Wan kasakka lukan lâka traika kaikisa piua ra, nahki ban kasak kaia sip sa

1, 2. ¿Jisas Kapernaum tawanka ra smalki kan taim, dîa takan?

“NAHA aisi na uya karna sa alki briaia; ¿ya sip kabia naha bîla na walaia?” (Jn. 6:60). Jisas disaipilka nani manis naku ai dara walan witin Kapernaum ra smalkan piua ra. Bisiura naha bîla nani win kan: “Man nani Upla Luhpia Waitna wîna tara na piras bara tâlia sin diras sma kaka, raya ban kaia ba briras sma”. Bara naku sin win: “Ya yang wîni tara pîsa bara tâilia sin dîsa kaka, raya ban kaia ba brisa, bamna yang mita tnata piua ra pruan wina bukamna” (Jn. 6:53, 54).

² Baha uplika nani Jisas dîa smalki kan ba dukiara aihka lukan ba mita, Jisas ra nina bliki kan ba swin. ¿Baha tânka sa ki witin nani ba Jisas ra danh kasak lukras kan? Ban kra, upla kum kum ai kasakka lukan lâka bri kan, kan kainara Jisas sainka tara kum kaiki witin nani naku win: “Kasak pali, naha sika prapit tasba ra balaia kan ba” (Jn. 6:14). Ban sakuna, ai kasakka lukan lâka traika kaikan piua ra, Jisas ra danh kasak apia kan.

3. Jisas aisanka wal ¿apastil nani nahki ai dara walan, bara dîa muni? (Lilka ba sin kaiks).

³ Sakuna Jisas apastilka nani ba ban kasak kan ba marikan. Bara Jisas witin nani ra makabi walan mahka waia want kan sapa. Pita mita pana win: “Dawan, ¿yaura yang nani wamna ki? Man bîlam nani ba lika raya ban kaia bîla nani sa. Yang nani pat kasak lukri bara sin kaiki banhwisna, man ba Holikira, Gâd wina sma” (Jn. 6:68, 69). Kaikan baku Pita wiras kan witin bara apastil wala nani ba Jisas wîna tara piaia bara talia diaia ba ai tânka aiska bri kan. Ban sakuna, witin nani wahbi sakan Jisas ra kasak banhwi kaia. ¿Dîa muni? Kan witin nani kasak luki kan Jisas ba Misaya ba Gâd wina aula kan (Lk. 9:20, 35).

4. ¿Dîa sât dukia nani ba Jehova ra kasakka lâka bri ba wan traika kaikaia sip sa?

⁴ Diara sât sât tâwan wan kasakka lâka ba traika kaikaia sip sa. Tânka kum kum kaisa laki kaikaia. Ban kra, asla takanka ba Baibil tikska kum nahki tânka bri kan ba nanara chens munan, apia kaka smalkaia warkka tnatka ba sât wala daukbia wan wisa. Baku sin, karna wan munaia sip sa wan tânka briaia dîa muni Jehova swisa diara saura nani wan takbia. Apia kaka muihni kum yawan uba latwan kaiki bara rispik muni ba saura wan munisa taim. Baku wan takbia piua ra, ¿nahki wan dara walbia ki?

5. Tânka kum wal mariks dîa muni wan kasakka lukan lâka kum karna briaia nit sa (Kolosi 1:23).

⁵ Traika kaikanka nani mapara kasak kaia dukiara, wan kasakka lukan lâka karna briaia nit sa. Tânka kum baku, utla tara kum bapanka karna nani briaia nit sa tasba nikbanka kum mapara buaia dukiara. Sim tnatka ra, baiki sakanka luan ra tânka nani laki kaikan baku, ban bapi buaia dukiara wan kasakka lukan lâka ba karna kaia nit sa. Baha mita, aitani kabia wan kasakka lâka ban karna dauki kabia. Baku, Jehova warkka ban dauki kabia dîa trabilka bal takbia kra sin (1 Ko. 15:58; Kolosi 1:23 ba aisi kaiks).

