Smalkaia warkka daknika nani ba tnatka sât sât ra hilp wan munisa

1, 2. ¿Smalkaia warkka daknika kum tilara kaia ba dukiara muihni lakri nani kum kum dîa lukisa?

¿KUPIAM kraukisma smalki tataukra takram yua ba? Lilia damra walram, kan baha piua wina Jehova ra mayuni daknika tara kum tilara dimram (Law. 148:1, 2, 12, 13). Baha yua ba sin kangrigisan bilara daknika kum kau sirpi tilara mai dingkan, baha ba smalkaia warkka daknika nina mâkisa. Naha daknika nani tilara kaia hilp wan munisa Gâd Kingka Lâka sturka yamni ba “tasba aiska ra” smalkaia (Mt. 24:14).

² ¿Smalkaia warkka daknika kum tilara kaia ba dukiara man dîa lukisma? Kristian mairin kum nina Wendya naku aisan: “Dakni kum tilara kaia kasak yamni ai munan sa. Muihni lakri nani hilp ai munan sa smalkaia warkka ra kau lankira takaia, bara Jehova warkka ra kau daukaia. Baku sin, pâna pain nani kau brisna”. Kristian waitna kum nina Rich naku win: “Yang maipara smalkaia warkka daknika pura kaiki kum kaia diara tara kum sa. Smalki tataukra kum upla kum ra hilp munisa tahbi daukan lâka bribia ningkara, smalkaia warkka daknika pura kaiki muihnika ba sanska brisa baha uplika ra hilp munaia spirit lainka ra ban pâwi kabia dukiara”. Bara kristian mairin kum nina Dinah naku wisa: “¡Smalkaia warkka daknika kum tilara kaia laik sna! Baha daknika muihni lakri nani ba pamaliki baku sa”.

3. ¿Naha stadika ra yawan dîa laki kaikbia?

³ Naha stadika ra laki kaikbia smalkaia warkka daknika pura kakaira bara hilp mamunra ba ani warkka brisa, bara muihni lakri nani ra nahki main kaikisa. Baha wina yawan laki kaikbia nahki kumi bani wan smalkaia warkka daknika ba tâ baikaia sip sa. Bara las ra aisabia naha daknika nani ba wina dîa yamnika sakaia sip sa.

DAKNIKA PURA KAKAIRA BARA HILP MAMUNRA BA

4. a) ¿Smalkaia warkka daknika pura kaiki muihnika ba dîa warkka pali brisa? b) ¿Bara naha muihnika ba daknika ra nahki main kaikisa ki? (“Smalkaia warkka daknika pura kaiki dukiara kupia kraukanka nani” bakska ba sin kaiks).

⁴ Smalkaia warkka daknika pura kakaira ba kangrigisan almukkab kum sa, witin dakni kum ra hilp munisa spirit lainka ra pâwaia. ¿Nahki daukisa? Pas ba, ai daknika tilara muihni lakri nani kumi bani dukiara lukisa (S.L. 27:23). Sepad latwankira kum baku, witin nani wal ban aisisa. Baku tnatka ra, spirit lainka ra sari ai dara walisa piua ra, apia kaka tnatka wala ra sin hilp munaia sip sa (S.L. 12:25; Ais. 32:2; Je. 2:15-17). Sekan ba, witin ba smalki tataukra bani ra hilp munisa smalkaia warkka kau tâ baikaia. Wik bani trai munisa ai daknika wal smalkaia warkka daukaia. Baku sin, ai daknika wina muihni lakri nani kumi bani wal smalkaia taki wisa, kupia bukaia bara hilp munaia smasmalkra kau lankira takbia dukiara. Aima kum witin smalki taki waia sip apia kaka, hilp mamunra apia kaka muihni lankira kum ra makabisa daknika ba tâ bribia. Yumhpika ba, tahbi daukan kristian waitnika nani ra hilp munisa kangrigisan bilara kau wark nani daukaia (1 Ti. 3:1). Ai warkka pain dauki ba mita kupia bukisa, Baibil wina kupia kraukanka nani yabisa tnatka sât sât ra hilp munaia dukiara, baku sin hilp mamunra apia kaka kangrigisan almukka kum baku wark takbia dukiara lan daukisa. Kaikan baku, smalkaia daknika pura kakaira warkka ba tânka tara brisa. Baha mita, kangrigisan almukka daknika ba kangrigisan almukka lankira kum wahbi sakisa naha warkka ba daukaia dukiara.

5. ¿Smalkaia warkka daknika kum pura kaikaia ba dîa muni isi apia sa?

