Smalkaia warkka ra man kau lankira takaia sip sma

1. ¿Yawan dîa lan takaia sa, bara dîa muni? (2 Timoti 4:2; lilka ba sin kaiks).

JISAS ba ai nina blablikra nani ra win: “Yang disaipilki nani dauki banhs [...] bara smalki banhs dîa dîa man nani ra adar maikri ba bîla wali kaia” (Mt. 28:19, 20). Naha bîla nani ba param wan marikisa kristian nani sut ba smasmalkra warkka ba daukaia sa. Rait sa, Jehova kupia pain bri uplika nani ra kaikisa bara witin nani ra pliki sakaia dukiara insal nani ba hilp wan munisa (Ap.St. 13:48; Jn. 6:44; Par.M. 14:6). Kuna, yawan sin wan warkka ba daukaia sa. Apastil Pal bara Bernabé sturka ra luki kaiks. Witin nani Iconio priaska watla ra kan piua ra, Baibil ba wisa witin nani ba “ai natka kan ba baku [...] mahka upla ra smalkan, bara upla uya kasak lukan, Ju nani bara Ju apia nani sin” (Ap.St. 14:1). Param sa, witin nani smasmalkra lankira banhwi kan (2 Timoti 4:2 ba aisi kaiks). Bara yawan sut kristian nani baku witin nani ra nina blikaia sa.

2. ¿Dîa muni kristian kum kum ba lukisa witin nani smasmalkra lankira takaia sip apia sa?

² Ban kra upla kum kum ba smasmalkra kau lankira takaia sip apia kabia ai dara walisa bara naku lukisa kaia sa: “Yang skul tara dimaia chanska briras kapri” apia kaka lukisa “yang na upla wala ra smalkaia lan apia sna”. Baibil sturka nani ra taki uplika kum kum ba sim baku ai dara walan (Imp.St. 4:10; Jir. 1:6). Baku sin, upla kum kum sari takisa bara lukisa: “Yang na smasmalkra saura kum sna kaia sa, kan smalkaia warkka ra Baibil stadika nani sakras sna, muihni lakri wala dauki ba baku”. Bara yawan nu sa smalkaia warkka ra upla kum kum ba sturi yamni ba walaia want apia kabia. Baku sin yawan lankira kaia sip sa, kuna naha tânka apia sa Baibil stadika nani ailal sâkbia. Yawan kaikan baku, Jehova bara ai insalka nani hilpka ba wal, wan walaia wilin uplika nani ba pliki sakaia sip kabia. Kuna baku kabia sin, wan brinka sa smalkaia warkka ra kau lankira takaia. Bara baha daukaia dukiara, kaisa tnatka yumhpa laki kaikaia.

WALA NANI RA LUKISMA BA MARIKS

3. ¿Dîa muni upla nani ba Jisas smalkanka nani walaia laik kan?

³ Baibil ba wisa Jisas ba “upla kupia ra dîa bâra ba sut” kaikaia sip kan (Jn. 2:25). Wibia sa kaka, witin ba upla lukanka nani bara dîa ai kupia buki ba nu takaia sip kan. Baha mita, ai nitka nani ba pain ai tânka bri kan bara upla kupia ba alkaia sip kan. Witin ba kaiki kan nahki upla nani ba spirit lainka ra umpira banhwi kan, bara nahki rilidian tâ brabrira nani ba witin nani ra taibi muni kan ba (Mt. 9:36; 23:4). Jisas il purara upla nani ra smalkan taim, baha tânka nani dukiara aisan. Baha smalkanka nani upla aihkika nani mapara tânka tara bri kan bamna, walaia wilin kan.

4. ¿Yawan nahki marikaia sip sa upla nani dukiara lukisa? (Lilka nani ba sin kaiks).

⁴ Upla nani ba dîa trabilka nani bâk luisa tânka briaia yawan trai munisa taim, yawan marikisa witin nani ra luki ba. Tasba aiska ba Sitan karnika mununhtara ba mita, upla sut ba trabil sât sât tâka mita pât wahwisa. Naha ra lukaia ba hilp wan munbia, yawan smalki uplika nani ba nahki ai dara wali ba wan tânka briaia. Tânka kum baku: ¿Yawan smalki tasbaya pîska ra diara kum takan ba dukiara upla nani ba uba wari takisa ki? ¿Skul watla ra ai luhpia nani ra diara saura kum takbia ba dukiara aisa yapti nani ba wari takisa ki? ¿Baha pliska ra uya wark âpu sa ki? Luki kaiks naha “piua karna nani” ra upla rayaka ba nahki sa, witin nani Baibil pramiska nani âpu ba mita nahki iwisa (2 Ti. 3:1; Ais. 65:13, 14).

