Wahma kapri piua wina Jehova ai smalki aula sa

Wel, sturki na tâura wina aisaia tâ krikamna. Yang na Canadá kuntrika ra, Calgary tawanka ra aisubi takri, sekan war aiklabanka tara piua ra. 75 mani luan baku ra, tâura smasmalkra baku wark taki kan wahmika kum nina Donald Fraser ba smalkaia dukiara waitla ra balan bara yaptika ba Baibil stadika kum briaia wilin takan. Witin ba kasak tânka ra latwan kaikan, sakuna siknis ailal bri kan ba mita asla aidrubanka sut ra waia sip apia kan. Ban sakuna, 1950 mânka ra tahbi daukan lâka ba brin. Sari sa kuna mani wâl sin luras kan ba ra, witin ba pruan. Baha piua ra, aisiki ba kau Jehova witnis apia kan, sakuna yaptiki dukiara muihni kum aisanka kum yabia swin.

Yaptiki pruan yu kum kum luan ningkara, bâk sakan kristian kum nina Alice ba asla aidrubanka ra waia ai paiwan. Witin pat ai kakaira kan, kan yaptiki pain ai dara wali kan piua ra aikuki asla aidrubi kapri. Aisiki ra makabi walri yang waia sip sna sapa. Witin âu ai win bara “baha piua ra baman” yang wal waia wilin takan, kan yaptiki dukiara aisanka yaban muihka ra tingki wiaia want kan. Baha tihmika ra, asla aidrubanka ba pranakira kan. ¡Kan pas trip aisiki ba asla aidruban! Witin ba upla sut mawanra aisaia lankira kaia dukiara skul kum brin. Baha mita asla aidrubanka ra dîa smalki kan ba kaiki witin tâ iwan. Baha piua wina asla aidrubanka sut ra waia tâ krikan.

Baha piua ra, wik bilara asla aidrubanka tâ bri kan muihnika ba aisanka yabaia wilin takan uplika nani nina mâki wini kan, bara ningkara kumi bani ba “nâra sni” ansa muni kan. Tihmia kum ra, baha muihnika ra makabri baha aidrubanka dukiara yang nini ba sin mâki winbia. Witin ba latwan lâka wal kupi buki bîla painkira nani aikan, kuna dîa daukaia kapri ba tâinka brisna sapa maikabi walras kan.

Yang want kapri nini ba mâki winbia, kuna ¡tâinka briras kapri baha piua wina nanara aisanka nani yabaia kapri ba! Bara wikka wala ra nini mâki ai winan bara yang karna wîri: “¡Nâra sni!”. Bara asla aidrubanka ba danh takan ningkara muihni lakri nani sut ba balan bara kupi buki bîla painkira nani aikan. Bara wik kum kum luan ningkara, wauhkataya kum aikan. Bahara aisanka kum yabamna wi kan, tâura aisari baku.

¡Sibrin ai daukan! Baha piua ra, ai nina ulbi mangki kan nani ra Baibil aisi kaikanka ba daukaia makabras kan. Kau ni bîla kaiki kan 6 minit apia kaka 8 minit aisanka kum yabia. Aisiki ba aisanka ba ridi daukaia dukiara hilp ai munan bara aima 20 baku praptis munamna ai daukan. Aisanka ba yabri ningkara, kupia kraukanka painkira nani aikan. Mani lui kan ba wal, Jehova, aisiki, muihni lakri lankira nani, bara ai asla takanka bâk lan ai daukan.