⁵ Aima kum kum smalkaia warkka daknika pura kaikaia ba isi apia sa. Kaisa Jörg sturka ba kaikaia. Witin Alemania kuntrika wina sa bara dakni kum pura kaikisa. Kangrigisan almukka wala nani baku wark ailal brisa. Witin naku win: “Smalkaia warkka daknika kum pura kaikaia bara sim piua ra kangrigisan warkka nani daukaia ba isi apia sa. Baha mita, karna ai munisa muihni lakri nani dakniki tilara ba wal ban aisi kaia”. Uganda kuntrika wina, kangrigisan almukka kum, nina Abel witin 70 mani bri ba naku aisisa: “Wan kangrigisanka ra kangrigisan almukka nani bara hilp mamunra nani ba wiria baman bâra sa. Baha mita, smalkaia warkka daknika nani ba tara pali sa. Bara karna ai munisa smalki tataukra bani ra wih kaikaia kupia bukaia dukiara”. Bara Obed, Surinam kuntrika wina kangrigisan almukka kum naku wisa: “Wala nani ra lan daukaia laik sna, kuna baha daukaia dukiara wan taimka bara wan karnika aiska dingkaia nit sa, bara yamnika nani ba piu wihka ra kaikisa. Baha mita, lan daukaia warkka ba uya daukras sna”. ¿Naha sât trabilka bara diara wala nani takbia taim, kangrigisan almukka nani ba dîa daukaia sip sa?

6. ¿Dîa muni smalkaia warkka daknika nani ba sirpi kaia sa?

⁶ Sip sa kaka, smalkaia warkka daknika nani ba sirpi kaia sa bara baku, daknika pura kakaira ba sip kabia muihni lakri nani sut wal pain kakaira takaia bara hilp munaia spirit lainka ra ban pâwi kaia. Ban sakuna, ¿kangrigisan almukka nani uya âpu sa kaka? Tânka kum baku, smalkaia warkka daknika ba uba tara sa kaka, bara pura kakaira ba karna munisa ai daknika ra hilp munaia, baku takisa piua ra, kangrigisan almukka daknika ba sip sa hilp mamunra kum wahbi sakaia dakni kum main kaikaia dukiara. Dakni nani ba kau sirpi sa piua ra, pura kakaira ba muihni lakri nani ra kau pain main kaikaia sip kabia. Baha sika kau tânka tara brisa.

7. ¿Kangrigisan almukka nani uya âpu sa taim, smalkaia warkka daknika pura kaiki nani ba dîa daukaia sip sa muihni lakri nani ba pain main kaikaia dukiara? (1 Pita 5:2; lilka ba sin kaiks).

⁷ Smalkaia warkka daknika kum main kaikisma kaka, bara kangrigisan almukka nani uya âpu sa kaka, hilp mamunrikam ra lan dauks hilp mai munbia muihni lakri nani ra main kaikaia (1 Pita 5:2 ba aisi kaiks). Witin ra wark nani kum kum daukbia yas. Tânka kum baku, aima kum kum ra smalkaia warkka aidrubanka dauki ba bara daknika ba tâ briaia yabaia sip sma. Baku sin, tânka tara brisa pana pana aisi banhwaia nahki muihni lakri nani ra hilp munaia sip sa smasmalkra kau lankira takaia bara Jehova lamara kaia. Muihni lakri nani ra kupia bukaia wama taim, hilp mamunrikam ra brih was. Sakuna waras kainara tânka mariks nahki daukaia lukisma ba, bara danh takbia taim witin ra kupia buks dîa pain daukan ba dukiara. Baku sin, kupia kraukanka kum yabaia nit sa kaka, dauks. Piu lubia ba wal hilp mamunrikam ba smalkaia warkka daknika kum pura kaikaia sip kabia (2 Ti. 2:2). Muihni lakri nani ra lan daukisma piua ra, aitani pâwan kristianka nani ra hilp mai munbia makas. Tânka kum baku, tâura smasmalkra nani bara kristian kau lankira nani ba smalki tataukra kau raya nani ba wal taki waia sip sa. Naha sât hilpka nani baku yabaia sip sa, upla wal aisaia tâ krikaia, upla ra kli wih kaikaia, bara nahki Baibil stadika nani tâ briaia. Nanara diara yumhpa laki kaikbia nahki yawan sut wan smalkaia warkka daknika bri ba tâ baikaia sip sa.

