Wan kupia dara walanka ra lan daukaia dukiara yawan nahki Baibil smalkanka nani ba yus munaia sip sa

1, 2. a) ¿Jehova Adam bara Iv ra dîa prisantka yaban? b) ¿Bara witin nani baha prisantka dukiara tingki luki kan ba nahki marikaia sip kan?

DAIWAN nani ba diara nani lukraskira daukisa, bara masin aihkika nani ba wark kum baman daukaia dukiara paskan sa. Kuna upla nani ba sât wala sa. Gâd bui wan paskan taim, prisant painkira kum wankan. Naha prisantka ba kristian rait aihwa nani ba tara kulkisa. Naha sika, diara nani silp wahbi sakaia prika lâka sa. Baibil ba wisa naha tasba ra pas waitnika ba Adam kan, witin ra Gâd lilkika kat paskan (Bla.St. 1:26, 27). Adam bara ai maya mairin Iv ba upla sinskira banhwi kan, bara diara nani silp wahbi sakaia prika lâka bri kan.

² Jehova Adam bara Iv ra ai rayaka dukiara lâ nani ailal yabras kan. Witin bui baha nani ra win tasba na main kaikbia, luhpa ailal bribia, bara lâ nani mangkaia raitka bri kan ba rispik munbia (Bla.St. 1:28; 2:16, 17). ¿Witin nani diara nani silp wahbi sakaia prika lâka yaban ba dukiara ai tingkika lâka ba nahki marikaia sip kan? Nit kan Gâd lâka nani ba bîla walaia. Baku tnatka ra, witin nani Gâd ra latwan kaiki kan ba, ai kupia lilia daukaia want kan, bara dîa yaban ba sut dukiara tingki luki kan ba marikaia sip kan (S.L. 23:15).

3. ¿Adam bara Iv ba diara nani silp wahbi sakaia prika lâka ba nahki yus munan?

³ Baibil ba marikisa nahki Adam bara Iv ba diara nani silp wahbi sakaia prika lâka ba saura yus munan, bara Jehova lâka nani ba krikan. Witin nani ba latwan lâka bara ai tingkika lâka marikaia watlika ra silp ai wina ra luki banhwan (Bla.St. 3:1-7). Bara saura wahbi sakan tâka mita naiwa piua ra kat sin yawan ban pât wahwisa (Ro. 5:12).

4. a) Galesha 6:5 ra wi ba baku, ¿yawan sut dîa daukaia sa? b) ¿Naha stadika ra ani prisantka wala ba dukiara aisabia?

⁴ Naiwa piua ra wan rayaka ba kau karna sa. Yu bani wahbi sakanka nani briaia nit sa (Galesha 6:5 ba aisi kaiks). Kum kum nani ba isi sa bara wala nani ba kau karna sa. ¿Yawan dîa daukaia sip sa wan wahbi sakanka nani ba Jehova yamni kaikbia dukiara? Diara sut purkara wan dara walaia sa yawan Gâd hilpka nit ba (S.L. 16:3; Jir. 10:23). Jisas ba kasakkira kan, kuna ai tânka bri kan Gâd hilpka nit kan ba (Hib. 5:7). Bara yawan, mistikkira banhwisa bara naha hilpka ba kau nit sa. Kuna Jehova wahbi sakanka pain nani briaia dukiara hilpka wala wankan sa, naha sika: Wan kupia dara walanka. Kaisa nanara naha prisantka ba dukiara aisaia.

¿WAN KUPIA DARA WALANKA BA DÎA SA?

5. a) ¿Wan kupia dara walanka ba dîa sa? b) ¿Wan kupia dara walanka ba nahki hilp wan munisa? (Roman 2:14, 15).