KAU LAN TAKISNA

Tâura Alice dukiara aisari. Smalkaia tâ krikri taim, witin ba hilp ai munan. Baha piua ra, wan kupia buki kan upla nani ra Baibil tikska yumhpa aisi kaiki yabaia bara ningkara ai mihta ra buk kum kahbaia. Yang aisamna piua ba aimaki kan taim, witin ba ai nina ba uplika ra wi kan, witin aisaia tâ kriki kan, bara pas Baibil tikska ba aisi kaikamna ai wi kan. Baha ningkara, yang uplika wal aisaia tâ kriki kapri, las tikska wâl ba aisi kaiki yabi kapri, bara ulbi sakanka ba mihta ra kahbi kapri. Piu luan ba wal, yang upla nani wal aisanka nani tâ krikaia lan takri. 1954 mânka ra aisiki ba tahbi daukan lâka brin bara baha piua wina, witin smalkaia warkka ba nahki daukamna lan ai daukan. Witin ba yakan kan, ban sakuna kasak tânka ra smalki pakaia dukiara karna trai munan. Witin mapara asla aidrubanka nani bara smalkaia warkka ba tânka tara bri kan. Baha mita, wik bilara yawan asla aidrubaia kan bara satadi an sandi smalkaia warkka ra takaia kan ba pat nu kapri.

Skul watla ra stadi tatakra lankira kum apia kapri, kuna 12 mani skul dimri ba rayaki aiska dukiara hilp ai munan. Tânka kum baku, numba tara nani kulkaia bara Inglis bîla pain ulbaia lan takri. Baku sin, buk nani ulbaia lan takri. Baha nani sut ba hilp ai munan naiwa Ulbi Sakanka Paskaia Pura Kaiki Daknika ra tâ baikaia warkka daukaia dukiara.

Upla nani ba maikabi wali kan yang dîa muni lawana walaia bara aiwanaia laik sna sapa. Aisiki nani ba lawana aiwanaia laik kan. Yang 7 mani bri kapri piua ra, piano kangbaia klaska nani ba briri, kuna smasmalkriki ba luki kan baha sât dukia nani kangbaia ba uba karna ai muni kan. Baha mita, witin aisiki ra win klaska nani ba swimna. Bara ai raitka bri kan, kan baha piua ra piano kangbaia dukiara yang uba sinski mangkras kapri.

Kati kum kum luan ningkara, aisiki ba smasmalkra wala pliki sakan. Bara naha trip, piano kangbaia bara lawana aiwanaia lan takaia tâ krikri, bara baku tnatka ra lawana walaia bara aiwanaia laik takri. Tuktan kapri wina, bîla baikra painkira kum bri kapri. Baha mita, aiwawanra pulanka nani dauki kan piua ra, aima manis ra win taki kapri. Yang brinki kan skul tara dimi miusik kangbaia bara walaia smasmalkrika kum takaia, bara baku tnatka ra klas nani yabi tâura smasmalkra warkka ba daukaia. Ban sakuna, klaska nani dimi kapri piua ra yang daira walri baha nani stadi takaia dukiara, uba taimki tiki kan. Baha mita, skulka ba swiri bara tâura smasmalkra warkka daukaia tâ krikri. Baha ba 1963 mânka ra takan.

TÂURA SMASMALKRA KAIA BA LILIA LÂKA MAIKISA

Mani kum baku tâura smasmalkra warkka daukri ningkara, piu aiska smalki tataukra baku, Kapuskasing, Ontario tawanka ra ai blikan. Pâinika kum bri kapri ai nina ba Daniel Skinner, witin yang wal kau almuk kan. Witin ba ai smalkan kangrigisan kum ba nahki wark takisa. 20 mani baman bri kapri, kuna kangrigisan bilara Smalkaia Warkka Pura Kaiki Daknika tilara kapri. Baha mita, diara ailal lan takaia kapri. Lilia pali sna kaikaia nahki Gâd asla takanka bilara kristian wahma nani ra lan daukaia warkka ra kli kulkanka tara yabisa. Witin nani karna wark taki banhwisa kaka, Jehova mapara wahma pali kabia kra sin yuskira kaia sip sa.

Kapuskasing ra iwaia ba isi apia kan. Kauhla piua iwi kan taim, kasak pali kauhla kan. Pâinika Dan bara yang ba plis sut ra wan mina ni wapi waia kan. Baha pliska ra tâ baikaia liliaka nani briri tila wina kum ba sika kristian mairin kum nina Linda Cole ra kakaira takaia ba. Witin ba ningkara naku ai nina mâkan, Linda Splane.