SMALKAIA WARKKA DAKNIKA NAHKI TÂ BAIKAIA

8. Daknikam tâ baikaia dukiara, ¿dîa daukaia sip sma? (Roman 1:12).

⁸ Daknikam aikuki smalks. Wan daknika wal smalkaia taki wisa piua ra, “pana pana hilp munaia” lâka ba marikaia sa (Roman 1:12 ba aisi kaiks). Baku sin, wan daknika wal smalkaia ba hilp wan munisa upla nani wal pain aisaia bara anira smalkaia wan blîkbia kra sin sibrin âpu kaia. Warkkam ba mita daknikam wal smalkaia sip apia sma kaka, trai muns baskam ra makabaia wark takisma awarka nani ba chens mai munbia. Ban kra dîa mai wibia ba dukiara tâ iwma (Nih. 2:4-6). Siknis apia kaka almuk tâka mita smalkaia pliska kat waia karna wan munisa kaka, wan daknika pura kakaira wal aisaia sip sa. Ban kra Internet bâk witin daknika wal kanet wan munaia sip sa bara baku, wauhkataya nani ulbaia apia kaka telepon ku wini aisaia. Bara wahma tiara karnika sut bri ba kum sma ban sakuna smalkaia warkka ban dauki kaia karna mai munisa kaka, naha na trai muns. Daknikam tila wina muihni lakri nani sât sât wal wik bani taki waia. Ban kra lukaia sma ramyaka ra dîa kau tânka tara brisa bara nahki taimkam ba kau pain yus munaia (Ro. 12:11; Kol. 4:5). Naha sut daukaia kasak trai munma kaka, daknikam tila uplika nani sut yamnika bribia. Bara Jehova ra makabaia sip sma brinka yamni nani ba bara karnika maikbia naha warkka pain daukaia dukiara (Pil. 2:13).

9. ¿Yawan dîa daukaia sip sa wan daknika ba pamali kum baku asla kabia dukiara? (Roman 12:13).

⁹ Wala nani ra yamni munaia. Wan daknika ra latwan lâka bâra kabia dukiara pana pana kupia yamni lâka marikaia sa (Roman 12:13 ba aisi kaiks). Tânka kum baku, wan watla lin munaia sip sa muihni lakri nani baha wina smalki taki wabia dukiara. Kangrigisan kum kum ra, wik bani dakni kum aisanka yabi muihnika ra kangrigisan wala wina aula ba ra kupia yamni lâka marikisa. Ban kra, dakni kum kum asla takisa plun piaia dukiara, aisasara witin nani wal kaia sip apia kabia sin. Piu aiska smalki tataukra kum nina Sarah ba wisa: “Upla kum kum waitla ra paiwisna piua ra, sringki ai daukisa. Baha mita, diara tara kum piakaia dukiara uya sinski mangkras sna. Kau ni muihni lakri nani wal taim lui kau pain kakaira takaia”. Wan daknika ra pamali kum baku pana pana kupia yamni lâka marikisa kaka, Jehova lamara kabia bara muihni lakri nani wal sin (Nih. 8:10; Ap.St. 20:35).

10. ¿Smalki tataukra kau lankira takaia dukiara, dîa daukaia sip sa? (Sins Lâka 1:5; 27:17; lilka ba sin kaiks).

¹⁰ Smasmalkra kau lankira takaia dukiara karna wark takaia. Yawan smalkaia bara lan daukaia warkka kau pain dauki wabia ba ra wan daknika wal smalkisa piua ra, kau lilia wan dara walbia. ¿Dîa daukaia sip sma smasmalkra lankira kum takaia dukiara? Ban kra, daknikam tilara tâura smasmalkra kum apia kaka smasmalkra lankira kum ra hilp mai munbia makabaia sip sma (Sins Lâka 1:5; 27:17 ba aisi kaiks). Daknikam pura kakaira ba ra wis diaura man ba kau wark takaia want sma bara witin wilinkira hilp mai munbia. Kristian mairin kum nina Heather, witin uya upla nani wal aisaras naku wisa: “Tâura smasmalkra latwankira kum ra wiri upla nani ra kli wih kaikaia dukiara hilp ai munbia. Bara witin aima ailal taki waia dukiara ai paiwi kan. Bara wih kaiki kapri uplika kum ra Baibil stadika kum tâ krikaia hilp ai munan. Lilia daira walisna hilp makabri ba mita, kan nanara smalkaia warkka ba kli lilia daukisna”. Param sa, smalkaia warkka daknika ra tâ baikaia tnatka ailal bâra sa.

DAKNI KUM TILARA KAIA YAMNIKA NANI

11, 12. ¿Dakni kum tilara kaia dîa yamnika brisa? Rayaka ra takan sturka kum wal tânka mariks.

