ദുരന്ത​ത്തി​ന്റെ ആഘാത​ത്തിൽനിന്ന്‌ മോചനം സാധ്യം!

ഒരുപക്ഷേ നിങ്ങൾ യുദ്ധത്തിൽ പങ്കെടു​ത്തി​ട്ടുള്ള ഒരു സൈനി​ക​നാ​യി​രി​ക്കാം. അതിന്റെ ഭീകര​മായ ഓർമകൾ ഇപ്പോ​ഴും വേട്ടയാ​ടി​യിട്ട്‌, യുദ്ധം അവസാ​നി​ച്ചി​ട്ടില്ല എന്ന തോന്ന​ലി​ലാ​യി​രി​ക്കാം നിങ്ങൾ ജീവി​ക്കു​ന്നത്‌. അതല്ലെ​ങ്കിൽ ഒരുപക്ഷേ നിങ്ങൾ ബലാത്സം​ഗം​പോ​ലുള്ള ഹൃദയ​ശൂ​ന്യ​മായ അക്രമ​ത്തിന്‌ ഇരയാ​യിട്ട്‌ നിങ്ങളു​ടെ മനസ്സിനു കടുത്ത ആഘാത​മേ​റ്റി​ട്ടു​ണ്ടാ​കാം. അതുമ​ല്ലെ​ങ്കിൽ നിങ്ങളു​ടെ പ്രിയ​പ്പെട്ട ആരെങ്കി​ലും ഒരു പ്രകൃ​തി​ദു​ര​ന്ത​ത്തി​ലോ അപകട​ത്തി​ലോ മരിച്ചി​ട്ടു​ണ്ടാ​കാം. ആ വ്യക്തിയെ കൂടാ​തെ​യുള്ള ജീവിതം നിങ്ങൾക്കു സഹിക്കാ​വു​ന്ന​തി​നും അപ്പുറ​മാ​യി​രി​ക്കാം.

ഇത്തരം തോന്ന​ലു​ക​ളൊ​ക്കെ മാറു​മോ എന്നു നിങ്ങൾ ചിന്തി​ക്കു​ന്നു​ണ്ടോ? അവ മാറു​മെന്ന്‌ ഉറച്ച ബോധ്യ​ത്തോ​ടെ പറയാ​നാ​കും. എന്നാൽ, അതുവരെ ദൈവ​വ​ച​ന​മായ ബൈബി​ളിൽനിന്ന്‌ ആശ്വാസം കണ്ടെത്തുക.

ദുരന്തത്തിന്റെ ആഘാതത്തെ അതിജീ​വി​ച്ചു

ഏതാണ്ട്‌ 2,000 വർഷം മുമ്പ്‌, അപ്പോ​സ്‌ത​ല​നായ പൗലോസ്‌ ജീവനു ഭീഷണി​യായ ഭീകര​മായ അനുഭ​വ​ങ്ങ​ളി​ലൂ​ടെ കടന്നു​പോ​യി. അവയിൽ ചിലതി​നെ​ക്കു​റി​ച്ചുള്ള അദ്ദേഹ​ത്തി​ന്റെ വിവരണം ബൈബി​ളിൽ കാണാ​നാ​കും. അദ്ദേഹം പറയുന്നു: “ഏഷ്യാ​സം​സ്ഥാ​നത്ത്‌ ഞങ്ങൾ സഹിച്ച കഷ്ടതകൾ നിങ്ങൾ അറിയാ​തെ​പോ​ക​രു​തെന്നു ഞങ്ങൾ ആഗ്രഹി​ക്കു​ന്നു. ജീവ​നോ​ടി​രി​ക്കു​മോ എന്നു​പോ​ലും ആശങ്ക തോന്നുന്ന വിധത്തിൽ സഹിക്കാ​വു​ന്ന​തി​നും അപ്പുറം സമ്മർദം ഞങ്ങൾക്ക്‌ അനുഭ​വ​പ്പെട്ടു. ശരിക്കും ഞങ്ങളെ മരണത്തി​നു വിധി​ച്ച​താ​യി ഞങ്ങൾക്കു തോന്നി.”—2 കൊരി​ന്ത്യർ 1:8, 9.

