“ഒരു മുതിർന്ന വ്യക്തിയുമായുള്ള ആശയവിനിമയം” കൗമാരക്കാർക്ക് ആവശ്യം
വാത്സല്യവും ശ്രദ്ധയും ലഭിക്കുമ്പോൾ കൊച്ചുകുഞ്ഞുങ്ങൾ ആരോഗ്യമുള്ളവരായി വളരുന്നു, മാതാപിതാക്കളുടെ പരിലാളനം വേണമെന്നു തോന്നുമ്പോൾ കുഞ്ഞുങ്ങൾ മുട്ടിലിഴഞ്ഞ് അവരുടെ മടിയിൽ ചെന്നിരിക്കുന്നു, കരുതലുള്ള എല്ലാ മാതാപിതാക്കൾക്കും അറിയാവുന്ന കാര്യങ്ങളാണിവ. എന്നാൽ കൗമാരത്തിലെത്തുമ്പോഴേക്കും ഈ കുട്ടികൾ മാതാപിതാക്കളെ അകറ്റിനിറുത്താനാണു കൂടുതൽ സാധ്യതയെന്ന് യു.എസ്.എ.-യിലെ കാലിഫോർണിയയിലുള്ള ഓക്ക്ലൻഡിലെ ചിൽഡ്രൻസ് ഹോസ്പിറ്റൽ ആൻഡ് റിസർച്ച് സെന്ററിലെ കൗമാര വൈദ്യശാസ്ത്ര വിഭാഗത്തിന്റെ ഡയറക്ടറായ ഡോ. ബാർബ്ര സ്റ്റാഗർസ് പറയുന്നു. എന്നാൽ, മാതാപിതാക്കളുടെ ശ്രദ്ധ അവർക്ക് ഏറ്റവുമധികം ആവശ്യമായിരിക്കുന്നത് ജീവിതത്തിലെ ഈ ഘട്ടത്തിലാണു താനും. എന്നിട്ടും എന്തുകൊണ്ടാണ് ഇങ്ങനെ സംഭവിക്കുന്നത്?
അടുക്കും ചിട്ടയുമില്ലാതെ, മറ്റുള്ളവരുടെ മേൽനോട്ടമില്ലാതെ കുട്ടികൾ സമയം ചെലവഴിച്ചു തുടങ്ങുന്ന പ്രായമാണ് കൗമാരം, കൗമാരപ്രായക്കാരെ അഭിമുഖീകരിക്കുന്ന ഏറ്റവും വലിയ അപകടങ്ങളിലൊന്നാണ് ഇത് എന്ന് ഡോ. സ്റ്റാഗർസ് പറയുന്നു. ടൊറന്റോ സ്റ്റാർ പത്ര റിപ്പോർട്ടിൽ അവർ ഇങ്ങനെ പറയുന്നു: “തങ്ങൾ ആരാണെന്നും ചുറ്റുപാടുകളുമായി തങ്ങൾക്ക് എങ്ങനെ ഇണങ്ങിച്ചേരാൻ കഴിയുമെന്നും കുട്ടികൾ പഠിക്കുന്ന കാലമാണ് കൗമാരം. ഇതോടൊപ്പം സാഹസികമായി പെരുമാറുന്നതിനുള്ള സഹജമായ പ്രവണതയും സമപ്രായക്കാരിൽനിന്നുള്ള സമ്മർദവും കൂടിയാകുമ്പോൾ അപകടങ്ങളുടെ അളവു ഭീമമായിത്തീരുന്നു.” കൗമാരത്തിന് പല ഘട്ടങ്ങളുണ്ട്. പ്രായമല്ല ഇവിടെ പ്രശ്നമായിരിക്കുന്നത്. പിന്നെയോ ഡോ. സ്റ്റാഗർസ് പറയുന്നതനുസരിച്ച്, “[കൗമാരക്കാർ] പ്രവർത്തിക്കുകയും വിവരങ്ങൾ കൈകാര്യം ചെയ്യുകയും പരീക്ഷണങ്ങൾ നടത്തുകയും ചെയ്യുന്ന വിധമാണ് പ്രശ്നം.” കൗമാരത്തിന്റെ ആരംഭം കുട്ടികൾ തങ്ങളെക്കുറിച്ചുതന്നെയുള്ള ചിന്തകളുമായി സ്വന്തം ലോകത്തിൽ ഒതുങ്ങിക്കൂടുകയും ശരീരത്തിനു വരുന്ന മാറ്റങ്ങളെക്കുറിച്ച് ഉത്കണ്ഠപ്പെടുകയും എടുത്തുചാട്ട പ്രവണത പ്രകടമാക്കുകയും ചെയ്യുന്ന ഘട്ടമാണ്. കൗമാരത്തിന്റെ മധ്യകാലം പുതിയ കാര്യങ്ങൾ പരീക്ഷിച്ചുനോക്കുന്നതിൽ കൂടുതൽ ശ്രദ്ധ കേന്ദ്രീകരിക്കുന്ന ഘട്ടമാണ്. സ്വതന്ത്ര ചിന്താഗതിയാണ് അവസാന ഘട്ടത്തിന്റെ സവിശേഷത.