¹¹ Jehova lamara kaia hilp wan munisa. Kaisa laki kaikaia spirit lâka ra dîa yamnika briaia sip sa dakni kum tilara kaia. Tânka kum baku, piarka nani, tuktan rau nani, bara muihni lakri almuk nani Jehova latwan pali kaiki ba mita, daknika pura kakaira ba witin nani ra wih kupia bukanka yabisa (1 Tes. 2:8; Je. 1:27). Wan daknika wal smalki tauki kaia hilp wan munisa smasmalkra kau lankira takaia. Bara tahbi daukan lâka brin kristian waitnika nani ra lan daukisa kangrigisan bilara wark nani kau daukaia (1 Ti. 3:10).

¹² Wendy sturka ra luks, witin dukiara baiki sakanka wâl ra aisan: “Aisiki ba want apia kan yang nani ba Jehova ra mayunbia, baha mita, yaptiki wik tnata manis ra ai daknika wal smalki taki waia sip apia kan. Kuna yang lika taki waia sip kapri. Tâura smasmalkra almuk kum ba yang ra kasak hilp ai munan bara witin wal aima manis smalki taki wi kapri. Kangrigisan bara smalkaia warkka dukiara kupia kraukanka yuskira nani aikan. Kupi kraukisa aima ailal ra dakni pura kakaira ba latwan lâka wal Baibil ba wina kupia kraukanka painkira nani aiki kan bara naiwa yua kat ban hilp ai munisa”.

13. ¿Smalkaia warkka daknika tilara kaia nahki hilp wan munisa pâna pain nani briaia? (Lilkika ba sin kaiks).

¹³ Rait aihwa pânika nani briaia sip sa. Muihni lakri nani wal wan daknika tilara “bakahnu” smalki taukisa taim, wan pânika lâka kau karna takisa (Pil. 1:27). Dakni nani ba sirpi sa ba mita, upla tilara aisi kaia karna muni ba mapara kau isi kabia pâna nani daukaia (2 Ko. 6:13). Siknis kum mapara aiklabisa, sari lâka, apia kaka latwankira kum pruan sa kaka, muihni lakri wan daknika tilara ba hilp wan munaia sip sa (1 Tes. 5:14). Pât wahwanka yua aula ba ra yawan pâna pain nani briaia nit kabia (Mt. 24:21). Muihni lakri nani latwan wan kaikisa bara wan tâ baiki ba tânka apia sa trabil nani âpu kabia, kuna bapi buaia dukiara hilp wan munisa (S.L. 17:17).

14. ¿Ban wina trabil tara kum luisa piua ra, smalkaia warkka daknika ba nahki hilp wan munaia sip sa?

¹⁴ Trabil bâra sa piua ra hilpka yabisa. Siknis saura kum iwisa piua ra, ban wina tasba sauhkanka kum, aspital ra dingki mai brisa kaka, lalah trabil, apia kaka wan nina bliki rau sauhkisa piua ra, wan smalkaia warkka daknika wina tâ baikanka briaia sip sa. Tânka kum baku, naha sât trabilka nani takras kainara, kangrigisan almukka nani ba dakni pura kakaira kumi bani ba wal asla wark takisa bara ridi takisa ya kau nit bri nani ra hilpka yabaia. Baku sin, ban wina trabil tara kum takisa piua ra, dakni pura kakaira nani ba ai daknika tilara pamali kumi bani ra plikisa dîa nitka brisa laki kaikaia dukiara. Tânka kum baku, daktar luaia, plun, lî, kwala, bara ani pliska ra takaskbia ba sin. Pura kakaira ba naha pain ai tânka brisa taim, hilpka brihwi yabaia sip sa. ¡Naha sât trabilka nani luisa piua ra, lilia wan dara walisa nu kaia wan daknika ba latwan wan kaikisa bara hilp wan munisa!

15. ¿Jehova ra mayuni nani ba sut dîa lukanka brisa?

¹⁵ Tâura aisan baku, Jehova asla takanka ba tara sa. Heven ra insal kasakkira milian pura milian nani bâra sa. Bara tasba ra 9 milian upla nani bâra sa Jehova ra mayunisa, bara kau pâwisa (Sak. 8:23; Par.M. 5:11). Heven bara tasba ra Gâd ra mayuni nani ba lukanka kumi baman brisa, Gâd Kingka Lâka sturka yamni ba upla sut walbia (Par.M. 14:6, 7). Baha mita, yawan trai munaia sa wan smalkaia warkka daknika wina yamnika aiska sakaia, kan hilp wan munisa wan kupia aiska ni Jehova ra mayunaia (Law. 111:1).