ആ സന്ദർഭ​ത്തിൽ കൃത്യ​മാ​യി എന്താണു സംഭവി​ച്ച​തെന്നു നമുക്ക്‌ അറിയി​ല്ലെ​ങ്കി​ലും അദ്ദേഹ​ത്തി​നു നേരിട്ട പ്രശ്‌നം ശരിക്കും ഭീകര​മാ​യി​രു​ന്നു. (2 കൊരി​ന്ത്യർ 11:23-27) ആ ദുരന്ത​ങ്ങ​ളു​ടെ ആഘാത​ത്തിൽനി​ന്നെ​ല്ലാം അദ്ദേഹം എങ്ങനെ​യാ​ണു കരകയ​റി​യത്‌?

ഏഷ്യയിൽവെച്ച്‌ തനിക്കു​ണ്ടായ അനുഭ​വ​ത്തെ​ക്കു​റിച്ച്‌ ചിന്തി​ച്ചിട്ട്‌ അദ്ദേഹം എഴുതി​യത്‌ ഇങ്ങനെ​യാണ്‌: “നമ്മുടെ കർത്താ​വായ യേശു​ക്രി​സ്‌തു​വി​ന്റെ ദൈവ​വും പിതാ​വും ആയവൻ വാഴ്‌ത്ത​പ്പെ​ടട്ടെ. നമ്മുടെ ദൈവം മനസ്സലി​വുള്ള പിതാ​വും ഏതു സാഹച​ര്യ​ത്തി​ലും ആശ്വാസം തരുന്ന ദൈവ​വും ആണല്ലോ. നമ്മുടെ കഷ്ടതക​ളി​ലെ​ല്ലാം ദൈവം നമ്മളെ ആശ്വസി​പ്പി​ക്കു​ന്നു. അങ്ങനെ ദൈവ​ത്തിൽനിന്ന്‌ കിട്ടുന്ന ആശ്വാ​സം​കൊണ്ട്‌ ഏതുതരം കഷ്ടതകൾ അനുഭ​വി​ക്കു​ന്ന​വ​രെ​യും ആശ്വസി​പ്പി​ക്കാൻ നമുക്കും കഴിയു​ന്നു.”—2 കൊരി​ന്ത്യർ 1:3, 4.

അതെ, ദുരന്ത​ത്തിന്‌ ഇരയാ​യ​വർക്ക്‌ ‘മനസ്സലി​വുള്ള പിതാ​വും ഏതു സാഹച​ര്യ​ത്തി​ലും ആശ്വാസം തരുന്ന​വ​നും ആയ ദൈവ​ത്തിൽനിന്ന്‌’ സഹായം ലഭിക്കും. എന്നാൽ നമുക്ക്‌ എങ്ങനെ ആശ്വാസം നേടാ​നാ​കും?

എങ്ങനെ സഹായം നേടാം?

ഒന്നാമതായി സഹായം ചോദി​ക്കുക. നിങ്ങൾക്കു വൈകാ​രി​ക​മായ തളർച്ച അനുഭ​വ​പ്പെ​ടു​ന്നു​ണ്ടെ​ങ്കിൽ ഒരു കാര്യം ഓർക്കുക, മറ്റുള്ള​വർക്കും അങ്ങനെ തോന്നി​യി​ട്ടുണ്ട്‌. അത്തരം പ്രശ്‌ന​ങ്ങളെ മറിക​ട​ന്ന​വർക്കു മറ്റുള്ള​വരെ സഹായി​ക്കാൻ പൊതു​വേ സന്തോ​ഷ​മാണ്‌. അപ്പോ​സ്‌ത​ല​നായ പൗലോ​സി​നെ​പ്പോ​ലെ അവരും, ദൈവ​ത്തിൽനിന്ന്‌ തങ്ങൾക്കു കിട്ടിയ ആശ്വാസം കഷ്ടതകൾ അനുഭ​വി​ക്കുന്ന മറ്റുള്ള​വ​രു​മാ​യും പങ്കു​വെ​ക്കേ​ണ്ട​തു​ണ്ടെന്നു പലപ്പോ​ഴും ചിന്തി​ക്കു​ന്നു. അതു​കൊണ്ട്‌ യഹോ​വ​യു​ടെ സാക്ഷി​ക​ളിൽപ്പെട്ട, നിങ്ങൾക്ക്‌ ഇഷ്ടമുള്ള ആരെ​യെ​ങ്കി​ലും സമീപി​ക്കുക. ‘ഏതു സാഹച​ര്യ​ത്തി​ലും ആശ്വാസം തരുന്ന ദൈവ​ത്തിൽനി​ന്നുള്ള ആശ്വാസം നേടാൻ’ അവരുടെ സഹായം സ്വീക​രി​ക്കുക.

