Не оставај ја својата прва љубов
1 Прославениот Исус го советувал собранието во Ефес од првиот век: „Ова го имам против тебе: ја остави својата прва љубов“ (Отк. 2:4). Очигледно, мнозина ја оставиле својата прва љубов кон Јехова. Кога ја дознавме вистината, развивме силна љубов кон Бог и кон ближниот, а тоа нѐ поттикна ревносно да ја објавуваме новопронајдената надеж. Што ќе ни помогне да не ја оставиме нашата прва љубов и да не забавиме во службата?
2 Личното проучување и присуството на состаноците: Што нѐ поттикна да развиеме љубов кон Бог и кон ближниот кога првпат дознавме за вистината? Зарем тоа не беа работите што ги учевме за Јехова преку проучување на Библијата? (1. Јов. 4:16, 19). Според тоа, за да може нашата љубов „сѐ повеќе и повеќе да расте“, мора да продолжиме да стекнуваме добро познавање преку копање во „Божјите длабочини“ (Фил. 1:9-11; 1. Кор. 2:10).
3 Бидејќи во овие последни денови сите имаме многу грижи и постојат многу работи што можат да ни го одвлечат вниманието, не е лесно да одржиме еден редовен распоред на лично проучување (2. Тим. 3:1). Мора да одвоиме време за да земаме духовна храна. Исто така, многу е важно редовно да присуствуваме на собраниските состаноци, особено додека ‚гледаме дека се приближува денот‘ (Евр. 10:24, 25).
4 Службата: Ревносното учество во службата ќе ни помогне да не ја оставиме првата љубов кон Бог. Додека ја проповедаме добрата вест, се потсетуваме на Јеховините убави ветувања, а ова помага нашата надеж да остане жива и нашата љубов, силна. За да можеме да ги поучуваме другите за библиските вистини, треба да истражуваме за и ние самите јасно да ги разбереме, а со тоа си ја зајакнуваме верата (1. Тим. 4:15, 16).
5 Јехова е достоен да добие сѐ, вклучувајќи ја и нашата љубов (Отк. 4:11). Не дозволувај твојата љубов да се намали. Одржувај ја силна својата љубов со тоа што сериозно ќе ја проучуваш Библијата, со редовно присуство на состаноците и со тоа што ревносно ќе им го објавуваш на другите она што најмногу го сакаш (Рим. 10:10).