⁵ Kupia dara walanka ba hilp wan munisa wan tânka briaia dîa ba pain bara dîa ba saura sa. Gâd lâka nani kakaira apia uplika nani kat sin kupia dara walanka kum brisa (2 Ko. 4:2). Naha ba wan insaitka ra yawan dîa luki ba apia kaka dîa dauki ba dukiara wan lâka daukisa apia kaka raitka wankisa (Roman 2:14, 15 ba aisi kaiks). Wan kupia dara walanka ba wan maisa pakisa yawan diara saura kum daukbia apia dukiara (1 Sa. 26:8-11). Bara sin wan kupia bukisa diara yamni ba alki daukaia. Diara nani silp wahbi sakaia prika lâka bri ba tânka apia sa, yawan dîa wahbi sâkbia ba Jehova yamni kaikbia. Yawan baha dukiara kupia dara walanka hilpka ba nit sa, kan baku tnatka ra wan tânka bribia, ani wahbi sakanka nani ba yamni sa apia kaka saura sa.

6. ¿Wan kupia dara walanka ba dîa trabilka brisa?

⁶ Kuna wan kupia dara walanka ba pain pali lika wark takras sa. Yawan mistikkira banhwi ba mita, wan kupia dara walanka ba sin mistikkira sa. Bara naha ba wan iwanka tnatka apia kaka wan brinka saura nani ba wal asla sa. Baibil ba wisa wan kupia dara walanka ba sip sa “swapni”, “tâski”, kupias, apia kaka saura takaia (1 Ko. 8:12; Tai. 1:15; 1 Ti. 4:2; Hib. 10:22). Baha piua nani ra, tapahkanka yamni kum kabia apia. Wiaia sip sa, naha ba paun kriwan kum baku sa bara kli paskaia nit sa. Baha mita, wahbi sakanka pain nani daukaia dukiara wan kupia dara walanka ra lan daukaia sa (1 Pi. 3:16). ¿Kuna yawan baha nahki daukaia sip sa?

WAN KUPIA DARA WALANKA RA NAHKI LAN DAUKAIA SIP SA

7, 8. a) ¿Dîa ba hilp wan munbia wan kupia dara walanka ra lan daukaia dukiara? b) ¿Baibil smalkanka nani ba nahki hilp wan munisa? Tânka kum wal mariks (Lilka ba sin kaiks).

⁷ ¿Wan kupia dara walanka ra nahki lan daukaia sip sa? Yawan lan takaia sa Jehova mapara dîa ba pain bara dîa ba saura sa, bara naha daukaia dukiara tnatka kum ba sika yu bani Baibil aisi kaikaia. Gâd lâka nani ba stadi munisa taim, hilp wan munbia wan tânka briaia witin nahki luki ba. Rait sa, yawan stadika luan ra laki kaikan ba baku, Gâd lâka nani kum kum ba klir pali sa bara diara kum baman dukiara aisisa. Baha mita, yawan smalkanka nani ba pliki sakaia sa. Baku tnatka ra, yawan param pali wan tânka briaia sip sa Jehova dîa luki ba bara nahki ai dara wali ba (Ais. 55:9).

⁸ Wan rayaka ba upla iwras tasbaya kum bâk impakaia baku sa, bahara yabal ba sain nani âpu sa. Ban kra yu lapta bara slilma nani kaiki, wan dara walaia sip sa yawan ani bâk waia sa. Kuna, map kum brisa kaka naha ba kau isi kabia, kan wan marikbia ani bâk yawan wapaia sa. Kristian nani ba want sa Jehova yamnika briaia yabalka bâk impakaia. Bara naha dukiara wan mapka ba sika Baibil sa. Baibil smalkanka nani ba wan marikisa ani bâk yawan wapaia sa. Bara naha nani nina blikisa kaka, wan impakanka ba yamni kabia.

9. Roman 9:1 ra wi ba baku, ¿wan kupia dara walanka ra lan daukaia dukiara yawan ani hilpka wala sin brisa?

⁹ Gâd spiritka holikira bâk yawan sip sa wan kupia dara walanka ra pain lan daukaia (Roman 9:1 ba aisi kaiks). Naha ba hilp wan munisa wan tânka briaia Jehova diara kum kum dukiara dîa luki ba. Baku sin, wan kupia bukisa bara karnika wankisa diara nani sut Jehova kupia lâka kat daukaia dukiara (Pil. 2:13). Kuna, ¿yawan dîa daukaia sa spirit holikira ba hilp wan munbia dukiara?

10. ¿Yawan dîa daukaia sa spirit holikira ba hilp wan munbia dukiara? (Luk 11:10, 13).

