“അതിമഹത്തായ സമ്മാനം”
തങ്ങളുടെ കുട്ടികളെ യോഗ്യരും നിയമം അനുസരിക്കുന്നവരും ദൈവഭയമുള്ളവരും ആക്കി വളർത്തുന്നതിന് കഴിവിന്റെ പരമാവധി പ്രവർത്തിക്കുന്ന മാതാപിതാക്കൾ, മക്കൾ തങ്ങളുടെ പ്രയത്നങ്ങളോട് വിലമതിപ്പു പ്രകടമാക്കുമ്പോൾ അതീവസന്തുഷ്ടരാണ്. ഈ കാലത്തിന്റെ ഒരു അടയാളം ‘മാതാപിതാക്കളോടുള്ള’ വ്യാപകമായ ‘അനുസരണക്കേട്’ ആയിരിക്കുമ്പോൾ ഈ “അന്ത്യനാളുകളിൽ” ഇത് വിശേഷാൽ വാസ്തവമാണ്.—2 തിമൊഥെയോസ് 3:1, 2.
നാൻസി എന്ന 15 വയസ്സുള്ള ഒരു ഹൈസ്ക്കൂൾ വിദ്യാർത്ഥിനി യഹോവയുടെ സാക്ഷികളായ മാതാപിതാക്കളാൽ വളർത്തപ്പെട്ടു. ഒരു ദിവസം അവളുടെ ഇംഗ്ലീഷ് അദ്ധ്യാപിക തങ്ങൾക്ക് ഇതുവരെ ലഭിച്ചിട്ടുള്ളതിലേക്കും അതിമഹത്തായ സമ്മാനം സംബന്ധിച്ച് എഴുതാൻ ക്ലാസ്സിന് ഒരു നിയമനം കൊടുത്തു. നാൻസി എഴുതിക്കൊടുത്തത് പിൻവരുന്നതാണ്, “അതിമഹത്തായ സമ്മാനം” എന്ന തലക്കെട്ടിൻകീഴിൽ:
“പലതരം സമ്മാനങ്ങളും സമ്മാനദാതാക്കളും ഉണ്ട്. സ്നേഹവും സ്നേഹിതരും കഴിവുകളും ആകുന്ന സമ്മാനങ്ങളുണ്ട്. വിദ്വേഷവും ദാരിദ്ര്യവുംപോലെ നിങ്ങൾ ആഗ്രഹിക്കാത്ത സമ്മാനങ്ങളും ഉണ്ട്. പലതരം ദാതാക്കളുണ്ട്. സ്വാർത്ഥതയോടെ കൊടുക്കുന്നവരും തങ്ങൾ ഇച്ഛിക്കുന്നതുകൊണ്ട് കൊടുക്കുന്നവരുമുണ്ട്. എനിക്കു ലഭിച്ചിട്ടുള്ളതിലേക്കും ഏററവും വിശിഷ്ടമായ സമ്മാനം എന്റെ അച്ഛൻ എനിക്കു നൽകിയതാണ്, ദൈവത്തെക്കുറിച്ചുള്ള പരിജ്ഞാനമാകുന്ന സമ്മാനം.
“ഈ സമ്മാനം ഒരു ആയുഷ്ക്കാലം നീണ്ടുനിൽക്കുന്നതാണ്, പഴക്കത്താൽ ഉപയോഗശൂന്യമായശേഷം ദൂരെയെറിയുന്ന മററു സമ്മാനങ്ങൾപോലെയല്ല. ഞാൻ പഠിച്ച കാര്യങ്ങൾ ആജീവനാന്തം എന്നെ പ്രചോദിപ്പിക്കുകയും ഞാൻ ചെയ്യുന്ന സകല കാര്യത്തെയും സ്വാധീനിക്കുകയും ചെയ്യും. ബൈബിളിലെ ദൈവത്തെക്കുറിച്ച് പഠിച്ചതിനാൽ ഞാൻ അവനെ വ്യക്തിപരമായ അടിസ്ഥാനത്തിൽ അറിയാനിടയായിരിക്കുന്നു, ഒരു സുഹൃത്തെന്നനിലയിൽ ഞാൻ അവനെ ബഹുമാനിക്കുകയും ആദരിക്കുകയും ചെയ്യുന്നു.