മടുത്തുപിന്മാറാതെ പ്രാർഥി​ച്ചു​കൊ​ണ്ടി​രി​ക്കുക. ദേഷ്യം തോന്നി​യി​ട്ടു പ്രാർഥി​ക്കാൻ ബുദ്ധി​മുട്ട്‌ അനുഭ​വ​പ്പെ​ടു​ന്നെ​ങ്കിൽ, ആത്മീയ​യോ​ഗ്യ​ത​യുള്ള ആരോ​ടെ​ങ്കി​ലും നിങ്ങ​ളോ​ടൊ​പ്പം പ്രാർഥി​ക്കാ​മോ എന്നു ചോദി​ക്കുക. (യാക്കോബ്‌ 5:14-16) യഹോ​വ​യോ​ടു സംസാ​രി​ക്കു​മ്പോൾ, ‘ദൈവം നിങ്ങ​ളെ​ക്കു​റിച്ച്‌ ചിന്തയു​ള്ള​വ​നാ​യ​തു​കൊണ്ട്‌ നിങ്ങളു​ടെ എല്ലാ ഉത്‌ക​ണ്‌ഠ​ക​ളും ദൈവ​ത്തി​ന്റെ മേൽ ഇടാൻ’ ഓർക്കുക. (1 പത്രോസ്‌ 5:7) തന്റെ ഓരോ ദാസ​ന്റെ​യും കാര്യ​ത്തിൽ ദൈവ​ത്തിന്‌ എത്രമാ​ത്രം താത്‌പ​ര്യ​മു​ണ്ടെന്നു ബൈബി​ളിൽ പലയി​ട​ങ്ങ​ളി​ലും ആവർത്തിച്ച്‌ പറഞ്ഞി​ട്ടുണ്ട്‌.

94-ാം സങ്കീർത്ത​ന​ത്തി​ന്റെ എഴുത്തു​കാ​ര​നും ഒരു ദുരനു​ഭ​വ​ത്തി​ലൂ​ടെ കടന്നു​പോ​യി​ട്ടു​ണ്ടാ​കണം. കാരണം അദ്ദേഹം ഇങ്ങനെ എഴുതി: “സഹായി​യാ​യി യഹോവ കൂടെ​യി​ല്ലാ​യി​രു​ന്നെ​ങ്കിൽ ഞാൻ എപ്പോഴേ ഇല്ലാതാ​യേനേ. ‘കാലുകൾ തെന്നി​പ്പോ​കു​ന്നു’ എന്നു ഞാൻ പറഞ്ഞ​പ്പോൾ യഹോവേ, അങ്ങയുടെ അചഞ്ചല​സ്‌നേഹം എന്നെ താങ്ങി​നി​റു​ത്തി. ആകുല​ചി​ന്തകൾ എന്നെ വരിഞ്ഞു​മു​റു​ക്കി​യ​പ്പോൾ അങ്ങ്‌ എന്നെ ആശ്വസി​പ്പി​ച്ചു, എന്നെ സാന്ത്വ​ന​പ്പെ​ടു​ത്തി.”—സങ്കീർത്തനം 94:17-19.

