എന്ന വാക്ക് “മെഗിദ്ദോപർവതം” എന്ന് അർഥമുള്ള ഹർ മെഗിദ്ദോൻ എന്ന എബ്രായ പദത്തിൽനിന്നാണ് വന്നത്. പുരാതന ഇസ്രായേലിലെ ഒരു നഗരമായിരുന്നു മെഗിദ്ദോ. അതുകൊണ്ടുതന്നെ, അർമഗെദോൻ യുദ്ധം ഇസ്രായേലിൽവെച്ചായിരിക്കും നടക്കുന്നതെന്ന് ചിലർ വിശ്വസിക്കുന്നു. എന്നാൽ മെഗിദ്ദോ പ്രദേശത്തോ മധ്യപൂർവ ദേശത്തിലെ മറ്റേതെങ്കിലും സ്ഥലത്തോ ‘ഭൂമിയിൽ എല്ലായിടത്തുമുള്ള രാജാക്കന്മാരെയും’ അവരുടെ സൈന്യങ്ങളെയും ഉൾക്കൊള്ളിക്കാനാകില്ല.
വെളിപാട് പുസ്തകത്തിൽ “അടയാളങ്ങളിലൂടെ” അല്ലെങ്കിൽ ആലങ്കാരികഭാഷയിൽ ആണ് കാര്യങ്ങൾ വിവരിച്ചിരിക്കുന്നത്. (വെളിപാട് 1:1) അർമഗെദോൻ എന്നത് ശരിക്കുമുള്ള ഒരു സ്ഥലമല്ല, പകരം ലോകവ്യാപകമായി രാഷ്ട്രീയ ഗവൺമെന്റുകൾ ദൈവഭരണത്തിന് എതിരെ അവസാനമായി അണിനിരക്കുന്ന ഒരു സാഹചര്യമാണ്.—വെളിപാട് 19:11-16, 19-21.