¹⁰ Jehova ra ai spiritka holikira wankbia makabaia sa (Luk 11:10, 13 ba aisi kaiks). Yawan kasak lukaia sip sa witin wilinkira baha ba wankbia (Jn. 3:34). Gâd ba ai tapahkanka briaia wilin nani ra ai kupia aiska ni ai spiritka holikira yabisa (S.L. 1:23; Je. 1:5). Kuna, ¿wan kupia dara walanka ra lan daukaia dukiara dîa wala sin yawan nit sa?

11. a) ¿Dîa ba wan rayaka ra pas tâura mangkaia sa? b) ¿Dîa muni yawan aman laki kaikaia sa wan kupia dara walanka ba pain wark takisa sapa?

¹¹ Jehova yamni wan kaikbia dukiara yawan karna trai munaia sa (S.L. 8:34, 35). Naha ba wan rayaka ra pas tâura mangkaia sa. Dîa trabilka bri kabia kra sin Jehova yamni wan kaikbia dukiara karna trai munisa kaka wan kupia dara walanka ra lan daukbia. Jehova luki ba baku lukaia bara witin nahki ai dara wali ba ra wan sinska mangkisa kaka yawan wiaia sip sa wan kupia dara walanka ba pain lan daukan sa. Naiwa piua ra wan rayaka ba kau karna sa ba mita, tânka tara pali brisa wan kupia dara walanka ra pain lan dauki bri kaia. Yawan piu bani wahbi sakanka nani daukaia nit sa, bara aima kum kum ra baha dukiara Baibil ra smalkanka kum âpu sa. Ban kra yawan wahbi sakaia nit sa dîa wal lilia takbia, dîa sât warkka bribia, dîa skulka dimbia, apia kaka dîa sât pânika nani wal taukbia. Baku sa kaka, ¿yawan dîa daukaia sip sa baha sât tânka nani dukiara wahbi sakanka nani dauki ba Gâd yamni kaikbia dukiara? (2 Ko. 1:12).

12. ¿Wan kupia dara walanka ba pain wark takisa sapa nu takaia dukiara dîa ba hilp wan munbia? (Epesus 5:10).

¹² Gâd Bîla ra dîa aisi kaiki ba tihu luki kaikaia sa (Law. 49:3). Baibil aisi kaikisa piua ra, yawan smalkanka nani ba pliki sakaia sa, kan baha nani ba hilp wan munbia wan tânka briaia Jehova dîa luki ba (Epesus 5:10 ba aisi kaiks). Baku tnatka ra, wan rayaka ra trabil tara nani bri kabia piua ra, baha smalkanka nani ba hilp wan munbia kaikaia wan kupia dara walanka ba wahbi sakanka pain nani briaia dukiara hilp wan munisa sapa (S.L. 2:4-9, 11-13). Bara nit sa kaka, wan lukanka nani ba wapni ra mangkbia (Hib. 5:14).

13. ¿Wahbi sakanka kum daukras kainara yawan dîa daukaia sa?

¹³ Pas pali Baibil smalkanka ba plikaia sa bara ningkara wahbi sakanka ba daukaia. 607 mânka ra yawan piua ninara Jerusalem tawanka sauhki tikan ningkara, Juda tasbaya ra takaskan Israel uplika nani daukanka marikan ba nina blikaia apia sa. Witin nani ba Jirimaya ra win: “Dawan Gâdkam [Jehova] ra puram suns yang nani nahki dauki waia yabalka ba mairikbia” (Jir. 42:3-6). Kuna raitka ba witin nani ba ai kupia ra dîa daukai kan ba pat wahbi saki bri kan. Baha mita, Jehova tapahkanka wali banhwan taim, bîla walaia want apia kan. Witin nani ba ai lukanka kat tniwi kan bara baha mita, diara sut saura takan (Jir. 42:19-22; 43:1, 2, 4). Baha tâka mita, witin nani baku kaia want apia sa, yawan diara kum daukras kainara want sa Baibil smalkanka nani bâk Jehova lukanka ba plikaia, bara ningkara witin yamni kaiki wahbi sakanka nani ba daukaia.

14. ¿Dîa muni Baibil smalkanka nani ra luki wahbi sakanka nani daukaia sa?

