സ്വർണ ആപ്പിളുകൾപോലെ
ആപ്പിളുകൾ—അവ കണ്ണിന് എത്ര ആനന്ദകരവും നാവിന് എത്ര സ്വാദിഷ്ഠവുമാണ്! “തക്ക സമയത്ത് ഉച്ചരിക്കുന്ന ഒരു വാക്ക് വെള്ളിത്താലങ്ങളിലെ സ്വർണ ആപ്പിളുകൾ പോലെയാണ്” എന്നു പറയുമ്പോൾ ബൈബിൾ ഈ സ്വാദിഷ്ഠഫലത്തെ ചിന്തോദ്ദീപകമായ ഒരു സാദൃശ്യത്തിൽ ഉപയോഗിക്കുകയാണു ചെയ്യുന്നത്. (സദൃശവാക്യങ്ങൾ 25:11, NW) ഈ പ്രസ്താവനയുടെ അർഥമെന്താണ്?
“വെള്ളിത്താലങ്ങളിലെ സ്വർണ ആപ്പിളുകൾ” എന്ന പദപ്രയോഗം ചിത്രപ്പണിയുള്ള വെള്ളിത്തളികയിൽ സ്വർണഫലത്തോടുകൂടിയ കൊത്തുപണിയെ അർഥമാക്കിയേക്കാം. ഈ അധ്യായത്തിലെ മുൻ വാക്യങ്ങൾ ഒരു രാജാവിനോടുള്ള സമീപനത്തെ പരാമർശിക്കുന്നതുകൊണ്ട് ഈ വാക്യം ഒരു രാജാവിനു നൽകുന്ന കാഴ്ചകളെ—വെള്ളിത്തളികകളിൽ വച്ചിരിക്കുന്ന ആപ്പിളാകൃതിയിലുള്ള സ്വർണാഭരണങ്ങളെ—പരാമർശിച്ചേക്കാം. (സദൃശവാക്യങ്ങൾ 25:6, 7) തീർച്ചയായും മതിപ്പുളവാക്കുംവിധം മനോഹരം!
സമാനമായ മനോഹാരിത ഉചിതവും മാന്യവും സമയോചിതവുമായ വാക്കുകൾക്കുണ്ട്, എഴുത്തിലായാലും സംസാരത്തിലായാലും. അവ അനേക വിധങ്ങളിൽ ആനന്ദകരവും പ്രോത്സാഹജനകവും പ്രയോജനപ്രദവുമാണ്. വിശേഷിച്ചും ദിവ്യനിശ്വസ്തമാക്കപ്പെട്ട ബൈബിളിലെ ആശയങ്ങൾ “വെള്ളിത്താലങ്ങളിലെ സ്വർണ ആപ്പിളുകൾ”പോലെ മനോഹരമാണ്.
സദൃശവാക്യങ്ങൾ 25:11-ൽ ശലോമോൻ രാജാവ് പറഞ്ഞ ജ്ഞാനമേറിയ വാക്കുകൾ ദൃഷ്ടാന്തീകരിക്കുന്നതുപോലെ, “ഇമ്പമായുള്ള വാക്കുകളും നേരായി എഴുതിയിരിക്കുന്നവയും സത്യമായുള്ള വചനങ്ങളും കണ്ടെത്തുവാൻ” അദ്ദേഹം പരിശ്രമിച്ചു. (സഭാപ്രസംഗി 12:10; സദൃശവാക്യങ്ങൾ 25:1) നൂററാണ്ടുകൾക്കുശേഷം ക്രിസ്തീയ അപ്പോസ്തലനായ പൗലോസ് ഇപ്രകാരം എഴുതി: “എല്ലാ തിരുവെഴുത്തും ദൈവനിശ്വസ്തവും . . . പ്രയോജനപ്രദവുമാകുന്നു.” (2 തിമൊഥെയോസ് 3:16, NW) അതേ, ഏററവും നല്ല കരകൗശലവിദഗ്ധരുടെ പണികളെപ്പോലും കവച്ചുവയ്ക്കുന്ന ശോഭയും മനോഹാരിതയുമുള്ള പ്രയോജനകരമായ ബുദ്ധ്യുപദേശം, പ്രവചനങ്ങൾ, പദചിത്രങ്ങൾ, സത്യങ്ങൾ എന്നിവയാണു ബൈബിളിൽ അടങ്ങിയിരിക്കുന്നത്. മാത്രമല്ല, ദൈവവചനമായ ബൈബിളിൽനിന്നുള്ള ജ്ഞാനം സമ്പാദിക്കുന്ന ഏതൊരുവനും അമൂല്യമായ ഒരു സമ്പത്തു നേടുകയാണ്, അനന്തജീവന്റെ പ്രത്യാശയെ താലോലിക്കാനും അയാൾക്കു കഴിയും.—സദൃശവാക്യങ്ങൾ 4:7-9; യോഹന്നാൻ 17:3.