ദുരന്തത്തിന്‌ ഇരയായ ചിലരു​ടെ കാര്യ​ത്തിൽ “ആകുല​ചി​ന്തകൾ” മനസ്സിൽ തളം​കെ​ട്ടി​നി​ന്നിട്ട്‌ അതു ചില​പ്പോൾ പരി​ഭ്രാ​ന്തി​യു​ടെ​യോ ദേഷ്യ​ത്തി​ന്റെ​യോ ഒരു കുത്തൊ​ഴു​ക്കാ​യി മാറാ​റുണ്ട്‌. എന്നാൽ, മനസ്സു​തു​റന്ന്‌ പ്രാർഥി​ക്കു​ന്നത്‌ അത്തരം ചിന്തക​ളിൽനി​ന്നൊ​ക്കെ പുറത്ത്‌ കടക്കു​ന്ന​തു​വരെ നിങ്ങളെ താങ്ങി​നി​റു​ത്തും. യഹോവ സ്‌നേ​ഹ​മുള്ള ഒരു അപ്പനാ​ണെ​ന്നും ആ അപ്പൻ സ്‌നേ​ഹ​ത്തോ​ടെ സംരക്ഷി​ക്കുന്ന ഒരു ചെറിയ കുട്ടി​യാ​ണു നിങ്ങ​ളെ​ന്നും സങ്കൽപ്പി​ക്കുക. “മനുഷ്യ​ബു​ദ്ധിക്ക്‌ അതീത​മായ ദൈവ​സ​മാ​ധാ​നം നിങ്ങളു​ടെ ഹൃദയ​ത്തെ​യും മനസ്സി​നെ​യും ക്രിസ്‌തു​യേശു മുഖാ​ന്തരം കാക്കും” എന്ന ബൈബിൾവാ​ഗ്‌ദാ​നം എപ്പോ​ഴും മനസ്സിൽപ്പി​ടി​ക്കുക.—ഫിലി​പ്പി​യർ 4:7.

ശാരീരികമോ മാനസി​ക​മോ ആയ മുറിവ്‌ ഉണങ്ങു​ന്ന​തി​നും ദൈവ​വു​മാ​യുള്ള ബന്ധം വീണ്ടും ശക്തമാ​കു​ന്ന​തി​നും സമയ​മെ​ടു​ക്കും. അതു​കൊണ്ട്‌ ദുരന്ത​ത്തി​ന്റെ കടുത്ത ആഘാതം അനുഭ​വി​ക്കു​ന്നവർ, പ്രാർഥ​ന​യി​ലൂ​ടെ പെട്ടെന്നു സമാധാ​നം വീണ്ടെ​ടു​ക്കാ​നാ​കു​മെന്നു പ്രതീ​ക്ഷി​ക്ക​രുത്‌. എങ്കിലും, മടുത്തു​പോ​കാ​തെ പ്രാർഥി​ച്ചു​കൊ​ണ്ടേ​യി​രി​ക്കണം. അതു പ്രധാ​ന​മാണ്‌. ദുരന്ത​ത്തി​ന്റെ ആഘാത​ത്താൽ അങ്ങേയറ്റം അസ്വസ്ഥ​രാ​യി​ട്ടു നിരാ​ശ​യു​ടെ പടുകു​ഴി​യി​ലേക്കു വീണു​പോ​കാ​തി​രി​ക്കാൻ അതൊരു വ്യക്തിയെ സഹായി​ക്കും.

ദൈവവചനം വായിച്ച്‌ അതെക്കു​റിച്ച്‌ ആഴത്തിൽ ചിന്തി​ക്കുക. സ്വന്തമാ​യി വായി​ക്കു​മ്പോൾ ഏകാഗ്രത കിട്ടു​ന്നി​ല്ലെ​ങ്കിൽ, ആശ്വാസം നൽകുന്ന ബൈബിൾഭാ​ഗങ്ങൾ വായി​ച്ചു​കേൾപ്പി​ക്കാൻ ആരോ​ടെ​ങ്കി​ലും ആവശ്യ​പ്പെ​ടാം. ഒരു വ്യക്തി എത്രതന്നെ വിഷാ​ദ​മോ നിരാ​ശ​യോ അനുഭ​വി​ക്കു​ന്നു​ണ്ടെ​ങ്കി​ലും വിശ്വ​സ്‌ത​രായ അത്തരം വ്യക്തി​ക​ളോ​ടുള്ള യഹോ​വ​യു​ടെ ആഴമായ സ്‌നേഹം വെളി​പ്പെ​ടു​ത്തുന്ന ബൈബിൾഭാ​ഗങ്ങൾ തിര​ഞ്ഞെ​ടു​ക്കാം.

