Aidrubanka nani ra dîa smalki ba ra aman wali kap

1, 2. a) ¿Naiwa spirit lainka ra Jehova dîa wankisa ki? (Lawana Nani 23:1, 2, 5). b) ¿Naha stadika ra yawan dîa laki kaikbia?

NAIWA piua ra, Jehova spirit pata ailal wankisa. Baha mita, Debit dîa luki kan ba yawan tâ baikisa, witin naku aiwanan: “[Jehova] sika sepadki; yang diara sut brisna” (Lawana Nani 23:1, 2, 5 ba aisi kaiks).

² Jehova mita aidrubanka nani bâk lan wan daukisa. Aidrubanka nani ra, piu wala ra lan takan smalkanka nani ba ban wan kupia kraukisa. Mani ailal Jehova warkka dauki kabia sin, yawan baha kupia kraukanka nani ban nit sa (2 Pi. 1:12). Aidrubanka nani ra, smalkanka kum yawan pat kakaira ba laki kaikisa taim, ¿aman walaia karna wan munisa ki, pat lan sa wisi? Baku sa kaka, naha stadika ba hilp wan munaia sip sa. Nanara laki kaikbia aidrubanka nani ra rait pali ya mita wan smalkisa sapa, dîa muni yawan aman pali walaia nit sa, aisasara nani ba dîa daukaia sip sa yawan kau pain walbia dukiara, bara yawan dîa daukaia sa pain walaia dukiara.

¿AIDRUBANKA NANI RA RAIT PALI YA MITA WAN SMALKISA KI?

3. ¿Jehova mita dîa bâk wan aisisa ki, bara ai uplika nani ba nahki ai Bîla ba yus munisa?

³ Jehova Baibil bâk wan aisisa (2 Ti. 3:16, 17). Jisas baha tânka ba param nu kan. Baha mita, Gâd Bîla ba lankira yus munan. Baku kan kaiki, upla kum kum ba makabi walan: “¿Nahki naha waitna diara tânka manis kaikisa, skul sin dimras ba?” (Jn. 7:15). Upla nani kupia yamni bri kan ba Jisas smalkanka ba walaia laik pali kan. Pas kristianka nani ba sin, Pal bara Apolos baku, upla ra smalkaia dukiara Baibil ba kasak yus muni kan (Ap.St. 17:2, 3; 18:24, 28). Yawan, Jehova witniska nani ba, pain nu sa wan ulbi sakanka nani sut ba, JW Broadcasting® lilkika nani, bara lilka wala nani sin Baibil wina sakan sa. Baha mita, upla nani pas trip wan aidrubanka nani ra wisa taim, tâ iwisa yawan nani nahki piu bani Baibil yus muni ba kaikisa taim. Ya nani aisanka yabi ba klir marikisa Gâd Bîla wina ai smalkanka nani sakisa, kan baha wina aisi kaikisa bara dîa lan taki ba nahki praptis munaia tânka wan marikisa (Lk. 24:32).

4. ¿Baibil ra aima kum kum ra “walaia” bîla ba dîa tânka sa ki?

⁴ Baibil ra “walaia” bîla yus munisa taim, aima ailal ra “alki daukaia” tânka sa. Aidrubanka nani ra Jehova Baibil bâk wan aisisa piua ra, yawan nu takisa ani ba ai kupia lâka sa bara baku kau isi wan takisa ai bîla wali daukaia. Yawan kasak lukisa aidrubanka nani ra dîa smalki ba aman wali bara alki daukisa wan kaikisa taim, Jehova lilia ai dara walisa (S.L. 27:11).

¿DÎA MUNI ASLA AIDRUBANKA NANI RA AMAN PALI WALAIA NIT SA KI?

5. ¿Jehova ra latwan kaiki ba mita, dîa daukaia wan kupia bukisa? (Jan 4:23, 24; 1 Jan 5:3).

⁵ Kan yawan Jehova ra latwan kaiki ba mita (Mt. 22:37). Jehova dukiara kau lan takisa taim, witin ra kau latwan kaikisa. Baha latwanka lâka tara ba mita, wan kupia bukisa witin bîla wali daukaia bara witin want ba kat mayunra yabaia (Jan 4:23, 24; 1 Jan 5:3 ba aisi kaiks).

6. ¿Aidrubanka nani ra Jehova dîa wan smalkisa ki?

