Patitara piua ra inska alkaia iliska nani

Patitara piua ra Jisas disaipilka nani kum kum ba inska miskaia warkka dauki banhwi kan (Mk. 1:16-20). Naha waitnika nani ba Galili lakunka ra ai iliska yus muni inska alki banhwi kan.

¿Baha iliska nani ba nahki paski banhwi kan? Witin nani kiwa sâtka kum yus muni mami banhwi kan. Inska sirpi nani miskaia want kan kaka, iliska untika nani ba sirpi mami kan, bara inska tara alkai kan kaka, untika nani ba kau tara dauki banhwi kan. Ilis sirpi nani ba un nani ra ayan pis apia kaka walpa ni wal wilki kan rungbia dukiara. Ilis tara nani ba inska nani aubi sakaia dukiara yus muni kan, bara aiawbia dukiara tat pis nani mangki kan, baku sin mununhtara ayan ni wilki kan rungwaia dukiara.

Ilis nani ba manakira kan ba mita pain main kaikaia kan. Sam taim ilis nani ba kalwi kan kipla nani tâka apia kaka dîa alkan kan ba uba wirha kan ba mita (Lk. 5:6). Baibil ra wisa aima kum, Jems bara Jan “ai iliska nani kalwan ba mami kan”, ban kra naha paskaia dukiara silak kum bara linin kiwka nani yus muni kan (Mt. 4:21). Talia sa mamiskra nani ba ai warkka yua danh taki banhwi kan piua ra ai iliska nani kli paski kan. Baku sin, tâskika sakaia dukiara ilis nani ba sikbi banhwi kan. Luk ba aisan inska mamiskra nani kum kum ba “ai tanka nani sikbi kan” (Lk. 5:2). Las kat, lapta ra laki banhwi kan; baku isti aisawbia apia dukiara (Isi. 47:10).

Jisas ba naha sât warkka dauki kan waitnika nani ra paiwan “upla âialkra nani” takbia dukiara.