6. ¿Apastil nani ra dîa hilp munan Jisas wal ban kasak kaia?

⁶ ¿Apastil nani ra dîa hilp munan Jisas wal ban kasak kaia wala nani witin ra lulki swin piua ra? Witin nani kasak luki kan Jehova ra baman mayunaia sa, kan wan Papaskra sa, Jisas ba Gâd luhpia sa bara “raya ban kaia bîla nani sa”, bara Jisas Jehova tâ baikanka ba brisa. Nanara nahki wan kasakka lukan lâka traika kaikanka ra kauhaia sip ba aisaia watlika ra, kaisa tânka kum kum laki kaikaia nahki Jehova hilp wan munaia sip sa kasak kaia piua karna nani ra: 1) Diara sut Papaskra ba sika Jehova, 2) Baibil ba Jehova wina balisa, bara 3) Jehova naiwa piua ra ai asla takanka ba tâ baikisa. Naha tânka yumhpa dukiara kasak lukisa kaka, wan kasakka lukan lâka mapara dîa traika kaikanka balbia kra sin mapara buaia sip kabia.

JEHOVA WITIN SIKA PAPASKRA

7. ¿Param Marikan 4:11 Jehova dukiara dîa wan smalkisa, bara nahki hilp wan munaia sip sa trabil nani luisa piua ra?

⁷ (Param Marikan 4:11 ba aisi kaiks). Naha tikska wan kupia kraukisa Jehova diara sut paskan. Baha mita, aitani sa witin ra baman mayunbia. Bara ai karnika tara bri ba ra lukisa piua ra, yawan kasak lukaia sip sa wan traika kaikanka nani sut wina swaki wan sakaia sip sa. Kuna, Sitan ai kuninka nani ba wal want sa upla nani namhpa namhpa lukbia Gâd kum bâra sapa. Científico nani ba sin naku aisisa, wan rayaka ba ban wina bal takan. Jehova wan paskan bara latwan wan kaikisa kasak lukras sa kaka, Gâd kum bâra ba yawan namhpa namhpa lukaia sip sa bara traika kaikanka kum bribia piua ra, witin hilp wan munbia apia lukaia sip sa (Hib. 11:6).

8, 9. Jehova wan paskan ba dukiara namhpa namhpa lukisma kaka, ¿dîa daukaia sip sma? (Lilka ba sin kaiks).

⁸ Jehova wan paskan ba dukiara namhpa namhpa lukisma kaka, man naha daukaia sip sma. Wan ulbi sakanka nani ra Gâd diara sut paskan tânka ba pliks. Kasakka lukan lâka karna dauki tânka nani ba pliki sâkma. Tânka kum baku, naha wauhkataya nani brisa ¿Es la vida obra de un Creador? bara El origen de la vida. Cinco cuestiones dignas de análisis. Baku sin, jw.org ra naha pîska bâra sa “¿Lo diseñó alguien?”. Jessica, kristian mairin tiara kum Stech kuntrika wina naku wisa: “Wan ulbi sakanka nani ra tânka pliki kaikri taim, kasak lukri diara sut ba tânka marikisa Papaskra kum sinskira bâra ba. Baha ba pat nu kapri, kuna wauhkataya tânka nani ba laki kaikri taim, namhpa namhpa lukanka nani danh âpu sna”. Muihni lakri manis ra ¡Man lilia bas ban kaia ra! bukka smalkanka 6 bara 7 hilp munan sa. Ban kra man pat aisi kaikram sa, kuna kli aisi kaikaia sip sma.

⁹ Silp Baibil stadikam ra Gâd kum bâra ba tânka pliki kaikma kaka, kasakkam lukan lâka kau karna takbia. Baku sin, Jehova daukanka painkira nani kau pain kakaira takma (Ro. 1:20). Bara dîa lan takram ba, upla wala ra hilp munaia sip kama Gâd dukiara namhpa namhpa lukisa kaka. Tânka ailal wal Jehova wan marikan sa witin ba wan Papaskra sa.

