Muihni lakri nani wal ban pâna lâka bris

1. ¿Anira pâna pain nani pliki sakaia sip sa?

“WAN muihni, lakri aikuki, asla ban iwisa. Yawan wilin hilp muni, trabil bri uplika nani ra pâna pain kum takisa, kupia yamni mariki”. “Wan kupia aiska ni pana pana latwan kaikpi” lawanka aiwanisa piua ra, ¿nahki damra walisma ki? Jehova nu sa yawan baha sât pânika nani briaia nit sa. Baha mita, ai uplika nani tilara pâna rait aihwa nani ba wal yamni wan munisa (Law. 119:63). Jehova ra asla mayuni bara pamali latwankira kum tilara iwi banhwisa.

2. ¿Wan muihni lakri nani wal dîa sât pânika kaia sa?

² Yawan want apia sa wan muihni lakri nani ba kakaira uplika kum baman kabia. Kau ni, wan pânika nani baku kulkaia want sa. Jehova bara Jisas ra latwan kaiki ba mita, asla wan munisa (Jn. 13:35). Sakuna pâna lâka pain kum briaia ba ban wina takras. Yawan karna trai munaia sa wan pâna lâka ba marikaia. Yawan sut mistik tatakra sa bara trabil kum kum taka mita wan muihni lakri nani wal pâna lâka bri ba sauhkaia sip sa.

3. ¿Dîa muni wan pânika lâka ban bri kaia ba karna wan munaia sip sa?

³ Muihni lakri kum kum wal pâna lâka kum briaia isi wan munaia sip sa, kan witin nani dîa laik kaiki ba apia kaka ai daukanka bri ba yawan wal sim sât sa. Ban sakuna, muihni lakri wala nani wal pâna lâka kum briaia karna wan munaia sip sa. Kan, aima kum kum ra blahwanka takaia sip sa. Baku takisa piua ra, rait aihwa latwanka lâka marikaia ba karna wan munaia sip sa. Ban kra, yawan lukisa uplika wala wal sim lukanka briras ba mita, lilia kaia sip apia sa. Baku sin, muihni lakri siknis saura kum brisa apia kaka sari ai dara walisa piua ra, witin wal ban pâna lâka kum briaia karna wan munaia sip sa. Naha stadika ra yawan laki kaikbia dîa ba hilp wan munbia wan muihni lakri nani wal ban pâna lâka kum briaia. Pas ba, ani daukanka nani ba yawan pakaia nit ba dukiara aisabia. Bara ningkara yawan trabil nani brisa piua ra, nahki Jisas ra nina blikaia sip sa.

HILP WAN MUNI DAUKANKA NANI

4. ¿Nahki wan muihni lakri nani wal wan pânika lâka bri ba kau karna daukaia sip sa?

⁴ Wan muihni lakri nani wal pânika lâka bri ba kau karna daukaia dukiara, yawan karna trai munaia sa ai daukanka painkira nani bri ba kaikaia. Bara witin nani aikuki taim luaia ba hilp wan munbia. Apastil Pal Tesalonaika kristianka nani ra naku win: “Kupi ra piu sut mai luki banhwi katna, bara wih mai kaikan pali sin ai dauki kata” (1 Tes. 2:17). Muihni lakri manis lukisa pana pana sturi aisisa piua ra, ai pânika lâka bri ba kau karna daukisa. Baha daukaia dukiara yawan chans ailal brisa, smalkaia warkka ra, asla aidrubanka nani ra, bara asla aidrubanka tara nani ra sin. Ban sakuna, wan muihni lakri nani wal piua ailal lui kabia kra sin, tânka apia sa trabil nani bribia apia.

5. ¿Wan muihni lakri nani wal ban pâna kaia dukiara, dîa ba hilp wan munbia? Tânka kum wal mariks (Kolosi 3:12).