¹⁴ Baibil smalkanka nani ra luki wahbi sakanka nani daukaia sa (Mt. 7:24-29; Je. 1:23-25). Baku daukisa piua ra, yawan marikisa spirit holikira tapahkanka ba nina blikisa bara dîa dauki ba Gâd kupia lâka ba wal asla sa. Bara naha wina yamnika bribia, kan Jehova ai spiritka holikira ba ban wanki kabia (Ap.St. 5:32). Kuna, yawan Gâd spiritka holikira tapahkanka ba nina blikras sa kaka, “Gâd spiritka holikira ba sarka [paski kabia]” (Epe. 4:30; Ais. 63:10; Ap.St. 7:51). Bara Jehova baha danh wankbia apia (Law. 51:11; 1 Tes. 5:19). Baku daukbia kaka, wan mapara saura pali kabia, kan yawan karnika nit ba spirit holikira wina balisa bamna (Epe. 3:16).

YAWAN NAHKI BAIBIL SMALKANKA NANI BA PLIKI SAKAIA SIP SA

15, 16. a) ¿Yawan nahki sip sa Baibil smalkanka yuskira nani pliki sakaia? b) ¿Sigarit swiaia dukiara Baibil stadi tatakra kum ra ani Baibil smalkanka nani ba hilp munaia sip sa ki?

¹⁵ Stadi takaia dukiara hilpka nani yus munaia sa. Baibil smalkanka nani ba wan rayaka ra alki daukaia dukiara, pas pali yawan Gâd Bîla ra pliki sakaia sa. Nahara luki kaiks, Baibil stadi tatakra kum mapara sigarit swiaia ba karna munisa. Ban kra witin naku lukbia kaia sa: “Baibil ba sigarit diaia dukiara diara aisaras sa. Baku sa kaka, ¿dîa muni Jehova witniska nani mapara baha daukaia ba saura sa?” ¿Yawan nahki witin ra hilp munaia sip sa Baibil smalkanka nani ba pliki saki ai lukanka ba wapni ra mangkbia dukiara? Yawan hilpka yuskira kum brisa. Naha sika Guía de estudio para los testigos de Jehová. Bahara “Tabaco” lalka bîla ra “¿Qué piensa Dios del tabaco?” ulbanka ba witin ra marikaia sip sa (La Atalaya junio kati yua 1, 2014 ba kaiks). ¿Naha ulbanka aisi kaikbia piua ra, ani Baibil tikska bara smalkanka nani ba sakaia sip kabia?

¹⁶ Kaisa naha ulbanka ra smalkanka 5 aisi ba dukiara laki kaikaia. 1) Yawan want apia sa prura ra wan brihwi dukia kum wina albika kaia (Ro. 6:16). 2) Wan wîna tara sauhki dukia nani ba wina laihura kaia sa (2 Ko. 7:1). 3) Jehova brinka sa yawan wan kupia aiska ni ai dukia daukbia (Mt. 22:37). 4) Wan daukanka nani wal yawan upla wala nani ra saura munaia apia sa (Mt. 22:39; 1 Ko. 10:24). 5) Yawan diara kasak ba daukbia dukiara Jehova karnika wankbia (Pil. 4:13). Baibil ra sigarit diaia ba dukiara aisaras sa, ban sakuna ai smalkanka nani ba stadi tatakra ra hilp munaia sip sa Jehova dîa luki ba ai tânka bribia dukiara.

17. ¿Ai maritka liliaka ridi daukaia dukiara Jehova witniska wâl ba nahki sip sa Baibil smalkanka nani ba pliki sakaia?