5. ¿Nahki tnatka ra Jisas ba parisi uplika nani ba wal sât wala kan? (Matiu 11:28-30).

⁵ Jisas ba upla nani ra latwan kaiki kan ba mita, yamni muni kan. Sakuna parisi uplika nani ba lika sât wala kan, witin nani tara puli kan bara upla nani ra saura muni kan (Mt. 23:13; Jn. 7:49). Jisas ba upla nani ra kupia yamni lâka marikan bara rispik lâka ba sin. Witin ba praut âpu bara ai kupia sin bawikira kan ba mita, smasmalkra lankira kum kan (Matiu 11:28-30 ba aisi kaiks). Yawan sin upla nani ra smalkisa piua ra, kupia yamni lâka bara rispik lâka ba marikaia sa.

6. ¿Dîa ba hilp wan munbia wan mapara bui apia kaka walaia want apia uplika nani ra kupia yamni lâka bara rispik lâka ba marikaia dukiara?

⁶ Upla kum kum ba wan walaia want apia kabia bara wala nani ba wan mapara bubia. Jisas ba smalkan wan mapara bui uplika nani ra pana saura munaia apia sa, kau ni witin naku win: “Waihlam nani wal lamtwan bas, misbara mai kaiki nani ra yamni muns, lamhtubi nani ra pana yamni muns, swiram dauki nani ba dukiara puram suns” (Lk. 6:27, 28). Upla nani ba diara sât sât tâka mita wan walaia want apia sa kaia sa. Nahara lukaia ba hilp wan munbia witin nani ra smalkisa piua ra kupia yamni lâka ba marikaia. Yawan nu sa upla kum kum ba sturi yamni nani mapara sa. Ban sakuna, wala nani ba uba trabil taki luki ba mita saura wan munisa kaia sa, ban kra ai pamalika apia kaka trabil wala bri ba tâka mita. Ban kra, uplika mapara aisaia piua pain kum apia sa. Dîa tâwan kabia kra sin, yawan naha smalkanka ra lukaia sa: “Sturi nani aisisma ba sut sin pain bara auhni kabia, bara kaiki banhwi kaia sma, dîa upla ra pana aisaia sma ba” (Kol. 4:6). Upla nani nahki ai dara walisa bara dîa sât nitka nani brisa wan tânka briaia trai munbia kaka, isti pali witin nani ba wal wan kupia sauhkbia apia bara smasmalkra kau lankira takaia sip kabia.

WALA NANI RA SMALKISA PIUA RA GÂD BÎLA BA YUS MUNS

7. ¿Jisas ba upla nani ra smalkaia dukiara dîa ba yus munan? (Jan 7:14-16).

⁷ Jisas ba, witin dîa luki kan ba wina upla nani ra smalkras kan, kau ni Gâd Bîla ba yus muni upla nani ra tânka marikan nahki ai rayaka ra yamni munaia sip kan ba. Bara witin tnatka isi ra smalki kan ba mita, upla nani ba sip kan ai smalkanka nani ba tânka briaia bara ai kupia kraukaia. Jisas dukiara Baibil ba wisa: “Witin aisi kan ba dukiara upla nani tâ iwan, kan smalkaia karnika bri uplika baku smalki kan, Lâ Smasmalkra nani baku lika apia” (Mk. 1:22). Jisas piua ra, lâ smasmalkra nani ba upla ra smalkaia dukiara, kulkanka tara bri rilidian tâ brabrira nani dukiara aisi smalki kan. Kuna Jisas ba lika, piua sut ra Gâd Bîla wina aisi smalkan. Jisas ba ai Aisa wal heven ra iwi kan ba mita, diara ailal nu kan. Ban sakuna, witin baha wal tara pulras kan, bara marikras kan upla nani ba wal witin kau sinskira sa. Ai Aisa kupia lâka ba smalkaia dukiara Gâd Bîla ba yus muni kan (Jan 7:14-16 ba aisi kaiks). ¡Jisas ba kristian nani sut ra tânka painkira kum wan marikan sa!

8. ¿Apastil Pita ba nahki Jisas daukanka nina blikan?

⁸ Jisas daukan baku disaipil nani ba sin Baibil ba yus munan wala nani ra smalkaia dukiara. Kaisa apastil Pita sturka ba laki kaikaia. Witin ba skul tara dimras kan, ban sakuna mani 33 Pentikus yua ra, witin ba tânka marikan nahki prapit aisanka nani ba Jisas ra aimaki kan ba. Bara smalki kan tnatka ba wal sip kan upla kupia bîla kat kangbaia (Ap.St. 2:14-21, 37). ¿Baha yua ra dîa takan? Baibil ba wisa: “Ai smalkanka bîla alki brin nani ba sut pali tahbi daukan; bara baha yua lika 3,000 lama upla kau lalukra nani wal asla prakan kata” (Ap.St. 2:41).