⁶ Kan yawan upla nani ra latwan kaiki ba mita (Mt. 22:39). Aidrubanka nani ra, Jehova wan smalkisa wan muihni lakri nani ra hilp munaia bara upla wala nani ra sin. Tânka kum baku, Upla nani ra smalkaia: Latwan lâka warkka kum wauhkataya ba hilp wan munisa smalkaia warkka ra daukanka painkira nani marikaia. ¿Upla nani wal ban wina aisaia karna mai munisa ki? Baku sa kaka, pain kabia wik bilara aidrubanka ra muihni lakri nani aisanka yabi ba ra aman walaia.

7. ¿Dîa muni tânka tara brisa Jehova ra aman walaia ba?

⁷ Kan yawan lilia iwaia want sa nanara bara ban kaia ra. Jehova patitara ai napakanka nani ra win ba baku, yawan ba ai bîla walaia sa, kan baku baman lilia iwaia sip sa bara raya ban kaia lâka ba briaia (Kli S. 32:44-47). Wan aidrubanka nani ra smalkanka yabi ba ra wan sinska mangkisa kaka, wan kupia buki bîla nani walbia, bara baku sip kabia tasba raya balbia ba kat ban bapi buaia (Ro. 8:25). Yawan las yua nani ra iwi ba mita, Jehova dîa wan smalki ba ra aman walaia nit sa bara spirit lainka ra dutki kaia (Mt. 24:42-44; Par.M. 1:3).

NAHKI WALA NANI RA HILP MUNAIA AMAN WALBIA DUKIARA

8. ¿Dîa muni kristian waitna nani ba kau pain smalkaia dukiara ban ridi takaia sa?

⁸ Kristian waitna nani aisanka yabi ba kau pain smalkaia ban ridi takaia sa. Ai aisanka nani pain ridi dauki bara Baibil wina sakisa taim, upla nani ra kupia bukisa tânka kasak ba lan takaia. Baku sin, wan muihni lakri nani ba ban kasak kabia dukiara hilp munisa. Aidrubanka nani ra aisanka yabi nani sut ba ai auya tikaia apia sa ai bîla nani ba wal wala nani ra hilp munaia sip sa. Man aisanka kum yabaia sanska brima taim, laki kaiks baiki sakanka aula nani ra takbia kupia kraukanka nani nahki alki daukaia sip sma ba. Nahara aisasara nani dukiara aisisa, sakuna muihni lakri wan aidrubanka ra aisanka yabi nani sut dukiara sin aisisa (2 Ti. 4:2; Tai. 1:9).

9. ¿Dîa muni aisanka nani ba tânka klir bara isi ra daukaia sa?

⁹ Aisankam ra tânka klir bara isi ra dauks. Aisankam ba uba karna sa kaka, ban kra mai wali nani ba diara wala ra ai sinska mangkbia. Man brinkam sa aisankam ba isi kabia bara baku upla nani ba tânka briaia sip kabia. ¿Dîa hilp mai munbia baku daukaia? 1) Tâ wina mariks dîa tânka tara nani dukiara aisaisma ba. 2) Tânka kumi bani laki kaiks. 3) Bara tânka wala dukiara aisaras kainara, wira kum takaski wis dîa dukiara aisaisma ba. Tnata prakras kainara dîa aisaram ba dukiara bîla prahni ra kupia krauks.

10. ¿Dîa muni yawan dîa aisai ba pain kakaira takaia sa?

¹⁰ Dîa aisaisma ba kakaira taks. Baibil tikska nani ra bara aisanka ba ani wina sakan ba ra tihu luki kaikisma kaka, aisankam ba uba laik takma (S.L. 2:4, 5). Baku tnatka ra, aisankam yama taim kupiam wina aisaia sip kama (Ap.St. 4:20). Stech kuntrika wina kristian waitna kum 70 mani pura bri ba, witin win kau wahma kan taim, aisanka kum walan ba ai auya tikras sa. Nawas kat ban ai kupia kraukisa. Baku sin, naku win: “Nawas kat ban kupi krawisa baha muihnika ba nahki wan kupia buki kan Baibil tihuka nani ba ra luki kaikaia. Bara klir pali aisan nahki baha daukaia sip kan ba bara ai kupia wina aisi kan. Baha aisanka ba sinski ra ban takaskan sa baha piua wina naiwa kat, bara kasak hilp ai munan Baibil aisi kaikaia bara Jehova wal pâna lâka painkira kum briaia”.