കഴിഞ്ഞ ലേഖന​ത്തിൽ കണ്ട ജെയി​നി​നു സങ്കീർത്ത​ന​ങ്ങ​ളി​ലെ പല ഭാഗങ്ങ​ളും വലിയ ആശ്വാസം പകർന്നു. സങ്കീർത്തനം 3:1-8; 6:6-8; 9:9, 10; 11:1-7; 18:5, 6; 23:1-6; 27:7-9; 30:11, 12; 31:12, 19-22; 32:7, 8; 34:18, 19; 36:7-10; 55:5-9, 22; 56:8-11; 63:6-8; 84:8-10; 130:1-6 എന്നിവ​യാ​യി​രു​ന്നു അവയിൽ ചിലത്‌. ഒറ്റയടിക്ക്‌ കുറെ ഭാഗങ്ങൾ വായി​ക്കാൻ ശ്രമി​ക്ക​രുത്‌. പകരം, വായിച്ച കാര്യ​ങ്ങ​ളെ​ക്കു​റിച്ച്‌ ആഴത്തിൽ ചിന്തി​ക്കു​ക​യും പ്രാർഥി​ക്കു​ക​യും ചെയ്യുക.

മുമ്പെന്നത്തെക്കാൾ ദുരിതം ഇപ്പോൾ

ബലാത്സംഗം, കൊല​പാ​തകം, യുദ്ധം, അക്രമ​പ്ര​വർത്ത​നങ്ങൾ എന്നിവ ഓരോ ദിവസ​വും വർധി​ച്ചു​വ​രു​ന്ന​തിൽ അതിശ​യി​ക്കേ​ണ്ട​തില്ല. അതിന്റെ കാരണ​ത്തെ​ക്കു​റിച്ച്‌ യേശു​ക്രി​സ്‌തു പറഞ്ഞത്‌, നമ്മുടെ ഈ നാളുകൾ ‘നിയമ​ലം​ഘനം വർധി​ക്കുന്ന’ കാലമാണ്‌ എന്നാണ്‌. “മിക്കവ​രു​ടെ​യും സ്‌നേഹം തണുത്തു​പോ​കും” എന്നും യേശു പറഞ്ഞു.—മത്തായി 24:7, 12.

ദുരന്തത്താലുള്ള ആഘാതം ഇന്ന്‌, മുമ്പെ​ന്ന​ത്തെ​ക്കാൾ സാധാ​ര​ണ​മാ​യി​ത്തീർന്നി​രി​ക്കു​ക​യാണ്‌. യേശു​തന്നെ മുൻകൂ​ട്ടി​പ്പറഞ്ഞ സംഭവ​ങ്ങ​ളാ​ണു മിക്ക​പ്പോ​ഴും അതിനു കാരണ​വും. ബൈബി​ളിൽ മത്തായി 24, മർക്കോസ്‌ 13, ലൂക്കോസ്‌ 21 എന്നീ അധ്യാ​യ​ങ്ങ​ളിൽ ലോകാ​വ​സാ​ന​ത്തോട്‌ അടുത്ത്‌ ഉണ്ടാകുന്ന ചില സംഭവ​ങ്ങ​ളെ​ക്കു​റിച്ച്‌ യേശു മുൻകൂ​ട്ടി​പ്പ​റ​ഞ്ഞി​ട്ടുണ്ട്‌. അവയിൽ ചിലതാണ്‌ അന്താരാ​ഷ്ട്ര​യു​ദ്ധങ്ങൾ, പ്രകൃ​തി​ദു​ര​ന്തങ്ങൾ, നിയമ​ലം​ഘ​ന​ത്തി​ന്റെ വർധന, സ്‌നേ​ഹ​മി​ല്ലായ്‌മ എന്നിവ. എന്നാൽ, ഇത്തരം പ്രശ്‌ന​ങ്ങ​ളിൽനി​ന്നുള്ള മോച​ന​വും വിദൂ​ര​ത്തി​ല​ല്ലെന്നു യേശു പറയു​ക​യു​ണ്ടാ​യി.