¹⁷ ¿Jehova witniska wâl ra dîa hilp munbia ai maritka liliaka ridi daukisa piua ra wahbi sakanka pain nani briaia dukiara? Naha piua ra sin, Guía de estudio hilpka yuskira kum kabia. Bahara “Bodas y recepciones” lalka bilara naha tânka dukiara aisi ulbi sakanka ailal bâra sa, bara kumi bani ba Baibil smalkanka nani brisa. Kaisa laki kaikaia nahki marit takaia luki nani ba naha smalkanka 6 nani ra ai sinska mangkaia sa: 1) Ai maritka liliaka dukiara dîa dauki ba sut Jehova ra kulkanka yabaia sa (1 Ko. 10:31, 32). 2) Ai kwalka dimra ba tânkira lâka bara rispik lâka marikaia sa. Baku sin, kristian apia nani kwalka dimra lâka ba nina blikaia apia sa (1 Ti. 2:9; 1 Pi. 3:3, 4). 3) Liliaka nani daukaia dukiara Sitan tasbaya uplika nani lukanka ba wina laihura kaia sa (Jn. 17:14; Je. 1:27; 1 Jn. 2:15, 16). 4) Dîa dauki ba sut asla lâka ra daukaia sa (1 Ko. 14:40). 5) Liliaka ba tânkira lâka wal daukaia sa bara upla nani bla takbia lukanka wal lika apia (Gal. 5:21). 6) Upla kum ra wahbi sakaia sa liliaka ba pura kaiki kabia dukiara (Jn. 2:8, 9).

18, 19. a) ¿Yawan ani hilpka wala sin brisa? b) ¿Naha bukka ra liliaka nani dukiara aisi pîska ra ani Baibil smalkanka nani pliki sakaia sip sa? (“¿Baibil wina smalkanka nani sakaia sip sa ki?” bakska ba sin kaiks).

¹⁸ Muihni lakri manis mapara hilpka yuskira wala kum bâra sa. Naha sika Textos bíblicos para la vida cristiana. Naha bukka ba tânka sât sât dukiara Baibil tikska nani brisa. Lal aisanka kumi bani bilara smalkanka pliki sakaia dukiara makabi walanka bara Baibil tikska nani bâra sa. Tânka kum baku, ban kra kristian kum lukisa liliaka kum ra waia sip sa sapa. Witin ba sip sa “Celebraciones” lal aisanka bilara dimi, “Celebraciones que no son apropiadas para un cristiano” pîska ra dimi kaikaia.

¹⁹ Baha pîska bilara naha lalka ba kaikbia: “¿Por qué está mal participar en celebraciones que están relacionadas con la religión falsa? (1Ko 10:21; 2Ko 6:14-18; Epe 5:10, 11)”. Baku sin naha tânka wal asla, liliaka kum kum kaikbia. Bara “Celebraciones patrióticas” pîska bilara Baibil tikska yuskira wala nani sin kaikaia sip kabia. Naha smalkanka nani ba witin ra hilp munbia wahbi sakaia ai kuntrika dukiara apia kaka pulitik bisniska wal asla liliaka nani ra waia sip sa sapa. War aiklabanka nani ra kulki asla paswanka nani ra dimaia sip sa sapa, apia kaka rilidian bara kulkanka tara bri uplika nani dukiara tauki rilidianka nani ra tâ baikaia sip sa sapa. Jehova asla takanka ra yawan tingki lukisa, kan wan kupia dara walanka ra lan daukaia dukiara hilpka yuskira nani wankan sa.

YAWAN MARIKAIA SA KUPIA DARA WALANKA PAIN KUM BRI BA

20. ¿Yawan wan kupia dara walanka ra pain lan daukan ba nahki marikaia sip sa?

²⁰ Yawan pain nu sa diara nani silp wahbi sakaia prika lâka ba diara manakira kum sa. Kuna sim piua ra wan tânka brisa, naha prika lâka pain yus munaia dukiara wan kupia dara walanka ra lan daukaia sa. Wan kupia dara walanka ra pain lan daukisa kaka, hilp wan munbia wahbi sakanka pain nani briaia. Naha nani ba Jehova ra kulkanka yabia bara ai kupia lâka wal asla kabia. Baku daukaia dukiara, yawan Jehova spiritka holikira hilpka ba nit sa. Baha mita, ai spiritka wankbia ban makabi kaia sa bara witin wan tapahkbia swiaia sa. Bara Baibil smalkanka nani ba sin wan kupia dara walanka ra lan daukaia hilp wan munisa. Yawan naha prisantka nani ba pain yus munaia sa bara baku, yawan kaikaia sip kabia nahki Gâd Bîla ba wan rayaka ra wark takisa (2 Ti. 3:16, 17; Hib. 4:12).