11. ¿Dîa muni tânka tara brisa aisanka kum yabisma taim, mai wali nani ra dîa daukaia nit ba klir pali tânka marikaia? (1 Timoti 4:13-16).

¹¹ Mai wali nani dîa nitka bri ba ra luks, bara dîa smalkisma ba nahki alki daukaia hilp muns. Diara ailal aisaia sirka ra, Baibil ba yus muns mai wali nani ra kupia bukaia bara dîa daukaia nit ba tânka marikaia dukiara. Tânka kum baku, apastil Pal mita Timoti ra kupia kraukanka nani yaban nahki ai spiritka lâka ba karna bri kaia dukiara (1 Timoti 4:13-16 ba aisi kaiks). Baha mita, mai wali nani dîa nitka bri ba ra pain luki kaiks, bara dîa smalkisma ba nahki pali alki daukaia sip ba tânka mariks.

12. ¿Dîa muni tânka tara brisa aisanka yabisma taim kupiam wina aisaia?

¹² Aisankam ba ridi daukisma piua ra, bîlam baikra karna wal aisi bas, baku tnatkam ba kat aisaia sip kama. Bahara aisi kaiki baman waia sirka ra trai kaiks tnatkam ba kat aisaia. Baku tnatka ra mai wali uplika nani ba mapara kau isi kabia dîa aisisma ba ra ai sinska mangkaia bara yamnika sakaia. Aisi Kakaira bara Smasmalkra Kau Pain Kaia wauhkataya ba baha dukiara naku wisa: “Tnatkam ba kat aisas bara kupiam wina sin. Baku lika, smalkanka bara upla dukiara dîa lukisma ba latan marikma”. Man kupiam wina aisisma kaka, mai wali nani ba kau pain ai tânka bribia bara dîa smalkisa ba ai rayaka ra alki daukaia want kabia.

13. ¿Aisanka yabisa taim, dîa muni aisasara lankira nani ra hilp wan munbia makabaia sa? (Lilka ba sin kaiks).

¹³ Aisasara lankira kum ra makas hilp mai munbia. Kaina manis dîa ridi takram ba witin ra mariks bara dîa kupia kraukanka nani maikbia ba alki dauks. Baku sin, aisankam yama piua ra nahki daukma ba mai kaikbia makabaia sip sma. Baku tnatka ra mai wibia nahki kau pain daukaia sip sma ba (S.L. 1:5). Sam taim wan aisanka nani ba klir bara tânka briaia isi sa sapa, yawan kaikaia sip apia sa. Baha mita, upla wala hilpka nit sa. Yawan smasmalkra lankira nani takaia want sa, kan baku wan wali nani ra hilp munbia Baibil smalkanka nani wina yamnika sakaia dukiara.a

AIDRUBANKA NANI RA AMAN PALI WALAIA DUKIARA DÎA HILP WAN MUNBIA

14. ¿Dîa muni pain sa Lawana 119 âiulbra daukanka ba nina blikaia? (Lawana Nani 119:24, 111, 167).

¹⁴ Jehova wina kupia kraukanka nani wanki ba kau latwan kaikaia. Naiwa “piua karna nani” ra iwi ba mita, Jehova wina kupia kraukanka nani nit sa wan trabilka nani mapara bapi buaia dukiara (2 Ti. 3:1). Ban kra yawan aima ailal ra sim aisanka nani walan sa wan dara walisa kaka, Lawana 119 âiulbra daukanka painkira nani bri kan ba nina blikaia sip sa. Witin ba Jehova wina kupia kraukanka nani ba dukiara ai tingkika lâka ban mariki kan (Lawana Nani 119:24, 111, 167 ba aisi kaiks).

15. ¿Dîa hilp wan munbia aidrubanka nani ra spirit pata wanki ba dukiara wan tingkika lâka marikaia? Tânka kum aisas.