Linda ba smalkaia laik kan, bara kli wih kaikanka painkira nani bri kan. Witin ba kupia pihni kan, latwankira kan, bara upla nani wal aisaia witin mapara isi kan. Ai yaptika nina ba Goldie, witin ba kristian mairin kasakkira kum kan. Ai aisika nina ba Allen, witin ba tâura Jehova witniska nani mapara bui kan. Allen ba ai maya mairin mapara bui kan, sakuna Goldie ba ai luhpia mairin Linda bara ai luhpia waitna John bara Gordon ra asla aidrubanka watla ra brih wi kan, bara nahki upla nani ra smalkaia ba sin lan dauki kan. Witin nani walhwal ba tâura smasmalkra warkka ba daukan. Mani kum kum luan ningkara, Allen ba tahbi daukan lâka brin bara kangrigisan bilara karna wark taki kan.

1965 mânka ra, Kangrigisan Almukka bara Hilp Mamunra Nani Skulka ra ai paiwan. Naha skulka ba kati kum bilkara dauki kan bara Canadá Betel apiska ra daukan. Baha skulka ra, Galaad skulka ra waia dukiara wauhkataya ulbi dingkamna kupi bukan. Yang aima kumi ra sin lukras kapri baha daukaia, kan luki kapri misan warkka ba sip daukamna apia. Ban sakuna, wauhkataya ba ulbi dingkri. Bara Galaad klaska 42 ra ai paiwan. Smasmalkra nani ba skul ra yawan nahki auya sa sapa laki kaiki wauhtaya kum ulbi wanki kan. Pas wauhkataya aikan ba ra kupi buki kan naha skulka piua ba pain yus munamna Gâd asla takanka nahki wark taki ba dukiara kau lan takaia. ¡21 mani bri wahmika kum mapara naha kupia kraukanka ba yamnikira kan!

Galaad klaska kum ra radiu bara tilivisan ra wark taki uplika nani wal nahki aisaia ba dukiara lan ai daukan. Laik pali kaikri. Lukras kapri naika piua ra dîa lan takri ba yuskira pali kabia. Kau naika ra baha tânka dukiara aisamna.

SENEGAL KUNTRIKA RA AI BLIKISA

Galaad skulka wina takri yu kum kum ningkara, Michael Höhle bara yang Senegal kuntrika ra impaki banhri. Naha ba Africa tasbaya ra sa bara baha ra misan uplika nani baku wan blikan. Baha piua ra, smalki tataukra 100 nani baku baman kan.

Baha pliska ra kati kum kum luan ningkara, ai paiwan Betel apiska ra wik bilara yua kum wih tâ baikaia. Naha ba misan watla bilara rum kum kan. Apiska ba sirpi kan, kuna baha pliska pura kaiki muihka Emmanuel Paterakis ba, ban kupi krauki kan naha kuntrika ra baha apiska ba Jehova asla takanka bâra sa tânka mariki kan. Aima kum ra, muihni Paterakis ba wahbi sakan misan uplika nani ra kupia bukaia dukiara wauhtaya nani ulbi blikaia. Baha piua ra, naha warkka daukaia ba isi bara sipar apia kan, wauhtaika kumi bani ba ulbaia masinka kum ra daukaia kan. Naha ba wark tara kan, kau pali yawan aman daukaia nit kan ba mita, kan ulbanka ra mistik kumi sin daukaia sip apia kan.

Baha sim yua ra, saiwan ra yang misan watla ra kli tawaia ridi taki kapri piua ra, muihni Paterakis ba wauhkataya kum aikan bara ai win: “David, naha ba asla takanka wina balan”. Yang laki kaikri ningkara, wauhkataya nani tilara yang ulbri wauhkataya kum bâra kan. Naha ba ai smalkan Gâd asla takanka bilara Betel apiska nani ba sirpi apia kaka tara kabia kra sin, yang rispik munaia sna.

Kangrigisan bilara pâna ailal sakri, bara satadi tihmia ra aikuki taim lui banhwi kapri. Baha piua nani ba painkira kan, bara naiwa kat witin nani wal ban aisisna. Bara Senegal kuntrika ra francés bîla aisi kapri ba mita, naha ba hilp ai munan tasba aiska Betel apiska nani ra naha sim bîla aisi uplika nani ra wih kaikisna piua ra.