⁵ Wan muihni lakri nani wal pânika lâka bri ba, trabil kum kum tâka mita sauhkisa piua ra, baha pura luaia dukiara naha daukanka nani ba hilp wan munaia sip sa: umpira kaikan lâka, latwan lâka, bawan lâka, praut âpu lâka, bara wihka bîla kaikaia lâka (Kolosi 3:12 ba aisi kaiks). Tânka kum baku, truk kum pain wark takbia dukiara ail dingkaia nit sa. Sim baku, wan muihni lakri nani wal kau pain iwaia dukiara naha daukanka nani briaia hilp wan munbia. Nanara yawan trabil yumhpa laki kaikbia nahki muihni lakri nani wal wan pânika lâka bri ba sauhkaia sip ba. Baku sin, yawan laki kaikbia nahki Jisas ra nina blikaia sip sa, kan witin bawan lâka, wihka bîla kaikaia lâka, latwan lâka, bara umpira kaikan lâka marikan ban pâna pain kaia dukiara.

BLAHWANKA NANI BRISA PIUA RA

6. Sim lukanka âpu sa piua ra, ban pâna lâka bri kaia ¿dîa muni karna wan munaia sip sa?

⁶ ¿Dîa muni naha ba trabil kum kaia sip sa? Kan upla wâl sim lukanka âpu sa piua ra, wâlsut ba lukisa ai lukanka ba kasak sa. Nahara luki kaiks, kristian waitna wâl ai daknika ba smalkaia warkka nahki daukbia ba dukiara sim lukanka briras. Kumi bani ai dara walisa dîa luki ba kau pain sa. ¿Sakuna rait apia baha trabilka sirpi ba tara takaia sip sa bara ai pânika lâka bri ba sauhkaia? Witin nani tânka aisi wapni mangkras sa kaka, tara pulan lâka mita ai kupia baiki takaskbia. Piu lui ba ra, danh sturi aisaras sa bara ai pânika lâka ba dakwi takisa, diara bahki kum tâka mita.

7. ¿Jisas nahki ai disaipilka nani ra smalkan blahwanka nani wapni mangkaia dukiara bawan lâka nit sa?

⁷ Jisas bawan lâka marikan ba wina lan takaia. Witin ai disaipilka nani ra smalkan blahwanka nani wapni mangkaia dukiara aitani sa bawan lâka bri kaia. Ai disaipilka nani ba blahwi aisi banhwi kan witin nani tila ba wina ya kau tara kan sapa. Baha sât lukanka ba wapni mangkaia dukiara, Jisas witin nani ra smalkan wala nani ra kau tara kulkaia kan (Mt. 20:25-28). Wibia kaka witin nani bawan lâka marikaia kan. Bara pruras kainara, baha tihmika ra ai disaipilka nani ra bawan lâka tânka tara kum marikan, ai mina nani ba sikban. Baha warkka ba alba nani baman dauki banhwi kan (Jn. 13:3-5, 12-16). Baku ai disaipilka nani ra marikan nahki ban pâna pain kaia sip kan. Wala nani ra kau tara kulki kan kaka, blahwanka nani takbia piua ra, witin nani mapara kau isi kabia unsabaia apia bara baku, ban ai pânika lâka briaia.

8. Blahwanka nani takbia piua ra, pâna lâka ban bri kaia dukiara bawan lâka ba ¿nahki hilp wan munisa? (Kolosi 3:13; lilka nani ba sin kaiks).

⁸ ¿Nahki wan pâna lâka ba main kaikaia sip sa? Yawan bawikira sa kaka, wan mapara kau isi kabia trabil sirpi nani ba purak luaia (Kolosi 3:13 ba aisi kaiks). Bawan lâka hilp wan munbia isti praut takaia apia bara pâna lâka pain kum bri kaia (Law. 4:4). Ban kra yawan pana pana saura aisan kabia kra sin, wan kupia kraukaia sa sam taim yawan lukraskira aisisa (Smas. 7:21, 22). Silp makabi wals: “¿Aitani sa ki wan pânika lâka sauhkaia, raitki brisna ba marikaia dukiara?”. “¿Pâinika lukanka ba tâ baikaia wilin sna ki?” Bara âuyapah lâka briaia want sa kaka, trabilka ba dukiara kli saki aisaia apia sa.