Nebulosa: IAC/RGO/David Malin Images; pez y automóvil: Mercedes-Benz USA; avión: Kristen Bartlett/University of Florida

BAIBIL BA JEHOVA WINA BALISA

10. ¿Dîa muni yawan mapara Baibil ba tânka tara brisa ki? (2 Timoti 3:16, 17).

¹⁰ (2 Timoti 3:16, 17 ba aisi kaiks). Baibil ra Gâd tânka dukiara upla ra param aisisa. Tânka tara bri makabi walanka nani ansa munisa, naha nani baku, rayaka ba ani wina bal takan, dîa muni wan paskan, Gâd dîa want sa yawan daukbia. Baibil ba witin wina balisa. Baha mita, yawan mapara naha bukka ba tânka tara brisa. Baha mita, trai munisa tânka briaia bara dîa wi ba wan rayaka ra alki daukaia.

11. ¿Dîa muni man kasak lukisma Baibil ba Gâd wina balan sa?

¹¹ ¿Dîa muni yawan kasak lukisa Baibil ba Jehova wina balisa? Tânka ailal bâra sa kasak lukaia dukiara. Tânka kum baku, patitara takan sturka nani Baibil ra taki ba sut kasak sa (Lk. 3:1, 2). Baibil ba paskanka dukiara aisisa piua ra sin kasak sa (Job 26:7). Baku sin, Sitan aima ailal ra naha bukka sauhki tikaia trai kaikan sa, ban sakuna bîla aisanka ailal ra lakan sa bara Baibil ba buk ailal nani tila wina kau ulbi sakan sa. Baibil ba 1.600 mani bilara waitna 40 mita ulban, ban sakuna ai smalkanka nani sut ba sim lukanka brisa. Mani ailal brisa Baibil ulbi sakan ba wina, sakuna ai smalkanka nani naiwa piua kat sin upla nani ra ban hilp munisa (S.L. 13:20; 15:21; Mt. 7:12). Baibil prapit aisanka manis pat aimakan sa (Jas. 23:14). Baha mita kasak lukaia sip sa Baibil ba Gâd wina balan sa.

12. ¿Baibil ba Gâd wina balisa namhpa namhpa lukanka brisa kaka, dîa daukaia sip sa?

¹² ¿Ban sakuna Baibil ba Gâd wina balisa namhpa namhpa lukanka brisa kaka, dîa daukaia sip sa? Nahki wan dara wali ba, bara hilp wan munbia dukiara wan pura sunaia sip sa, bara ningkara tânka ba pliki kaikaia. Kaisa wahma kum nina Jordan, tânka kasak ra pâwan ba, dîa aisan ba laki kaikaia: “Upla nani dîa ai wi ba sut ba isti pali kasak lukras sna. Sturka ba kasak sapa tânka plikisna. Raitka pali ba, sam taim namhpa namhpa lukanka nani brisna. Kuna, baha sât lukanka nani ba sinski wina sakaia dukiara, wan ulbi sakanka nani ra tânka pliki kaikisna”. Baibil ba Gâd wina bali ba kasak lukisa kaka, wan kasakka lukan lâka bapanka ba kau karna dauki kabia (1 Ko. 3:12, 13).

JEHOVA NAIWA PIUA RA AI ASLA TAKANKA BA TÂ BAIKISA

13. ¿Jehova witniska nani naiwa piua ra Gâd tâ bri ba dukiara namhpa namhpa lukisa kaka, dîa daukaia sip sa?

¹³ Jehova witniska asla takanka ba naiwa piua ra Gâd tâ bri ba dukiara namhpa namhpa lukanka brisa kaka, mahka diara kum daukaia sa. Nahara silp luki kaikaia sip sa: “¿Ya nani naiwa karna trai munisa Baibil smalkanka nani kat iwaia? ¿Ani asla takanka Baibil dîa wi ba kat smalkisa? bara ¿Ya nani naiwa piua ra Jehova kupia lâka daukisa?” (Mt. 7:20, 21; 2 Ti. 4:3, 4).

