¿Jehova witniska nani ba upla ra taibi munisa ai rilidianka chens munbia dukiara?
Apia, upla ra taibi munras sa. Wan ulbi sakanka kau tara ra, La Atalaya wauhkataya, naku ulban sa: “Ai rilidianka chens munbia dukiara upla ra taibi munaia ba saura pali sa”.a Yang nani piu kumi ra sin upla ra taibi muni banhras sna, kan:
Jisas upla ra taibi munras kan ai smalkanka nani walbia dukiara. Witin nu kan upla wiria baman ai nina blîkbia (Matiu 7:13, 14). Aima kum ai disaipilka kum kum Jisas smalkanka ba laik apia kaikan, taibi munaia watlika ra Jisas swin witin nani taki wabia (Jan 6:60-62, 66-68).
Jisas ai disaipilka nani ra smalkan, upla nani ra taibi muni ai lukanka chens munaia apia. Baku daukaia watlika ra, walaia brin dauki nani ra plikbia win (Matiu 10:7, 11-14).
Upla kum ra taibi muni ai rilidianka chens munaia ba yus kumi sin âpu sa. Gâd want sa upla nani ba witin ra mayunbia silp ai kupia lâka wina, taiban lâka ra lika apia (Kli Smalkanka 6:4, 5; Matiu 22:37, 38).
¿Jehova witniska nani ba disaipil daukaia baman pliki taukisa ki?
Yang nani Baibil tânka upla ra smalki banhwisna tasba aiska ra, bara baha daukisa upla sut mawanra bara utla bani ra sin, Baibil dîa wi ba kat (Apastil Nani Sturka 1:8; 10:42; 20:20). Pas kristianka nani dauki kan ba baku, sakuna aima kum kum ra upla nani ba wan nina sauhkisa bara aisisa, yang nani ba rilidianki bapaia baman pliki tauki banhwisna (Apastil Nani Sturka 18:12, 13). Sakuna, baha ba rait apia sa. Upla bani dîa kasak luki ba, yang nani rispik muni banhwisna. Yang nani diara kumi baman brin wan dauki ba lika, upla nani ba Baibil dîa aisi ba kakaira taki banhbia. Bara baku, ani rilidianka nina blikaia ba silp wahbi sâkbia.
Upla wala nani ra yang nani dîa kasak lukisna ba, nina blîkbia taibi munras. Rilidian nina bâk upla lukanka nani pulitik wal abalki sin taukras sna. Jehova witniska takbia dukiara yang nani upla ra lalah apia kaka diara wala sin yabi taukras. Upla ailal kristian sa wisa kuna, Jisas dîa daukaia adar win ba lika daukaia want apia banhwi ba, yang nani baku kaia want apia.b
¿Upla ba ai rilidianka chens munaia sip sa?
Prapit Ebraham ba ai aisika nani rilidianka bri kata ba swin.
Baibil ba wisa âu, sip sa. Kan Baibil ra upla ailal bâra sa, witin nani Gâd kasakkira ra mayunaia wilin taki banhwan ba mita, ai almukka nani rilidianka ba swin. Ebraham, Rut, Atenas uplika nani tila wina kum kum, bara baku sin apastil Pal ba baku dauki banhwan (Jasua 24:2; Rut 1:14-16; Apastil Nani Sturka 17:22, 30-34; Galesha 1:14, 23). Baha baman apia, Baibil ba sin alki takaskras ya mayunra rait aihwa, Gâd mita yamni kaiki ba, lulki swiaia want sa kaka (1 Jan 2:19).
Tasba aiska ra upla nani raitka dukiara ulbi sakanka daukan ba wan rilidianka chens munaia raitka bri ba dukiara, naku win: “Yawan sut pri lâka kum brisa wan rilidianka apia kaka diaura kasak luki ba chens munaia. Baku sin ulbi mangkan sa upla sut ai raitka brisa diara tânka pliki turbi kaikaia, upla wala lukanka alki briaia bara yawan dîa luki ba sin upla wala ra aisaia”.c Baku pali sa, baha tilara dimisa rilidian smalkanka nani sin. Naha raitka yawan sut bri ba tânka sika, upla wala nani dîa kasak luki ba aisaia sip sa bara yawan rispik munaia sa, bara yang nani smalkanki ba sin kasak lukaia apia ai raitka brisa.
¿Upla kum ai rilidianka chens munisa kaka ai pamalika ra rispik munras sa marikisa ki?
Apia. Baibil ba wan wisa upla sut ra rispik munaia, dîa sât rilidianka tilara kabia kra sin (1 Pita 2:17). Baha baman apia, Baibil adarka yang nani bîla wali dauki banhwisna, bara wan aisa yapti nani ba rispik muni banhwisna rilidian wala bri kabia sin (Epesus 6:2, 3).
Ban sakuna, upla sut pain kaikras Baibil dîa aisi ba. Tânka kum baku, Zambia kuntrika ra mairin kum ai sturka aisisa: “Yang tawanki uplika nani mapara, rilidian chens munisa kaka [...] wan pamalika bara wan tawanka ra lulki swiaia tânka sa.” Baku kan sakuna, witin kau tiara lupia kan taim, Jehova witniska nani wal Baibil stadi takaia tâ krikan bara ai rilidianka chens munaia wahbi sakan. “Papiki bara mamiki laik apia takan, bara witin nani sarka paskri ai win. Baha lika yang maipara uba karna kan, kan witin nani yang ra pain ai kaiki kabia ba yang maipara uba tânka tara kan. [...] Sakuna Jehova ra kasak kaia kau tara kulkaia sa wan almukka nani lâka ba wal, baha tânka apia sa wan pamalika lulki swibia.”d
a 2002 manka, enero kati 1 yua La Atalaya wauhkataya, wahia 12 baiki sakanka 15 ba laki kaiks.
b Tânka kum baku, 785 manka ra (yawan piua ninara) king Carlomagno mita lâ kum bapi mangkan: ani uplika kristian takaia want apia kan nani ra ikaia kan. Tânka wala bâra sa, 1555 manka ra Sacro Imperio Romano tasbaya ra, war aiklabi kan piua ra kupia kumi lâka brih balaia dukiara lâ kum bapi mangkan ba ra win, wihta tara nani ba wahbi sakaia kan katolik takaia apia kaka luterano takaia, bara wihtka uplika nani sim rilidianka briaia kan. Upla kum apia wi kan kaka, baha tasbaya wina kangbi sakan kabia.
c Upla sut naha raitka nani brisa, naha lâka nani ra baku ulban sa: Carta Africana de Derechos Humanos y de los Pueblos, Declaración Americana de los Derechos y Deberes del Hombre, Carta Árabe de Derechos Humanos de 2004, Declaración de Derechos Humanos de la Asociación de Naciones del Sudeste Asiático, Convenio Europeo de Derechos Humanos y Pacto Internacional de Derechos Civiles y Políticos. Ban sakuna kuntri kum kum ba naha lâka nani rispik munras sa apia kaka lâ wala nani brisa.
d Baibil ra takisa rait aihwa Gâdka nina ba sika Jehova.