1968 mânka ra, Linda bara yang marit takaia pramis taki banhri. Kati ailal bilkara wark sirpi kum sakaia trai munri, kan baku tnatka ra yang nani Senegal kuntrika ra tâura smasmalkra warkka daukaia sip kamna. Kuna kuntri ba bîla kaiki kan kampani nani ba tringsar nani ra wark yabaia watlika ra tawan uplika nani ra yabaia. Yang nani marit takri, bara kli Canadá kuntrika ra impaki banhri. Bahara piu aiska smalki tataukra baku, Nuevo Brunswick tasbaya pîska ra Edmundston tawanka ra wan blikan, naha ba Quebec tasbaya ba wal baila kan.

NUEVO BRUNSWICK BARA QUEBEC RA TÂURA SMASMALKRA WARKKA BA

Edmunston tawanka ra smalki tataukra kumi sin âpu kan, Baibil stadi tatakra nani wiria baman. Bara Katolik rilidianka ba tnatka sât sât ra upla rayaka tâ bri kan. Utla nani aihkika mawan ra naku ulban kan: “Jehova witniska nani balaia adar âpu sa”. Baha piua ra, baha sât ulbanka nani ra upla nani ba rispik munras kan, baha mita kum kaiki kan taim, uya wan sinska mangkras kan bara watla durka ra wih kingbi kan. Wik bani, Katolik asla takanka kum ba periódico bâk naku maisa paki kan: “Kaisa Jehova witniska nani ra pliki na wina kangbi sakaia”. Baha piua ra, Edmunston tawanka ra Jehova witniska walhwal baman bâra kan—Victor bara Velda Norberg, Linda bara yang. ¡Baha mita, pain nu banhwi kapri yang nani dukiara aisi kan ba!

Ban kupi krauki kamna pas trip impaki pura kakaira wih wan kaikan taim. Yang nani aikuki wik kum luan ningkara, naku wan win: “Man nani kau nâra sma piua ra, ban kra diara kumi baman daukaia sip kama, upla nani ra hilp munaia Jehova witniska nani dukiara dîa luki ba chens munbia dukiara”. Baha piua wina, witin dîa wan smalkan ba alki daukaia trai muni banhri. ¡Bara pain takan! Tawa tawa, upla nani ba param kaikan nahki Jehova witniska nani bawanka lâka ba wihki Katolik rilidianka tâ brabrira nani ba wal sât wala sa. Bara nanara, Edmunston tawanka ra kangrigisan sirpi kum bâra sa.

Baha pliska ra takaski mani kum baku luan ningkara, Quebec tawanka ra kangrigisan tara kum ra tâ baikaia wan paiwan. Kati 6 baku bilara muihni lakri nani kupia pihnika lâka wina yamnika bri banhri, bara ningkara impaki pura kakaira warkka daukaia ai blikan.

Quebec tasbaika ra mani 14 baku impaki pura kakaira warkka dauki banhri. ¡Piua painkira nani kan! Quebec ra smalkaia warkka ba pâwi auya kan. Aima ailal ra kaiki kan nahki kangrigisan kumi ra pamali aiska kum Baibil stadi taki kan bara spirit lainka ra pâwi kan.

MUIHNI LAKRI NANI WARKKA BA BAN KUPI KRAUKISNA

Canadá kuntrika ra, plis kum kum nani ra francés bîla aisisa. Baha pîska ra iwi muihni lakri nani ra latwan kaikaia ba isi sa. Witin nani kupia pain brisa bara liliakira banhwisa. Kuna aima aihkika ra, witin nani mapara kasak tânka ba ai rayaka ra alki briaia ba isi apia kan, bara pamali ba sin witin nani mapara karna pali bui kan. Aisa yapti nani kum kum ba ai luhpia nani ra naku wi kan: “Jehova witniska nani wal ban stadi takaia want sma kaka, utla wina taks”. Kuna, witin nani ba ai ninara tawras kan. ¡Yawan kasak lukaia sip Jehova witin nani ra yamni pali kaikisa!