9. Blahwanka kum piu wihka wapni mangkras sa kaka, ¿bawan lâka ba nahki hilp wan munbia? (S.L. 17:9).

⁹ Bawan lâka ba hilp wan munbia blahwanka kum piu wihka brisa kaka. Wan raitka bri ba marikaia dukiara yawan blahwaia apia sa (Sins Lâka 17:9 ba aisi kaiks; 1 Ko. 6:7). Kau pain sa ban pâna kaia lukanka bri kaia. Muihni lakri manis latwan lâka wal aisi ai trabilka ba wapni mangkan (Law. 34:14). Ban kra yawan naku aisaia sip sa: “Pânikam lâka lus tikaia want apia sna. Kaisa trabilka ba dukiara aisaia”. Wilin kaia sa wiaia yawan sin pâtka brisa bara ai kupia krikan tâwan padin wan munbia makabaia sa. Bara witin sin padin wan makabisa kaka, bawan lâka marikaia sa bara wan kupia aiska wal padin munaia sa (Lk. 17:3, 4). Wan kupia kraukaia sa yawan want apia sa marikaia ya pâtka brisa, kau ni trabilka ba wapni mangki wan pânika lâka ba ban bri kaia want sa (S.L. 18:24).

DAUKANKA NANI SÂT WALA BRISA PIUA RA

10. ¿Dîa muni isi apia sa pâna lâka kum ban bri kaia?

¹⁰ ¿Dîa muni naha ba trabil kum kaia sip sa? Sam taim karna wan munaia sip sa muihni lakri kum wal pâna lâka ban bri kaia ai daukanka nani ba sât wala sa piua ra. Kan upla kum kum daukanka nani ba yawan aihka kaikaia sip sa. Ban kra ai rayaka ra diara saura kum tâka apia kaka ai iwanka tnatka ba mita, uya sturi aisaras sa, bara wala nani sturi aisaia laik sa. Apia kaka upla kum kum upla ailal tilara kaia laik sa sakuna wala nani ba lika yakan kaia want sa.

11. ¿Jisas ba daukanka sât wala bri uplika nani wal, nahki ban ai pânika lâka bri kan?

¹¹ Jisas wihka bîla kaikan lâka marikan ba wina lan takaia. Jisas pânika nani ba daukanka sât sât bri kan. Tânka kum baku, apastil Jems bara Jan Jisas ra king iwaika pliska tara kum makaban. Baha ba marikisa witin nani kulkanka tara baman pliki kan (Mk. 10:35-37). Ban sakuna, Jisas bawan lâka marikan, heven ra ai warkka nani bara ai prana bri kan ba swin tasba ra balaia dukiara (Pil. 2:5-8). Param kaikisa witin nani daukanka sât wala pali bri kan. Ban sakuna Jisas ba Jems, Jan, bara wala nani ra wihka bîla kaikan lâka marikan.

12. ¿Jisas ra dîa hilp munan ai pânika nani ra wihka bîla kaikan lâka marikaia?

¹² Jisas bîla kaikras kan piu bani ai pânika nani ba daukanka painkira nani marikbia. Witin ba nu kan ai disaipilka manis ba kulkanka tara briaia baman luki kan, Jems bara Jan wal takan ba baku (Mk. 9:34). Jisas ba witin nani ra pain ai tânka bri kan dîa muni baku kan ba, kan witin baha sim iwanka tnatka ra pâwan. Baha piua ra, upla nani ba kulkanka tara kum briaia aitani luki kan. Baha mita witin nani ra wihka bîla kaikan lâka marikan. Jisas pain nu kan ai disaipilka nani ba baha sât lukanka wal pâwan ba mita, bîla kaikras kan isti pali chens taki banhbia (Mk. 10:42-45).

