AISI KAKAIRA NANI MAKABI WALANKA

Apastil Pal Galesha 4:24 ra lâ wâl dukiara aisan taim, ¿dîa wiaia want kan?

Apastil Pal Ebraham, Sara bara Agar dukiara aisan ningkara, naku ulban: “Naha na lika tânka tihu kum wan marikisa. Mairin wâl ba lika wan marikisa lâ wâl tânka” (Gal. 4:22-24). Patitara yawan luki kan naha lâka nani ba Moses wal lâ daukan bara lâ raya ba dukiara aisisa. Sakuna, naha tânka tihu ra laki kaikan ba ra, aitani kaikisa naha lukanka ba chens munaia nit sa. Kan talia sa apastil Pal ba Moses bara Ebraham wal lâ daukan ba dukiara aisisa, lâ raya ba dukiara lika apia. Kaisa tânka kum kum laki kaikaia.a

Pal ba Sainai ilka ba alba mairin Agar wal praki kaikanka kum daukan (Gal. 4:25). 1513 manka ra yawan piua nina ra, baha ilka ra baha lâka daukan (Imp.St. 19:5, 6). Baha mita Agar dukiara aisisa taim, Moses wal lâ daukan ba dukiara tânka sa. Upla kumi sin sip apia kan lâ dîa wi ba kat daukaia, baha mita naha lâka ba Ju uplika nani ra ai kupia krauki kan saurka lâka ra albika nani banhwi kan. Naha lâka ba Israel uplika nani ra hilp munaia sip kan Misaya ba param kaikaia, kan witin baman upla kum baku naha lâka aitani kat daukaia sip kan. Misaya ai rayaka kasak ba sakripais baku yaban taim, sip kan upla nani mistikkira ba saurka bara prura wina pri sakaia (Gal. 3:19, 24, 25). Jisas Gâd kupia lâka daukan piua ra, baha lâka danh nit apia kan (Ro. 10:4).

Pal win Agar ba mairin sât wala kan bara Sara dukiara win “mairin pri” pramis kum tâka mita luhpa baikan (Gal. 4:23). Baha pramiska ba Ebraham wal lâ kum daukan ba (Gal. 3:29; 4:28, 30). Jehova Ebraham ra tânka marikan baha pramiska ba nahki kabia ba: “Bara man kiamkam ra praki nisan wala nani sut tasba aiska ra bâra ba sin yamnika yan kabia, man bui yang bîli wali daukram ba mita” (Bla.St. 22:18).

Ebraham wal lâ daukanka ba kau tânka param sakan Jehova Eden giadinka ra dîa pramis munan ba dukiara (Bla.St. 3:15). Tânka marikan balaia kan “kiamka” ba Ebraham bâk aimakbia. Pal win baha “kiamka” tilara kau tânka tara bri kan ba, Jisas Kraist kan. Baha kiamka tilara “Kraist dukia” nani sin bâra sa, wibia kaka 144.000 Jisas wal king aimakai nani ba (Gal. 3:16, 29; Par.M. 14:1-3). Gâd Ebraham ra naha pramiska ba daukan ba mita ya Jisas ra bribia bara bîla walbia kaka yamnika manis bribia.

¿Pal ba naha tânka dukiara aisan ba wina yawan dîa lan takaia sip sa? Witin marikaia want kan ai piua ra iwi kan Ju uplika nani ba Moses ra yaban lâka ba ban bîla walaia want kan kaka, Agar baku ban alba kaia kan. Sakuna witin nani, tânka tara bri “kiamka” ra bribia kaka, wibia kaka Jisas Kraist ra, Sara baku upla pri nani kabia. ¿Dîa wina pri taki banhbia ki? Saurka bara prura ba wina (Jn. 8:32-34). Witin nani Jisas ra kasak lukras kan kaka, baha lâka ba dîa muni mangkan ba ai tânka briras kan ba marikan: Kraist kat brih waia.

Galesha kangrigisanka nani ra kristian kum kum nani ba Ju uplika nani apia kan ba mita aima kumi ra sin Moses lâka ba alki daukras kan. Sakuna Ju uplika ba Ju apia uplika nani ra taibi muni kan Moses lâka ba bîla walbia dukiara, baha tilara kan sirkumsisan lâka ba. Apastil Pal ba win, Moses lâka ban nina blikaia bahki kan, kan witin nani Jisas ra kasak luki kan kaka, Moses lâka ra alba kum baku iwaia danh nit apia kan (Gal. 5:1, 10-14).