അവൾ ആ സമ്മാനം നേടി
“ഞാൻ അതിനെല്ലാം നിങ്ങളോടു കടപ്പെട്ടിരിക്കുന്നു” എന്നു ഹൈസ്കൂളിലെ ഒരു മുതിർന്ന വിദ്യാർത്ഥിനിയായ കൈയോവ വാച്ച് ടവർ സൊസൈററിയുടെ ജപ്പാനിലെ ബ്രാഞ്ചാഫീസിലേയ്ക്ക് എഴുതി. എന്തിനുവേണ്ടിയാണ് അവൾ ഇത്ര നന്ദിയുള്ളവളായിരിക്കുന്നത്? കൈയോവ അടുത്തകാലത്തു ജപ്പാൻ ട്രാഫിക്ക് സേഫ്ററി അസ്സോസ്സിയേഷൻ സ്പോൺസർ ചെയ്ത ഒരു ദേശീയ ഉപന്യാസമെഴുത്തു മത്സരത്തിൽ ഏററവും ഉന്നതമായ സമ്മാനം നേടി. ഈ മൂല്യവത്തായ അവാർഡിൽ സ്വീഡനിലേക്കുള്ള ഒരു യാത്രയും ഉൾപ്പെടുന്നു.
തന്റെ വിജയത്തിന് അതിയായി സഹായിച്ചതായി അവൾ വിചാരിക്കുന്ന വാച്ച് ടവർ ബൈബിൾ ആൻഡ് ട്രാക്ററ് സൊസൈററി പ്രസിദ്ധീകരിച്ച അനേകം നല്ല പ്രസിദ്ധീകരണങ്ങൾക്കുവേണ്ടി തന്റെ വിലമതിപ്പു പ്രകടിപ്പിക്കാനായിരുന്നു കൈയോവ ഇതെഴുതിയത്. ഈ മത്സരം കൂടാതെ അവൾ അനേകം പ്രസംഗ മത്സരങ്ങളിലും ഉപന്യാസമെഴുത്തു മത്സരങ്ങളിലും തന്റെ സ്കൂളിനെ പ്രതിനിധാനം ചെയ്തിട്ടുണ്ട്. അവൾ പറയുന്നു: “ഈ മത്സരങ്ങളിൽ മിക്കതിലും ഒരു വിഷയം നൽകപ്പെടുന്നു, എന്നിട്ടു വിദ്യാർത്ഥികൾ തങ്ങളുടെ ഉപന്യാസങ്ങൾക്കുവേണ്ടി ഒരു ലൈബ്രറിയിൽ പോയി ഗവേഷണം നടത്തുന്നു. എന്നാൽ, എനിക്ക് ആ ബുദ്ധിമുട്ടൊന്നും ഇല്ല. ഞാൻ വീട്ടിലുള്ള പുസ്തക അലമാരയിൽ വിശിഷ്ടമായ വിഷയങ്ങൾ കണ്ടെത്തുന്നു!” അവൾ തുടരുന്നു: “വിഷയം എന്തുതന്നെയായിരുന്നാലും, വാർദ്ധക്യത്തിന്റെ പ്രശ്നങ്ങളോ പരിസ്ഥിതിയോ സാർവദേശീയ ബന്ധങ്ങളോ സ്വന്തപുരോഗമനമോ സാധാരണയായി വാച്ച്ടവർ മാസികയിൽ അല്ലെങ്കിൽ എവേക്ക്! മാസികയിൽ ആഴത്തിലുള്ള ഒരു ചർച്ച ഉണ്ടായിരിക്കും.”
എന്നുവരികിലും, വെറും പ്രസിദ്ധീകരണങ്ങളല്ല കൈയോവയെ സഹായിച്ചത്. യഹോവയുടെ സാക്ഷികളുടെ പഠിപ്പിക്കൽപരിപാടികളിൽനിന്ന് അവൾക്കു ലഭിച്ച വിദ്യാഭ്യാസമാണ് അവളുടെ വായനയും എഴുത്തും മെച്ചപ്പെടുത്താൻ അവളെ സഹായിച്ചതെന്നും അതാണു മത്സരങ്ങളിൽ മികവു കാട്ടാൻ അവളെ പ്രാപ്തയാക്കിയതെന്നുമാണ് അവൾ പറയുന്നത്. “ഒരിക്കൽ ഒരു സർവകലാശാലാവിദ്യാഭ്യാസം വേണമെന്നു ഞാൻ ആഗ്രഹിച്ചിരുന്നു” എന്ന് അവൾ സമ്മതിച്ചുപറയുന്നു. “എന്നാൽ ഇതുപോലൊരു പരിശീലനം എനിക്കെവിടെ കിട്ടും?” ഇപ്പോൾ, തനിക്കു ലഭിച്ച വിദ്യാഭ്യാസത്തിൽനിന്നു മററുള്ളവർ പ്രയോജനം അനുഭവിക്കുന്നതിനു സഹായിക്കുന്നതിൽ മുഴുസമയം പ്രവർത്തിക്കാമെന്ന പ്രതീക്ഷയിലാണ് അവൾ. ഉപന്യാസമെഴുത്തിൽ ലഭിച്ച സമ്മാനത്തിന്റെ സന്തോഷത്തിലായിരിക്കെ, കൈയോവയുടെ ഹൃദയം ജീവന്റെ സമ്മാനം നേടുന്നതിൽ ഉറച്ചിരിക്കയാണ്.—ഫിലിപ്പിയർ 3:14 താരതമ്യം ചെയ്യുക.