അതേ, കൗമാര വർഷങ്ങൾ ആവേശജനകമായിരുന്നേക്കാം. അതേസമയം അവ മാതാപിതാക്കൾക്കും കൗമാരക്കാർക്കും ചിന്താക്കുഴപ്പവും സൃഷ്ടിച്ചേക്കാം. മിക്ക കൗമാരക്കാർക്കും “അവരെക്കുറിച്ചു കരുതലുള്ള ഒരു മുതിർന്ന വ്യക്തിയുമായുള്ള ആശയവിനിമയം ആവശ്യമാണ്” എന്ന് 20 വർഷത്തിലേറെയായി കൗമാരക്കാരെ ചികിത്സിച്ചുവരുന്ന ഡോ. സ്റ്റാഗർസ് പറയുന്നു. ഇത് എങ്ങനെ ചെയ്യാനാകും?
ആശയവിനിമയ മാർഗങ്ങൾ തുറന്നിടുക. മാതാപിതാക്കളേ, ഒരു നല്ല ശ്രോതാവ് ആയിരുന്നുകൊണ്ട് കുട്ടികളെ സംബന്ധിച്ചു നിങ്ങൾ കരുതുന്നുവെന്ന് അവർക്ക് ഉറപ്പുകൊടുക്കുക. ആശയങ്ങൾ കോർത്തിണക്കാനും അവർ എടുത്തേക്കാവുന്ന ബുദ്ധിശൂന്യമായ ഏതു തീരുമാനത്തിന്റെയും ഭവിഷ്യത്തുകൾ തിരിച്ചറിയാനും അവരെ സഹായിക്കുന്നതിന് ചോദ്യങ്ങൾ ചോദിച്ചുകൊണ്ട് കരുതൽ പ്രകടമാക്കുക. ശരിയായ തീരുമാനങ്ങളെടുക്കുന്നതിന്റെ പ്രയോജനങ്ങളെക്കുറിച്ച് അവരോടു പറയുക. ഏതുതരം പെരുമാറ്റമാണ് സ്വീകാര്യം എന്നു മനസ്സിലാക്കാൻ അവരെ സഹായിക്കുക.
കുട്ടികൾ പ്രശ്നങ്ങൾ സ്വയം കൈകാര്യം ചെയ്യാൻ പഠിക്കണം എന്ന പൊതുവേയുള്ള അഭിപ്രായത്തിനു ചേർച്ചയിൽ മാതാപിതാക്കൾ കുട്ടികളോടു പെരുമാറുന്ന പക്ഷം അവർ തത്ത്വദീക്ഷയില്ലാത്ത വ്യക്തികളുടെ ഹാനികരമായ സ്വാധീനത്തിന് ഇരയായേക്കാം. (സദൃശവാക്യങ്ങൾ 13:20) നേരെ മറിച്ച്, ബൈബിൾ ബുദ്ധിയുപദേശം ബാധകമാക്കുന്ന മാതാപിതാക്കൾ മക്കൾക്ക് കൗമാരവർഷങ്ങളിലൂടെ വിജയകരമായി കടന്നുപോകാനും ഉത്തരവാദിത്വബോധമുള്ള മുതിർന്നവരായിത്തീരാനും ഉള്ള ഏറ്റവും നല്ല അവസരം പ്രദാനം ചെയ്യും. അതുകൊണ്ട്, “ബാലൻ നടക്കേണ്ടുന്ന വഴിയിൽ അവനെ അഭ്യസിപ്പി”ക്കാൻ മാതാപിതാക്കൾ പഠിക്കേണ്ടതുണ്ട്.—സദൃശവാക്യങ്ങൾ 22:6.
മാതാപിതാക്കൾക്കും മക്കൾക്കും പരസ്പരം ഫലപ്രദമായി ആശയവിനിമയം നടത്താൻ കഴിയുന്നത് എങ്ങനെ, മാതാപിതാക്കൾക്ക് കൗമാരപ്രായക്കാരായ മക്കളെ പരിശീലിപ്പിക്കാൻ കഴിയുന്നത് എങ്ങനെ എന്നിവയെ സംബന്ധിച്ച പ്രായോഗിക ബുദ്ധിയുപദേശം കുടുംബസന്തുഷ്ടിയുടെ രഹസ്യം എന്ന പുസ്തകത്തിൽ അടങ്ങിയിട്ടുണ്ട്.a കുടുംബത്തിലെ ഓരോ അംഗത്തിനും ആവശ്യമായ പ്രായോഗിക തിരുവെഴുത്തു ബുദ്ധിയുപദേശവും അതു പ്രദാനം ചെയ്യുന്നു.
[അടിക്കുറിപ്പ്]
a യഹോവയുടെ സാക്ഷികൾ പ്രസിദ്ധീകരിച്ചത്.