9. ¿Dîa muni smalkisa piua ra Baibil ba yus munaia sa?

⁹ Baibil baman karnika brisa upla nani rayaka ba chens munaia dukiara (Hib. 4:12). Baha mita, smalkisa piua ra yawan yus munaia. Wan brinka sa Gâd Bîla ba smalkaia, wan lukanka nani ba lika apia (2 Ti. 4:2). Sins Lâka 2:6 ra wisa: “Dawan [Jehova] sika sins lâka wankisa; witin aisi ba wina sika sins lâka bara diara tânka kaikaia lâka ba bal takisa”. Smalkisa piua ra Baibil ba yus munisa taim, Jehova upla nani wal aisabia chanska yabisa (Mal. 2:7). Want sa upla nani ba ai dara walbia Baibil smalkanka nani ba kau yamni sa upla smalkanka nani ba wal. Baku sin, wan brinka sa witin nani ba kaikbia, Baibil ba Gâd bîla sa bara wan smalkisa nahki wan Papaskra kupia ba lilia daukaia bara rayaka lilia kum briaia dukiara yawan dîa daukaia sa (2 Ti. 3:16, 17).

10. ¿Yawan nahki sip sa wan Baibil stadi tatakrika ra hilp munaia witin dîa lan taki ba Baibil wina sa ai tânka bribia dukiara?

¹⁰ Baibil stadika kum yabaia dukiara ridi takisma piua ra, luki kaiks nahki tnatka ra stadi tatakrikam ra hilp munaia sip sma, Baibil smalkanka nani ra ai sinska aiska mangkbia dukiara. Witin nani ai tânka briaia sa lilka nani bara buk ra dîa kaiki ba stadi takaia dukiara hilpka kum baman sa, bara kau tânka tara bri ba sika Baibil ra ulban ba. Baibil stadika yabi kama piua ra, smalkanka tâ baiki Baibil tikska nani ba, stadi tatakrikam aikuki aisi kaiks. Baha ningkara witin ra hilp muns luki kaikaia, baha tikska nani wina dîa lan takaia sip sa. Bara bukka ra dîa taki ba apia kaka lilka kum stadi tatakrikam wal laki kaikma taim, witin Baibil wina dîa lan takaia sip sa luki kaikbia dukiara hilp muns. Naha tânka apia sa yawan uba sturi aisaia, apia kaka stadika ra taki Baibil tikska nani sut aisi kaikaia. Kau yamni kabia stadi tatakrikam ra taim yabaia, witin Baibil tikska nani aisi kaiki ba ai tânka bribia dukiara bara sam taim kli aisi kaikaia nit kabia. Baku daukbia kaka, yawan uplika ra buk kum apia kaka lilka kum ra dîa wi ba baman smalki kabia apia. Kau ni, yawan Gâd Bîla, Baibil dîa aisi ba smalki kabia (1 Ko. 2:13).

11, 12. a) ¿Wan Baibil stadi tatakra nani ra nahki wihka bîla kaikan lâka marikaia sip sa? (Ap.St. 17:1-4) (Lilka ba sin kaiks). b) ¿Upla kum kum dukiara dîa ba wan kupia kraukaia sa, bara witin nani ra hilp munaia dukiara yawan dîa daukaia sip sa?

¹¹ Baibil stadi tatakra ra smalkanka kum tânka briaia karna munisa kaka, apastil Pal smalkanka ba wan kupia kraukaia sa: “Wihka bîla kaikaia lâka aiska ni upla nani ra smalks”. Upla kumi bani ba sât wala sa. Ban kra yawan nani mapara smalkanka kum kum wan tânka briaia isi sa, kuna wala nani ba kau taim nit kabia kaia sa. Tânka kum baku, Tesalonaika ra apastil Pal ba aima ailal ra Baibil ulbanka nani ba yus munan Ju uplika nani kupia alkaia dukiara (Apastil Nani Sturka 17:1-4 ba aisi kaiks).

¹² Baku sin, wan Baibil stadi tatakrika ra makabi walanka nani ansa munaia dukiara taim aitani yabisa piua ra, yawan wihka bîla kaikan lâka ba marikisa bara yawan trai munaia sa uba sturi aisaia apia. Witin nani aisisa taim, yawan aman walaia sa. Baku tnatka ra witin nani dîa luki ba wan tânka bribia. Ningkara, Jehova dîa luki ba, witin nani ai tânka bribia dukiara aikuki Baibil tikska nani ba laki kaiks. Kupiam krauks, upla kum kum ba Baibil dîa smalki ba kakaira apia sa, ban kra pas trip Baibil kum kaikisa. Baha mita, kau yamni kabia “Gâd bîla ba wina lan taki bas” wauhkataya tara ba brih wi yabaia. Baku witin kaikaia sip kabia nahki Baibil ra smalkanka yuskira nani manis sakaia sip sa. Bara ai rayaka ra nahki yamni munisa kaikbia dukiara, baha wauhkataya tara ra makabi walanka 15 dukiara Baibil tikska nani taki ba aikuki aisi kaikaia sip sma, bahara smalkisa nahki Baibil ba hilp wan munisa rayaka kau lilia kum briaia dukiara. Kaikan baku, wan stadi tatakrika nani ra Baibil nahki karnika tara brisa marikisa kaka, yawan smasmalkra kau lankira kum takbia.

