‚Потребни ни се чесни луѓе‘

ЧЕСНОСТА е ретка во денешниов свет. Сепак, таа е основно барање за христијаните. Павле напишал: „Сакаме да се однесуваме чесно во сѐ“ (Евреите 13:18, НС). Тоа сакала да го прави Вилма, еден Јеховин сведок од Фаенца (Италија).

Весникот Il Resto del Carlino раскажува дека, кога надвор од еден супермаркет во нејзиниот град нашла едно портмоне кое содржело голема количина пари, таа „без колебање“ го предала во полицијата за да му биде вратено на неговиот сопственик.

Кога градоначалникот чул за ова, веднаш испратил до Вилма едно кусо писмо со благодарност. „Во името на градот“ — напишал тој — „сакам срдечно да Ви заблагодарам за Вашиот убав гест. На нашиот прекрасен град Фаенца му се потребни добри и чесни луѓе.“

Сеедно дали добрите постапки стануваат познати или не, секогаш треба да се стремиме да бидеме чесни. Како што нѐ поттикнува Светото писмо, „ние се трудиме за доброто не само пред Господа, туку и пред луѓето“ (2. Коринтјаните 8:21).