മനസ്സിനു കടുത്ത ആഘാത​മേൽപ്പി​ക്കുന്ന ദുരന്ത​ങ്ങ​ളു​ടെ കാര്യ​ത്തിൽ ലോക​മെ​ങ്ങു​മാ​യി ഒരു വർധന​യു​ണ്ടാ​കു​മെ​ന്നും അതെത്തു​ടർന്ന്‌ ഒരു ‘മഹാകഷ്ടത’ തുടങ്ങു​മെ​ന്നും വിവരി​ച്ച​ശേഷം ആളുകൾ എന്തു ചെയ്യണ​മെന്നു യേശു പറഞ്ഞു: “ഇതെല്ലാം സംഭവി​ച്ചു​തു​ട​ങ്ങു​മ്പോൾ, നിങ്ങളു​ടെ മോചനം അടുത്തു​വ​രു​ന്ന​തു​കൊണ്ട്‌ നിവർന്നു​നിൽക്കുക, നിങ്ങളു​ടെ തല ഉയർത്തി​പ്പി​ടി​ക്കുക.” (മത്തായി 24:21-31; ലൂക്കോസ്‌ 21:28) ലോകാ​വ​സ്ഥകൾ ഒന്നി​നൊ​ന്നു വഷളാ​കു​മ്പോൾ നമുക്ക്‌ ഒരു കാര്യം ഉറപ്പി​ക്കാം: ഇന്നു മനുഷ്യർക്കു വളരെ​യ​ധി​കം വേദന വരുത്തി​വെ​ക്കുന്ന ഈ വ്യവസ്ഥി​തി​യി​ലെ എല്ലാ ദുഷ്ടത​യും മഹാക​ഷ്ട​ത​യു​ടെ ഒടുവിൽ അവസാ​നി​ക്കു​ക​യും അതിനു ശേഷം നീതി​യുള്ള ഒരു പുതിയ ലോകം വരുക​യും ചെയ്യും.—1 യോഹ​ന്നാൻ 2:17; വെളി​പാട്‌ 21:3, 4.

ദുഷ്ടതയും അക്രമ​വും അതിന്റെ മൂർധ​ന്യ​ത്തിൽ എത്തിയ​തി​നു ശേഷമേ നമുക്ക്‌ ഒരു മോചനം ഉണ്ടാകൂ എന്നതു നമ്മൾ പ്രതീ​ക്ഷി​ക്കേ​ണ്ട​താണ്‌. പണ്ട്‌ നോഹ​യു​ടെ നാളിലെ ലോക​ത്തിന്‌ എതി​രെ​യും പിന്നീട്‌ സൊ​ദോം, ഗൊ​മോറ പട്ടണങ്ങ​ളി​ലെ ദുഷ്ടന്മാർക്ക്‌ എതി​രെ​യും ഉള്ള ദൈവ​ത്തി​ന്റെ ന്യായ​വി​ധി​യും ഏതാണ്ട്‌ അങ്ങനെ​യാ​യി​രു​ന്നു. ദൈവം ഭാവി​യിൽ എന്താണു ചെയ്യാൻ പോകു​ന്നത്‌ എന്നതിന്റെ ഒരു സൂചന​യാ​യി​രു​ന്നു ആ ന്യായ​വി​ധി​കൾ.—2 പത്രോസ്‌ 2:5, 6.

ദുരന്തംകൊണ്ടുള്ള ആഘാത​ത്തി​നു വിട!

ദുരന്തത്തിന്‌ ഇരയാ​യ​വർക്ക്‌ ഉണ്ടാകുന്ന ആഘാതം അഥവാ പിറ്റിഎസ്‌ഡി അനുഭ​വി​ക്കുന്ന ഒരാളാ​ണു നിങ്ങ​ളെ​ങ്കിൽ, അത്തരം വേദനി​പ്പി​ക്കുന്ന ഓർമകൾ എന്നെങ്കി​ലും മാറു​മോ എന്നു നിങ്ങൾ ചിന്തി​ച്ചേ​ക്കാം. മാറും എന്നുത​ന്നെ​യാണ്‌ അതിന്റെ ഉത്തരം. കാരണം, യശയ്യ 65:17-ൽ ദൈവ​മായ യഹോവ പറയുന്നു: “ഇതാ, ഞാൻ പുതിയ ആകാശ​വും പുതിയ ഭൂമി​യും സൃഷ്ടി​ക്കു​ന്നു, പഴയ കാര്യങ്ങൾ ആരു​ടെ​യും മനസ്സി​ലേക്കു വരില്ല; ആരു​ടെ​യും ഹൃദയ​ത്തിൽ അവയു​ണ്ടാ​യി​രി​ക്കില്ല.” ഒരു ദുരന്തം മനസ്സിന്‌ ഏൽപ്പി​ക്കുന്ന മുറിവ്‌ ഒരിക്ക​ലും മാറി​ല്ലെന്നു തോന്നി​യാ​ലും ഈ തിരു​വെ​ഴു​ത്തു നമുക്കു തരുന്ന ഉറപ്പ്‌, ഒരു നാൾ അതു പൂർണ​മാ​യും മാറും എന്നുത​ന്നെ​യാണ്‌.