JEHOVA WAL KAKAIRA TAKBIA HILP MUNS

13. ¿Yawan smalkisa piua ra ya dukiara kau aisaia sa? Tânka kum wal mariks.

¹³ Wan brinka sa upla nani ra hilp munaia Jehova ra kakaira takbia bara witin lamara wabia dukiara (Je. 4:8). Nahara luki kaiks: Tihmia ra awala ra impakisa piua ra duri ra upla kum ba ra sa lait kum wal yabal ba ingni daukisa, duri ba diara kumi ra sin prukbia apia dukiara. Naha uplika ba lait wal yabal ingni dauki wabia kra sin, upla sut nu sa duri ba kiaptin kum brisa, sim natka ra yawan smalkisa piua ra, wan brinka sa, upla nani ba kaikbia smalkanka nani sut ba Jehova wina aula sa, witin sika diara sut tâ brisa.

14. ¿Yawan nahki sip sa wan Baibil stadi tatakrika nani ra hilp munaia Jehova kupia lilia daukbia dukiara?

¹⁴ Yawan Baibil stadika kum yabi kabia piua ra, stadi tatakra ra hilp munaia sa, Jehova kupia lilia daukaia brinka ba pakbia (S.L. 27:11). Naha tânka apia sa Jehova witniska kum takbia dukiara lâ manis alki daukbia makabaia. Kau ni yawan want sa, witin Jehova kupia lilia daukaia want ba mita, ai rayaka ra chenska nani daukbia. Tânka kum baku, daukanka saura kum swiaia witin ra karna munisa kaka, naku makabi walaia sip sa: “¿Dîa muni Jehova baha daukanka ba saura kaikisa ki? ¿Dîa muni Jehova want sa man dîa daukaia laik sma ba mahka swima? bara ¿Baha nahki mai marikisa Jehova man ra latwan mai kaikisa?”. Stadi tatakrikam ra kupia buks Jehova nahki ai dara wali ba ra luki kaikaia, kan baku daukbia kaka Jehova ra kau latwan kaikbia bara ai kupia lilia daukaia want kabia.

SMASMALKRA KAU LANKIRA TAKAIA DUKIARA BAN WARK TAKI BAS

15. ¿Yawan dîa daukaia sip sa smasmalkra kau lankira takaia dukiara?

¹⁵ Smalkaia warkka ra kau lankira takaia dukiara, pura sunra bâk Jehova ra hilp wan munbia makabaia sip sa (1 Jn. 5:14). Wan pura sunbia ningkara, Jehova blisin wan munaia sip kabia dukiara asla aidrubanka nani ra dîa lan wan dauki ba ra wan sinska aiska mangkaia sa, bara dîa lan taki ba alki daukaia sa. Baku sin, Baibil stadika kum yabaia dukiara yawan sip sa, muihni apia kaka lakri lankira kum ra wan yula kahbia makabaia bara stadika ningkara, witin ra makabi walaia, yawan diaura kau wark takaia sip sa smasmalkra kau pain kaia dukiara. Kupiam krauks, man uplika wal dîa laki kaikisma ba, pat tânkam brisma ba mita smalkisma kuna stadi tatakrikam ba lika apia, baha mita witin ra lukaia sa. Stadi tatakrikam ra hilp muns kaikbia, dîa lan taki ba nahki ai rayaka ra yamni munisa bara Jehova pramiska nani tara kulkbia dukiara sin. Baku daukbia kaka, yawan witin ra hilp munbia Jehova pânika takaia bara lilia lâka rait aihwa bribia dukiara (Law. 1:1-3).

16. ¿Dîa muni yamni sa smasmalkra kau lankira takaia dukiara ban wark taki kaia?

¹⁶ Jehova dukiara wala nani ra smalkaia ba lilia pali wan sakisa bara tasba raya ra sin baha warkka daukaia ban nit kabia. Baha mita, sturi yamni nani ba smalki kabia piua ra, yawan upla nani ra luki ba ban marikaia sa, Baibil ba yus munaia sa bara Jehova wal kakaira takbia witin nani ra hilp munaia sa. Baku daukbia kaka, smasmalkra kau lankira kum takbia.