¹⁵ Yawan spirit pata bri ba dukiara wan tingkika lâka ban marikaia sa. Kaisa kaikaia Israel uplika nani ra dîa takan ba upla iwras tasbaya ra iwi kan taim. Tâura Jehova mita manâ yabi kan taim, witin nani ba ai tingkika lâka marikan. Kan baha pata ba Jehova wina bali kan, auhni pali kan, bara baha wal raya kaia sip kan (Imp.St. 16:15, 31). Sakuna, witin nani yu bani pi kan ba mita, tayat takan bara ai tingkika lâka danh marikras kan (Kul.K. 21:5). ¿Yawan dîa lan takisa? Diara kumi tâka mita sin, yawan spirit pata wanki ba bahki kulkaia want apia sa, Israel uplika nani daukan ba baku. Aima manis ra, sim smalkanka nani walbia sin yawan swapaia apia sa bara wan tingkika lâka marikaia sa. Wan kupia kraukaia sa naha smalkanka nani ba Jehova wina balisa, bara wan asla takanka ba tânkira lâka ni ridi daukisa. Bara naha smalkanka nani ba sins lâka nit ba wankisa raya ban kaia lâka briaia dukiara (S.L. 3:13, 16-18; Jn 17:3).

16. ¿Muihni lakri kum kum Jehova warkka dauki mani ailal bri ba ra dîa hilp munisa aidrubanka nani ra aman walaia dukiara? (“Kau pain walaia dukiara dîa daukaia sip sma” bakska ba sin kaiks).

¹⁶ Naha kupia kraukanka nani ba alki daukaia sa. ¿Muihni lakri kum kum Jehova warkka dauki mani ailal bri ba ra dîa hilp munisa aidrubanka nani ra aman walaia dukiara? Ashley, Jehova witniska baku 30 mani brisa, witin naku wisa: “Aidrubanka ra waras kainara, ridi takaia ba tânka tara brisa. Kan baku daukras sna kaka, aisanka sip yabras sna bara sinski ra diara wala ra lukisna”. József ba Jehova warkka dauki 52 mani brisa, witin naku wisa: “Aidrubanka nani ra sim smalkanka nani walaia laik sna, kan kau tihu tânka briaia sip sna bara ban diara raya nani lan takisna”. Bara witin wisa: “Aisanka yabi muihnika ba lankira apia kabia sin, nahki aisi ba ra lukras sna, kau ni Baibil wina dîa smalki ba ra sinski mangkisna”.

17. ¿Aidrubanka nani ra aman walaia dukiara, dîa kau daukaia sip sma? (Lilka ba sin kaiks).

¹⁷ Nanara kupia kraukanka wala nani laki kaikbia aidrubanka nani ra aman walaia kau isi kabia dukiara. 1) Kau tâ krikras kainara diara kum piaia want sma kaka, uba ailal pipara, baku yapan mai daukbia apia. 2) Aidrubanka tâ krikras kainara bahara kaia trai muns bara iwaikam pliki bris. 3) Teleponkam ba bin âpu tnatka ra mangki swis, baku ambuk mai munbia swipara. 4) Aidrubanka ra dîa aisabia ba dukiara luki bas. 5) Aisasara dîa aisi ba ra sinskam ba mangki bri bas. 6) Aisanka ra tânka tara nani bri ba ulbi bris, apia kaka kupia kraukaia dukiara lilka lupia nani paskaia sip sma. 7) Baibil tikska nani ra luks bara luki kaiks aisanka ba wal dîa wilkanka brisa. 8) Silp mamkabi wals: “¿Kangrigisan bilara apia kaka smalki taukisna taim, nahki naha smalkanka na yus munaia sip sna upla kum ra hilp munaia dukiara?”. 9) Aidrubanka tara ra waras kainara, laki kaiks yu bani dîa ulbanka lalka brisa, aisanka lalka bani, bara tikska nani kau tânka tara bri nani ba. 10) Kupiam ridi daukaia dukiara, programka tâ krikras ba kainara wih iws, baku aman walma miusik bara lilka nani mangkbia ba ra.

JEHOVA RA BAN WALI KAP

18. ¿Dîa muni aidrubanka nani ra aman walaia ban trai kaikaia sa?

¹⁸ Aidrubanka nani ra aman walaia ban trai kaikaia sa, kan baku swika Jehova mita “kasakka yabalka nani bâk” wan brih wabia (Law. 23:3; 31:3). Jehova kupia kraukanka nani ba yawan nit pali sa, baku wan yabalka ba wina tnaya ra tawbia apia. Baha mita, silp wan wîna kat ban laki kaikaia sa aidrubanka nani ra yawan aman pali walisa sapa bara dîa lan taki ba alki bri daukaia sa (Lk. 8:18). Jehova smalkanka nani ba walisa kaka, nanara lilia kabia bara kaina piua ra raya ban kaia lâka ba yawan bribia (Law. 119:2, 14).