13. ¿Wihka bîla kaikan lâka ba nahki hilp wan munisa wan pânika lâka ban briaia? (Epesus 4:2).

¹³ ¿Nahki wan pâna lâka ba main kaikaia sip sa? Yawan karna trai munaia sa wihka bîla kaikan lâka marikaia bara wan muihni lakri nani daukanka nani aihka kaikbia kra sin rispik munaia sa (S.L. 14:29). Yawan kumi bani ba silp daukanka kum brisa, sakuna aihkika nani ba saura apia sa, dis marikisa yawan dîa sât uplika sa. Baha mita, lilia wan dara walisa upla nani ba wan daukanka nani rispik munisa taim (Epesus 4:2 ba aisi kaiks). Baku sin, tânkira kaia sa bara swiaia sa uplika ba ai daukanka bri ba marikbia. Tânka kum baku, yawan lukaia sa upla sâpkira kum mapara nahki karna munisa upla tilara sturi aisi kaia. Ban sakuna, upla kum upla tilara uba sturi aisaia laik sa kaka, yawan wihka bîla kaikan lâka marikaia sa. Raitka ba sika muihni lakri nani sut wal yawan pâna lâka kum bribia apia. Ban sakuna, wan kupia kraukaia sa kristian nani daukanka sât wala bri kabia kra sin, yawan asla wark takaia sip sa.

14. ¿Wihka bîla kaikan lâka marikisa piua ra, diaura wan sinska mangkaia sa?

¹⁴ Wihka bîla kaikan lâka ba hilp wan munbia muihni lakri nani daukanka painkira nani bri ba ra lukaia. Baku daukbia kaka, pana pana wan daukanka nani sât wala kabia kra sin ban pâna lâka kum briaia sip kabia. Tânka kum baku, Jems bara Jan kulkanka tara kum briaia want kan, sakuna ai makabanka ba wal marikan Gâd Kingka Lâka ba bîla kaiki kan. Jisas ai kasakka lukan lâka ba kaikan bara tara kulkan. Yawan sin wan pânika nani daukanka painkira nani bri ba kaikisa piua ra, Jisas bara Jehova nina blikisa.

15. ¿Ban pâna lâka briaia dukiara, ya hilp wan munaia sip sa ki?

¹⁵ Diara sut purkara, yawan Jehova ra makabaia sip sa muihni lakri nani daukanka sât wala bri kabia kra sin hilp wan munbia witin nani ra ban pâna lâka marikaia. Upla kum wal dîa wan kupia baikaia sip ba dukiara, wan pura suni makabaia sip sa wan kupia alki takaskaia dukiara. Wan kupia kraukaia sa Jehova wan Papaskra sa, bara witin pain tânka brisa yawan kumi bani ba sât wala sa. Jehova ra kasak luks, kan witin pain mai kakaira sa bara dîa hilpka nit sma ba witin maikbia. Bara wihka bîla kaikan lâka ban marikaia dukiara karna wan munisa piua ra, Jehova spiritka holikira ba makabaia sip sa wan dara walanka nani ba alki takaskaia dukiara (Lk. 11:13; Gal. 5:22, 23).

MUIHNI LAKRI NANI PÂT WAHWISA PIUA RA

16. ¿Trabil nani tâka mita muihni lakri kum kum dîa daukaia sip kabia?