ബലാത്സംഗശ്രമത്തിന്‌ ഇരയായി ഒരു വർഷത്തി​നു ശേഷം ജെയിൻ ഒരു മുൻനി​ര​സേ​വി​ക​യാ​യി, അതായത്‌ യഹോ​വ​യു​ടെ സാക്ഷി​ക​ളു​ടെ മുഴു​സമയ സുവി​ശേ​ഷ​ക​യാ​യി പ്രവർത്തി​ക്കാൻതു​ടങ്ങി. “ആക്രമണം നടന്ന്‌ ഏതാണ്ട്‌ എട്ടു മാസം കഴിഞ്ഞ്‌ വിചാരണ പൂർത്തി​യാ​കു​ക​യും അയാൾ കുറ്റക്കാ​ര​നാ​ണെന്നു തെളി​യു​ക​യും ചെയ്‌ത​തി​നു ശേഷം മാത്ര​മാ​ണു ഞാൻ വീണ്ടും പഴയ ആളായത്‌” എന്നു ജെയിൻ അടുത്തി​ടെ പറഞ്ഞു. “കഴിഞ്ഞ വർഷം ഈ സമയത്ത്‌, ഞാൻ ഇപ്പോൾ ആസ്വദി​ക്കു​ന്ന​തു​പോ​ലുള്ള ഒരു സമാധാ​ന​വും സന്തോ​ഷ​വും ഉണ്ടാകു​മെന്ന്‌ എനിക്കു ചിന്തി​ക്കാൻപോ​ലും കഴിയി​ല്ലാ​യി​രു​ന്നു. നിത്യം ജീവി​ക്കാ​നുള്ള മനോ​ഹ​ര​മായ പ്രത്യാ​ശ​യും അതെക്കു​റിച്ച്‌ മറ്റുള്ള​വ​രോ​ടു പറയാ​നുള്ള അവസര​വും നൽകി​യി​രി​ക്കു​ന്ന​തിൽ ഞാൻ യഹോ​വ​യോ​ടു നന്ദിയു​ള്ള​വ​ളാണ്‌.”—സങ്കീർത്തനം 27:14.

പിറ്റിഎസ്‌ഡി-കൊണ്ട്‌ ഉണ്ടാകുന്ന നിരാ​ശ​യോ​ടും വൈകാ​രിക മരവി​പ്പി​നോ​ടും മല്ലിടുന്ന ആളാണു നിങ്ങ​ളെ​ങ്കിൽ, ആ പ്രത്യാശ നിങ്ങ​ളെ​യും താങ്ങി​നി​റു​ത്തും.

[ചിത്രം]

ക്രിസ്‌തീയയോഗങ്ങൾക്കു ഹാജരാ​കു​ന്നതു പിടി​ച്ചു​നിൽക്കാൻ നിങ്ങളെ സഹായി​ക്കും

[ചിത്രം]

ദൈവവചനം വായി​ക്കു​ന്ന​തും പ്രാർഥി​ക്കു​ന്ന​തും സഹിച്ചു​നിൽക്കാൻ വലി​യൊ​രു സഹായ​മാണ്‌

[ചിത്രം]

ദുരന്തത്തിന്റെ ആഘാത​മേൽപ്പിച്ച മുറി​വു​കൾ പെട്ടെ​ന്നു​തന്നെ ഒരു ഓർമ​യാ​യി മാറും