ജീവന്റെ ഉത്ഭവം സംബന്ധിച്ച ചോദ്യം
ഫ്രാൻസിലെ സ്കൂളുകളും മാധ്യമങ്ങളും തർക്കമറ്റ ഒരു വസ്തുത എന്നനിലയിലാണ് പരിണാമ സിദ്ധാന്തത്തെ അവതരിപ്പിക്കുന്നത്. ഫലമോ, ദൈവത്തിൽ വിശ്വസിക്കുന്നവർപോലും ജീവന്റെ ഉത്ഭവത്തിനുള്ള ഏക വിശദീകരണം പരിണാമം ആണെന്ന് കരുതുന്നു. എന്നിരുന്നാലും, ജീവരൂപങ്ങളുടെ സങ്കീർണതയിൽ അങ്ങേയറ്റം താത്പര്യം തോന്നിയിട്ടുള്ള പലരും പരിണാമ സിദ്ധാന്തത്തിന്റെ സത്യതയെ സംശയിക്കുന്നു. യഹോവയുടെ സാക്ഷികളുടെ ഫ്രാൻസിലെ ബ്രാഞ്ച് ഓഫീസിന് പിൻവരുന്ന ഒരു കത്തു കിട്ടി:
“നിങ്ങൾ പ്രസിദ്ധീകരിക്കുന്ന ജീവൻ—അത് ഇവിടെ എങ്ങനെ വന്നു? പരിണാമത്താലോ സൃഷ്ടിയാലോ? എന്ന പുസ്തകം അടുത്തകാലത്ത് എനിക്കു കിട്ടി. പഴയ പുസ്തകങ്ങൾ വിൽക്കുന്ന ഒരു കടയിൽ നിന്നാണ് അതു കിട്ടിയത്. ഉൾപ്പെട്ടിരിക്കുന്ന യഥാർഥ സുപ്രധാന ചോദ്യങ്ങളെ കുറിച്ച് അത് ചർച്ച ചെയ്യുന്നതുകൊണ്ട് ഈ ചെറിയ പുസ്തകം എന്നെ വളരെയധികം ആകർഷിച്ചു. ഭൗതിക ശാസ്ത്രജ്ഞനായി പരിശീലനം നേടിയ ഞാൻ, ‘ഡാർവിനിസ’ത്തിനും മറ്റ് ‘പരിണാമ സിദ്ധാന്തങ്ങൾക്കും’ വിശദീകരിക്കാൻ ബുദ്ധിമുട്ട് നേരിട്ടിട്ടുള്ള സങ്കീർണമായ പ്രശ്നങ്ങളിൽ വർഷങ്ങളായി തത്പരനായിരുന്നിട്ടുണ്ട്. ഈ സിദ്ധാന്തങ്ങൾ ജീവരൂപങ്ങളിലേക്കുള്ള അചേതന വസ്തുക്കളുടെ മാറ്റത്തെ അഥവാ ജീവനില്ലാത്തവയിൽനിന്നുള്ള ജീവന്റെ ഉത്ഭവത്തെ വിശദീകരിക്കുന്നതായി അവകാശപ്പെടുന്നു.”
“നിങ്ങളുടെ ചെറിയ പുസ്തകം” എന്ന് അദ്ദേഹം പരാമർശിച്ച ഈ പുസ്തകം വായിച്ചതിനുശേഷം അദ്ദേഹം ഇപ്രകാരം എഴുതി: “ജീവൻ—അത് ഇവിടെ എങ്ങനെ വന്നു? എന്ന പുസ്തകം കാര്യങ്ങൾ ഏറ്റവും മെച്ചമായി അവതരിപ്പിച്ചിരിക്കുന്നതും വ്യക്തമായ തെളിവു നിരത്തുന്നതുമാണ്. അത്, ആധുനിക ശാസ്ത്രജ്ഞർ പൊതുവേ അംഗീകരിക്കുന്ന സംശ്ലേഷിത പരിണാമ സിദ്ധാന്തം ഉയർത്തുന്ന പ്രശ്നങ്ങളെയും അതിലെ വിശദീകരിക്കാനാവാത്ത വൈരുദ്ധ്യങ്ങളെയും കുറിച്ച് വളരെ നന്നായി, സംക്ഷിപ്തമായി അവതരിപ്പിച്ചിട്ടുമുണ്ട്.” തുടർന്ന് അദ്ദേഹം കൂടുതൽ വിവരങ്ങൾ ആവശ്യപ്പെടുകയുണ്ടായി.
ജീവൻ—അത് ഇവിടെ എങ്ങനെ വന്നു? പരിണാമത്താലോ സൃഷ്ടിയാലോ? എന്ന ഈ പുസ്തകത്തെ കുറിച്ചു കൂടുതൽ വിവരങ്ങൾ അറിയാൻ ആഗ്രഹിക്കുന്നെങ്കിൽ ദയവായി ഇതോടൊപ്പം നൽകിയിരിക്കുന്ന കൂപ്പൺ പൂരിപ്പിച്ച് ഈ മാസികയുടെ 5-ാം പേജിലെ അനുയോജ്യമായ മേൽവിലാസത്തിൽ അയയ്ക്കുക. (g03 8/08)
□ജീവൻ—അത് ഇവിടെ എങ്ങനെ വന്നു? പരിണാമത്താലോ സൃഷ്ടിയാലോ? എന്ന ഈ പുസ്തകത്തെ കുറിച്ചു കൂടുതൽ വിവരങ്ങൾ എനിക്ക് അയച്ചുതരിക.
□സൗജന്യ ഭവന ബൈബിൾ പഠനപരിപാടിയിൽ പങ്കെടുക്കാൻ താത്പര്യമുണ്ട്.