¿Jehova witniska nani ba dîa muni krismis liliaka dauki banhras?
Upla nani aisi tauki ba bara kasakka nani ba
Upla nani aisi tauki ba: Jehova witniska nani ba krismis liliaka kulkras, kan Jisas ra luki banhras ba mita.
Kasakka ba: Yang nani ba kristian banhwisna bara kasak luki banhwisna Jisas Kraist bâk baman swaki sakan lâka briaia sip sa (Apastil Nani Sturka 4:12).
Upla nani aisi tauki ba: Krismis liliaka daukaia apia wisi smalki ba mita ai uplika nani bara pamali nani ra tar baiwan lâka dingkisa.
Kasakka ba: Yang nani maipara pamali aslika ba uba tânka tara brisa; baku bamna, Baibil wina smalkanka nani yabi kaia dukiara karna trai muni banhwisna.
Upla nani aisi tauki ba: Krismis piua ra liliaka upla sut bri ba, prisantka nani yui, pana pana aikuki asla kaia spiritka ba brih banhras sa.
Kasakka ba: Yang nani trai kaiki banhwisna kupia pihnikira bara kupia kumi lâka ra iwi kaia yu bani bara mani aiska ra sin (Sins Lâka 11:25; Roman 12:18). Sampla baku, wan asla aidrubanka nani ra yang nani lalah makabras, bara upla ra smalki banhwisna ba mana sin lalah makabras, kan yang nani Jisas adarka ba bîla wali dauki banhwisna “man nani prisant briram; bamna warkka daukma bara mana bripara” (Matiu 10:8). Baha baman apia, yang nani smalki banhwisna Gâd Kingka lâka baman kupia kumi lâka brih balbia ba, bîla kaiki banhwisna (Matiu 10:7).
¿Jehova witniska nani ba dîa muni krismis liliaka daukras?
Jisas adar yaban witin ai pruanka ba wan kupia kraukbia, ai aisubanka lika apia (Luk 22:19, 20).
Jisas apastilka bara pas kristianka nani sin krismis liliaka dauki banhras kan. Diccionario del cristianismo bukka ba naku win, naha liliaka yua ba Rom ra bapi mangkan 330 yawan piua manka ra, apastil nani sut prui tiwan wina 200 mani pura lui wan ningkara.
Plis kumi ra sin marikras Jisas ba diciembre kati yua 25 ra aisubi takan ba; Baibil ra param pali wiras Jisas aisubanka yua pali ba.
Yang nani tânka brisna krismis ba Gâd pain kaikras, kan daukanka bara tnatka saura nani dauki ba wal marikisa idan uplika nani tila wina bal takan sa (2 Korint 6:17).
¿Dîa muni Jehova witniska nani ba upla aihkika dauki baku dauki banhras sa?
Krismis dukiara Baibil ra diara kumi sin wiras ba tânka bri kabia sin bara idan nani wina bal takan kra, upla ailal liliaka ba daukisa ban pali wilinkira lika apia. Sâtka sut ra lukisa aitani apia sa upla aihkika mapara buaia.
Baibil ba wan kupia bukisa yawan sut wan sinska diara luki kaikaia lâka bri ba pain yus muni kabia, bara kumi bani silp wahbi saki diara dauki kabia (Roman 12:1, 2). Bara baku sin, kasak tânka ba tara kulki kabia (Jan 4:23, 24). Baha ba upla wala mita yawan dukiara dîa lukbia ba wan kupia lukras sa tânka apia, kuna Baibil lâka nani kriki upla aihkika mapara buaia tânka sin apia sa.
Wel kasak sa, yang nani krismis liliaka kulkaia apia wahbi sakri, kan upla bani silp dîa daukaia brin dauki ba wahbi sakisa. Bara pain wan dara walisa, upla kumi ra sin alki takaskras baha liliaka ba daukbia apia.