¹⁶ ¿Dîa muni naha ba trabil kum kaia sip sa? Muihni lakri nani trabil kum kum tâka mita pât wahwisa apia kaka sari ai dara walisa piua ra, ban kra dîa wi ba apia kaka dîa dauki ba wan mapara aihka kaia sip sa. Tânka kum baku, ban kra yakan kaia want sa, isti ai kupia baiki sa, apia kaka ban ai daukanka nani ba isti chens takisa. Bara aima kum kum dîa wi ba apia kaka dîa dauki ba wan kupia sauhkaia sip sa (Job 6:2, 3). Ban kra wan muihni lakri nani dîa trabilka bri ba wan tânka briras ba mita, yawan bîla kaikisa piua bani ra daukanka pain nani marikbia.

17. Jisas Bartimius ra nahki munan ba wina, ¿dîa lan takaia sip sa?

¹⁷ Jisas latwan lâka bara umpira kaikan lâka marikan ba wina lan takaia. Witin pât wahwi uplika nani ra, kakaira apia kra sin, latwan lâka bara umpira kaikan lâka marikan. Nahara luks, nahki witin waitna blain kum nina Bartimius ra munan. Witin walan Jisas ai lamara kan taim, ai bîla baikra wal mahka winan. Upla kum kum ai bîla prakbia win, kuna ai brinka pali kan Jisas ba witin ra rakbia. Baha mita, kau ai bîla baikra tara wini kan. Bara dîa dauki kan ba mita, upla ailal praut takaia sip kan. Sakuna Jisas, witin ra “umpira kaikan” (Mt. 20:34; Mk. 10:46-52). Jisas witin ra latwan lâka wal aisan bara win ai kasakka lukanka ba tara kan, bara ai nakra nani ba kwâkan.

18. ¿Pâna kum pât wahwisa piua ra, nahki hilp munaia sip sa? (1 Tesalonaika 5:14).

¹⁸ ¿Nahki wan pâna lâka ba main kaikaia sip sa? Latwan lâka bara umpira kaikan lâka wan kupia bukisa wan muihni lakri nani trabil kum kum tâka mita pât wahwisa apia kaka sari ai dara walisa piua ra maisa nihkaia (1 Tesalonaika 5:14 ba aisi kaiks). Wan kupia kraukaia sa pâna rait aihwa kum ba wala nani ra ban hilp munaia wilin sa, kau pali “wan kupia wirha bri piua ra” (S.L. 17:17). Sari baman ai dara walras sa kuna ani sip ba kat ai pânika ra hilp munisa, kupia buki bîla nani yabisa, bara dîa nit ba wal tâ baikisa.

19. ¿Nahki tnatka ra latwan lâka bara umpira kaikan lâka marikaia sip sa? (Lilka nani ba sin kaiks).

¹⁹ ¿Nahki tnatka ra latwan lâka bara umpira kaikan lâka marikaia sip sa? Wan kupia kraukaia sa wan pânika nani pât wahwanka ba tikaia sip apia kabia. Kuna nahki ai dara wali ba dukiara tânka briaia trai munaia sa (Mt. 7:12; 1 Pi. 3:8). Ai trabilka ba dukiara aisisa piua ra, yawan walaia sa bara sip sa kaka, kupia buki bîla nani wal maisa nihkaia (S.L. 12:25). Kuna yawan lukaia apia sa ai rayaka ra dîa taki ba yawan diara sut nu sa (S.L. 18:13). Wan pânika nani wal wihka bîla kaikaia lâka marikaia sa bara bîla kaikaia apia sa witin nani diara sut kasak kat daukbia (Epe. 4:32).

20. ¿Yawan dîa sât pânika kaia want sa?

²⁰ Yawan kulkanka tara yabisa wan asla takanka tilara pâna nani briaia. Sakuna yawan sut mistikkira sa bara wan rayaka ra diara saura kum kum takan ba mita, sam taim lukraskira diara nani aisi daukisa. Baha mita, wan kupia aiska ni tingki yabisa wan muihni lakri nani bawan lâka mariki ba, latwan lâka, wihka bîla kaikan lâka, umpira kaikan lâka, bara baku ban wan pânika nani kabia. Rait apia yawan baha sât pânika kaia want sa.