Baku sin, ban kupi kraukisa nahki baha mânka nani ra Quebec tasbaya ra piu aiska smalki tataukra bara tâura smasmalkra daknika tara kum tâ baiki kan ba. Aihkika nani ba plis sât sât wina bali kan. Witin nani ba francés bîla aisanka baman lan takras kan, kan baha purkara upla iwanka tnatka bara nahki luki kan ba lan takaia kan, bara baha piua uplika nani rayaka ba Katolik rilidianka mita tâ bri kan.

Aima aihkika ra, piu aiska smalki tataukra nani ra plis laihura nani ra bliki kan, bara bahara smalki tataukra kumi sin âpu kan. Bahara iwi kan uplika nani ba Jehova witniska nani ra pain kaikras kan ba mita, iwaia dukiara utla kum sakaia bara wark sirpi kum briaia karna muni kan. Bara marit nani kat sin rent mana aibapaia sip kabia dukiara, upla 4, 6 apia kaka 8 nani aikuki sim watla ra iwaia kan. Witin nani ba Jehova dukiara karna wark taki banhwi kan. Baibil stadika kum tâ kriki kan piua ra, ai taimka bara ai sinska aiska mangki kan. Naiwa piua ra Quebec tasbaya ra smalki tataukra ailal bâra sa. Baha mita, tâura smasmalkra nani ba hilp nit sa pliska nani ra tâ baikaia dukiara impaki banhwisa.

Impaki pura kakaira warkka dauki kan piua ra, satadi titan bani ra wahma tiara nani aikuki smalki taki waia trai muni banhwi kapri. Bara witin nani ra makabi wali kan dîa sât trabilka nani mapara bapi buisa sapa. Naiwa piua ra baha nani tila wina kum kum ba kuntri wala ra tâ baikisa misan uplika nani baku apia kaka wark wala nani dauki.

Baha piua ra, kangrigisan nani ba impakanka nani mana wankaia sip apia kan, baha mita kati tnata aimaki kan taim, danh lalah âpu kapri. Baha piua nani ra, yawan nit kan wan kupia aiska ni Jehova ra kasak lukaia, kan witin baman nu kan yawan hilp nit kan ba. Witin aima kumi ra sin lulki wan swiras kan. Tnatka sât sât pliki, yawan kangrigisan wala nani ra wih kaikaia sip kan.

KRISTIAN WAITNA KASAKKIRA NANI WINA LAN TAKRI

Tâura aisi kapri baku, Galaad ra tilivisan bara radiu ra wark taki uplika nani wal nahki aisaia sna ba lan takaia ba wina yamnika sakri. Quebec ra, radiu, tilivisan bara periódico nani ra kasak tânka dukiara aisaia sanska ailal briri. Aima aihkika ra impaki pura kakaira kum nina Léonce Crépeault wal wark takaia ai bliki kan. Witin ba baha uplika nani wal aisaia lankira kan. Witin baha kampanika nani tila wina uplika kum wal aisi kan piua ra, marikras kan witin lankira pali kan ba. Kau ni, uplika ra naku aisi kan: “Tâ upla, pâinika bara yang ba man nani daukisma warkka ba dukiara uya nu âpu sna. Kuna wan blikan sa upla nani ra maisa pakaia Jehova witniska nani ba asla takanka tara kum daukbia. Baha mita, naha maisa pakaia man hilp wan munma kaka, lilia pali wan dara walbia”. Yawan daukanka pain nani marikras kan kata witin hilp wan munaia apia kan, kuna bawan lâka mariki kan ba mita, upla nani ba hilp wan munaia wilin kan.

Galaad skulka ra dîa ai smalkan ba bara muihni Léonce daukanka wina dîa lan takri ba naika ra hilp pali ai munan. Betel apiska ba wan layarka kum wal wark takaia ai blikan, muihni Glen How wal. Yang nani ba asla takanka dukiara lâ trabilka tara nani wal wark taki kan, naha nani ba sip kan noticias uplika nani ailal bri balaia. Witin ba kupia karna lâka ni lâ watla ra Gâd asla takanka tâwan aisi kan. Kuna baha sut purkara witin Jehova ra latwan kaiki kan waitnika kum kan. Witin wal wark takaia ba yang maipara kulkanka tara kum kan.