“ഈ വർഷം എന്റെ അച്ഛൻ മരിക്കുന്നതുവരെ, മാർഗ്ഗനിർദ്ദേശം ആവശ്യമായിവന്നപ്പോൾ ഞാൻ അദ്ദേഹത്തെ ആശ്രയിച്ചിരുന്നു. മററുള്ളവരും അങ്ങനെ ചെയ്തിരുന്നു. എന്റെ അച്ഛൻ ജോലി കഴിഞ്ഞ് വീട്ടിൽ വന്നശേഷം ഞാൻ പലപ്പോഴും അദ്ദേഹത്തെ കണ്ടിരുന്നില്ല, എന്തെന്നാൽ ആശുപത്രിയിലുള്ളവരെ സന്ദർശിക്കുന്നതിലും അവർക്ക് പിന്തുണകൊടുക്കുന്നതിലും അദ്ദേഹം വ്യാപൃതനായിരുന്നു. അദ്ദേഹം തന്റെ സമയം എത്ര ഉദാരമായി കൊടുത്തിരുന്നുവെന്ന് ഞാൻ ഇപ്പോൾ തിരിച്ചറിയുന്നു. എനിക്ക് ആവശ്യമായിരിക്കുന്ന പിന്തുണയും മാർഗ്ഗനിർദ്ദേശവും നൽകാൻ അദ്ദേഹം ഇപ്പോൾ എന്നോടൊപ്പമില്ലെങ്കിലും എന്റെ ജീവിതത്തിലുടനീളം ഞാൻ ആഗ്രഹിക്കുന്ന കാര്യങ്ങൾക്കായി എനിക്ക് എന്റെ സ്വർഗ്ഗീയ പിതാവിനെ ആശ്രയിക്കാൻ കഴിയും.
“ഞാൻ ഈ സമ്മാനത്തെ വളരെയധികം വിലമതിക്കുന്നു, ശക്തനും വിശ്വസ്തനുമായ അത്തരമൊരു പിതാവിനെ എനിക്കു നൽകിയതിൽ ഞാൻ ദൈവത്തോടു നന്ദി പറയുന്നു. അദ്ദേഹത്തിന്റെ മാതൃകക്ക് എന്നിൽ എന്നും നിലനിൽക്കുന്ന ഒരു ഫലം ഉണ്ടായിരിക്കും. മുതിർന്നുവരുമ്പോൾ വിലമതിപ്പ് പ്രകടമാക്കാനും എന്റെ അച്ഛൻ എനിക്കു കാണിച്ചുതന്ന മാതൃക പിൻപററാനും എനിക്കു കഴിയുമെന്ന് ഞാൻ പ്രത്യാശിക്കുന്നു.
“എന്റെ ഏററവും വിലപ്പെട്ട സമ്മാനം ദൈവത്തേക്കുറിച്ചുള്ള പരിജ്ഞാനമാണ്, എല്ലായ്പ്പോഴും അങ്ങനെ ആയിരിക്കുകയും ചെയ്യും. ഈ സമ്മാനം എനിക്കു നൽകിയതിൽ ഞാൻ എന്റെ മാതാപിതാക്കൾ ഇരുവരോടും നന്ദിയുള്ളവളുമാണ്. വിശ്വസ്തതയുടെ കാര്യത്തിൽ അവരുടെ മഹത്തായ ദൃഷ്ടാന്തം എല്ലായ്പ്പോഴും എന്നോടൊപ്പം ഉണ്ടായിരിക്കും.”
അദ്ധ്യാപിക ഈ ഉപന്യാസം വിലമതിക്കുകയും തന്നെ അത് വളരെയേറെ സ്പർശിച്ചുവെന്ന് പറയുകയും ചെയ്തു. അവർ അത് ക്ലാസ്സിൽ വായിച്ചുകേൾപ്പിച്ചു. അവർ ഉള്ളടക്കത്തിന്റെ കാര്യത്തിലും വ്യാകരണത്തിന്റെയും ചിഹ്നനങ്ങളുടെയും കാര്യത്തിലും ആ ഉപന്യാസത്തിന് ഏററവും ഉയർന്ന മാർക്കു നൽകി.
നാൻസിയുടെ അമ്മയും ആ ഉപന്യാസം വിലമതിച്ചു. അവൾ പറഞ്ഞു: “അത് എന്നെ വളരെയധികം സന്തുഷ്ടയാക്കി. എല്ലായ്പ്പോഴും നിങ്ങളുടെ കുട്ടികൾ എങ്ങനെ വിചാരിക്കുന്നുവെന്ന് കൃത്യമായി അറിയാതിരിക്കെ, നാൻസി പുരോഗമിക്കുന്നുവെന്നും തന്റെ കഴിവനുസരിച്ച് അവൾ കാര്യാദികൾ അംഗീകരിക്കുന്നുവെന്നും മനസ്സിലാക്കാൻ അത് എന്നെ സഹായിച്ചു.” (g91 8/8)