14. ¿Matiu 24:14 bîla nani ba aimakbia dukiara Jehova ai witniska nani ra nahki yus munisa?

¹⁴ Yawan nu sa naha las yua nani ra Gâd kupia lâka sa sturi yamni upla nani ra smalkbia. Baha mita, yawan silp makabi walaia sa: “¿Ya nani naha warkka ba daukisa?” (Mt. 24:14). Param sa, Jehova ai witniska nani ra yus munisa naha warkka na tâura brih waia dukiara. Jehova witniska nani baman Gâd Kingka Lâka sturka yamni ba 240 kuntri nani bara tasbaya pîska nani ra smalkisa. Bara 100 mani pura brisa naha warkka dauki. Kasak pali, Gâd uplika nani mapara smalkaia warkka ba kau kulkanka tara brisa (Mt. 28:19, 20).

15. ¿Jehova witniska nani nahki Gâd nina ba holi daukisa ki? (Matiu 6:9; Aiseya 43:10).

¹⁵ (Matiu 6:9 bara Aiseya 43:10 ba aisi kaiks). Yawan Gâd nina ba twilkisa, baha mita upla nani ba Jehova witniska baku wan kaikisa piua ra, wan mapara kulkanka tara brisa. Upla aihkika ba naiwa piua ra nu âpu sa Gâd nina ba Jehova, baha mita Baibil kum paskaia dukiara karna wark takan sa bara baha Baibilka ra Gâd nina ba ani pliska takaia kan ba ra mangkan sa. Bara Traducción del Nuevo Mundo Baibilka ra Gâd nina ba aima 7.000 pura ulbi mangkan sa.

16. ¿Yawan nahki nu sa Jan 13:34, 35 bîla nani ba Jehova witniska nani alki daukisa? (Lilka ba sin kaiks).

¹⁶ (Jan 13:34, 35 ba aisi kaiks). Upla nani ba pana pana tar baiwan lâka ra iwisa. Kuna, painkira sa kaikaia nahki Jehova uplika nani ba latwan lâka bara asla lâka ra iwisa. Baha mita kuntri wala wina kabia kra sin, iwanka tnatka, bara nahki wan pakan sât wala kabia sin, ban karna trai munisa kupia kumi lâka bara latwan lâka pana pana marikaia. ¿Plis wala ra, kangrigisan kum ra pat wih kaikram sa ki? Ban kra kaikram anira kabia kra sin Jehova uplika nani ba pamali kum baku sa, asla bara pana pana latwan lâka mariki banhwisa. ¡Naha ba param wan marikisa Jehova yus wan munisa ai kupia lâka ba aimakbia dukiara! Naha ba ban wan sinska ra bri kaia hilp wan munbia Jehova wal kasak kaia bara traika kaikanka nani balbia piua ra mapara buaia.

JEHOVA RA LULKI SWIPARA

17, 18. ¿Las piua nani ra dîa dukia nani sip sa wan traika kaikaia, bara yawan dîa wiaia sip kabia?

¹⁷ Piua karna nani ra iwi ba mita, yawan trabil ailal bribia (2 Ti. 3:1, 13). Ban kra, diara kum kum tânka briaia karna wan munbia. Baku sin, wan asla takanka ba chens nani kum kum daukbia piua ra wan mapara aihka kabia bara bîla walaia karna wan munbia. Apia kaka muihni lakri kum saura wan munan sa. Baku wan takbia taim, trabilka nahki wapni mangkaia ba sip apia baku lukbia, bara dîa muni taki ba tânka sip briras kabia.

¹⁸ Yawan trabil ailal tâka pât wahbia kra sin, Jehova ra ban kasak kaia sip sa. ¿Dîa muni? Kan yawan nu sa wan Papaskra sa, Baibil ba witin wina balan, bara Jehova witniska nani ai uplika nani sa. Pita Jisas ra win ba baku yawan sin wibia: “¿Yaura yang nani wamna ki? Man bîlam nani ba lika raya ban kaia bîla nani sa”.