1985 mânka ra, Canadá kuntrika ra muna tani ra impaki pura kakaira baku ai blikan, kan aisiki ba baha tani ra iwi kan bara yang nani baku witin ra main kaikaia sip kan. Sari sa kuna kati yumhpa luan ningkara, witin pruan. 1989 mânka ba kat baha pliska ra impaki pura kakaira warkka dauki banhri, bara ban wina Stech kuntrika Betel apiska ra wark takaia wan paiwan. Baha warkka briaia ba tânka kan 19 mani bilkara impaki pura kakaira warkka dauki aula kan ba swiaia. Baha piua nani ra, utla ailal nani ra takaski banhri bara muihni lakri latwankira ailal wina plun auhni piaia. ¡Witin nani kupia pihni lâka wan mariki banhwan ba mita, tingki pali luki banhwisna!

STECH KUNTRIKA RA IMPAKI BANHRI

Brooklyn ra wih banhri taim, Smalkaia Warkka Pura Kaiki Daknika ra wark takaia ai blikan. Baha piua ra dîa lan takri ba dukiara ban tingki luki kamna. Bahara lan takri yang lukaia apia sna diara sut nu sna, kau ni diara sut pain aman laki kaikaia sna. 1998 mânka ra, Âiulbra Nani Daknika ra wark takaia ai blikan, bara baha warkka kau lan takisna. Mani ailal bilara, yang sip kapri muihni John Barr ra hilp munaia, witin ba Âiulbra Nani Daknika pura kakaira kan. Witin dîa ai smalkan ba bara aikuki yawan taim luan ba, ban kupi krauki kraukamna. Naha muihka ba daukanka painkira nani bri kan.

Âiulbra Nani Daknika ra muihni lakri bawikira nani aikuki wark takaia ba yang maipara kulkanka tara brisa. Witin nani Jehova ra ban makabisa ai warkka daukaia hilpka lâka yabia bara pain nu sa witin nani dîa lan ba mita, diara nani daukras sa. Kau ni, diara sut daukisa spirit holikira hilpka ra tingki.

Mayi Linda bara yang maipara wan muihni lakri kasakkira nani ra wih kaikaia dukiara kuntri 110 nani ra impakaia ba kulkanka tara brisa. Yang nani kaikri sa misan nani, Apis Tara Pura Kaiki Daknika kristianka nani, bara piu aiska Gâd warkka dauki muihni lakri nani latwanka lâka ba. Baku sin, lilia wan dara walan kaikaia nahki smalki tataukra nani ba lilia lâka ni King Lâka ba ai rayaka ra pas tâura mangkisa, bara war aiklabanka trabil nani, lalah trabilka nani, nina bliki rau munan lâka bâra kabia kra sin, kasak banhwisa. ¡Kasak luki banhwisna Jehova witin nani ra latwan pali kaikisa!

Naha mânka nani sut ra, warkki ba daukaia sip kapri kan Linda hilpka brisna ba mita. Witin mapara upla nani wal aisaia isi sa. Upla nani ra latwan kaikisa bara hilp munaia dukiara tnatka nani ban pliki sa. Baku sin, ban wina upla nani wal aisanka nani tâ krikaia lan sa. Witin ba upla ailal ra hilp munan sa Jehova ra kakaira takbia dukiara, bara muihni lakri manis spirit lainka ra kauhla kan nani ra kli kangrigisan ra tawaia hilp munan. ¡Param sa Jehova prisant painkira kum aikan sa! Nanara yang nani pat almuk banhwisna bara wan impakanka nani ra bara tnatka sât sât nani ra nahki muihni lakri nani hilpka lâka wankan ba dukiara, wan kupia aiska ni tingki lukisa (Mk. 10:29, 30).

Pat mani 80 bilara dîa luri ba luki kaikisna taim, lilia pali daira walisna. Yang sin lawana âiulbra baku naha bîla nani aisisna: “Dawanki, wahma katna ba wina ai smalkram, bara ban kau aisisni, man warkkam tara daukram ba” (Law. 71:17). Bara naha bîla nani ba yang raya kamna piua ra ban alki daukaia brinki sa.